http://ascenteq.com/project/epdp

ርእሰ-ዓንቀጽ ሰደህኤ

እዚ ንርከበሉ ዘለና እዋን ብመንጽር ኤርትራዊ  ፖለቲካዊ ሃለዋት ኣዝዩ ኣጸጋምን፡ ካብዚ ጸገም ንምውጻኣ ናትና ጥራይ ዘይኮነስ ናይ ካለኦት ደለይቲ ጽቡቕና ኢድ እውን እንጽበየሉ መድርኽ እዩ። ምጽባይ ክበሃል እንከሎ  ናትካ ከይገበርካ ኢድካ ኣጣሚርካ ናይ ካልኦት ደገፍ እተቋምተሉ ዘይኮነስ፡ ነቲ ናትና ብጽሒት እንዳፈጸምና ናይ ካለኦት መራጐዲ ኣስተዋጸኦ እንሓተሉ እዩ። ምኽንያቱ እቲ ወሳኒ ናትናን ናይ ህዝብናን ዝተወሃሃደ ድፍኢት ስለ ዝኾነ። እዞም ክልተ ተግባራት፡ ኣብ ኢድካ ብዘሎ ወሳኒ ዓቕሚ ምጥቃምን፡ ናይ ካለኦት ኣካላት ተደራቢ ዓቕሚ ክትረክብ ምምሕጻንን፡ ዝተነጻጸሉን እቲ ሓደ ምስ ተተግበረ እቲ ሓደ ዝስዕብን ዘይኮኑስ ኣብ ሓደ መስርሕ እንዳተመላልኡ ኣብ ዓወት ዝበጽሑ እዮም።

ሰልፊ ደሞክራሲ ህዝቢ ኤርትራ ነዚ ብምርዳእ ከምቲ ልሙድ ብፍላይ ድማ ኣብዚ እዋንዚ ብጻዕቂ ይስርሓሉ ኣሎ። ኣብዚ ዝሓለፈ ሒደት መዓልልታት’ኳ፡ ኣብ ዞባ ሰሜን ኣሜሪካ፡ ኣብ ዞባ ኤውሮጳ፡ ኣብ ኣወስትራሊያን ኢትዮጵያን ዘካየዶም ዝያዳ ናብ ሰልፋዊ ጉዳያት ዘድሃቡ ናይ ኣባላት ኣኼባታት ናይዚ ኣብነት እዮም። ብዘይካዚ ኣቦመንበር ሰልፊ ኣብ 23 ሕዳር 2014 ዘካየዶ ናይ ኩሎም ኣባላት ሰፊሕ ኣብ ህልዊ ኩነታት ሃገርን ሰልፍን ዘድሃበ ኣኼባ ካልእ ናይቲ እዋናዊ ወፍሪ ኣካል እዩ። ኣቦመንበር ሰልፊ ኣቶ መንግስተኣብ ኣስመሮም ኣብ ዓባይ ብሪታንያ ዘሰላስሎ ዑደትን ምስ ዝተፈላለየ ፖለቲካዊ ኣረኣእያ ዘሎም ግና ድማ ኤርትራዊ ተገዳስነቶምን ሻቕለቶምን ሓደ ዝገብሮም ኤርትራውያን ዘካየዶ ኣኼባ ከዓ ነብሱ ዝኸኣለ ርኢቶኻ ናይ ምስራጽ ስራሕ እዩ። እዚ ሓደ መርኣያ ናይቲ ጉዳይ ኤርትራ ብቐዳምነት ንኤርትራውያን ዝምልከቶም ምዃኑ እዩ። ኣብ ከምዚ ውስጠ-ሰልፋውን ህዝባውን ኣኼባታት ቆላሕታ ዝወሃቦም ዛዕባታት፡ ኣብ ኤርትራ ዘሎ ኣሻቓሊ ኩነታት ንኹሉ ንጹር’ኳ እንተኾነ ከም መእተዊ ምስ ዳህሲስካ፡ ናይቲ ሰልፊ ርኢቶ ብዛዕባ ኣወዳድቓ ዲክታተርያዊ ጉጅለ ህግደፍን ወሳኒ ግደ ህዝቢ ኤርትራን፡ ኩነታት ደንበ ተቓውሞን ናብ ሓደ ናይ ቃልሲ መኣዲ ኣመጻጽእኡን፡ ዝምድናታት ኤርትራዊ ሓይሊ ተቓውሞ ምስ ሕብረተሰብ ዓለምን ጐረባብትን እቶም ቀንድታት ከም ዝኾኑ ፍሉጥ እዩ።

ኣብ ከምዚ መድረኽ ብሓፈሻ፡ ብፍላይ ከዓ ኣብቲ ህዝባዊ ኣኼባታት፡ ዕላማ ናይቲ ርክባት ሒዝካዮ ዝቐረብካ ርኢቶ ተሳተፍቲ ከም ዝቕበሉልካ ምግባር ጥራይ ኣይኮነን። ማዕረማዕረ እዚ ካብ ተሳተፍቲ ዝወሃብ ኣውንታዊ ይኹን ኣሉታዊ ርኢቶ ንምቕባል እውን እዩ። መጻኢ ፖለቲካዊ መደባትካ ብምሉኡ’ኳ እንተዘይኮነ፡ ዝበዘሓ ካብ ህዝቢ ኤርትራ ዝቕበሎ ክትገብሮ እትኽእል ከዓ ካብ ከምዚ ዓይነት ኣጋጣምታት ብዝእከብ ሃናጺ ሓሳባት ክህብትም እንከሎ እዩ። ከምቲ “ክቕየር እንከለኹ ዝቕየር፡ ርእሰይ እንቕንቕ እንከለኹ ርእሱ ዝንቕንቕ ዓርኪ ኣይደልን እየ፡ ምኽንያቱ ነዝስ ጽላለተይ እውን ብዝሓሸ መንገዲ ክፍጽመለይ ስለ ዝኽእል” ዝበሃል ናይ ነኣድትኻ ጥራይ ዘይኮነስ ዝያዳ እትመሃረሉ ናይ ነቐፍትኻ ሓሳብ እውን ካብዚ እዩ ዝርከብ። እዚ መስርሓ ኣብ ሰባት ናይ  ኣተሓሳስባ ለውጢ ናይ ምስራጽ ጉዳይ ስለ ዝኾነ፡ ነዊሕ ግዜን ከቢድ ድኻምን ዝሓትት እምበር፡ ኣብ ሓደ ክልተ ኣኼባታ ጻማ ድኻምካ ትሓፍሰሉ ኣይኮነን። ስንኻ ነኺስካ እንተቐጺልካዮ ግና ከምቲ ብቐጻሊ እትነጥብ ማይ ከውሒ እትሰብር፡ ጻዕርኻ ከም ዘድምዕ ትስፉው ኮይንካ ምቕጻሉ መሰረታዊ ጉዳይ እዩ። ሰደህኤ፡ ኣብ ዝመረጾ ኣገባብ ቃልስን ሕቶ ሓድነት ፖለቲካዊ ሓይልታት ተቓውሞን  ርኢቶኡ ኣብ ግደ ሲቪካዊ ማሕበራትን ኣብ ለውጥን፡ ዘተባብዕ ግንዛበ ይምዝገብ ምህላዉ ከዓ ሓደ ተስፋ ካብ ዝህቡ ምዕባለታት እዩ።  ምእንቲ እዚ እዩ ከዓ ሰደህኤ ዓቕሙ ክሳብ ዘይገደቦ ምስ ዝተፈላለዩ ኤርትራውያን ኣካላት ዝገብሮ ርክብ ከም ቀንዲ ዓማሙ ዝሕዞ።

ኣይኮነንዶ ኣብዚ ዘመነ ዓለም ለኻውነት ቀደም እንተኾነ እውን ከምዚ ናትና ሃገርን ህዝብን ናይ ምድሓን ቃልሲ ምስ ካለኦት ሓይይልታት እንዳተደጋገፍካን ኢድ ከይተኣታተኻን እምበር ገዛኻ ዓጺኻ በይንኻ ዝዕመም ከም ዘይኮነ ሰልፊ ደሞክራሲ ህዝቢ ኤርትራ ይኣምን’ዩ። ግጉይነት ናይ ዕጹው ገዛ ፖሊሲ ዝምድና ከዓ፡ ናብ ርሑቕ ከይከድና ካብ ተመኩሮ ጉጅለ ህግደፍ እንመሃሮ እዩ። ካብዚ ብምንቃል እዩ ድማ ሰደህኤ ኣብ ብዙሕ ዓለም ለኻዊውን ዞባውን መድረኻት ከከም ኩነታቱ ብኣካልን ብኻልእ መንገድን ዝሳተፍን ናይ ህዝብና ሕሰም ገሊጹ ምድግጋፍት ዝሓትትን። ኣብቲ ዝገብሮ ተሳትፎ ዝተፈላለዩ ኣካላት ከከምቲ ዝተሰለፍሉ ዕላማታት፡ ኣብ መዳይ ደሞክራሲ፡ ሰብእዊ መሰልን ጉዳይ ስደተኛታትን እጃሞም ከበርክቱ’ዩ ዝምሕጸን። ዝሓለፈ ጻዕርታት ናይዚ ሰልፊ ኣብ ቦታኡ ኮይኑ፡ ኣብዚ ዝሓለፈ ሰሙን ኣብ ከተማ ጆሃንስበርግ ኣብ ዝተኻየደ 15 ሃገራት ናይ ዝውክል ደቡብ ኣፍሪቃዊ ናይ ዕቤት ኮሙኒቲ ዝተባህለ ሲቪላዊ ማሕበር ኣብ ዘዳልዎ ዓውደ መጽናዕቲ፡ ኣካል ኤርትራዊ ልኡኽ ኮይኑ ዝገበሮ ተሳትፎ ፍሉይ ግምት ዝወሃቦ እዩ።

እዚ ተሳትፎ ፍሉይ ዝኾነሉ ምኽንያት ብክልተ መንጽር ምርኣዩ ይከኣል። በቲ ሓደ ወገን ደንበ ተቓውሞና፡ ኣፍሪቃዊ ክንሱ ተፈላጥነቱ ኣብ ኣፍሪቃ ኣዝዩ ድሩት ኮይኑ ድሕሪ ምጽንሑ በዚ ሰፊሕ ኣፍሪቃዊ ጽልዋ ዘለዎ ማሕበር ክፍለጥን ክዕደምን ምኽኣሉ እዩ። ከምቲ ዘይንስሕቶ ካብ ዕማማት ሕብረት ኣፍሪቃ ሓደ ናይዛ ኣህጉር ሰላምን ቅሳነትን ምርግጋጽ እዩ። ናይ ኤርትራ ጉዳይ ዘይሓወሰ ኣፍሪቃዊ ናይ ሰላም ኣጀንዳ ምሉእ ከም ዘይከውን እትገልጸሉ መድረኽ ምርካብ እምበኣር ኣዝዩ ኣገዳሲ እዩ። እቲ ካልእ ፍሉይነቱ ኣብዚ ኣብ ደንበ ተቓውሞ ኤርትራ እሂንምሂንን ንኤርትራዊ ረብሓ ሓቢርካ ምውፋር ዝጠፈኣሉን ናይ ምምንጫት ህሞት፡ ዝተፈላለዩ ኤርትራውያን ውድባት፡ ማሕበራትን ንጡፋት ውልቀ ሰባትን ነናይ ትካሎም ዝለዓለ  እምነት 2ይ ደርጃ ኣትሒዞም፡ ብደረጃ ኤርትራዊ ልኡኽ  ምእንቲ ለውጢ፡ ሰላምን ሰብኣዊ መሰልን ኤርትራውያን ብሓደ ቃል ክዛረቡ ምኽኣሎም ኣዝዩ ዘሕጉስን መጻኢ ብሩህ ተስፋ ዘመልክትን ምዃኑ እዩ።

እቲ ኣብ ኣፍሪቃዊ መድረኽ በዂሩ ዝጸንሐ ደንበ ተቓውሞ ብኣፍሪቃዊ ማሕበራትን ውድባትን ዘይፍለጥ ምዃኑ ጥራይ ዘይኮነ፡ ምስ ኤርትራውያን ኣብ ደቡብ ኣፍሪቃ ሌላ ዘይምግባሩ እውን ካልእ ጸገም እዩ ነይሩ። እዚ ካብ ኣወሃሃዲ መድረኽ ንሃገራዊ ዘተ ኣንበሳድር ዓንደብርሃን ወልደጊዮርጊስ፡ ካብ ሰልፊ ደሞክራሲ ህዝቢ ኤርትራ ኣቶ ወልደየሱስ ዓማር፡  ካብ ኤርትራዊ ምንቅስቓስ ንዲሞክራስን ሰብኣዊ መሰላትን ኣቶ ኩሉብርሃን ኣብርሃም፣ ከምኡ’ው ወይዘሮ ሳልዋ ኑር ኤርትራዊ ተሓላቒት ሰብኣዊ መሰል ኣብ ሃገራት ወሽመጥ ዝቖመ ልኡኽ፡ ምስ ኤርትራውያን ነባሮ ፕሪቶርያን ደርባንን ኣኼባ ምክያዱ ካልእ መግለጺ ዓወት ናይቲ መገሻ እዩ ነይሩ። እዚ ክበሃል እንከሎ ግና ኣብዚ ከባቢ መንገዲ ተኸፊቱ እምበር እቲ ዝድለ ሸቶ ተመዝጊቡ ማለት ኣይኮነን። ኣብቲ ዝድለ ንምብጻሑስ እቲ ዝኸበደ እቲ ተሪፉ ዘሎ እዩ። እዚ ተበግሶ እዚ ካብ ተመኩሮ ብሩሰልስ ተማሂርካ፡ ብዓይኒ ሓልዮት እንተተራእዩ መኽሰቡ ንኹሉ ኣብ ደንበ ተቓውሞ ዘሎ ደላይ ለውጢ ምዃኑ ጌርካ ክውሰድ ዝግበኦ እዩ። ሓቢርካ ምውፋር ክሳብ ክንደይ ከም ዘዕውት ድማ ከም ኣብነት ክውሰድ ይግበኦ። “እሞ ኣብ ደነበ ተቓውሞና ከምዚ ዓይነት ረዚን ልቦና ኣሎዶ?” ንዝብል ሕቶ ግና ኣፍካ መሊእካ ናይ “ኣወ” መልሲ ክትህቦ ኣጸጋሚ እዩ። እንተኾነ እዚ ጸገም ኣይኮነን ሎሚ እንተዘየለ ጽባሕ ብቓልሲ ክፍጠር ናይ ግድን ስለ ዝኾነ።  እዚ  ልኡኽ ኣብቲ ዝተሳተፈሉ መድረኽ ብዘቕረቦ “1፡ መንግስቲ ደቡብ ኣፍሪቃ፡ ንኤርትራውያን ስደተኛታት ፖለቲካዊ ዑቝባን ኣብ ደቡብ ኣፍሪቃ ብሰላም ክነብሩን ኣብ ማሕበረ-ቍጠባዊ ምዕባለ ናይ'ታ ሃገር ክሳተፉ ዘኽእሎም ዘድሊ ሕጋዊ ሰነዳትን ክህቦም፤ 2፡ ናይ ደቡብ ኣፍሪቃ ሲቪላውያን ማሕበራት ንቃልስታት ህዝቢ ኤርትራ ምእንቲ ዲሞክራሲ፡ ሰብኣዊ ክብርን ፍትሕን ዝገብርዎ ደገፍ ክብ ከብሉ፤ 3፡ ሕብረት ኣፍሪቃ ብመሰረት ቅዋሙ ናይ ኣሳላጢነት እጃሙ ክጻወት፤ 4፡ ጐረባብቲ ኤርትራን ሃገራት ቀርኒ ኣፍሪቃን ብመሰረት ኣህጕራዊ ውዕላትን ንመሰላትን ድሕነትን ናይ ኤርትራውያን ስደተኛታት ከሕልዋን ንጽውዕ።” ዝብል መልእኽቲ ዕላማ ተሳትፈኡ ክሳብ ክንደይ ጸቢብ ውድባዊ ወይ ማሕበራዊ ዘይኮነስ ኤርትራዊ ምንባሩ ኣነጺሩ እዩ።

ሰልፊ ደሞክራሲ ህዝቢ ኤርትራ፡ መንገዲ ዓወት በይንኻ ዝግበር ወፍሪ ዘይኮነስ ኣብ ንጹር መጽናዕትን ፍልልያት  ብግቡእ ኣብ ዝተመሓደረሉ ባይታን ሓቢርካ ብምስራሕ ምዃኑ ካብ ቀድሙ ስለ ዝርዳእ፡ ንመጻኢ ኣውን ንጹር ቅሩብነትን ትብዓትን ምስ ዘለዎም ኤርትራዊ ናይ ለውጢ ኣካላት ንምስራሕ ኣፍደግኡ ክፉት ምዃኑ በዚ ኣጋጣሚ የረጋግጽ።

15 ታሕሳስ 2014

ኣቦ መንበር ሰልፊ ዲሞክራሲ ህዝቢ ኤርትራ፡ ሓው መንግስተኣብ ኣስመሮም፡ ነቲ ኣብ  ሎንዶን ምስ ህዝቢን ማሕበራትን ኣገደስቲ ባእታታትን ብጉዳይ ሃገር ዝገብሮ ዘሎ ርኽኽባት ብምቕጻል፡ ትማሊ ቀዳም 13 ታሕሳስ 2014 ውን ኣብ በርሚንግሃም ብርክት ዝበሉ ብጉዳይ ሃገሮምን ህዝቦምን ዝግደሱ ኤርትራውያን ዝተረኽብዎ ብዓይነቱ ኣገዳሲ ዝኾነ ህዝባዊ ኣኼባ ኣካይዱ።  ኣብዚ ኣኼባዚ፡ ክልተ ኣባላት መሪሕነት ሰልፊን ካብ ሎንዶን ዝመጹ ኣባላት ጨንፈርን  ተረኺቦም ኔሮም።

ሓው ሓምድ ድራር፡ ኣባል ፈጻሚት ሽማግለ ሰልፊ ንኣኼበኛታት እንቋዕ ደሓን መጻእኩም ድሕሪ ምባል፡ በቲ ዝነበረ ሕማቕ ኩነታት ኣየር ከይተዓንቀፉ ዕድመ ሰልፊ ኣኽቢሮም ካብ ርሑቕን ቀረባን ብምምጽኦም ድማ፡ ልባዊ ምስጋና ኣቕሪቡ።

ካብዚ ብምቕጻል፡ ኣቦ መንበር ሰልፊ ሓው መንግስተኣብ ኣስመሮም፡ሃገርና ኣብ ትሕቲ ምልካዊ ስርዓት እትሓልፎ ዘላ ኩነታትን፡ ኩነታት ተቓዉሞ ደምበን ኣህጉራዊ ኩነታትን ብሰፊሑ ብክልቲኡ ቋንቋታት፡ ትግርኛን ዓረብኛን መግለጺ ኣቕሪቡ።ብተወሳኺ ሰልፊ ዲሞክራሲ ህዝቢ ኤርትራ ኣብ ህዝባዊን ዜናውን ዲፕሎማስያውን መዳያት ዘካይዶ ዘሎ ንጥፈታትን፡ ንሓድነት ደምበ ተቓውሞ ሰልፊ እናካየዶ ዝጸንሐ ጻዕሪታት ብዝርዝር ንኣኼብኛታት ገሊጹ።

ተቓዉሞ ደምበ ፡ብክንዲቲ ኩነታት ሃገርና ዝጠልቦ ደረጃ ሓላፍነት ክሰርሕ በቒዑ ከምዘየለን  በዚ ሎሚ ዘለዎ፡ ዝተበታተነ ሃለዋት ከድምዕ ከምዘይክእልን ኣረዲኡ። ኩሎም ሓይሊታት ተቓዉሞ፡ ናይ ቀረባ ዕላምኦም ንዲክታቶርያዊ ስርዓት ምልጋስ ምዃኑ ተረዲኦም፡ ኣብ ክሊዚ ዕላማዚ ሓቢሮም ክሰርሑ ሓላፍነት ክስምዖም ከምዝግባእ ኣረዲኡ።

ድሕሪ ብሓው መንግስተኣብ ዝተዋህበ መግለጺ፡ ኣኺበኛታት ጠቓሚ ርእይቶታትን፡ ናብ ደምበ ተቓውሞ ብሓፈሻ፡ ናብ ሰልፊ ደሞክራሲ ድማ ብፍላይ ዘነጻጸረ ሃናጺ ነቐፌታታት ኣቕሪቦም።

ካብ ኣኼበኛታት ንዝቐረበ ሕቶታት፡ ብኣቦ መንበር ሰልፍን ኣብኡ ብዝነበሩ ኣባላት መሪሕነትን ዝግባእ መልሲ ተዋሂብዎ። ነቲ  ሓደ-ሓደ እዋን ዘይትርጉሙ ዝወሃቦ፡ ሰልፊ ዲሞክራሲ መሪጽዎ ዘሎ ሰላማዊ ዲሞክራስያዊ ቃልሲ፡ ስለምንታይ ሰልፊ ከም ቅኑዕ ኣገባብ ቃልሲ ከም ዝኽተሎ ሰፊሕ መግለጺ ተዋሂቡ።

ካብ ተሳተፍቲ ኣኼባ፡ ሰልፊ ዝገብሮ ምንቅስቓሳት ንዝናን ሽምን ኢሉ ከምዝገብሮ፡ ኣብ ህዝቢ ቦታ ከምዘይብሉ፡ ናብ መንእሰያት ክወርድ ከምዘይከኣለ ርእይቶ ቀሪቡ፡ ነዚ መብርሂ ክወሃብ ከሎ፡

ሰልፊ ኣብ ዲፕሎማስያውን ዜናውን ስራሓት ዘካይዶ ንጥፈታትን፡ ከም መኽሰብ መላእ ተቓዉሞ ደምበ ተቖጺሩ ክኽበርን ክሙጎስን ዘለዎ፡ ካልኦት ድማ  ኣብ ርእሲኡ ክውስኽሉ ከሀብትምዎን ዝግባእ  ድኣምበር ፡ ነዚ ሃገራዊ ስራሕዚ ከም ንዝናን ንምሽማው ስልጣንን ተባሂሉ ዝግበር ዘሎ ጌርካ ምቑጻር ግጉይ ምዃኑ ተገሊጹ።

እቲ ህዝቢ ኣብ መላእ ተቓዉሞ ደምበ ኣብ ምዕሳል ዘሎ ጸገም ኣብ ሰልፊ ዲሞክራሲ ህዝቢ ኤርትራ ውን ህሉው ኢዩ። እንተኾነ ግን ሰድህኤL ቃልሲ ብዘይ ተሳትፎ ህዝቢ ክዕወት ኣይክእልን ኢዩ ካብ ዝብል ጽኑዕ እምነት ብምንቃል፡ ናብ ህዝቢ ከብጽሖ ብዝኽእል ፖሊሲ ተመሪሑ ይኸይድ ኣሎ። ብእንሕዞ ሃገራዊ መርገጻትን እንኽተሎ ፖሊስን ዝሓሸ ህዝባዊ ቦታ ከምዘሎና ንኣምን ኢና። ነዚ ኩሉ ዝገጥመና ተጻብኦታት፡ ብዘሎና ህዝባዊ ቦታ ጥራይ ኢና በዲህናዮ ንኸይድ ዘሎና ተባሂሉ።

ሰልፊ ዲሞክራሲ ህዝቢ ኤርትራ ምስ መንእሰያት ክሰርሕ ንዘለዎ ድሌት ኮንፈረንሳት ፕሪቶርያን ቦለኛን እኹላት መረዳእታ ኢየን።

ኣኼባ በርሚንግሃም፡ ሓላፍነት ዝመልኦ ኣኼባ፡ ካብ ተሳተፍቲ  ድማ ኣብ ስራሕና ሓጋዝን ጠቓምን ሓሳባት ዝረኸብናሉ ኢዩ ኔሩ። በዚ ኣጋጣሚ ድማ ንኹሎም ተሳተፍቲ ኣኼባ ነመስግኖም። ንተቓለስቲ ኑሪ ዓብደላን ስዒድ ዓብደልሃዲን ንኹሉ ዝገበሩልና እንግዶት ብልቢ ነመስግኖም።

ሰልፊ ደሞክራሲ ህዝቢ ኤርትራ

ጨንፈር ዓባይ ብሪጣንያ

14 ታሕሳስ 2014

ሰልፊ ዲሞክራሲ ህዝቢ ኤርትራ ዞባ ኣውሮጳ ምስ ንኡስ ዞባን ጨናፍርን ዝሓወሰ፡ብዕለት 12-12-2014 ካብ ሰዓት 20.00 ክሳብ ስዓት 23.30 ብኣቈጻጽራ በርሊን ኣብ ዝተዳለው ኣጀንዳታት ዘትኰረ ልዙብ ውጽኢታውን ኣኼባ ኣካይዱ።

ኣቦ መንበር ዞባ ኣውሮጳ፡ ሓው ብርሃነ ገብረክርስቶስ፡ ሕውነታዊ ሰላምታ ድሕሪ ምቕራብ፡ እዚ ኣኼባ'ዚ ኣብ'ዚ ዓመት 2014 ናይ መጨረሻ ኣኼባ ስለዝዀነ፡  ነዚ ኣጋጣሚ'ዚ ተጠቒመ ንኣመንቲ ክርስትና፡ ርሑስ በዓል ልደት፣ ንኹሉኹም ኣባካት ክኣ፡ ኣብ ሃገርና እነብዕሎ ክዀነልና እምነ ብዝብል ቃል ኢዩ ከፊትዎ።

ሓው ብርሃነ ዘረብኡ ኣስዒቡ፣ ናይ ሎሚ ኣኼባና ናይ 2014 ሓበራዊ ዘካየድናዮ ስርሓት ሓጺር ገምጋም ምቕራብን ብፍላይ ክኣ እቶም ንስራሕና ዓንቂፎም ሒዞም ዝጸንሑ ብምልላይ ን2015 ከነማልኦም ዘለና መርሆ-ስራሕን  ዕማም-ሓይሊ-ዕዮን ኣውጺእና ንስራሕ እንብገሰሉ ኣኼባ ምዃኑ እዩ ክብል ገሊጽዎ። ቀጺሉ ድማ፡ ነዚ ዝስዕብ ናይ ኣኼባ ኣጀንዳታት ኣቕሪቡ።

1-      ሓጺር ህሉው ኩነታት ህዝብና ሃገርናን ኣብ ውሽጥን ኣብ ወጻእን፤

2-     ሓጺር መግለጺ ብዛዕባ ንጥፍታት ሰልፍና ብፍላይ ከኣ፡ ኣብዚ እዋን ዝካየድ ዘሎ ሓባራዊ ጕዕዞ ጉዕዞ ደምበ ፍትሕን ዲሞክራስን፤

3-     ጸብጻብ ስራሓት 2014 ዓ.ም፣ ከምኡ'ውን፡ ናይ 2015 መደብ ስርሓት።

 ብሰንኪብልሽው ምሕደራን ውልቃዊ ምልኪ ስርዓተ ኢሳያስን፡ ህዝብና ዘሕልፎ ዘሎ ምረትን ስቓይን ጸልማት ናብራን ንኹላትና ብሩህ እዩ። ይኹን እምበር ክምስርዓት ኣብ ውሽጡ በዅቢኹ፡ ትልኽ ዝብለሉ ዘሎ እዋን ኮይኑ፣ ብወገና ከምሰልፊ ብፍላይ፡ ከምደምበ ፍትሕን ዲሞክራሲን ድማ ብሓፈሻ፡ ሓባራዊ ስራሕን ምትእምማንን ዘንጸፈ ምቅርራብን  ሓበራዊ ጽላልን ክህሉ ምጽዓር መድረኽ ዝዕድሞ ዘሎ ጕዳይ ኢዩ።

ሰልፍና ብሓፈሻ፡ ኣብ ዲፕሎማስያዊ ዕማማት ዝያዳ ክነጥፍ ዝጸንሐን ዘሎን ምዃኑ ክላትና እንግንዘቦ ዘሎና ጕዳይ እኳ እንተኾነ፣ ብፍላይ ኣብ'ዚ እዋን'ዚ ኣቦ መንበር ሰልፍና ምስ ሓው ሓምድ ድራር ኣብ ዓባይ ብሪጣንያ  ዑደት የካይዱ ኣለዉ። ከምኡ'ውን፡ ሓው ወልደሱስ ዓማር፡ ሓላፊ ወጻኢ ጉዳያት ሰዲህኤ ምስ ኣምባሳደር ዓንደብርሃን ወልደገርጊስን ሳልዋ ኑርን ኩሉብርሃን ኣብርሃምን ኰይኖም ኣብ ደቡብ ኣፍሪካ ዘካይድዎ ዘለዉ ዑደት ኣመልኪቱ ኣብ ሓርነት ኦርግ ሰፊሕ ሪፖርታጅ ቀሪቡ ኣሎ።

ኣብ ውሽጣዊ ጉዳያትና፡ ሰ.ዲ.ህ.ኤ. ኵሉ ጊዜ  ለውጢን ስራሕና እነመሓየሽሉ ኣጋባብ ንምትእትታውን ካብ ዘለዎ ቍሩብነት ተበጊሱ፡ ኣብያተ-ጽሕፈታት ፈጻሚ ሽማግለ ብጥምሮ ዘሰርሓሉ ኣገባባት ኣታኣታትዩ ኣሎ።  እዚ ኣሳራርሓ እዚ፡ ተዋሃሂድካን ተሓጋጊዝካን ኣብ ምስራሕ ዝብሉ ዕላማታት ዝተሰረተ ስለዝዀነ፡ ውጽኢታቱ ውን ኣወንታዊ ምዃኑ ድሮ ኣብ'ቲ እነካይዶ ዘለና ስርሓት እንድህስሶ ዘለና ሓቂ ኢዩ። ብዝዓበየ ኽኣ ጉባኤታትናን ፈስቲቫላትናን ኣብ ኩሉ መዳያቱ ንምዕዋት ተዋሃሂድና ክንሰርሕን ክንተሓጋገዝን ኣድላዪነቱ ምዃና ተስፋይ ወሰን የብሊን ኢሉ።

ሓው ብርሃነ፡ ብዛዕባ ጸብጻባት ስራሕና ብዝምልከት፡ ዋላ እኳ ዝንኣድ ስርሓት ይካየድ እምበር፡ ኣብ ጉዕዞና ዝረኸብናዮም ዱንኩላት ወይ ዕንቅፋታት እዉን ውሑዳት ኣይነበሩን  ብምባል ድሕሪ ምባል፡ መፍትሒታት ይዀኑ ኢዮም ዝብሎም ነጥብታት ብምቕራብ መግለጹ ኡ ዛዚሙ።

ንኣገዳስነት ናይ ምውህሃድን ምትሕግጋዝን ንምብራህ ድማ ከም ካብ ንህብን ጻጸን ዓቢ ትምህርቲ ክቕሰም ከምዝከኣል ኣብሪሁ። ኣናህብ ቆፍኦም ንሹምን ማለት ንግስትን ሓለውታን ሓዲጎም ይወፍሩ ወይ ይዕንዝሩ። ካብ ዝወፈርዎ ርሑቑን ቀረባን ቦታታት ንምዓር ዝኸዉን ፍረ ሒዞም ይመጽኡ፡ ብኸምዚ ኣጋባብ ክኣ መዓር የፍሪዩ። ጻጸ ድማ፡ ተሓባቢሮምን ተዋሃሂዶምን ብምስራሕ በበይኖም ክገብርዎ ዘይክእሉ ነገራት ብምግባር ማሕበራዊ ህይወቶም የሰላስሉ። ንሕና እውን ንዕላማታት ሰልፍና ንምዕዋት ከምንህቢ ምስ ኣባላትና፡ ዜጋታትና፡ ደገፍቲ ሰልፍና፡ ኣዕሩኽን ፈተውቲ ቃልስናን ዝዀኑ ትካላትን መንግስታትን ወፊርና ፖለቲካዊ፡ ቍጠባውን ካልእ ዓይነት ደገፋትን ክንረክብ ከምንህቢ ክንጽዕር ኣሎና። ነዚ ኣብ ግብሪ ንምትርጓም ጽጹይ መምርሒታትን  ልክዕ ከም ንህብን ጻጸን ናይ ስራሕ ምቅሊትካ ወሲድካ እናተዋሃሃድካን ተሓጋገዝካን ምስራሕ ከምዝግባእ እምነተይን ተስፋይን ኢዩ ብምባል ዘረባኡ ደምዲሙ።

ብድሕር'ዚ፡ ብወገን ሓለፍቲ ንኡስ ዞባን ጨናፍርን ሃነጽቲ ዝዀኑ ንናይ ዕዮ መርሆታት፡ ክቘሙ ዘለዎምን ሓይሊ ዕማማት፡ ፈስቲቫላትን ጕባኤታትን ዝምልከቱ ርእይቶታን ለበዋታትን ቀሪቦም።   ሓው ብርሃነ ኣብ ምዕጻው ኣኼባ ጹማቕ ውጽኢት ናይ'ቲ ኣኼባ ብምግላጽ፡ ናብ መሪሕነት ከምሓላልፎ ምዃኑ ብምሕባር ንተሳተፍቲ ኣኼባ ኣመስጊኑ ዛዚምዎ።

ብሓላፊ ዜናን -ባህልን ዞባ ኤውሮጳ

 ፍትዊ ክፍለ

 ሰደህኤ ዞባ ሰሜን ኣመሪካ ድሕሪ’ቲ ብመስከረም 27 – 28, 2014 ዓ.ምኣብ ከተማ ቺካጎ ዘካየዶ 3ይ ዞባዊ ዕዉት ጉባኤኡ፣ ብናይ ስልኪ ዋዕላ ንዅሎም ኣባላቱ ዘሳተፈ ቀዳማይ ዞባዊ ኣኼባኡ ብ 7 ታሕሳስ 2014 ዓ.ም. ኣሰላሲሉ። ኣኼባ ዝኸፈተ  ኣቦ መንበር ዞባ ሽማግለ፣ ወልዱ ነጋሲ፤ ንምይይጥ ተቐሪቡ ዘሎ ዛዕባታት ብዝርዝር ድሕሪ ምሕባር፤ ብቐዳምነት ግን ኣብ ኣኼባና ተሳቲፎም ዘለዉ ኣባላት ፈጻሚ ሽማግለ ሰደህኤ፣ ብዛዕባ ሰልፍና ሒዝዎም ዘሎ ዕማማትን ዘሰላስሎም ዘሎ ንጥፈታትን፣ ከምኡ’ውን ሓፈሻዊ ኵነታት ሃገርናን ህዝብናን ዘጠቓለለ ሓበሬታን መብርህን ምእንቲ ክህቡና መድረኽ ንዓኦም ኣረከበ።

ተስፋሚካኤል ዮውሃንስ ኣባል ፈጻሚ ሽማግለን ሓላፊ ቤት ጽሕፈት ስርርዓዊ ጉዳያትን፣ ፈጻሚ ሽማግለ ኣብ ዝሓለፈ ኣኼብኡ ዝመዘኖምን ዝወጠኖምን መደባት መሰረት ብምግባር ዝርዝር ሓበሬታ ኣቕሪቡ። ሰልፍና ኣብዚ እዋን’ዚ ኣብ ዲፕሎማስያዊ ዕማማት ዝያዳ ይነጥፍ ከምዘሎን፣ ኣብ ተቓውሞ ደምበ ብፍላይ ምስቶም ብራኢ ዝቀራረቡና ሓይልታትን ሲቪላዊ ማሕበራትን ጽዑቕ ርኽክባትን ልዝብን የካይድ ከምዘሎ’ውን ሓቢሩ። ብሰንኪ ብልሹው ምሕደራ ህግደፍ፣ ህዝብና ዝሓልፎ ዘሎ ምረት ናብራን ስቓይን ብምሕባር ስርዓት ኢሳያስ ብውሽጡ ቦኽቢኹ ኣብ ገምገም ውድቀት ትልኽ ዝብል ዘሎ ንምልጋስ ቃልስና ከነዛይድ ከምዘሎና ኣዘኻኺሩ። ካብ ኣባላት ንዝቐረበሉ ሕቶታት መልስታት ሂቡ።

ወልዱ ነጋሲ ዞባ ሽማግለ ተመያይጡ ዝቐረቦም ዛዕባታት፤ ዕማማት ናይ ኵለን ኣብያተ ጽሕፈት ሰልፍና ዝሓቖፈ ኰይኑ፣ ጨናፍር ዞባና ኣብ ዘዝነብራሉ ከባብታት ዕቱብ ምንቅስቓስ ከካይዳሉን ክትግብርኦን ከምዘለወን ብስም ዞባ ሽማግለ ኣዘኻኺሩ። ብምቕጻል ነቲ ንጥፈታት ዝመርሓ ናይ ዕማም ሽማግለታት ቆይመን ከምዘለዋ’ውን ሓቢሩ። ኣባላት ዞባ ሽማግለ ነንዝመልከቶም ቤት ጽሕፈት ወኪሎም ኣብ ርእሲ’ቲ ወልዱ ዝሃቦ ተወሳኺ መብርሂ ኣቕሪቦም። ኣባላት ኣብ ዝቐረበ መደብ ዘለዎም ሕቶታትን ርእይቶን ብምቕራብ ዓሚቝ ክትዕ ድሕሪ ምክያድ፣ ኣብ ግብሪ ከውዕልዎ ቅሩባት ምዃኖም ኣረጋጊጾም።

ምኽትል ሓላፊ ማሕበራዊ ጉዳያት ቤት ጽሕፈት ፍስሃየ ሓጎስ፣ ድሕረ ባይታ ናይ’ቲ  ክካየድ ዝጸንሐን ዘሎን ማሕበራዊ ንጥፈታትን ኣገልግሎትን ብዝርዝር ኣብሪሁ። ኣብዚ እዋን’ዚ ቀንዲ ዕማም ቤት ጽሕፈት ንኣብ ስደት ዝነብር ህዝብና ብፍላይ ኣብ ሱዳን ንዝርከቡ ህጻናትን መንእሰያትን ኣገልግሎት ትምህርትን ረድኤታዊ ንጥፈታትን ምክያድ ምዃኑ ሓቢሩ። እዚ መደብ’ዚ ክዕወትን ዝሰፍሐ ኣገልግሎት ከቕርብን ግን ናይ ንዋትን ገንዘብን ካብ ገበርቲ ሰናይ ማሕበራትን ውልቀ ለገስትን ክርክብ ምስ ዝኽእል ምዃኑ ኣስሚሩሉ። ኣባላትን ጨናፍርን ሰልፊ ነዚ መደብ’ዚ ከዐውቱ ጻዕርታቶም ከዛይዱ ኣተሓሳሲቡ።

ክብርን ዝኽርን ንሰማእታት ኤርትራ

ውድቀት ንምልካዊ ስርዓት

ፍትሓውን ደሞክራስያውን ቃልስታት ህዝቢ ኤርትራ ክዕወት’ዩ

ሰደህኤ - ዞባ ሰሜን ኣመሪካ

7 ታሕሳስ 2014

ብዕለት 07-12-14 ብኣቦወንበር ሰ.ዲ.ህ.ኤ. ሓው መንግስትኣብ ኣስመሮም ዝተጸውዔ ሰለስተ ቤት ጽሕፈታት

1. ቤት ጽሕፈት ኣበወንበር 2) ቤት ጽሕፈት ሉኡኽ ወጻኢ ጉዳያት 3) ቤት ጽሕፈት ዜናን ባህሊን ፣ኩለን ሓለፍቲ ትካላት ሚዲያ ሰልፊና እውን ዝተኻፈልዎ፣ ሓቢርካን ተዋሃሂድካ ምስራሕ ዝብል መደብ ዕዮ ዝኣመተ ሰሚናር ተኻይዱ።

ኣቦወንበር ሰልፊ ሓው መንግስትኣብ ኣስመሮም ኣብ ኣኼባ ተረኺቦም ዝነበሩ ኣባላት ሕውነታዊ ሰላምታ ድሕሪ ምቕራብ ንኣኼባ መጸዊዕዑ ምኽኒያት እቲ ድሕሪ ነዊሕ ግዜታት ነፍሲ ወከፍ ቤት ጽሕፈታትናን ትካላታትናን፣ ብመደብ ዕዮ ሰልፍና ተመርዂሰን ዘካየድኦ ገና እውን ዘካይድኦ ዘለዋ ኑጡፍ ውድባዊ ስርሓት ኽምስገን ዘለዎ እኳ እንተኾነ፣ ግዚኡ ገምጋም እንግሀብረሉን ኣብ ተሞክሮና ተሞርኲስና ምምሕያሽን ተሞክሮታትና እንላዋወጠሉ ኣብ ስርሓትና ምትሕግጋዝ ኣንገብረሉ ሓዲሽን ሃናጽን መደበ-ዕዮ እነተኣታትወሉ ይጠቅም ብምባል ቤት ጽሕፈታትና ትካላትናን ንምውህሃድ ኣብ 3 ጥምሮ ምትእኽኻባት  ኸፊልናዮስ እንሆ እዚ ሎሚ ጸዊዕናዮ ዘለና ናብኡ ዝዓለመ እዩ ኽብል ኣብሪሁ ። ዘረባኡ ብምቕጻል፣ቅድሚ ኣብቲ ርእሲ ነገር ምእታው ኣብዚ ሰሙን እዚ ኣነ ኣብ ሃገር ዓባይ ብሪጣንያ ፣ሓው ወልደየሱስ ክኣ ኣብ ደቡብ ኣፍሪቃ ንርከብ ከም ዘለና ኩሉኹም እትፈልጥዎ እዩ። ብወገነይ እቲ ምስ ግዜን ኩነታትን ኽግበር ዘለዎ ዑደት ብምምርኳስ፣ዕድመ ብጨንፈር ዓባይ ብሪጣንያ ዝገበሩልና ምስ ሓው መሓመድ ድራር ኣኬባ ምስ ኣባላትና ሰሚናራት ምስ  ዜጋታትና ወይ ዕድመ ኣኽቢሮም ዝመጹ ክፋል ህዝብናን ውድባትን ውልቀ ሰባትን ምስ ሰልፍታትን ባእታትት መንግስታውያን   ኣካላት ብሪጣንያ ወይ ኣማሓደርቲን ዘካየድናዮ ርክባት ጹቡቕ ውጺኢት ሂቡን ይህብን ኣሎ፣ ሃገራት ደቡብ ኣፍሪቃ ኸምዚ ዝኣመሰሉ ዑደት ኣብ ሙሉእ ኤውሮጳ ፣ኣመሪካ ፣ኣውስትራልያ፣ኣሲያ፣ኣፍሪቃ ኽግበር ዘለዎ ኢልና እናኣምኖን እንደልዮን እኳ ይኹንምበር ምስ ግዜን ምቅርራብ ዞቦታትና ፣ኣብ ዓቕምታት ትሕዝቶና ዝተሞርኮሰ ኸም ዝኾነ ኹላትና እንግንዘቦ እዩ።

ሓው ወልደኢየሱስ ዓማር በቲ ን15 ሃገራት ዝውከል ልምዓታዊ ማሕበር ሃገራት ደቡብ ኣፍሪቃ (Southem African Development Community/SADC) ዝተገብረልና ዕድመ ምስ ኣምባሳደር ዓንደብርሃን፣ ኣባል ኣዋሃሃዲ ኣካል ኤርትራዊት መድረኽ ንዲሞክራስያዊ ዘተን ወይዘሮ ሳልዋ ኑር ኤርትራዊት ተጣባቒት ሰብኣዊ መሰላትን ተዋሳኢት ንዲሞክራስያዊ ለውጥን ካብ ወሽመጥ ዓረብ፣ዝተኻፈልዎ ኹነታት ህዝብና ፣ግብሪ ውልቀ -መላኺ ስርዓተ ኢሳያስ ብደቂቕን ንጹሩን ኣብሪሆምስ ኽዋሃብ ዘለዎ ደገፍን ንተግባረ ዲክታተራዊ ስርዓተ ኢሳያስ ንምግላጽን ኣብ እቲ ዘድሊዮ ኢንስቲትዩሽን ምምልካትን ኽዝተዮ ኽንጽዕር ዝብል ፖለቲካዊን ሞራላዊ ደገፍ ረኺቦም ኸም ዘለለዉ በቲ ቐልጢፉ ዝማሓላለፈልና ሪፖርታጅ ይበርህ፣ ገና ኣብ ደቡብ ኣፍሪቃ ዝርከቡ ምንቅስቃሳት ኸምኡ ዜጋታት ኤርትራዊያን ኣኸባታትን ምስ ሓለፍቲ መንግስቲ ደቡብ ኣፍሪቃ ርክባት ንምግባር ይቕጽል ኣሎ ኣወንታዊ ውጽኢት ኽርከብ ዘለና ትምኒትን እምነትናን እዩ።

ብወገን ዞባታትናን ኑኡሳት ዞባታትን ጨናፍርናን እውን ጹዑቕ ስርሓትን ጉባኤታተንን ኣኼባታትን ገምጋም ስሪሓተን ብምክያድ ፣ምቅርራብ ንዝመጽእ ጉባኤና ፣ፈስቲቫልና፣ ኸምኡ ጉባኤ ዞባ ኤውሮጳ ናይ ምቅርራብ ጉዕዞ ተጀሚሩ ኣሎ ኽብል ኣብሪሁ። ብምቕጻል ኣቦ ወንበር ሓደ ሰፊሕ ፕሮግራም ናይ ቤት ጽሕፈት ሓላፊ ወጻኢ ጉዳያትን ናይ ዜናን ባህልን ዝርዝር ኣንቢቡ ናብ ኹላትና ኽበጽሕ ምዃኑ እውን ሓቢሩ።

ድሕሪ ብጽምዋን ጥንቃቐን ምስማዕ ቓል ኣቦ ወንበር ንዝቐረበ ሓበረታን ሓድሽ ምትእትታው መደብ ዕዮ ኣድንቖትን ንተሞክሮታትናን ኣብ ስራሕ ምትሕግጋዝ ኣዚዩ ጠቓሚ ምዃኑ ኣስሚሩሉ።

ካብ ዝቐረቡ ርእይቶ ንምጥቃስ ስጋብ ሕጂ ዝርኤ ዝጸንሔ ጻዕሪ ቤት ጽሕፈታትና ትካላታትና ኑኡድ እኳ ይኹን እምበር ተሞክሮታት ምልውዋጥን ምምልላእ ወይ ምትኽኻእ ንስርሓትና የሳልጥ ጥራይ ዘይኮነስ ብቦታ ዝኣክል ተራሓሂቕና ዘለና ሳላ ምዕቡል መራኸቢ ቡዙሃን ኽንቃራረብን ኣብ ስራሕ ተራኺብካ ኣጸቢቕካ ክትላለ ዝሕግዝ፣ ብሓቂ ዝንኣድ ሓሳብን ኣጋባብ ስራሕን እዩ ዝብል ነበረ።

ካብቶም ዝተረዳዳእናሉ ነጥብታት፣

1) ኩሉ ፕሮግራማት ነቲ ቐዳምነት ክዋሃቦ ዘለዎ ኣለሊኻ ብምኽፋል ውሱን ግዜ ብምሃብን ጽብጻባት ስርሓት ኽቐርብን ንቕድሚት ዝኸደሉ ወይ ዝስጉመሉ ኣጋባብ ኽሕዝ ምግባር።

2) ኹሉ ዝስራሕ ስራሕ ደቒቕ ጸብጻብ ውሽጣዊ ኮይኑ ንደገ ዝወጽእ ኸም ዜና፣ ሪፖርታጅ ፣ ሓቤረታ ምትሕልላፍ፣ንስራሕ ሰልፍና ምስ ህዝቢ ምልላይ ኣገዳሲ እኳ ይኹንምበር እንጽሕፎ ሕጽር ዝበለ ክኸውን እቲ ዝተመርጸ እዩ። ኹሎም ወረ ዘመሓላኪፉ ካብ ተገዳስነት ልምድን ዝነቐለ ድኣምበር ሞያኛታት ወይ ናይ ጋዜጣ ኺኢላታት ስለ ዘይኮና ንዓቕምታትና ምድላብ የዲሊ እኳ እንተኾነ ሰልፍና ብጨናፍሩ ኣቢሉ ኣብቲ እንነብረሉ ሃገራት ብምድህሳስ ንመንእሰያትና ዕድል ትምህርትን ንስርሓትና ኽኣ ብኺኢላታት ኽስራሕ ዝጠቅም ዓውዲ ስራሕ ኸነማልእ ስል ንኽእል ንምምላኡ ኽንጽዕር ኣለና ዝብል ሓሳባት ቐረበ።

3) ዓውደ-መጽናዕቲ (workshop) ኽንገብርን ኣብ ስርሓትና ኣወንታዊ ምትሕግጋዝን ምምልላእን፣ ጽፉፍ ኣጋባብ ኣሳራርሓ ኸነኻይድ፣ ፍልጠትና ኽምዕብልን ውጺኢት ስርሓትና ኣዕጋቢ ክኸውን ምእንቲ ኸም ስራሕ ኽንትሓሓዞ ኣለና ዝብል ሓሳብ እውን ሰሚሩሉ።

4) ናይ ኹላትና ኢ-መይል፣ ስካይፐ ብምልውዋጥን ንኹላትና ዘራክበና ቦታ ኽንገብርን ኽንጥቀመሉ፣ ቑልጡፍ ሓቤረታት ኽንላዋወጥን ጡርኑፍ ኣሳራርሓ ኸነታኣታቱ እዩ ድልየትና ።

5) ኣዚ ሓዲሽ መራኸቢ ቡዙሃን ከም ትዊተር፣ ፈይዝ ቡክ ፣ይቱብ ኻልእ ሓደስቲ ዝወጹ ናውቲ፣ ቢፍላይ መንእሰያትና ምስ መዘናታቶም ክራኸቡን ከም እዋኑ ዝጠልቦ ሙዕቡል ኣጋባብ ክጥቀሙ ክንታሓባበሮም ኣለና ኽብል ኣኼባ ተደምደመ።

  ሓላፊ ዜናን ባህልን ዞባ ኤውሮጳ

 ፍትዊ ኽፍለ

ኣርዓዶም በርሀ

“ስንኩል ንስንኩል ይዋቕዑ ብድንኩል” እዚኣበሃህላ’ዚ ኣብ ባህልና ልሙድ ኮይኑ መልእኽቱ ድማ ክልተ ድኹማት እንተተላፈኑ’ውን ኣየድምዑን እዮም ዝብል እዩ። ሎሚ ኣብ ህዝብና ናይ ለውጢ ድሌትን ቅሩብነትን ኣሎ። ኣብ ሃገርና ድማ ገሃርሃር ዝብል ናይ ለውጢ ወድዓዊ ባይታ ኣሎ። እቲ ኣዘራራቢ ኮይኑ ዘሎ እምበኣር ነቲ ብሱል ባይታ መዚኑን ሓድነቱ ኣድልዲሉን ናብ ረብሓ ህዝብን ሃገርን ከውዕል ዝኽእል ቃያሪ ሓይሊ ክጥረ ዘይምኽኣሉ እዩ። ከምቲ ካብቲ ክምዝገብ ንቃለሰሉ ዘለና ለውጢ ተጠቀምቲ ብዙሓት ምዃና ዘየዳዲ፡ እቲ ለውጢ ንክረጋገጽ ክስለፍሉ ዝግበኦም ሰብ ጉዳይ ኤርትራውያን’ውን ብዙሓት ኢና። ካብዞም ብዙሓት ሰብ ውራይ እቶም ቅድም ቀዳድም ዝጥቀሱ ሓፋሽ ህዝቢ ኤርትራ ብዓብይኡ ኮይኑ፡ ፖለቲካዊ ውድባትን ሲቪላዊ ማሕበራትን እውን ቅድሚት ዝስለፉ ውዱባት ኣካላት እዮም። ህዝብና ሎሚ ኣብ ትሕቲ መሰል ምውዳብ ዝነፍግ ገዛኢ ሓይሊ ስለ ዘሎ ነቲ ድሌቱን ህርፋኑን ብዝምጥን ፍጥነት ኣብ ናይ ለውጢ ጐደና ክምርሽ ኣብ ዘይክእለሉ ሃለዋት እዩ ዝርከብ።

እቲ ኣብ ዓዲ ጓና ዘሎ ውድባትን ማሕበራትን እውን፡ ብዘይካቲ ምስቲ ቀንዲ ደላይን ዋናንን ናይ ለውጢ ዝኾነ ህዝቢ ዝባኑ ቀሊዑ ብኣካል ተራኺቡ እሂንምሂን ክብሃሃል ዘይምኽኣሉ ሓደ ንቃልሱ ካብ ዝብድህዎ ሕጽረታት እዩ። ናቱ ባዕላዊ ስንፍና እንተወሲኽሉ ኸዓ እቲ ጉዕዞ ክሳብ ክንደይ ጽንኩር ከም ዝኸውን እዚ ንነብረሉ ዘለና ናይ ቀንፈዘው ህይወት ባዕሉ ምስክር እዩ። እንተኾነ እዚ ሕጽረታት እዚ ከምቲ “ካብ ልቢ እንተሓዚንካ ንብዓት ኣይኣብን’ዩ” ዝበሃል ቅንዕናን ናይ “ክገብሮ ኣለኒ” በሃልነት ኒሕን እንተልዩ ዘይከኣል ዕማም እዩ ማለት ኣይኮነን። ብዙሕ ዋጋ ከም ዘኽፍል ግና ከሎ ጌና ከነስተብህለሉ ዝግበኣና እዩ። ኣብዚ ሒዝናዮ ዘለና ከምቲ ንደልዮ ዘይሰለጠና መንገዲ፡ ኩሉ ግዜ መውጽኢ ኣፍና ጌርናዮም ክንስና ብተግባር ግና ዘየዕወትናዮም  መብጸዓታት ሓደ “ሓይልና ደልዲሉ ንጸላኢ ዘርዕድ ቀጺሉ ድማ ዘወግዶ ምእንቲ ክኸውን ሓቢርና ንስራሕ” ዝብል ምሉእ ሓሳብ ምዃኑ ኩልና ንሰማማዓሉ እዩ ዝብል እምነት ኣለኒ። እዚ መብጸዓዚ ምምብጻዕን ከምቲ ዝተመባጻዕካዮ ኮይንካ ምቕራብን በበይኑ፡  እኳደኣ ኣዝዩ ዝረሓሓቕ ምዃኑ ናይ ክሳብ ሕጂ ተመኩሮና ምሂሩና እዩ። እንተኾነ ነዚ ናይ ገዛእ ርእስና ተመኩሮ እውን ክንድቲ ዝድለ ኣይተመሃርናሉን። ከምኡ ስለ ዝኾነ ኢና ድማ ብዛዕባኡ ወርትግ ደጋጊምና ክንዛረበሉን ክንጽሕፈሉን ተገዲድና ዘለና። ገለገለ ወገና ነቲ ጉዕዞና “ስብራ ዘየብሉ ጓይላ” ዝብልዎ’ውን ካብዚ ብምንቃል እዩ።

ውድብ ኮነ ማሕበር ወነንቲ ጽቡቕ ድሌት ውልቀሰባት ተኣኪቦም እዮም ዝምስርትዎን ዘዕውትዎን። ብርታዐን ዓቕምን ናይዚ ውዳበታት ድማ ካብ ዓቕምን ብርታዐን ናይዞም መስረቱን ኣንቀሳቐስቱን እዩ ዝቕዳሕ። ንሳቶም ብቑዓትን ውፉያትን እንተኾይኖም ወዮ ውድቦም ወይ ማሕበሮም ብኽንድኡ ደረጃ የድምዕ። ንሳቶም ሰነፋት ካብ ኣፍንጨኦም ኣርሒቖም ዘይርእዩን ናይ ህዝቦም ጸበባ ዘየሳሕዮምን እንተኾይኖም ከዓ ብኽንድኡ ደረጃ ይደክም ምናልባት እውን ጠቕሊሉ ካብ መስርዕ ቃልሲ ይወጽእ። ውድባት ይኹኑ ማሕበራት ዝያዳ ከድምዑ ከም ዝግበኦም ምስ ተረድኡ ክገብርዎ ካብ ዝግበኦም ብዙሕ ሓላፍነታዊ ስጉምታት ሓደ ከምቲ “ዝሓበራ ኣጻብዕ ኣርቃይ የዘንብዓ” ዝበሃል ሓደ ዝዕማሙ ክንሱ በበይኑ ንዝወፍር ዓቕምታት ኣብ ናይ ሓባር ናይ ቃልሲ መኣዲ ከም ዝቕረብ ምግባሩ እዩ። ከምቲ ብቕዓት ውድባት ኣባላተን ካብ መጀመርታኡ ጀሚሮም ብዝመርጽዎ መንገድን ዘርእይዎ ተወፋይነትን’ዩ ዝውሰን ዝበልናዮ፡ ግንባራት፡ ምሕዝነታት፡ ኪዳናትን ባይቶታት ኣውን ዓቕመን ኮነ መልከዐን ነቲ ዘቑመን ውድባት ይኹን ማሕበራት ዝመስል ክኸውን ናይ ግድን እዩ። ውድባትን ማሕበራትን ናብዚ ዝተጠቕሰ ናይ ሓባር መድረኻት ከንቅዱ እንከለዉ፡ ዕላማኦም ብኻለኦት ኣብ ዝተኣጉደ መጋርያ ንምስሓን ጥራይ ዘይኮነ፡ እቲ መጋርያ ውልዕ ኢሉ ከየብሰለ ወይ ከየሞቕ ምእንቲ ከይጠፍእ ነናቶም መጻኢ ራእይ ዘንጸባርቕ መወዓዓዪ ሓሳብ ሒዞም ክቐርቡ ይግበኦም። ኣብ’ዚ ግና እቲ ሒዘምዎ ዝቐርቡ ራእይ፡ ናብቲ ናይ ሓባር ዕዳጋ ቀሪቡ ናይ ምሻጥን ዘይምሻጥን ዕድል ዘለዎ እምበር፡ ናይ ግድን ናተይ ቅቡል እንተዘይኮነ ኢልካ እምባጋሮ እትፈጥረሉ ኣይኮነን። ኣብቲ ናይ ሓባር መድረኽ ራእይካ ብርኡይ ምኽንያት ክሰዓር እንከሎ፡ ግዚያዊ ስዕረትካ ተቐቢልካ፡ ነቲ ካብ ናትካ ዝያዳ ልዕልና ረኺቡ ናይ ሓባር ክኸውን ዝተመርጸ ሓሳብ ከም ናትካ ጌርካ ምቕባሉን ብምሉእ ልብን ዓቕምን ምትግባሩን ካብ ሓደ ዕቱብ ናይ ለውጢ ሓይሊ እትጽበዮ እዩ።

ናብቲ ኣርእስተይ ክምለስ። እቲ ቀዳምነት ክወሃቦ ዝግበኦ ቅድሚ ብኸመይን ምስ መንን ልፍንቲ ምቑጻር፡ እንታይ መላፈኒ ዓቕሚ ከም ዘለካ ምፍላጥን ካባኻ ዝድለ ዕጥቂ ክትዕጠቕ ክትበቅዕን ናይ ግድነት እዩ። ሓደ ውድብ ከም ስሙ ውድብ ንክበሃል ጥራይ ዘይኮነስ ውድብ ንክትከውን ከተማለኦ ብዛዕባ ዝግበኣካ መምዘኒ ዝምልከት ምናልባት ኩልኻ ኣብ ሓደ ዘይቅየር መዕቀኒ ቀትዒ ምርድዳድ ኣይከኣልን  ይኸውን። ምኽንያቱ ዝተፈላለዩ ወገናት ነናቶም መምዘኒ ኩነት ንምስኣል ኣብ ግምት ዘይእትዉዎም ነጥብታት ክፈላለዩ ስለ ዝኽእሉ። ብውሕዱ ግና፡ ኣብ ቀጻሊ ኣባላት ናይ ምምልማል፡ ጥቡቕ ዝምድና ምስቲ ምእንታኡ እየ ዝቃለስ ዘለኹ እትብሎ ህዝብ ምፍጣርን ድሌቱ ምርዳእን፡ በብግዜኡ ንዘጋጥሙ ምዕባሌታት ዝርዕም ሜላታት ምህንዳስ፡ ኣብ ዝተወሰነ ግዜ ዝመረጽካዮ ሜላ ብተግባር ዘየሰጉም ኣብ ዝኾነሉ ኣጋጣሚ ግዜ ከየባኸንካ ሓድሽ መዋጸኦ ሃሰስ ምባል፡ እትምረሓሉ ነጻ ራእይ ምውናን፡ ኣባላትካ ምስቲ ዝፍጠር ምዕባለታት ዘሰጉሞም ብቕዓት ከም ዝውንኑ ምኽኣል … ወዘተ ናይ ሓደ ውድብ ተግባራት ክኾኑ ይግበኦም። እዚ ንጥፈታት ኣብ ዝበኾረሉ፡ ዝተወሰነ ሓይሊ ሰብ ሒዝካ፡ ጉባአ ኣካይድና፡ ኣኼባ ሓጋጊ ኣካል ኣሳሊጥና፡ ኣብ ኣኼባ ፈጻሚ ኣካል ቀኒና እንዳበልካ ደድሕሪ’ዚ ፍጻመታት ሓድሽ ጉዳይ ዘይንበበሉ ደምዳሚ መግለጽታት ብምውጻእ ጥራይ ውድባዊ ፖለቲካዊ ህይወት ክረጋገጽ ኣይክእልን እዩ።

እቲ ዝያዳ ዘገርምን ሕጂ’ውን ከእረም ዝግበኦን ከዓ ኣብዞም ዝተጠቕሱ መምዘንታት ሰሪሕካ ከምቲ እትጽወዓሉ ህይወት ዘለዎ ውድብ ድዩ ማሕበር ክትከውን ዘይበቃዕካ ክንስኻ፡ ኣብ ክንዲ ናብ ውሽጢ ናብ ደገ እንዳማዕደኻ ብዛዕባ ካለኦት ክትወራዘ ምፍታን እዩ። እቲ ካልእ ግጉይ ጉዳይ ንገዛእ ርእስኻ ከም ውድብ ወይ ማሕበር ትንፋስ ሰዂዕካ ክትቀውም ስለ ዘይከኣልካ ረይረይ እንዳበልካ እንከለኻ ምስ ካለኦት ክትላፈን ዝግበር ሃቐነ እዩ። ኣብ ከምዚ ኩነታት ዝፍጠር መላፈኒ መድረኽ ክትቃለሰሉ ዲኻ ወይስ ክትዕቆበሉ ፍሉጥ ኣይኮነን። እቲ ምሳኻ ዝላፈን ከማኻ ድኹም እንተኾይኑ እሞ ድማ ውጽኢቱ  ብሓቂ “ ስንኩል ንስንኩል ይዋቕዑ ብድንኩል” ኮይኑ ናብ ዓዲ ውድቀት መገሻ እዩ ዝኸውን።

”ቆልዓ ብንእሱ ቆርበት ብርሕሱ” ዝብል ምስላ ወለድና ኣብ ከምዚ ንርከበሉ ዘለና ፖለቲካዊ ሃለዋት እውን ዝሰርሕ ኮይኑ እዩ ዝረኣየኒ። ሓደ ነገር ክንጅምር እንከለና ውድብ ድዩ ግንባር እቲ ዝድኮነሉ ባይታ “ክሳብ ክንደይ እዩ ጥጡሕ” ንዝብል ሕቶ ካብ ልቢ ክንሻቐለሉ እዩ ዝግበኣና።  ብሰንኪ ታህዋኽ ድዩ ካልእ ምኽንያት ከም መንቀሊ ዝመረጽናዮ ባይታ ዘይጽኑዕ እንተኾይኑ፡ ደሓር ዝፍጠር ነቓዕ ንምልጋብ ኣዝዩ ኣጸጋሚ እዩ። ምናልባት እውን ኣይከኣልን ይኸውን። ከምዚ ዓይነት ታህዋኽን ኣቋራጭ መንገዲ ምምራጽን ዝፈጠሮ ጸገም ኣብ ብዙሕ ፖለቲካዊ ተመኩሮ ዘጋጥም እዩ። ንሕና ሓይልታት ተቓውሞ ኤርትራ፡ ነዚ ብዝምልከት ተመኩሮ ንምንዳይ ኣርሒቕካ ምጋሽ ወይ ዓበይቲ መዛግብ ምግንጻል ዘድልየና ኣይኮነን። ንተመኩሮና ኣብ ግዜ ምትእኽኻብ ሃገራዊ ሓይልታት ኤርትራ፡ ምሕዝነት ሃገራዊ ሓይልታት ኤርትራ፡ ኤርትራዊ ደሞክራሲያዊ ኪዳን፡ ኮሚሽ ኣቃቂ፡ ባይቶ ኣዋሳ ብኽፉት ኣእምሮ ሃሰስ እንተንብሎም ካባና ሓሊፉ ካለኦት ዘይኤርትራዊ ኣካላት’ውን ክመሃርሉ ዝኽእሉ ምስጢራት ኣለዎም። ነቲ በብግዜኡ ኣብ መንጎ ውሱናት ውድባት ከጋጥም ዝጸንሐ ናይ “ስርሕ ብትን” ተመኩሮ ሓድነታትን ልፍንትታትን  እንተወሲኽናሉ’ሞ ኸዓ እቲ ቤት ትምህርቲ ኣዝዩ ሰፊሕ መኾነ። መን’ዩ እሞ ክይመሃረሉ?

ኣብ ሓደ ኣጋጣሚ ዝመረጽካዮ ናይ ሓባር መድረኽ ምስራሕ ይኣቢ። ካብቲ ብዙሕ ምኽንያታት ናይቲ ኣብያ፡ ቅድም ክትብገስ እንከለኻ ዘይዳህሰስካዮም ምዕባለታት ደሓር ግዜኦም ጸብጺቦም ስለ ዝመጹ’ሞ ፍታሕ ስለ ዝደልዩ ሓደ ምኽንያት እዩ። ኣብ ከምዚ ኩነታት ክትከፍቶ ፈቲንካ ምኽፋት ዝኣበየካ ማዕጾ ክትኩሕኩሕ ግዜን ጉልበትን ምብኻን ውሕሉል ኣተሓሕዛ ጉዳያት ኣይኮነን። እቲ ውሕሉል መፍትሕስ ብዓንተብኡ ካልእ መማረጺ ምድላይ እዩ። ምናልባት እቲ ደሓር ዝምረጽ መዋጸኦ ናይቲ ቀዳማይ ግና ምስራሕ ዝኣበየ መድረኽ ምፍራስ የስዕብ ይኸውን። ኣብዚ እዩ እምበኣር ኣብ ልዕሊ ከም ዘይስርሕ ባዕሉ ዝተዛረበ መድረኽ ከይትጭክን ክትብል፡ ካልእ ከስርሕ ዝኽእል ዕድልን ግዜን ከይሃድመካ ንምድሓኑ  ትብዓትን ውሕልነትን ዝሓትትን።

10 ታሕሳስ 2014

ብዕለት 05-12-14 ናይ ሓለፍቲ ዞባ ኤውሮጳ ብመራኸቢ ብዙሃን ፓል ኣቢሎም ኣኼባ ኣካይዶም።

ኣቦ ወንበር ሓው ብርሃነ ገብረክርስቶስ ህሉው ኹነታት ሃገርና ኻብቲ ናይ ቅድም እናገደደ ቀረብ ዘይርከበሉ ብነፍሒ ወይ ፕሮፓጋንዳ ስርዓተ ውልቀ መላኺ  ዓይኒ ህዝብና ንምድፋንን እዝኑ ንምጽማምን ዕለታዊ መደበ-ስርሑ ኣብ ርእሲ ምዃኑ  ኣብዚ እዋን እዚ ኽኣኸምቲ ሉሙድ ሓሶቱ ሓዲሽ ወረ ወተሃደራዊ ኣጎልጉሎት ሓደ-ዓመቲን ሾመንተ ወሪሒን ኪከውን ኢዩ ዝብል ኽነፍሕ ጀሚሩ ኣሎ ።እዚ ወረ እዚ ነቲ ኣብ ውሽጢ ዘሎ ህዝብና ኸደናግር ዘይክእል እኳ ኣንተኾነ ኒቲ ኣብ ዲያስፖራ ዝነብር ምስ ዲክታተር ዝዳናገጽ ዝዓለመ እዩ፣እዚ ሽጣራ በቢግዚኡ ዝጥቀመሉ፣ ግዜ ምንዋሕ ግዝኣቱ ንምንዋሕ ኢሉ ፉሹል ስራሕ፣ ኑኹሉ ቡሩህ ኮይኑ ቓልስኻ ብዘይ ምድኻም ምቕጻል እዩ።እታ ሓንትን መጠርሽታ ኽገብራ ዘለዎ ስልጣን ንህዝቢ ምስርካብ እዩ ፣እዚ ግን ኣብ ርእስን ሓሳብን ውልቀ መላኺ ስለ ዘየሎ ህዝቢና ብቓልሱ ኣቢሉ ባዕሉ ስልጣን ኻብ እዚ ዲክታተር መንጢሉ ህዝባዊን ዲሞክራሲያዊት ስርዓትን ሉእላዊት ሃገርን ሓድነቱን ዘጠንክረልሉ ባዕሉ እዩ።   

ኣብ ኤውሮጳ ብፍላይ ኣብ ደኒማርክ ነዞም ሓደሽቲ ዕቑባ ዝሓተቱ ኣስጋኢ ወረ ይስማዕ ኣሎ፣ መንግስቲ ደኒማርክ ኸም ዝብሎ ሉኡኹ ናብ ኤርትራ ሰዲዱ ምስ ስርዓተ ኢሳያስ ተራኺብና ዝረኸብናዮ መረጋገጺ ምሕረት ኽግበረልሎምን ብሓገዝ መንግስቲ ደኒማርክ ናብርኦም ከጣጥሑ ይኽእሉ ብምብእል ንቡዙሓት ዜጋታትና ናብ ሃገሮም ኽመልሶም ይቃራረብ ምህላዉ እንሰምዖ ዘለና ወረ እዩ።

ንሕና ብወገና እዚ ምትላል ስርዓተ ኢሳያስ መጀመርታን መጠረሽታን ኣይክኸውንን እዩ፣ስለዚ ንምድሓን ዜጋታትና ምስ ሰብኣዊ መሰላት ዝጣበቓ ማሕበራትን ፣ ዲሞክራሲያን ውድባትን ፣ ምስ ኹሎም ዉዑል ጅነቭራ ዝቕበሉ ባእትታትን። ዝተፋላለዩ ኣመንቲ ቤተ ክርስትያናት ደቂ ደኒማርክ ብምትሕብባር ናይ ዕቑበኛ ሰባዊ መሰላቶም ኽሕሎ ኽንጽዕር ኣለና።

ብዛዕባ ደምበ ፍትሕን ዲሞክራስን ፣ኹሉ ናብ ጉባኤታቱ ዝኸይድን ገሊኡ ኽኣ ድሮ ዝገብርን ብሚዲያ እንሰምዖ ዘሎና ሃዋሁው እዩ፣ ብወገና እቲ ሓቢርካ ምስራሕን ኣብ ሓደ ንኹላትና ኽጥርንፍ ዝኽእል ጽላል ንምብጻሕ ጺዕርናን ኽንጽዕርን ምዃና ደጊምና እነራጋግጾ ጉዳይ እዩ።

ንሕና እውን ንዝመጽእ ዘሎ ዓመት ስልፋዊ፣ ዞባዊ፣ ጉባኤታትን ፈስቲቫልን ከነካውን ስለ ዝኾንና መደባትን፣ ምቅሊት ስርሓትን ጌርና ጉዕዞ ስራሕ ብምጅማር ኑጡፉን እሩሙን ኣጋባብ ምኽታል ኸድሊየና እዩ ኽብል መድሩ ደምደመ።

ሓለፍቲ ዞባ ነቲ ዝተዋህበ ኣርእስቲ ዘትዮም ዘድሊ ስጉምትታት መደብ ስራሕ ኣውጺኦም ንስራሕ ንምጓዓዝ ብሙሉ ሓይሎም ኽሰርሑ ተራዲዶም።

ሓላፊ ዜናን ባህሊን ዞባ ኤውሮጳ

ፍትዊ ክፍለ 

ብዕለት 06-12-2014 ካብ ሰዓት 14.00 ክሳዕ ሰዓት 18.00 ድሕሪ ቀትሪ ዝተኻየደ ኣኼባ ጨንፈር ከሎንን ከባቢኡን ብዓወት ከምዝዛመ ካብኡ ዝተመሓላለፈ ዜና እነሆ።

ኣኼባ ብኣቦ መንበር ጨንፈር ሓው ዓንደብርሃን ዮውሃንስ እንቋዕ ብደሓን መጻእኩም ብምጅማር ነቶም ኣኼበኛታት ብናይ ሕድሕድ ምልላይ ገይሩ ነቲ ኣኼባ ከፈትዎ።

ሓው ዓንደብርሃን ዮሃንስ ብዛዕባ ሰልፊ ዲሞክራሲ ህዝቢ ኤርትራ ኣንጻር ስርዓት ህግዲፍ ኣብ ኵሉ መዳይ ዘካይዶ ቃልሲ ሰፊሕ መግለጺ ንጨንፈር ገሊጹ።                                                                                                                    ብድሕሪዚ ጨንፈር ኮሎን ብዛዕባ ውሽጣዊ ምምሕዳሩ ዝምልከት  ምምይያጥ ብምግባር  ኣሰራርሓ ጨንፈር ክግምግምን ክሰርሓሉ ዘለዎ መንገዲን ተዘራሪብሉ። ኣብ ርእሲኡ ኣኸበኛ ጨንፈር ብዛዕባ ዝመጽእ ዘሎ ሓዲሽ ዓመት 2015 መደብ ዕዮ ሰልፊ ብምክትታል ሕኑን ቃልሲ ከካይድ  ብዃኑ ቃል ኣትዩ።

ኣስዒቡ ሰልፊ ዲሞክራሲ ህዝቢ ኤርትራ በቲ ኣውጺእዎ ዘሎ እማሜ መሰረት ምስ ኵሉ ደላይ ፍትሒ ሓቢሩ ናይ ምስራሕ ዝብል ኣምር ጨንፈር ከሎንን ከባቢኡን ነዚ እማሜ ኣዚ ከም ዝደገፎን ኣብ ስራሕ ከተግብሮ ምዃኑ ኣስሚርሉ።

ኣብ መወዳእታ ኣኸበኛ ርእይቶታቱን ለበዋኡን ብምሃብ ብዝኽሪ ስዉኣት ኣኼባኡ ፈጸመ።

ብንኡስ ዞባ ሽማግለ  ዞባ ጀርመን ዝተጸውዐ  ሰሚናር፡ ስርዒታውያን ሓለፍቲ፡ ኣብ ከተማ ፍራንክፈርት ብዕለት 06-12-2014 ዓ.ም. ኣኼባኡ ብምክያድ፡   ዕዉት ስራሕ  ኣሰላሲሉ።

ኣብ መኽፈቲ ሰሚናር ሓው ተስፋማርያም ክብረኣብ ኣቦ መንበር ንኡስ ዞባ ጀርመን ኣንቋዕ ብደሓን መጻእኩም ብምባል ነቲ ነዚ ዕለት እዚ ተዳሊዩ ዘሎ ዛዕባ ብምትንታን ከፈቶ።

ብድሕሪዚ እዚ ኣብ ድሮ ሓዲሽ ዓመት 2015 ን መደምደምታ ዓመት 2014 ን ዝተገብረ ሰሚናር ኵለን ጨናፍር ንኡስ ዞባታት ጀርመን  ነቲ ኣብ 2014 ዘካየድኦ ንጥፈታተን ብመራሕቲ ጨንፈራተን ብቐደም ተኸተል ብንጹር ኣወታውን ኣሉታውን ጸብጻበን ኣቕሪበን።

እዚ ጸብጻብ እዚ ነዚ ዝመጽእ ዘሎ  ሓዲሽ ዓመት ሰልፊ ዲሞክራሲ ህዝቢ ኤርትራ ብፖለቲካውን ማሕበራዊን ዲፕሎኦማስያዊን ቁጠባውን ባህላዊን መዳያት  ንምሕያል ጥጡሕ ባይታ ዝፈጥርን ንዅሉ ኣወንታዊ ከይዲ ዝተብገረ ስራሓት ንምስፋሕን እቲ ኣሉታዊ ጐድንታት ድማ ከይድገም  ካባኡ ብምምሃርን  ምጽጋንን  ዘኽእል እኹል  መግለጺ ተዋሂቡ።

ሰሚናር ካብዚ ብምብጋስ ንዝመጽእ  ሓዲሽ ዓመት 2015 ክሰርሖም ዘለዎ ሓዲሽ መደብ ዕዮታትን እማመታትን ብምስራዕ ነዚ መደባት እዚ ተግባራዊ ንምግባር  ብቑዓት ኣካላት ምምዳብን ምቁጽጻርን ክግበረሉ ከም ዘለዎ ብጥብቂ ኣስሚርሉ።    

              ብድሕሪዚ ኣኼበኛ ሰሚናር ብሃናጺ ርእይቶታትን ለበዋታትን ሂቡ ብዝኽሪ ስዉኣት ኣኼባኡ ዛዘመ።