http://ascenteq.com/project/epdp

በይ-ኤርያ ኤርትራውያን ንዲሞክራስያዊ ልወጢ ነቲ ብሰንበት ሚያዝያ 3 2016 ኣብ ሕንብርቲ ከተማ ኣስመራ ዘጋጠመ ባርባራዊ ቅዝፈት መንእሰያትና ዝተሰማዓና መሪር ሐዘን እናገለጽና ንቤተሰብ ግዳያት ጽንዓት ይሃብ ንብል። በይ-ኤርያ ኤርትራውያን ንዲሞክራስያዊ ለውጢ ስቃይ እቲ ኣብ ማእከል ስርዓት ህግደፍ ኾይኑ ሐሳረ መከርኡ ዝሪኢ ዘሎ ህዝብና ንከብቅዕን ኩሉቲ ብስርዓት ህግደፍ ዝግበር ኣረሜናዊ ግፍዕታትን ካብ ምቅላዕን ምቁዋምን ሐንቲ ካሊእት’ውን ትኹን ዓዲ ውዒሉ ኣይፈልጥን። ስለዝኾነ ድማ  ነዚ ተረኺቡ ዘሎ ኣረሜናዊ ፍጻሜ ሐዘና ንምግላጽ ጥራሕ ዘይኾነስ ንህዝብና መጸዋዕታና እነቕርበሉ ሰዓት እውን’ዩ።

ኦ- ውጹዕ ህዝቢ ኤርትራ፡

እዚ ሎሚ ኣጋጢምካ ዘሎ ዘሕዝን ፍጻሜ መቀጸልታ ናይቶም ፍርቂ ኣካላቶም ኣብ በርካታት ኤርትራ ቀቢሮም ዝኣተዉ ሐርበኛታት ስንኩልላን ማይሓባር ዝተፍጸመ’ዩ። እዚ ፍጻሜ’ዚ መቀጸልታ ነቲ ንሱ ባዕሉ ብስዉር ዝወለዖ ወራር ዓደቦኦም ከይድፈር ጅግንነት ዝፍጸሙ ዋርሳይ ይከኣሎ ኣብ እስርቤት ዓዲ ኣቤቶ ብደ ርዘናት ዝፈጸሞ መቅዝፍቲ’ዩ ። ሎሚ ድማ ስጋብ ክንደይ ንጽንተትካ ተበጊሱ ምህላዉ የዓሪካ ክትፈልጦ መሬትካ’በር ንስካ ከምዘይ ተድልዮ ይነግረካ ምህላዉ ከተስተውዕል ይግባኣካ።እሞከደኣ ስቅታካ ክሳብ መኣስዩ። እዚ ሕሱም ኣረሜናዊ ስርዓት’ዚ ዳስ ሐዘን’በር ዳስ መርዓ ወይ ሓጎስ ክትተክል ዘይምነየልካ፡ ውሉዳትካ ካብ ቅድሚ ዓይንካ ሃጽ ኢሎም ክጠፍኡን ኣደዳ ባሕርን ሸየጥቲ ደቂ-ሰባትን ክኾኑ ንስካ ድማ መዓልታዊ ተቀባሊ መርድእ ኾንካ ክትነብር፡ ነቶም ኣብ ትሕቲኡ ዝትረፉ’ውን እንተኾነ ዕደመ ንእስነቶም ኣብ ዘይውዳእ ባርነት ቆሪኑ ጸልማት መጻኢ ሂወት ክሕልፉን ነዚ መሪርዎም እንተ ተቃወሙ ድማ ከምዚ ኣብ ቕድሚ ዓይንካ ዝረኣካዮ ብዘስካሕክሕ ኣረሜናዊ ግፍዒ ብጥይት ክቅለዉ ዝገብር ዘሎ ደመኛካ ሕሱር ስር ዓት ዓይንካ ከፊትካ ብትብዓት እትምክተሉ ሰዓት ሕጂዩ።

ውጽዕ ህዝቢ ኤርትራ፡ ስቅታካ ከምዚ እንተ-ቀጺሉ ስቓይካ ክቅጽል ጥራሕ ዘይኾነስ ህላዌካ ከም ህዝቢ ኣብ ምልክት ሕቶ ዘእቱውን’ዩ። ውሉዳትካ ሲኢካ ከይኣክል ነታ ብፍርቂ ከብድኻ እናሓድርካ ተዓምጺጽካ እትሓድረላን መርድእ ወሉዳትካ ተዓጺኻ እትነብዓላን ጎጆካ ብዶዞራት ኣፍሪሱ ኣብ ኣሳሓይታን ንፋስን ተቃሊዕካ ኣደዳ ዘይፍወስ ሕማማትን ሞትን ክትቃላዕ ጌርካን ጌና’ውን ይቅጽል ኣሎ። እሞከዳኣ ኣብ ታሪኽ ናይ ዓለም ነባሪ ህዝቢ’በር ነባሪ ስርዓት ከምዘየለ፡ ቃልሲ ውጽዓት አንጻር ጨፍለቕቲ ስርዓታት ድማ ኩሉ ግዜ ከምዝዕወት ኣሚንካ ንመሰልካ እትለዓለሉ ግዜ ሎምን ሕጅን ጥራሕ’ዩሞ ንመሰልካን ክብርኻን ተለዓል።

መጸዋዕታ፣ ንደገፍትን ተደናግጽትን ስርዓት ህግደፍ፡

ስቃይን መክራን ፣ሞትን ብርሰትን ህዝብኹም እናራኣኩም ከምዘይ ራኣኩም፡ እናሰማዕኩም ከምዘይ ሰማዕኩም ንህዝብኹም ክትብድሉን ከተንብዑን ጸኒሕኩምን ገና’ውን አለኹም። እዚ ኣብ ታሪክ ህዝብኹም ዘይድምሰስ ኣበሳ በቲ  ንሱኹም እታኣምንሉን እተሳስይዎን ስርዓት መንእሰያት የሕዋትኩም ክጸንቱ፡ ሃገር ክትበርስ፡ የዒንቲ ኣደታትኩም ብንብዓት ሓዘን ክዓውር ፡ ስንኩላን ሓርበኛታትኩም ብመንግስቶም ክርሸኑ ደቂ-ኣንስትዮን ደቂ-ተባዕትዮን ሐርበኛታት የሕዋትኩምን ኣያታትኩምን ኣብ እስርቤት ብዘይ ፍርዲ ክሞቱን ክሳቐዩን እናራኣኹም ብውሽጥኹም እቲ ሐቂ እናበልዓኩም ንግዚያዊ ረብሓኹም ክትብሉ ብህዝብን ሃገርን ትጻወቱ ምህላውኩም ተገንዚብኩም ኣብ ጎኒ ውጽዕ ህዝብኹም ደው ክትብሉን፤ ዝተረፈ ህዝብኹም ካብ መከራን ስቃይን ክድሕን፡ ነዚ ኣብ ማእከል ከተማ ኣስመራ ኣጋጢሙ ዘሎ ዘሕዝን ፍጻሜ ተጠቂምኩም ነቲ ዓማጺ መንግስቲ ክትኩኑኑን መጸዋዕታ ካብ ውጹዕ ህዝብኹም ይቐርበልኩም ኣሎ።

እታ ክትጸንትን ክትበርስን ዓይንኩም ዓሚትኩም እተጥፍእዋ ዘለኹም ሃገር ምስየናይ ወሎዶ ክትነብሩላ ኢኹም ትሓልሙ ዘለኹም። ዘፍርን ዝወልድን መንእሰይ ንክጸንት ትፈርድዎ ከም ዘለኹም ይስቆረኩ’ድዩ። ስለዚ ነታ ሕጂ ብዋጋ ህዝብኹም እተውደኽድኹላ ዘለኩም ሃገር ጽባሕ ናይቶም ስቓይን መከራን ዘሕልፉ ዘለዉ ዜጋታት ደቃ ምካና ኣይትዘንግዑ። ሰለምንታይሲ ነባሪ ህዝቢ’በር ነባር  ስርዓት ሰለዘየለ። እምባኣር ነዚ ሓቂ’ዚ ተረዲእኩም ናብ ልብኹም ተመሊስኩም ኣብ ጎኒ ውጹዕ ህዝብኹም ክትስለፉ ዳግም ህጹጽ መጸዋዕታ ይቀርበልኩም ኣሎ።
                                                   
                                                                                 እንቢ ንምልኪ!!
                                                                                 እወ ንልዕልና ሕጊ!!                                                
                                                               በይ- ኤርያ ኤርትራውያን ንዲሞክራስያዊ ለውጢ
                                                                                                                       
ሚያዝያ 7 2016

ኤርትራዊ ምንቅስቓስ ንዲሞክራስን ሰብኣዊ መሰላትን (ኤምዲሰመ) ኣብዚ ሰሙን ኣብ ልዕሊ ንጹሃት ኤርትራውያን መንእሰያት ኣባላት ሃገራዊ ኣገልግሎት ኣብ ኣስመራ ንዘጋጠመ ዘስካሕክሕ ኣረሜናዊ ቅትለት ብትሪ ይኹንን። እዚ ፍጻመ እዚ መቐጸልታ ተግባራት ናይቲ ንኤርትራ ኣብዚ ዝሓለፈ 25 ዓመታት መወዳድርቲ ብዘይርከቦ ግፍዕን ጭቆናንን ረሚስዋ ዘሎ ኣረሜናዊ ዲክታቶርያዊ ስርዓት ኢሰያስ እዩ። ሎሚ'ውን ከምቲ ትማሊ እታ ንስንኩላን ተጋደልቲ ኣብ ማይሓባር፡ ንንጹሃት ኤርትራውያን ኣብ ዓዲ ኣቤቶ ዝረሽረሸት ኢድ ስርሓ ትቕጽል ኣላ። እዚ ስርዓት ንሕይወት ኤርትራውያን ዋላ ሓንቲ ፋዕራ ከምዘይብሉ ካልእ መርኣያ እዩ።

ዎ... ህዝቢ ኤርትራ! ክሳብ መዓስ ኣፍካ ተዓቢስካ ሱቕ ክትብል ኢኻ? ካብ ሞት ዕሸላት ደቕኻካ እንታይ ክመጸካ? ካብዚ ከርፋሕ ናብራ እንታይ ከይጎድለካ? ሃየ፡ ሎሚ ይኣክል ሞት፡ ይኣክል ምልኪ፡ ይኣክል ግፍዒ፡ ይኣክል ባርነት፡ ይኣክል ስደት እትብለሉ እዋን እዩ። ዕስራን ሓሙሽተን ዓመታት ኣብ ሃገርካ ሓርነትካ ተገፊፉ፡ መሰልካ ተጋሂሱ፡ ህሉው ክነስኻ ትሕቲ ህሉዋት፡ ምዉት ከይትብሃል እተተንፍስ፡ እተደንግጽ ፍጥረት ኰንካ ኣሎኻ።

ዎ... ህዝቢ ኤርትራ! ሃየ ተበራበር። ነብስና ካብቲ ስዉር ናይ ኣእምሮ ባርነት ሓራ ኣውጺእና ነቲ ተመንዚዑ ዘሎ መሰልና ነምልስ። ኣብ ሃገርና ብሰላም ናይ ምንባር መሰል ካብ ካልኦት ክመጸና ኣይንጸበ። 'ካብ ሰብ ዝደሊ ከም ሳእኒ ይበሊ' ዝብል ምስላ ኣቦታት ዘኪርና፡ ካልኦት ክመርሑና ከይተጸበና ነፍሲወከፍና ኣነ፡ ንስኻ፡ ንስኺ ንመሰልና ደው ክንብል ይግባእ። ኩላትና መራሕቲ፡ ኩላትና ደለይቲ ፍትሒ ንኹን።

እዚ እንተጌርና ጥራሕ ኢና እታ ንብህጋ ሰላም ዝዓሰላ፡ ህዝባ ብሰላም፡ ብኽብረት፡ ብስኒት ዝነብረላ ኤርትራ ክንርኢ እንኽእል።

ዓወት ንውጹዕ ህዝቢ ኤርትራ!

ንስድራቤትን መቕርብን ግዳያት ጽንዓት ይሃብ!

ኤምዲሰመ

ፕሪቶርያ

06/04/2016

ኣብ መስርሕ ዕጥቓዊ ቃልስና፡ ነቲ ኣብ ፈቐዶ ቦታታት  ምውጻእ ምእታው ዝኸልኣና ዝነበረ፡ ጨካን ሰራዊት ባዕዳዊ ስርዓት ኢትዮጵያ ንምድምሳስ፡ ኩሉ ዓይነት ብድሆታት ተጻዊርና ካብ ቓሮራ ክሳብ ራስዱሜራ ለይቲ ብጸልማት፡ ቐትሪ ብፅሓይ እናተጓዓዝና፡ ኣብ ዝጥዕመና ጊዜን  ቦታን ኣጽኒዕና ከነጥቅዕ  መተካእታ ዘይነበሮ ሓላፍነታዊ ግድነት‘ዩ ነይሩ። እዚ ኩሉ ድኻምን ጽምእን ዕርቓንን ጥሜትን ብምጽማም  ዝተካየደ ዘዅርዕ ታሪካዊ ፍጻሜን መዘና ኣልቦ መስዋእቲ ክቡር ህዝብናን ኽኣ፡ ነዛ ንመበል 25 ዓመት ክብርቲ መዓልቲ ናጽነት ንምጭባጥ እምበር ንዝና ወይ ንተራ ዙረት ከምዘይነበረ ዘካትዕ ኣይኾነን።

እዚ ቅድሚ 2 ወርሒ ጀሚሩ፡ ክሳብ ሎሚ  ብደቂ ዓዲ  አናተመርሐ ጌና ዝቕጽል ዘሎ ጉዕዞ እግሪ ሽግ ሓርነት ድአኸ ዕላምኡ እንታይ ንበሎ? ነዚ ብዓል ብሩራዊ ኢዮበልዩ ክቡር ነጻነትና ዝያዳ ድምቀትን ርዝነትን ንምሃብ ዝዓለመ ዶ ይኸውን? ወይስ ነቲ ህዝብና ኣብ ልዕሊ ሃገሩን ነጻነቱን ዘለዎ ልዑል ክብርን ፍትወትን ብሓደ ወገን፡ በቲ ስዉአቱ ዘሰከምዎ ረዚን ሓላፍነትን ሕዽርን ክአ በቲ ካልእ ወገን መዝሚዙ፡ ህዝቢ ኣብ ጎድኒ መንግስቱ ከም ዘሎ ኣምሲሉ ብመራኸቢ ብዙሓን ንህዝቢ ዓለምን ኣብ ደገ ንዝነብሩ የወሃን ደቂ ሃገርን ብምግላጽ ከደናግርን ዕድመ ስልጣኑ ኣናዊሑ ህዝብና ንምጽናት ተውሳኺ ዕድል ንምርካብ ዝዓለመ እዩ?

እቲ ኣብ ክንዲ ካብ ጎቦ ኣዳል ካብ ከተማ ናቕፋ ክትብገስ ዝተመርጸሉ ምኽንያት ከ እንታይ‘ዩ? ነዚ ዝምልከት መልሲ ቅድሚ ምሃብ  ብዛዕባ ሽግ ሓርነት ገለ መእተዊ ምሃብ ሓጋዚ‘ ዩ። ሽግ ሓርነት፡ ሓዊ ትነድድ ቀንዴል ወይ ሆየ  ትምሰል እምበር ኣድማሳዊት ናይ ሓርነት ብርሃን  ዝብል ረዚን ትርጉም ዘሎዋ ሽግ ምዃና  ኩልና ኤርትራውያን ዘይንፈላለየሉ ሓቂ ምኮነ።     

ሽግ ሓርነት ኣብ‘ቲ ግቡእ ናይ ክብሪ ቦታኣ ተቐሚጣ ንኩሉ ኣብ ጽላላ ዝነብር ህዝቢ መሰሉ ተሓልዩ ብሰላም ክነብር ብመሎኮታዊ ናይ ፍትሒ ዓይኒ  እናሓለወት ነብሱ ከምሓድርን ናብ ጉዕዞ ምዕብልና ክምርሽ ዋሕስነት ክትህቦ እምበር፡ ሎሚ ድሕሪ ርብዒ ዘመን ብዃደረ ተመሪሓን ብጓይላ ተስንያን ርባን ኩርባን ከርተት ክትብል ኣድላዪ ኣይምነበረን።

እቲ ምኽንያት ነዛ መበል 25 ዓመት ናጽነትና ፍሉይ ክብርን ድምቀትን ንምሃብ  ተባሂሉ ዝግበር ዘሎ እንተኮይኑ፡ ህዝብና  ድምጹ ሰሚዑን ትርግታ ልቡ ተረዲኡን ንተባልሓቲ ዓቕሙን ልቦንኡን ግቡእ ኣቓልቦ ሂቡ፡ ህይወቱ ቅሳነት ክመርሕ ዝክኽለሉ ዕድል ዘፍቅድ ስርዓት ረኺቡ ብምሉአ ዓቅሙ ኣብ ህንጻ ሓገሩን ምልዋጥ ናብርኡን ተዋፊሩ ብዝረኽቦ ጸጋ ነጽነትን ዝሓፍሶን ውጽኢን እዩ እምበር፣ ደርሆ ጻሕቲራ እተውጽኦ ሜላን መደናገሪ ምህዞታትንስ፣ ካብ ጽናነት ክሳብ ሎሚ ዘላድዮ መሳርሕ‘ቲ ስርዓት ምዃኑ  ዝተርድኦ ስለ ዝኾነ በዝን ክንድዝን ኣይታለልን ኢዩ። ድምቀትን ክብርን ናጽነትን ሓርነትን ድማ በቲ ንህዝቢ ዝህብኦ ክብርን ሓልዮትን ምዕሩይ ኣብ ናጽነት ብዝርከብ ጸጋ፡ ምዕሩይ ምሕደራ እምበር ብጓይላን ዝላን ዝደምቕ ኣይኮነን።

ህዝብና ድማ ነዚ ሜላን ዕላማን ስርዓት ህግዲፍ እናተረድኣ፡ ነባሪ ሃገርን  ህዝብን እምበር ነባሪ ስርዓት የለን ካብ ዝብል ስነ-ፍልጠታዊ እምነት ነቂሉ፡ ነቲ ዘይትፈትዎ ጋሻስ ትፈትዎ ሂብካ ኣፋንዎ ዝብል ምስላ ቀዳሞት ተኽቲሉ፡ ረጽምን ጎነጽን ብዘይብሉ ልዙብ ሰላማዊ ናይ እንቢታ ጥይት  ሳይለንሰር ኣሳቅዩን  ኣማሲኑን ሓንሳብን ንሓዋሩን ከቃብጾ ምዃኑ ኣሚኑ‘ዩ  ኣብ ውሽጢ ብስቅታ ኣብ  ደገ ድማ ብዓውታ ዝቃለስ ዘሎ።

እቲ ጉዕዞ ህዝቢ ምስ መንግስቱ ከም ዘሎ ኣምሲልካ ንህዝቢ ዓለም ንምትላል ዝዓለመ እንተኾይኑ ከኣ‘ሞ ዕርቃኑ ዘግሃደ ሕሱር ሜላ ምዃኑ ጸብጺብካ  ዘይውዳእ ምኽንያታት ምቕራብ ዘጸግም ኣይምኮነን። ብሓጺሩ ንምግላጽ ግን፡ ዓለም ብብዝሒ  ስደተኛታት እሞ ክአ ብዙሓት ትሕቲ ዕዽመ ሕጻናትን ንሕርሲ ዝቀረባ መብዛትኣን ኣብ ሓርነታዊ ቃልሲ ልዑል ተራ ዘብርከታ ኣዴታትን ዝርክብኦ፡ ኣብ ሃገሮም ተስፋ ቖሪጾም፡ ነቲ ኩሉ ኣብ ጉዕዞ ዘጋጥም ዘሰካሕክሕ ማሕረድትን ናይ ባሕርን ስሃራን ድንገተ ሞትን ምሻጥ ክፍሊ ኣካላትን፡ ካብ ብኾፍካ ሞትስ ተስፋ እናማዕዶኻ ሞት ብዝመረጹ ዜጋታትካ ተጨኒቓን ለይትን መዓልትን ብዛዕባ ግስሩጥን ዘይሓላፍነታውን ምሕደራኻ እናተገረመት ከላ፡ ሕዝቢ ምሳይ ኣሎ ምባል  ጽላለ እምበር ምልክት ጥዕና ኣይኮነን ።

እንተ ነቲ ደድሕሪ ሽግ ሓርነት ተኸቲሉ ዝኽይድ ዘሎ ህዝብና ግን ተገዲዱን እምቢ ምስ ዝብል ከአ በቲ ስርዓት ክወርዶ ዝኽእል ንሕስያ ኣልቦ ጨካን ግፍዒ ተርዲኡ ንመጻኢት ሓቀኛ  ብርሃን ሽግ ሓርነት ዘማዕዱ  ጸዋርን ትዕግስተኛን ምዃኑ እምበር፡ ብዓይኒ‘ቲ ስርዓት ዝጽበዮ ውጽኢትን ምስጢርን ኣይኮነን ዝመዝኖ።

በንጻሩ እዚ ዲክታቶርያዊ ጉጅለ‘ዚ ኣብ ዝባን  ህዝቡ ዝተጻዕነ ሃገራዊ ሕልናን ሓላፍነትን ዘይስምዖ ብዘይካ ስልጣኑ ካልእ ሕልሚ ዘይብሉ ኣረሜናዊ ስርዓት ምዃኑ ዓለም ብምልእታ ዝመዘነቶን  ምልጋሱ፡ ወሳኒ መድሓኒት ኩሉ  ጸገማት ህዝቢ ኤርትራ ምዃኑ ኣብ መደምደምታ ዝተበጽሓሉ እዋን  ምህላውና እቲ ስርዓት ክእመነሉ‘ዃ ኣይድለ እምበር ዘይሕቶ ጉዳይ እዩ። ከም ውጽኢት እኩብ ድምር መዘና ኣልቦ ትዕግስቱን ዘይጽንቀቕ ጽንዓቱን ከኣ ደምበ ደለይቲ ፍትሒ ክሕይልን እቶም ንሱ ንሕና፡ ንሕና ንሱ እናበሉ ስልጣኑ ንምንዋሕ ዘገልግሉ ዝነበሩ ኣባላቱ ኣብ ነብሶም  ብምምላስ ስለ ዝሓደግዎ ዕርቃኑ እናወጸን ይኸይድ ምህላውን ነብሱ ንምድሓን ዘይአምነሉን ዘየድሕኖን ዝምድናታትን ንምፍጣር ዓጽረሞታዊ  ፈንጠርጠር ክገብር ንዕዘብ ኣሎና።

ህዝቢ ኤርትራ ግን ነዛ  ክሳብ ሎሚ ውርደት እምበር ራህዋን ቅሳነትን ክይረኽበ ሓልዩ ዝዓቀባ መበል 25 ዓመት ክብርቲ ናጸነት ኤዮበልዩ ብዓሉ ናብ‘ታ መሰሉ ዝኸብረላ ብህይወት ቀሲኑ ደቁ ሓቑፉ ክነብረሉ` ኣብ ዝኽእል ሓድሽ ናይ ብርሃን ዓመት ከተሰጋግሮ ተስፋ እናገበረ ዘብዕላ፡ መርአያ  ክብሪ ናጽነቱን ምስጋናን መጎስን ስውኣቱን ስንኩላቱን ምዃና ስለ ዝኣምን ድአ‘ምበር ምስ ጨካን ስርዓት ዝምድና ስለ ዘለዎ ኣይኮነ።

እንተ ነቲ ኣብ ክንዲ ካብ ጎቦ-ኣዳል ካብ ከተማ ናቕፋ ክትብገስ ዝተደልየሉ ምኽንያት ዝምልከት መልሲ ነንበብቲ ገዲፈ ነዚ ንርብዒ ዘመን ዘሳቐየና ጉሒፍና ኣብ‘ታ ብሃንቀውታ እንጽበያ ብሉጻት ጀጋኑ ዝኸፈልናላ  ሓቀኛ ሽግ ብርሃን ሓርነት      ንምብጻሕ ብሓባር ንረባረብ።

ዓንደጽዮን ግርማይ

ሃገረ ጀርመን  

ብዕለት 02 ሚያዝያ 2016 ዓ.ም.ፈ ናይ ማሕበር ኣካለ ጽጉማን ኤርትራ ጨንፈር ሃገር ሽወደን ካብ ዝተፋላለያ ከተማታት ሽወደን ዝመጹ ማለት፡ ካብ ስቶኮልም ኡፕሳላ ዮተቦርግ ዮንሾፒን ዝተሳተፍዎ ን5ይ ጊዜኡ ኣብ ከተማ ስቶኮልም ተካይዱ። ዓመታዊ ጉባኤ ብኣደ ወንበር ወ/ኣልጋነሽ ኢሳቅ ብናይ ደሓን መጻእኩ ሰላምታ ከፊታ ብምቅጻል ጽማቅ ዝተተግበሩ ንጥፈታት ጠቂሳ ብሓቂ ብኣባላት ማሕበርን ብርህሩሃት ሃገራውያን ዝተገብረ ወፈያይት ገንዘብ ብምትንካፍ ልዑል ምስጋና ኣቅሪባ፡ ብምሉኡ ዝተወፈየ ከኣ ኣብ ኢዶም ከም ዝበጽሔን ኣብ ጥቅሚ ኣገልግለቶምን ከም ዝወዓለ ብብሩህ ብሓቂ ዘሔብብንን ዘተባብዕን ምዃኑ ሓቢራ። ቀጺሉ ሓው ዑቅባሚካኤል ተስፋጽዮን ተሓዝ ገንዘብ ማሕበር ኣብ ዓመት 2015 ብኣባልነትን ወፈያታትን ዝኣተወ ገንዘብ ብጽሑፍ ንኩሎም ተሳተፍቲ ጉባኤ ዓዲሉ፡ ብዝርዝር ናብኦም ንዓመታዊ ባጀቶም ብጨንፈር ዝለኣኾን ተረፍ ዘሎ ህልዊ ገንዘብን ብብሩህ ሓቢሩ። ድሕሪኡ ተሳተፍቲ ጉባኤ ብንጥፈታትን ተሳታፍነት ህዝብናን ዋላ እኳ ዝምስገን እንተኾነ ጌና ቀጻልን ብዝሰፍሔ ኣገባብ ክምዕብል ናይ ኩልና ሓላፍነት ምዃኑ ተራዲኦም ብልዙብ ሰናይ ኣገልግሎት መሕቲ  ጨንፈር ኣመስጊኖም ብሃነጽቲ ለወባታት ንጸብጻብ ሽማገለ ኣርጊኤሞ። ቀጺሉ ጉባኤ ንዓመተ 2016 እትመርሕ ሽማገለ ብሙሉእ ድምጺ እታ ዝነበረት ሽማገለ በቲ ምስጉንን ጽፉፍ ኣመራርሓኣ ማለት ወ/ኣልጋነሽ ኢሳቅ ኣደ ወንበር ሓው ረዘነ ተኽለ ዋና ጸሓፊ ሓው ዑቅባሚካኤል ተስፋጽዮን ተሓዝ ክትቅጽል ተሳማሚዖም ንዓመተ 2017 ከኣ ሓጻይት ሽማገለ መሪጾም ጉባኤ ብዓወት ዛዚሞም። ብድሕሪኡ ብሓብትና ይርጋኣለም ተከስተ ብተወፋይነት ብገንዘባ(ልዕሊ 800:-) ዘዳለዎቶ ናይ ጾም ስዕረት ሙዑዝ መግቢ ድራር ቡን ሻህን ሙሉእ ኣባል ጉባኤ ተኣንጊዱ ኣምሰየ። 

ንኤርትራውያን ኣካለ-ጽጉማን (ውጉኣት ሓርነትና - ከሰላ) ፡ ብቐጻሊ- ዘጽልሉ ቤት፡ ዝሰትይዎ ማይ፡ ዝበልዕዎ መግቢ ክህልዎምን፣ ከይዓርቁ፡ ከይጽገሙ፡ ሰኣን ብቑዕ ሕክምና ብቓንዛ ከይሳቐዩ፡ ከየስተማስሉን፡ ኤርትራውያንን ግብረ-ሰናያዊ ሕልና ዘለዎምን ርህራሄ ዘለዎም ፈተውትን በብዓመቱ ወፈየኦም ከየቋርጹ ክሕግዙ ዝጸንሑ ምህላዎም ምህላዎም እናዘኻኸርና ብሓበን ንዝክሮምን ነመስግኖምን።

ብድሆ ንነፍስኻ ምኽኣልን ቀጻልነቱን!!!

ቀዳማይ ዕማም፡

እቲ ናይ መጀመርታ ገጽ ናይ ቀዳማይ ዕማም ክዕወት $40,000.00 ይሓትት። እዚ ቀዳማይ እምነ-መሰረት ምቕማጥ እዩ። እዚ ቀዳማይ እምነ-መሰረት ንብሎ ዘለና፡ ንኣዝዩ ዘሰክፍን ዘሻቕልን ሃለዋት ውግኣት ሓርነት ከሰላ ዘቃልልን ብመጠኑ ንእዋናዊ ኩነታቶም ዝፈትሕን`ዩ።

ንቕድሚት፡ ቁጽሪ ውጉኣት ሓርነት ኣብ ከሰላ ኣዝዩ ክበዝሕ ይኽእል`ዩ ኢልና ንግምት። ስለምንታይ ንቕድሚት ዝጥውሮም ዝስእኑ ኣረጋውያን ሓርበኛታትናን ስንኩላትናን ክህልዉ እዮም ኢልና ስለእንኣምን። ``ውሕጅ ከይመጸ፡ መንገዲ ውሕጅ ጽረግ `` ስለዝኾነ።

ናይ ቀዳማይ ዕማምን መጀመርታ ገጽ ናይ`ዚ ዕማም`ዚ ግና $40,000.00 ካብ ግበረ ሰናያት ኣሕዋትን ኣሓትን ምርካብ`ዩ። ናይ`ዚ ወፈያ`ዚ ወፍሪ ብሓልዮት ራድዮ ድምጺ ኤርትራ-ናዝ የማነን መስከረም.ነት፡ ስኒትና.ካምን ብቐጥታ ናብ ባንክ ውግኣት ሓርነት ብምልኣኽን ይሰላሰል ኣሎ። ካልኦት ናይ ኮምፒተር መርበባት`ውን ሓበሬታ ናብ ኩሉ ክባጻሕን ክዝርጋሕን ምሉእ ምትሕባባር የበርክታ ኣለዋ። ንኹሉም ደገፍቲ ናይ`ዚ ግብረሰናያዊ  ተበግሶ`ዚ ንኽዕወት ዘወፍይዎ ዘለዉ ሰናይ ሃገራውን ሞራላውን ተግባር፡ ብስም ውጉኣት ሓርነት መደበር-ከሰላ፡  ሞጎስናን ሓበናን ንገልጸሎም።

ክሳብ ሕጂ ዝተዋጸአ (ዝኣተወን መብጻዓን) $8650.00 + 600.00 ብሪትሽ ፓውንድ

ኣብ ራብዓይ ሰሙን ናይ 2016 ዘወፈዩ፡

ኣብዚ ዝሓለፈ ቅንያት ንሰማዒኡ ዘደንጸወ ፖለቲካዊ ትንታነታት ብገለ ዉልቀሰባት ይኹኑ ጉጅለ ክንዛሕ ቅንያት። ካብቲ ዝተባህለ ገለ ንምጥቃስ ዝኣክል “ሰዉራ ኤርትራ ፍትሓዊ ኣይነበረን፣ ቃልሲ ህዝቢ ኤርትራ ክጅመር ከሎ ብጌጋ ስነሓሳብ እዩ ተበጊሱ፣ ስዉኣት ክዝከሩ የብሎምን፣ መዓልቲ ናጽነት ከም መዓልቲ ሓዘን ኢና ከነኽብራ ዘለና፣ ወዘተ” ገለ ካብቲ ንትንታነታቶም መበገሲ ዝተጠቕለን ሓረጋት እየን። እዚ ኩሉ ትንታነታት ሓፈሻዊ ብስም ደለይቲ ፍትሒ ስለዝዝርጋሕ፣ ንደምበ ደለይቲ ፍትሒ ኣድቂቑ ንዘይከታተል ህዝብና ንግዚኡ ከዳናግር ይኽእል ይኸዉን። እንተኾነ ንኹሉ ኤርትራዊ ሃገራዊ ከም ዘነደረ ኢና ርኢና።

እታ እንኮ ኣፍሪቃዊት ሃገር ካብ ምዕራባዊያን ናጽነታ ተነፊግዋ ከይኣክል፤ ብዓለማዊ ሽርሒ ኣንጻር ድሌት ህዝባ ኣብ ዳግማይ ኣፍሪቃዊ መግዛእቲ ዝተቘረነት ኤርትራ፣ ህዝባ ካብ መግዛእቲ ንክገላገል ዝገበሮ ቃልሲ ፍትሓዊነቱ ኣብ ሕቶን ርእይቶን ዝኣቱ ጉዳይ ኣይኮነን።

ሓደ ዉላዶም “ኪድ ምስ ጀጋኑ የሕዋትካ ተጋደል” ኢሎም ንሜዳ ኣሰንዮም ብዘይ ጠዋሪ ዝተረፉ ወለዲ፤ ድራር ተጋዳላይ ከተብስል የእዳዋ ዝሓረረት፣ የዒንታ ብትኪ ጸረር እንዳበለ ቅናታ ሸጥ ዘበለት ኣደ፣ ከምኡ እውን ብዕሩቕ ዝባኑን ጥሙይ ከብዱን ደኺመ ከይበለ ዕጥቅን ስንቅን ተሰኪሙ ደድሕሪ ተጋደልቲ ከበሳን ቆላን ዝጎየየ፣ ካብ ጸላኢ ሓበረታ ኣኪቡ ንሰወርኡ ዘስነቐ፣ ኣብ ዉሻጥኡን ቁሸቱን ተጋደልቲ ሓቢኡ ንህይወቱ ኣብ ሓደጋ ዘእተወ ህዝቢ፣ ርሃጹ ዘንጠበ፣ ደሙ ዝኽዓወ፣ ህይወቱ ዝኸፈለ ተጋዳላይ፣ ብዘይ ኣቦን ኣደን ዝዓበዩ ደቂ ስዉኣት … ወዘተ፡ እቲ ዝርዝር ነዊሕ እዩ። ኣዚ ኩሉ ከቢድ ዋጋ ዝተኽፍለ ንስለ ሃገራዊ ናጽነትን ነቲ ዝተጠልመ ሓርነትን እዩ ነይሩ። እዚ ታሪኽ እዚ ከምዘለዎ ከይተሸራረፈ ብወርቂ ቀለም ክስነድን፣ መጻኢ ወለዶ ድማ ርዝነት ናይቲ ዝተኽፍለ ዋጋ ክፈልጦን፣ ሓድነት ህዝብን ሃገረን ንከይቡሕጎግ፣ ሉኡላዊ መሬታውን ህዝባውን ሓድነት ኤርትራ ንክዕቀብ ከቢድ ሓላፍነት የሰክሞ። 

ሓቂ እዩ፡ ኣብ ዉሽጢ ሰውራ ኤርትራ ዝነበሩ ዘይደሞክራስያዊያን ሓይልታት፥ እንተስ ስዉር ዉዳበታቶም ሓጊዝዎም፡ ኣንተስ ንቕሓት ናይ ተጋዳላይ መዝሚዞም፣ ኣብ ሕብረተሰብ ኤርትራ ዘይነበረ ክፍኣታት ተቐኒቶም፣ ነቶም ንጹሃት ገስገስቲ ሓይልታት ጨፋሊቖም ኮረቻ ስልጣን ምስ ጨበጡ፣ ነዚ ንዋቱ፣ ጉልበቱን፣ ህይወቱን ዝኸፈለ ህዝቢ ኣብ ነጻ ኤርትራ ሓርነቱ መንዚዖም  ከም መንድዓት ካብ ዝባኑ ምራድ ኣብዮም ይርከቡ።

ኣብ ዝሓለፈ ርብዒ ዘመን፡ እዚ ዘይብሃል ቁጠባውን ማሕበራውን ሃስያታት ወሪዱ፣ ብሰንኪ እዚ ድማ፡ ኤርትራዊያን ከም ደቂ ዛግራ ዓድና ገዲፍና እግርና ናብ ዘምርሓና ፋሕ ጭንግራሕ ኢልና ንርከብ። ተጋዲልና ሃገርና ካብ መንጋጋ ገዛእቲ መንጢልና ክንስና ብሰንኪ እዞም ኣብ ሞንጎና ተጸፍዮም ዝሰወዱ ዘይዲሞክራስያውያን ሓይልታት ክሳድና ኣድኒንና ክብረት ኣልቦ ኮንና ንርከብ ኣሎና።  ነዚ ከም ምኽንያት ወሲዶም ብዓብይኡ ነቲ መዳርግቲ ዘይርከቦ መኸተ ናይ ሕዝቢ ኤርትራ “ፍትሓዊ ኣይነበረን፣ ሽፍትነት እዩ ነይሩ… ወዘተ” ንኸብሉ ስነ ሞጎታዊ ድዩ? በየናይ መለክዒ’ዩ ፍትሓዉነት ቃልስና ኣብ ምልከት ሕቶ ዝኣቱ? ንምዃኑ ክሳብ ከምዚ ድፍረት ዘብጽሖም እንታይ ነይሩ?

ኣብ ክልቲአን ዉድባት ዝነበረ ተጋዳላይ ካብ ኣብራኽ ህዝቢ ከም ዝወጸ ዘንጊዖም? ንታሪኽ ህዝብን ሃገርን ደዊንካ ኣበይ ክብጻሕ ይድለ ኣሎ? መጋረጃ ደለይቲ ፍትሒ ተጎልቢብካ ጸይቂ ምስራሕ ዕላምኡ እንታይ እዩ? ንህዝቢ ኣሰምቢድካ ካብ ደለይቲ ፍትሒ ዉድባትን ማሕበራትን ንምንጻል ዶኾን ይኸዉን? ንምዃኑ ነዞም ብሃልቱ ኣዕቊብዎም ዘሎ ጉጅለ ስለምንታይ ብጽጽ ዘይበለ?

እዞም ንሰውራ ኤርትራ ክትንከፍ ዘይግብኦ፣ ብዝኾነ ይኹን መለክዒ መዳርግቲ ዘይርከቦ ጅግንነትን መኸተን ከጸልሙን፣ መልክዑ ዝድዉን ትንታነታት ክነዝሑ ከይደቀሱ ዝሓድሩ ዘለዉ ዉልቀሰባት ይኹን ጉጅለ፣ ክትንከፍ ዘይግብኦ ተንኪፎም ነቲ ቀይሕ መስመር ከምዝሰገሩ ዝስሕትዎ ኣይመስለንን። እንተስ ብወዲ ወጻኢ ተሸሚቶም ጸቢብ ረብሓታቶም ንምዉሓስ ዝገብርዎ ምዕልባጥ፣ እንተስ ኣብ ዉሽጢ ደምበ ፍትሒ ተሸጉጦም፣ ተልእኮ ጉጅለ ኢሰይያስ ንምዕዋት ዝገብርዎ ፈተነ፣ ክበጽሕዎ ዝሃቀኑ ሽቶ ከይተበገሰ ተረኹምሹ፣ ኣብ ደምበ ፍትሒ ወጊኑ ዝቃልስ ዘሎ ኤርትራዊ፣ ዉድባዊ ጸግዑ ብዘየገድስ ከም ቆፉኡ ዝተተንከፈ ንህቢ ነዲሩ ከምዘሎ ዛጊት ፈሊጦሞ ኣለዉ።

ኣብዚ ሓርነታዊ ቃልስና፡ ንእሽተይ ሒቕታ ካብ ምፍጣር ሓሊፉ ጽልዉኡ ሃሳስ ምዃኑ ተረዲእዎም ኣሎ።  የዒንትን ልብን ሓፋሽ ኣብ ጽልግልግ ከእትዉ ዝተበገሱ ኣካላት፣ ካብቲ ኣብ ስልጣን ዘሎ ዘይደሞክራስያዊ ጉጅለ ተፈልዮም ከምዘይርኣዩ ክግንዘብዎ ይግባእ። ብተወሳኺ ኣጀንዳ ባዕዲ ተኾልኩልካ፣ ርኢቶ ሓፋሽ ተወዲኑ ኣብ ቃልሲ ንኸተቕንዖ ዝግበር ቃጻ፣ ሃገራዊ ክሕደት ምዃኑ ክግንዘቡ ይግባእ። በዚ ኮይኑ በቲ እዞም ብሃልቱ፣ ሃገር ሕግታታ ምስ ተኸለት፣ ካብ ትሓታትነት ከም ዘየምልጡ ርዱእ ኮይኑ፣ ግን ከኣ ወነንቲ ናይዚ ርእይቶ እዚ ከም ዘይኮኑ ሓፋሽ ኣጸቢቑ ተገንዚቡዎ ኣሎ። ነቶም ብሃልቱ እስከ ጽሓይ ይብረቕ . . .  ሓርነት ይዛሪ . . . . ንብሎም! ነቶም ኣብ ጉብጥሽ ዘለዉ ወነንቲ ናይዚ ርእይቶ እዚ ድማ . . . ኣናፍራ ቆቃሕ ዘይፈልጥሲ  ኣይሃዳናይን. . .  ንብሎም።

ኣብዚ እዋን እዚ፡ ኣብ ኤርትራ ዝረአ ዘሎ፡ ዘይሃገራዊ ወስታታት ክነስተውዕሎ ዝግበኣና ጉዳይ እዩ። እዚ ወስታታት’ዚ ሓደጋኡ ከቢድ ስለ ዝኾነ፥ ኣበይ እዩ ክበጽሕ ኢልና እውን ክንመራመረሉ ዝግባእ ተርእዮ እዩ። ምኽንያቱ ሳዕቤኑ ቀሊል  ስለ ዘይኮነ።

ኣብ ኤርትራ ዘሎ ምልካዊ ስርዓት ምልጋስ ዝከኣል ብናይ ኣተሓሳስባ ለውጢ ዲዩ ወይ ብጸርፍን ምክፋእን? ንሕና ኤርትራውያን ኣብ ዘይንቡር ኣተሃላልዋ ስለ ዘሎናን ንሓርነታዊ ቃልሲ ካብ’ቲ ብረታዊ ቃልሲ ፈሊና ክንርእዮ ብዘይምኽኣልና ዘስዕቦ ጸገም ከም ዘሎ ርዱእ ይመስል ኣሎ። ምኽንያቱ ኩልና ኤርትራውያን ተቓወምቲ ንኹን ደገፍቲ እቲ ስርዓት፥ ሒዝናዮ ዘሎና ባህሊ፥ ምጽራፍ፡ ምቁንጻብን ምጽላምን እዩ። ጸርፍን ጸለመን ሃናጺ ናይ ለውጢ መሳርሒ ስለ ዘይኮነ ከኣ ኢና ሓቢርናን ተሰማሚዕናን ነቲ ምልኪ ንምስዓር ግዜ ዝወስደልና ዘሎ።

ኣንጻር ምልካዊ ስርዓትሲ ይትረፍ፥ ደምበ ተቓውሞ ኣብ ነንሓድሕዱ ዝፍጽሞ ዘሎ ጸለመን ምርሕሓቕን፥ ምስ ምብኳር ሓላፍነታዊ ኣተሓሳስባ ተደማሚሩ፡ ነቲ ስርዓት ክንገጥሞ ኣይከኣልናን። ንገዛእ ርእስና ደንበ ፍትሒ ኢልና ኣጠሚቕና፡ ንመሰል ውልቀ ሰብ ብዘቆናጽብ ኣገባብ ንጎዓዝ ምህላውናኸ ሃሳይነቱዶ ንርደኦ ንኸውን? ጸርፍን ጸለመን ዝምጽኦ ፋይዳ የብሉን። እንታይ እዩ ደኣ ክኸውን ዝግበኦ? ዝብል ሕቶ ክምለስ ኣለዎ። ብናይ ለውጢ ስነ-ሓሳብ ብዝተሰነየ ኩሉ ዓቕምታትና ኣንጻር ምልክን መላኽን ክነቕንዕ ይግበኣና። እዚ ከኣ ንነፍስና ምስቲ ሓዲሽ ሕብረተሰብ ንምህናጽ ዝካየድ መድረኽ ክንስጉም የድሊ። ካብኡ ሓሊፉ ንጹር ዕላማ ዘይብሉ ምንቅስቓስ፡ ትርጉም ስለ ዘየብሉ፡ ኣብ ምጽላምን ምርሕሓቕን ዝዋፈር ሓይሊ እዩ ዝኸውን። ከምዚ ዓይነት ኣካይዳ’ዩ ከኣ፡ ኣብ ክንዲ  ሃገራዊ ክውንነት ዝሕሉን ዘማልእን ስራሓት ዝሰርሕ፥ ኣብ ዝበታትንን ሃገራዊ ኣንፈትና ዘስሕትን የድህብ ኣሎ።

ከምዚ ዝዓይነቱ ባህሊ ዝስዕብ መንእሰይ ንጹር ፖለቲካዊ ዕላማ የብሉን። እዚ ናይ  ምድንጋርን ምጥምዛዝ ታሪኽን ኣገባብ  ናብቲ ዝደለዮ ሸቶ ዘብጽሖ ስለ ዝመስሎ፥ ንካልኦት ከም ጸገንቲ፥ ደለይቲ ስልጣን እናበለ ዘይስሞም ይህብ። እንተኾነ ከምዚ ዝዓይነቱ ምንቅስቓስ ምስሊ ሃገርን ታሪኽን ዘበላሹ ካብ ምዃን ሓሊፉ ዘምጽኦ ለውጢ የለን። መጻኢ ሳዕቤኑ ኸኣ ካብዚ ዘሎናዮ ናይ ምልኪ መዋእል ዝኸፍአ እዩ ክኸውን።

እተን በብግዜኡ ዝጫጭሓ ፖለቲካዊ ውድባትን፥ ምንቅስቓሳትን ካብ ነፍሲ ወከፈን ዝደል ግደን ኣበርክቶን ኣሎ። እቲ ዘይተደላይ ብዝሐን ድማ ዝምድና ፍልልያትን ሓድነትን ካብ ዘይምግንዛብ ዝመጽእ እዩ። እዚ ከምቲ “ምሳር ኣብ ዘይለዓቱ” ዝበሃል ኣገባብ ሒዝና ንጎዓዝ ምህላውና ዘመልክት’ዩ። ህዝቢ ግቡእ ንቕሓት ወኒኑ ቅኑዕ መንገዲ ንከይሕዝ’ሞ ጉዳዩ ከይርኢ ከኣ ዕንቅፋት ንኾኖ ኣለና። ካብ ፈላላይ ኣካይዳ ወጺእና፡  ሰላምን ምርግጋእን ዝፈጥር ብናይ ምርሕሓቕ መንፈስ ብዘይተበከለ፡ ሓባራዊ ሃገራዊ ራኢ ተገዚእና ከም ሓደ ሰብ ኰይንና ድምጽና ክነስምዕ ይግበኣና።

ብዘይካዚ ንኹሉቲ ካብ ሃገራዊ ኣንፈትና ዘስሕት ብፍላይ ብሕሳብ ብሄር፡ ኣውራጃ ወይ እውን ብሃይማኖት ተደሪኽና እንኸዶ ጉዕዞ ቃልሲ፡ ሰላም ከንግስ ፈጺሙ ኣይክእልን እዩ። ምኽንያቱ ንመላእ ሃገር ዝሓስብ ስነ-ልቦናን ርዲእትን ስለ ዘዳኽም ነቲ “ሃገርና ብኹልና ንኹልና ብማዕረ” ዝብል፡ መንፈስ ሃገራዊ ኣተሓሳስባ  ስለ ዝዳኸም ንሽግራትና ብሓባር እምበር ብተናጸል ከምዘይፍታሕ ንምርዳእ ዘኽእል ዓቕሚ የስእነና። ስለዚ ንሃገርናን ህዝብናን ብቕንዕና ንሓስብ ካብ ኮና፡ እቲ መስርሕ ብሓባር እምበር ነጻጺልካ ዝኽይድ ስለዘይኮነ፡ ካብ ሃገራውነትና ዘስሕት ኣንፈት ካብ ምሓዝ ክንጥንቀቕ የድሊ። ወዲ ሰብ ብመሰረቱ ንነፍሱ ዝጐእ ሓሳብ ከም ዘይቅበል፡ ንሃገሩን ህዝቡን እውን ብማዕርኡ ክግደስ ይግበኦ። ናይ ብዝሕነትና መርኣያ ዝኾኑ ፍልልያትና ግና ክዕቀቡ ናይ ግድን እዩ።

ሎሚ ዕለት 10.03.2016 ሰለስቲኡ ኣብያተ ትምሀርቲ ካቶሊካዊት ቤተ ክርስትያን ከሰላ ብሓባር ተጠርኒፉ ብድሙቕ በዓል ዛዚመን። ኣብዚ ዓመት መጸት እናደመቐ ዝውዕል ዕለት ዕድመ ዝተገብረሎም ናይ ክልቲኡ ቤተክርስትያን ካህናት (ካህናት ካቶሊካዊት ቤተ ክርስትያን ከሰላን ካህናት ቁዱስ ሚካኤልን) ናይ መንግስቲ ሱዳን ዳይረክተ ናይ ዘይመንግስታውያን ኣብያተ ትምህርቲ ዞባ ሱዳን ሓው ደክተር ዓድል መሓመድዜን ከምኡውን ዳይርክተ መባእታ ቤት ትምህርቲ ሳላሓዲን ኣል-ኢዮቢ ሓው ኣስርን ወከልቲ ማሕበረኮማት ኤረትራን ኢትዮጵያዊያን ህንዲ ወለዲ ተማሃሮን ተሳቲፎም።

ምዝዛም ናይ 2015-2016 ኣብያተ ትምህርቲ ካቶሊካዊት ቤተ ክርስትያን ከሰላ ከምቲ ልሙድ ምዕጻው ቤት ትምህርቲ ሎሚ ዘመን እውን ብዘደንቕ ኣገባብ (ፍረ ጻማና ዕቤት ውጼኢት ስራሕና ዕቤት ፈልጠትና ) ኣብ ትሕቲ ዝብል ጭርሖ ኣብታ ፍልጠት እተቅስም (እተምህር) ውቅብትን ብዝተፈለዩ ጭርሖታት ዝተሸልመት ዳስና ልክዕ ሰዓት 2፡30 ድሕሪ ቀትሪ ብመምህር ወልደሂወት ቀለታ ብጨብጨ እልልታን ተኸፊቱ።

ዘመስጥ መዛሙር ግጥሚታትን ብህጻናት ተማሃሮ መባእታ ቤት ትምህርቲ ተቀረበ። ዝያዳ ሰሓቢ ብምንባሩ ወለድን ኣጋይሽን ናይ ሓጎስ ዳስታን ስምዒታትን ኣብ ገጻት ህዝቢ ይረኣን ይንበብን ነበረ ።ብምቅጻል ድራማታትን ፡ ተዋስኦታትን ፡ ግጥሚታትን ብማእከላይን ላዕለዋይን ተማሃሮን ምስ ግዜ ዝኸይድ ትምህርቲ ሓዘል ብቛንቛታት ትግርኛን ፡ እንግሊዝን ፡ ዓረብን ምኽርን ፍልጠትን ናይ ዝመጽእ ዕላማ ዝሕብሩን ብምንባሮም ዝያዳ ነቲ ህዝቢ ዓቢ ናይ ትምህርቲ ድሌት ዘስሕቡ ሃዋህውን ባይታን ዝፈጥሩ ነበሩ ።

እቲ ዝያዳ ብሩህን ተፈታውን ዝነበረ እሞ ዓቢ ድምቐት ዘሐደረ ብዝነኣድ ኣገባብ ናይ ሃገር ባህልን ልምድን ስሚዒታት ዘበራብሩን ዘዘኻኽፋን ብትግሪኛን፡ ትግረን፡ ብለንን፡ ኣምሓሪና ዝቀረበ ደርፍታት ምስቲ ባህላዊ ኣልባሳቶም ብምርኣይ ነቲ ኣብ ኣብ ዳስ ዝነበረ ህዝቢ ብርቱዕ ሃገራዊ ባህላዊ ናፍቆት ስለ ዘዘኻኽሮም ብሓያል ጨብጨባን እልልታን ካብ ልቦም ዝነቀለ ስሚዒታቶምን ይገልጹ ነበሩ። ኣብ መንጎ ናይቲ ብጉጅለ ባህሊ ተመሃሮ ዝቐርብ ዝነበረ መደባት ከኣ ቃል መማህራን ብመምህር ወልደየሱስ ሃብተ ቃል ሓላፊ ኣብያተ ትምህርቲ ኣባ ገብራይ ቢኢደማርያም ቃል ዳይርክተር ዘይመንግስታውያን ኣብያተ ትምህርቲ ዞባ ሱዳን ሓው ዶክተር ዓድል መሓመድዜን ተዋሂቡ። ዝተፈላለየ ሽልማታት ከኣ ተዓዲሉ።

ንመማህራን ወኪሉ መምህር ወልደየሱስ ሃብተ ንተሳተፍቲ ናይቲ በዓል ድምቕ ሰላምታ ብቕዳም ሎሚ’ውን ከም ቀደምና ‘’ግዜ ባዕሉ ዝመጽእ’’ ወናኒ ዘይብሉ ብምዃን እንሆ ዕለት ምዕጻው ካቶሊካዊት ቤ\ክ\ከሰላ ዳሳ ብዓጀብ ሽልማ ተኽላ ፍረ ዓመት ናይ ተምሃሮ ኣብ ውጺኢት ስራሖም ኣብ ትሕቲ ዝብል ጭርሖ ተመርኩስና ኣብ ኣድራሽ ኮፍ ኢልና ብሓገዝ ትኹራት መማህራን ተማሃሮን ዝተጻለወ ተዋስኦታትን ግጥሚታትን ድራማን ንሓንጎል ዘመስጡ ብሂላትን ብምርኣይን ብምስማዕን ነቲ ወርቅዊ ግዜኹም ተሕልፋን ትዘናግዑን ኣሎኹም።

ክቡራት ወለድን ኣጋይሽን ትዕዘብዎ ዘለኹም ተርእዮታት ደቕና ኣብ ስደት ብምህላዎም መጠን ቛንቛ ስደት´ውን ብመጠኑ ስለ ዝወረሱ ኣብ መልሓሶም ጌጋ ኣድማምጻ ትግሪኛ ········ ክህልዎም ስለ ዝኽእል ግር ኣይበልኩም።

 ናብ ቁም ነገር ክምለስ ኣድላይቲ ነጥብታት ኵውከስ፣ተማሃራይ መን ኢዩ ? መምህርከ ብከመይ ይሕግዞ? ተራ ወለዲኸ እንታይ ኢዩ?. ከባቢኻ ከመይ ዝኣመሰለ ኢዩ?. ተማሃራይ ንክመሃርከ እንታይ የድልዮ?

- ብሓጽሩ ነዚ ኣብ ላዕሊ ዝተጠቀሰ ንምምላሽ ፣ ተማሃራይ ፣ ወለድን ፣ መምህርን ኣብ ምኽትታል ስራሕ ትምህርቲ ሓደ ምስ ዝኸኑ ኢዮም። እዚ እሞር እዚ ብጣዕሚ ብዕምቆት ምርዳእ ዘድልዮ ኢዩ።

- ትምህርቲ ብግቡእ ንክኸይድ ቅሳነት ስድራ ቤት የድሊ። ወለዲ ምስ ከባቢ ምስ ዝርበሹ እቲ ትምሕርቲ´ውን ብኣኡ ይጽሎ እሞ ውጺኢት ደቆም ብልዕሊ ዝበለ ደረጃ ነጥቢ ክጽበዩ ኣይክእሉን ኢዮም።

- እዚ ኵነታት´ዚ ብፍላይ ኣብዚ ሰዓት እዚኣ ኣብ ነፍሲ ወከፍ ሓንጎል ስደተኛ ዝረአን ዘሎን ብምዃኑ እቲ ቀንዲ ኣንጻር (ፀረ ) ጉዕዞ ትምህርትና ኰይኑ ኣሎ።

- ግድን ኢዩ ብግቡእ ተማህርካ ማዕብልካ ጽቡቕ ስራሕ ንክትረክብ ነዊሕ ግዜ ይውስድ፣ ግን ናይ ሎሚ መንእሰይ ሓጺር መንገዲ ወሲድካ ሕይወትካ ምምራሕ ዝብል ጭርሖ ኢዩ፣ እዚ ፍጹም ጸረ ምዕባሌ ትምህርቲ ኢዩ። ስለዚ ካብ ኣፍረይቲ ዘያፍረይቲ ሰባት ንኸውን ። ናይ ሎሚ ተክኖሎጂ ምዕቡል ሓንጎል ይሓተና ኣሎ ፣ ስለዚ ተካእቲ ናይ ጽባሕ ወልዶ ንኽከውን ምስ እንመሃር ጥራሕ ኢዩ።

• ኩሉ ሰብ ባህሪየቱን ጥባየቱን ኣተዓባቢይኡን ሓደ ኣይኮነን ። ባህራየትን ጠባያት ናይ ተማሃሮና ድማ ኣብዚ ዝተመርኮሰ ይኸውን ። መማህራን እኩብ ድምር ናይዚ ጠባያት ኣማእኪሎም ይጐዓዙ ።
• መንፈስ መምህር ኣብ ቦታኡ ከሎ ፣ መንፈስ ተማሃራይ ሸገርገር ዝብል ይመስል፣ ንቅድሚት ንሳልሳይ ሃገር ንስደት ስለዘዘንብልኣብ መንጎ ወልድን መማህራንን ፍሕሽው ዝበለ ዝምድና ይመሰል።

• ብኣውንተ ክንገልጽ ከሎና ካቶሊካዊት ቤ\ክ\ ኣብየተ ትምህርቲ ከሰላ ኣብ ድሮ ናይ ወርቓዊ ኢዩቤል ዝኸይድ ዘሎ ብዙሓት ዜጋታት ኣምህሩ ናብ ክብ ዝበለ ናብራ ዓለም እናሰርሑ ጽቡቕ ህይወት የሕልፋ ከምዘሎው´ውን ኣመስኪራ ኢያ ። ብራቮ ( ኣቅሳሚት ፍልጠት ዝኾንኪ ቤት ትምህርቲ ካቶሊካዊ ቤተ ክርስትያን ከሰላ ።
• ናይ ሎሞ ዘመን 2015-2016 ሰንጠረዥ ተማሃሮና እዚ ዝስዕብ ኢዩ

• ኣብ መወዳታ ክብሎ ዝደሊ

1. ናይ 12 መርመራ ተዳሊኹም ዓመት ይምነየልኩም
2. ነዚ ተወዳዳሪ ዘይብሉ ንምዕጻው ቤ\ት ሰብ ምርኢት መማህራን ተማሃሮን የመጉስ
3. ሽማገለ ወለዲ ተሳትፎኹም ብዅሉ ሸነኻቱ የመጉስ
4. ሓው ዝኾነ መንግስቲ ህዝብን ሱዳን የመጉስ
5. ማሕበር ካቡቺኒ ኣበርክቶን ቆላሕታ ንህዝቢ ምሃቡ የመጉስ ብምባል ቃሉ ዛዚሙ፥

ቀጺሉ ዝያዳ ተጠቅምቲ ንሕና ተማሃሮ ናይ ሎሚ ዕንባባ ናይ ጽባሕ ፍረ ብምዃና መጠን ፍልጠት ዘቅሰሙና ክቡራት መማህራንና እናነኣድና በላሕትን ብሉጻትን ተማሃሮ ክንከውን ኣሎና ብምባል ብተማሃሪትሄለን ግርማይ ቃል ተማሃሮ ቀረበ። ኣብ መፋሪቅ ናይቲ ፕርግራም ሰዓት 3፡30 ሓላፊ ናይ ዘይ ምንግስታውያን ኣብያት ትምህርቲ ዞባ ከሰላ ዶክቶር ዓድል መሓመድዜን ምስ ጉጅለኡ ኣብ በዓል ብምምጻእ ምውቅ ኣቀባብላ ብህዝቢ ተገብረሉ። ናይ እንቛዕ ዳሓን መጻእኩም ምባልን ዝበርክትዎ ዘሎው ሓገዝን ዝገልጽ መልእኽቲ ብመምህር ዓብዱ ኣማን

 ብቛንቛ ዓረብ ቀረበ። ሽማግለ ወልዲ ተመሃሮ ንክቡር ዶክቶር ዓድልን ንሓላፊ ኣብየት ትምህርቲ ካቶሊካዊት ቤ\ክኣባ ገብራይ ቢኢደማርያም ህያብ ኣውፊዩ። አዚ ከዓ ናይ ሓድነትን ናይ ምሕዝነት ዝገልጽ ነበረ ። ቀጽሎም ናይ 12 ክፍሊ መበል 16 ዙርያ ምስክር ዲፕሎማ ዓደሎም ፡ ድሕሪዚ ድክቶር ዓድል ስለቲ ዝተገብሮሎም ኣቓባብላ ሸልማተን ኣብ ዘስምዕዎ ቃላት ነዚ ግዚፍ ዕማም ሒዝኩም ንነዊሕ ዘመናት ተጓዓዝዎ ዘሎኩም ኣዚዩ ዝመስገን ኢዩ። ህጻን ክመሃር ኣሎዎ ፡ ናይ ዝኾነ ሃገር ሓላፍነት ከምዚኾነ ብምግላጽ ነቲ ዝረኣዩን ዝተዓዘቦን ኣመስጊኑ ንካቶሊካዊት ቤት ክርስትያን ብእትገብሮ ዘላ መደብ ትምህርቲ ንክትቅጽሎ ኣተባብዐ ። ንመማህራን ወለድን ህርኩት ስራሖም ነኣደ ፡ ኣብ ጐንኹም ኣሎኹ በርቱዕ ብምባል ናብ ቦታኡ ተመልስ፡ ብናይ ህዝቢ ጨብጨባን እልልታን ድማ ብጽቡቕ መንፈስ ምስ ብጾቱ ተፋነወ።

ሓላፊ ኣብያተ ትምህርቲ ካቶሊካዊት ቤተ ክርስትያን ከሰላ ብወገኖም ንኹሎም ተሳተፍቲ ናይቲ በዓል ልኡል ሰላምታ ብምቕዳም፡ ልዕል አግዚኣብሔር ብጸጋ መሕረቱ ነዚ ዓመት ምህርቲ ኣጀሚሩ ንመዝዛሚ ብስላም ዘብቃዓና ምስጋና ይብጻሓዮ። እዚ ዓመት መጽ ብሓባር ተኣኪብና ክንውዕል ዝመደብናዮ ናይ ደቅና ፍረ ጻም ንምቅባል ንመምሃራን ንምተበባዕ ኣብ ጉእዞ ዓመት ትምህርቲ ዝናበረ ባህሪኣያት ንጥፈታት ተማሃሮ ንምፍላጥ ኢዩ።

ጉዕዞ ትምህርቲ ኣብ ስደትና ከቢድ ኮይኑ አዃ እንተ ተሰመዓና ንኩሉ ነቲ ዘጓንፍ ጸገማት በዲህና ነቲ ናብ ፍልጠት ጎደና ዝምራሓና ብቅዳመነት ሰሪዕና ኣብ ዓወት ምብጻሕ ኢዩ። እዚ ኸዓ ሕብረትን ጻዕርን ናይ ኩሉና ይሓትት። ኸምዚ ስለ ዝኾነ ኢዩ ኸዓ ኣሕዋት ካፑቺኒ ኽሳብ ለይቲ ሎሚ ነቲ ዝተለምዎ ዕላማ ምስ ቡዙሓት ግዱሳትን ዉፊያት ሰባተን ወለድን ብዘይ ሕለል ጻዕሪ ቡዙሓት ዜጋታት ኣብ ምፍራይ ትርከብ ከምዘላ ታሪኽ ዝመስክሮ ኢዩ። እዚ ዝተጠቕስ ግዚፍ ታሪኽ ዘለዎ ስሩዕ መደባዊ ትምህርቲ ንክትመረሕን ንኽትመዉልን ቡዙሕ ኣድካምን ኣጽጋሚን እኳ እንተኮነ ብሓይሊ እግዚኣብሔር ደቕና ባህሎም ልምዶመን ከይሰርዑ ኣብ ናይ ፍልጠት ጎዶና ንመርካቦም ኣዚዩ ዘሕጉስ ኢዩ ።

ናባኹም ናብ ወለዲ ምልስ ኽብል፡ ከም መጠን እዋሓህዲ ኣብያት ተሙርቲ ካብ መመሃራን ገለ ካብ ወለዲ ዘዋህለልኩዎ ነጥቢ ክብርህ።ተማሃራይ ንመንታይ ናብ ቤት ትምህርቲ ይመጽእ? መምህር ስለምንታይ ይቁጸር ?ወለዲ ክ መን ኢዩም? እዞም ዝተጠቅሱ ሓደ ካብ ሓደ ዘይፍለዩ ኢድን ጞንተን ኢዩም። ሓደ ዝዝንግዕ ኩሎም ይዝንጎኡ። እንታይ ኢዩም ክ እቶም በኣሉታ ዝጸልዉና እንተበልና፡ መልሱ ከምዚ ይኸውን ሓንጎል ተማሃራይ ኣብ ኽንዲ ትምህርቲ ዝሓስብ ናብ ኻልእ መንገዲ ትጠምዚዙ ይርከብ ንዓ ትቕለስ እንተበልካዩ ዘይቕለስ ። ንዓ ተማእዘዝ እንተበልካዩ ዘይምእዘዝ፡ ሕንጎል ወለዲ ዕለታዊ ዜና ናብ ሳለሳይ ስደት ዝብል ጥራሕ ኮይኑ ሰለዝርከብ። .ዝያዳ ኣብዚ ቅረባ እዋን ስድራቤታት ብብዝሒ ናብ ሳለሳይ ስደት ስለዝኸዱ ንተመሃሮ ወለዲ ስበድበደን ዘይምቕሳን ፈጢሩ ንቶም ንፉዓት በላሕትን ተማሃሮ ክዘንግዕ ስለ ዝርከብ። ስልዚ ወለዲ ኣወንታወን ኣሉታወን መሚኹም ኣብ ምተብባዕን ምክትታልን ኣይተዘንጎዑ።

ንሕና እሕዋት ካፒቺኒ ብስም ካቶሊካዊት ቤት ክርስቲያን እዚ እንበርክቶ ዘሎና ዓውደ ትምህርቲ ምስ ሓው መንግስቲ ሱዳን ክፍሊ ትምህርቲ ብምዉህሃድ ነዚ ኣድካመን ናይ ሕልና ስራሕ ክም ምኻኑ መጠን ሓላፍነቱ ዓቢ ሽኽም ክምዝኮነ ክሕብር እፈቱ።

ኣብዚ ኻዕ ንሓው መንግስቲ ሱዳን ስለ ኣትኩሉ ምትሕብባሩ ብልቢ ኣመስግን ።

ብሕጽር ዘበለ ኩነታት ቤት ትምህርትና ብከምዚ ክግለጽ እንክሎ ነቶም 12 ክፍሊ ዛዚሞን ንፈተና ንላዕልዋይ ደርጅ ትምህርቲ ንምቕጻል ኣብ ፈተና ዝቅራረቡ ዘሎው ዓወት አመነየልኩም አንቛዕ ኽዓ ኣብ ምዘዛም ኣብቃዓኩም።

ኹለኩም ሽማግለ ደብረ ቅዱስ ሚካኤል ነዚ በዓል ክዉን ንምግባር ብተግዳስነት ዝተዓጠቅኩም ክብረት ይሃብኩም።

መማህራን ምስ ደቅኩም ተማሃሮ ብዘቅረብኩሞ ባህላወን ትምህርቲ ሓዘልን ተዋስኦ ግጥሚን የመስግን ቀዳማይ ቃሎም ደምዲሞም።

ድሕሪኡ እቲ ፕሮግራም ክሳብ ሰዓት 6፡30 ቀጸለ ።ኣብ መወዳእታ ጠቅላላ ሓላፊ ናይ ካቶሊካዊት ቤ\ክ ኣብየት ትምህርቲ ሓላፊ ኣባ ገብራይ ካብ ኣዚለ ክሳብ 12 ክፍሊ ናይ 2015-2016 ጸብለል ኢሎም ዝተረኽቡ ተማሃሮ ብልጫታት ዓደለ ።ቀጺሎም ድማ ቃል ደምዳሚ ግዜ ሓያል ምዃኑ መምህርን ፡ ተማሃራይን ፡ ወለድን ብምትሕብባር ሓያላት ተማሃሮ ክሃንጹ ከም ዝክእሉን ኩላትና ንሓደ ዕላማ ከም ሓንቲ ስደራ ኰይና ደቅና ናብ ፍልጠት መኣዲ ንክነሳተፍ ብርቱዕ ጻዕሪ ከም ክምዝሓተናብንጹር ኣብሪሆም።

 ኣብ መወዳእታ ንሓው መንግስቲ ሱዳንን ህዝቡን ፣ ኣመጒሱ። ንበዓል ብኹሉ ሸነኻቱ ኣዳለውቲ ኣመጒሱ ። ሰናይ ዕርፍቲ ይግበርልኩም ብምባል ናይቲ በዓል ፍጻመ ኮነ።