http://ascenteq.com/project/epdp

ኣብ ዓለምና ቁጽሪ መንእሰይ ናይ ክልቲኡ ጾታ፡ ማለት ካብ 15-30 ዝዕድሚኡ ኣዝዩ ብዙሕ እዩ። ብፍላይ ኣብ ኤርትራ ድማ መንእሰይ ካብ ጠቕላላ ብዝሒ ህዝቢ ሰለስተ ርብዒ ከም ዝሕዝ ዝተፈላለዩ ወገናት ይሕብሩ። ክልቲኡ ጾታ ብዘይ ኣካላዊ ተፈጥሮኣዊ ፍልልይ ብኣተሓሳስባ ኮነ ብመሃዝነት ሓደ እዮም። እዚ ማለት ኩሉ ከከም ዓቕሙ ክምዕብል ዝኽእልን ክምዕብል ዘይክእልን ክኸውን ይኽእል እዩ።

መንእሰይ ዓይኒ ሃገር፥ እምነ-መሰረት ብልጽግናን ምዕብልናን ሃገርን ምንጪ መሃዝነትን እዩ። ብዘይካዚ ሃገር ኣብ ጐደና ዕቤትን ገስጋስን ክትቅጽል ዘኽእላ ህላዌ መንእሰይ እዩ። መንእሰይ ክበሃል ከሎ ከምቲ ኣቐዲሙ ዝተገልጸ እቲ ኣብ ክሊ ዕድመ 15-30 ዓመት ዘሎ ክፋል ሕብረተሰብ እዩ። እዚ ከበሃል ከሎ መንአሰይ ይዓቢ ይሽምግል ይኣርግ ዝትክእዎ ከኣ ይፍጠሩ። ስለዚ መንእሰይ ብቐጻሊ እናተተኻኸአ ዝመጽእን ዝሓልፍን እምበር ደው ኢሉ ዝነብር ኣይኮነን።

መንእሰይ ከም ውልቀ ኣብቲ እኩብ ማሕበረሰብ ክረአ ከሎ፥ ፈሊኻ ዝረኣየሉ ጠባያት ኣለዎ። ንሱ ድማ ብባህሪ፡ ብምህዞ፡ ብሓልዮት፡ ብህርኩትነት፡ ከምኡ’ውን ዕሸልነትን፥ ንኹሉ ክፈልጥን በሃልነትን ዝኣመሰሉ፡ ዝልለየሎም መዕቀንታት ይህልውዎ። ይኹን እምበር ውልቀሰብ ካብ ሕብረተሰብ ተፈልዩ ንበይኑ ክነብር ከምዘይክእል ርዱእ እዩ። በዚ ዝኣክል ውልቀ ሰብ ብዘይሕብረተሰብ፥ ሕብረተሰብ ከኣ ብዘይውልቀሰብ ክህሉ ዘይግመት እዩ። በዚ ከኣ እዩ እቲ ንሕብረተሰብ በቲ ኣብ ውሽጡ ዘሎ ውልቀሰብ ተኣሳሲሩ ንረብሓ ኩሉ ዝፍጸም ሓሳባትን ተግባራትን ዝርከብ። ዋላ እውን ውልቀሰባት ነናይ ውልቆም ረብሓን፥ ዝናን፥ ኣነ ብሃልነትን ስምዒት እንተሃለዎም፡ ኩሉ እዚ ባህሪ እዚ ኣብ ውሽጢ እቲ ሓባራዊ ዝኾነ ሕብረተሰብ እንተስ ብእወንታ እንተስ ብኣሉታ ዝጸሉ እዩ።

መንእስይ ነቲ ናይ ኣሉታ ጎደና ገዲፉ፥ መመንጨዊ ሃናጺ ሓሳብ ኮይኑ፥ ነቲ እውንታዊ ዝኾነ ሓሳብ ምስ ዝኽተል ንናይ መላእ ሕብረተሰብ ሓባራዊ ረብሓ ዝውዕል ከም ዝኸውን ርጉጽ እዩ። መንእሰይ ውዑይ ሓይሊ ከም ምዃኑ መጠን ምናዳ ምናዳ ብትምህርቲ እናዓኾዀ ምስ ዝመጽእን ዝዂስኰስን እታ ሃገር ውሕስነት ናይ ኣፍራዪን ቁጠባኣ ዘዕብን ሓይሊ ክህልዋ ይኽእል። ብፍላይ ድማ ኣብ ምሕደራዊ ሸነኽ ካብቲ ቅድሚኡ ዝነበረ ክምኮርን፥ ክመሃርን ከሎ ነቲ ዲሞክርሲያዊ መስርሕ ከቀላጥፎን ንፍትሒ ክጣበቕን ይበቅዕ።

መንእሰይ ናይ ለውጢ ሃዋርያ እዩ እንተተባህለ ምግናን ኣይኮነን። ናይ ለውጢ ሃዋርያ እዩ ከበሃል ከሎ ግና ንሱ ንበይኑ ጥራሕ ቅኑዕን ዘይጋገን ገይሩ ንነፍሱ ክርእያ ኣይግባእን። እቲ ብቕድሚኡ ዝነበረ ወለዶ እውን መንእሰይ ከም ዝነበረን ኣብ ጉዕዞ ጌጋታት ይኹን ብዙሕ ቅኑዕ ተግባራት እናፈጸመ ከም ዝመጸ ርዱእ እዩ። እቲ ተካኢ መንእሰይ እምበኣር ነቲ ጌጋታት ኣብ ክንዲ ዝጽብጽብ ንሱ እውን ባዕሉ ናብቲ ጸገም እቲ ንኸይኣቱ ካብ ቅድሚኡ ዝነበሩ ክመሃር ናይ ግድን እዩ። ነዚ ተረዲኡ ድማ ነቶም ቅድሚኡ ዝነበሩ ክኸሶም ኣይግባእን። ኣብ ክንድኡ ነቲ ሃብታም ተመክሮኦም ክመሃረሉን ንሳቶም ተጋግየሞ ንዝበሎ ከእርምን ሓላፍነት ክርከብ ይግበኦ።

‘’መንእሰያት መራሕቲ ናይ ጽባሕ’ዮም” እናተባህለ ብዙሕ ግዜ ይዝረብ እዩ። ሓቂ እዩ መንእሰይ መራሕን ተካእን ናይ ጽባሕ ምዃኑ ዝኽሕዶ የለን። እንተኾነ መንእሰያት ናይ ብሓቂ ናይ ለውጢ ሃዋርያትን መራሕትን ክኾኑሉ ዝኽእሉ፡ ኣብ ፖለቲካ ይኹን ኣብ ዲሞክራሲያዊ ለውጢ ዝግበር መስርሕ ብዘበርክትዎን ብዝዋስእዎን እዩ ዝውሰን። ምኽንያቱ፡ መንእሰያት ተካእትን መራሕትን ኢዮም ካብ ተባህለ፥ ኣብ ፖለቲካዊ ዓለም ተሳቲፎም ክነጥፉን ክዋስኡን እዩ ዝግበኦም። ኣብዚ እዋንዚ ብሓደሓደ ተበለጽቲ ባእታታት ብዝካየድ ጐስጓሳት፥ ነቲ መንእሰያት ንፖለቲካዊ ተሳትፎ ዘጽልእን፥ ናብ ፖለቲካዊ ሰልፍታት ንኽሳተፉ ዘይዕድምን ዓንቃጺ ተራ ይጻወቱ ኣለዉ። እዚ ከኣ ነቲ ዲሞክራሲያዊ ለውጢ መስኖኡ ከም ዝስሕት ይገብሩ ምህላዎምን፥ መንእሰያት ነቲ ሓላፍነት ክርከቡ ኣብ ክንዲ ምስትምሃር፥ ንበይኖም ተገሊሎም እምበር ምስ ዘለዋ ፖለቲካዊ ሰልፍታት ተጸንቢሮም ንከይዋሳኡን “ነዘን ውድባት ይኹን ሰልፍታት ኣይትጸግዕወን” ብምባል፡ ክመሃርሉን ተመኩሮ ክቐስምሉን ካብ ዝግበኦም መድረኻት ከብኩርዎም ኣይግባእን።

ሎሚ፡ ብሰንኪ እዚ እኩይ ጐስጓስ ይኹን ካልእ ምኽንያታት ተሳትፎ መንእሰያት ኣብ ዝኾነ ሰልፊ እናተሸምረረ ወይ እናጎደለ ከኸይድ ከሎ፡ ዘስዕቦ ጉድኣት ሓደገኛ እዩ። ከም ሳዕቤን ናይዚ ናይ ሕድሕድ ጽልኢ ይዓቢ። መንእሰያት እውን ኣብቲ ክዓምዎ ዝግበኦም ፖለቲካዊ ሓላፍነትን ደሞክራሲያዊ መስርሕን ጽልኢ ይሓድሮም። እዚ ዝኾነሉ ቀንዲ ምኽንያት ከኣ መንእሰያት ኣብቲ ተደኲኑ ዘሎ ተካላዊ ፖለቲካዊ መስርሕ ኣትዮም ብዘይምውስኦም እዩ። እቲ ቀንዲ መንቀሊ ድማ መንእሰያት “ብሰልፍታት ክመጽእ ዝኽእል ለውጢ የለን” ኣብ ዝብል ግጉይ ተረድኦ ይኣምኑ እሞ ነቲ ‘’ብዘይህላዌ ፖለቲካዊ ሰልፍታት ዲሞክራሲ ውሕስነት የብሉን’’ ዝብል ስነፍልጠታዊ ኣምር ዘንጊዖም እቲ ዝደልይዎ ለውጢ ብቃልሲ ኣይመጽእን እዩ ናብ ዝብል ተረድኦ የምርሑ። እዚ ከኣ ካብቲ ቅድሚኦም ዝነበረ ክመሃሩ ካብ ዘይከኣሉ፥ ብዛዕባ ዲሞክራሲ ስልጠና ወይ ትምህርቲ ክረኽቡ ካብ ዘይከኣሉ፥ ኣብ ናይ ገዛእ ርእሶም ተረድኦ ናይ ዲሞክራሲ እዮም ክኣትዉ። ብሰንኪዚ ብስለትን ብልህነትን ክጎድሎም ስለ ዝኽእል ነቲ ክውንነት ጓስዮም ክጎዓዙ ምዃኖም ዘጠራጥር ኣይኮነን።

ስለዚ እቲ መንእሰያት ዝደልይዎ ለውጥን፥ ዲሞክራሲን ንበይኖም ተወዲቦም ጥራይ ዘይኮነስ ብዝያዳ ኣብቲ ዘሎ ፖለቲካዊ ሰልፍታት ብምስታፍን ብምውሳእን መንእሰያዊ ሓላፍነቶም ከበርክቱ ከለዉ እዩ ውሕስነት ዓወት ክህሉ ዝኽእል። ናይ ሎሚ ተካኢ መንእሰይ ናይ ጽባሕ ተተካኢ ነባር እዩ። ካብዚ ብምብጋስ እያ ሰልፊ ዲሞክራሲ ህዝቢ ኤርትራ ንድሞክራሲ ምእማኑን ምቕባሉን ጥራይ ዘይኮነስ ምትግባሩ እዩ እቲ ቀንዲ ቁምነገር ብዝብል ተረድኦ “መንእሰያት ንዑ ነዚ ሰልፊ ውረስዎ” እናበለት ደጋጊማ መጸዋዕታኣ እተቕርብ። ምኽንያቱ እቲ መንእሰይ ኣብ መስርሕ ካብቲ ዝነበረ ተማሂሩ ምስ ህልዊ ብምውህሃድን ንቕድሚት ብምምዕዳውን፡ ዓቕሚ ከጥሪ’ሞ እቲ ሰልፊ ብሓድሽ ብቕዓትን እተሓሳስባን ንክህብትም ስለ ዘኽእሎ።

ድራር መንታይ

30/10/2015

ምስ መርማሪት ኮሚሽን እትደጋገፍ ሓይሊ ዕማም ምቛም፡ ኣዝዩ ኣገዳሲ ምዃኑ ብሩህ እዩ። ኣብ  ሓጺር ጊዜ ቆይማ ስራሕ ክትጅምርን  ዘድሊ ምስንዳኣት ተጻፊፉ ክቕረብን ጽባሕ ዘይባሃሎ ህጹጽ ጉዳይ`ዩ። እዚ፡ ከቢድ ሓላፍነት ዝስከም ሓይሊ ዕማም`ዚ፡ ጀሚሩ ዝቕጽልን፡ ኣብ ስራሕ ንዘጋጥምዎ መኸታት በዲሁ ናብ ዓወት ዝምርሽ ኮይኑ ክቐውም ይግባእ። ስለዝኾነ፡ ብዙሕ ምምኽኻርን ምልኣት ተሳትፎም ናይ ኩሎም ደለይቲ ፍትሒ ኤርትራውያን  ከድልዮ ምዃኑ ክሳሓት ኣይግበኦን።

ንኣውያት ህዝቢ ኤርትራ ከም`ቲ ዝድለ ክስማዕ ዝገብር  ብኡ መጠን ድማ ብትብዓት ሰሪሑ  ፍትሒ  ዘጓናጽፍ ሓይሊ ዕማም፡ ናብ ኩሎም ደለይቲ ፍትሒ ኤርትራውያን ደገፍን ተቐባልነት ክረክብ ቅድመ-ኩነታዊ ተደላይነት ኣለዎ።  ረጊእካ ክሕሰበሉ ስለዚ ደማ ኤርትራውያን በብዝቕመጥዎ State/Province፡ እኹል ጊዜ ሂቦም ክዝተይሉን ብዕምቆት ተመልኪቶም ከሳላስልዎም ዝግባእ ስለዝኾነ፡ ኣብ ዝቐልጠፈ ጊዜ እቲ መስርሕ ክጅመር ይጥለብ።

ስራሕ ሓይሊ ዕማም ንቀጻሊ ደገፍ መርማሪት ኮሚሽን፡ ዘላቒን ውጽኢታውን ክኸውን ስለዘለዎ፡ ንቐጻልነቱን ጽፈት ስራሓቱን ዘገልግል ህዝባዊ ትካላዊ ኣሰራርሓ ዘለዎም ኮይኑ ክሳናዳእ ይህልዎ። እዚ ተማራጺ ኣገባብ`ዚ ኣብ ምትግባሩ፡ ኩለን ጥርናፊታትን ፖለቲካዊ ውድባትን ሞራላዊ ደጌፋታ ጥራሕ ዘይኮነስ፡ ኣብ ባይታ ዕዉት ኮይኑ ክወጽእ፡ ኩሉ ዘድሊ መሳላጢያታት ክወፍያን ብዕትበት ከም ሃገራዊ ሓላፍነትን ክዋፈራሉን ትጽቢት ይንበረለን። ቀጻሊ ደገፍ ንመርማሪት ኮሚሽን እተበርክት ሓይሊ ዕማም፡  ከም ሓደ  ዕዙዝ  ሃገራዊ ተግባረ-ስራሕ፡ ደንበ ተቓውሞ ሓደ ካብ`ቶም ዓበይቲ ዕማማት ንስርዓት ህግደፍን ኩሉ መሓውራቱን ንምስዓር  ዘቃላጥፉ፡ ዕማማት ወሲዶም፡ ብጥምረትን ስጥመትን ክዓስልዎ ይግባእ። እማመ ፕሮጀክት ንክዓሙቕ፡ ንክሰፍሕ፡ ኣብ መወዳእታ`ውን እ`ዚ ፕሮጀክት`ዚ ዕዉት ኮይኑ ክውጽእ ብተግባር ክሳተፉ ምስ ዝደልዩ ናይ ተቓውሞ ሃገራዊ ሓይልታት ኤርትራ፡ ብሓደ ከስርሕ ዝኽእል ምቹእ ባይታ ንምፍጣር ምርድዳእ ክግበር ኣድላዪ ይኸውን።

ርእይቶና ኣብ ምቛምን ስራሕን ሓይሊ ዕማማት፡

• ደለይቲ ፍትሒ በብከተምኡ  ነዚ ጉዳይ`ዚ ብዝምልከት ተጋቢኦም/ተወዲቦም ብደረጃ ስተይት (State) ሓደ  ዝውክሎም ሓይሊ-ዕማም (Taskforce) ይምስርቱ። ቀንዲ ኣተኩሮኦም ኣብ ዘዘለዎ (State) ዝርከቡ ንኤርትራውያን ምጉስጓስን ንኮንጉረስን ሰነይትን ናይ`ታ ዝቕመጡላ ስተይት ሕሱም ኩነታት ህዝቢ ኤርትራ ብጥራዓን/ፐቲሽን፡ ጽዑቕ ወፍሪ ምክያድ`ዩ።
• እቲ ካልኣይ ክንፊ ከኣ ብደረጃ ሰሜን ኣሜሪካ ዝምስረት ሓይሊ-ዕማም (Taskforce) ኮይኑ፡ በቶም ካብ ነፍሲ-ወከፍ ስተይትስ ዝተመርጹ ሓይሊ ዕማም ይቐውም። ስራሕ ካልኣይ ክንፊ ሓይሊ ዕማም፡  ፍሉይ ክእለት፡ ሞያዊ ብቕዓት/ፕሮፈሽናል፡ ዝሓትት ስለዝኾነ ኣብ ምምርጹ ወይ ምውካሉ ይኹን ኣብ ውህደቱ ፍሉይ ጥንቃቐ የድልዮ። ቀንዲ ኣተኩርኡ ንዋይት ሃውስ፡ ንባይቶን ሰነይትን/ፈደራላዊ ትካላት፡ ንስትይት ዲፓርትመንት፡ መንግስቲ ካናዳ፡ ዋና-ጸሓፊ ሕቡራት መንግስታትን ንሰብኣዊ መሰል ደቂ ሰብ ዝጣበቓኣህጉራዊ ትካላትን ዘደሃበ ይኸውን።

ነዚ ፕሮጀክት`ዚ ንምስላጥ:  ዝምስረታ ሓይሊ-ዕማም (Taskforce) ክልቲኤን:-

• ዕድመ ዘመን ኣገልግሎተን ንክልተ ዓመት ኮይኑ : ካብ 7 ክሳዕ 9 ኣባላት ይህልወን።
• ንሕርያ ኣባላት ናይ`ዘን ሓይሊ- ዕማም እዚ`ኣተን ዝምልከት  እንጥቀመሉ ረቛሒ ከኣ: ብቐንዱ “ብቕዓትን ተወፋይነትን ኮይኑ ሕብረ-ብሄር/ኣብዝሓ ክኸውን ግን ይምረጽ።
• እቶም ነዘን ሓይሊ-ዕማም ዝመስረቱ ከኣ ተቘጻጸርቲ ናይ`ተን ዝመስረትወን ሓይሊ-ዕማም ኮይኖም የገልግሉ።

ክጭበጥ ዝድለ ውጽኢትን ዝሰላሰል መደብ ስራሕን፡ መደብ ትግባረን ሰሌዳ ግዜን ብንጹር ምሕንጻጽ (Schedule for PLAN OF ACTION)

ብቦታ ደረጃ/ Cities/States/provinces

1. ህዝቢ: ብደረጃ State/Province ተወዲቡን ተወኪሉን ናብ ኣባላት ባይቶ ኣሜሪካን ካናዳን:  ዝቐንዔ ቀጻሊ (lobby) ጽዑቕ ጎስጓስ ምክያድ።
2. እማም ፕሮጀክት ምስ ከተማታት፡ ስተይትስ ፕሮቪንስ፡ ይኹን ምስ ዝሳተፉ ናይ ተቓውሞ ሃገራዊ ሓይልታት ኤርትራ፡ ብሓባር ምክላስ/REVISE: ምምዕባልን ምጽዳቕን።
3. ኣብ ኩሉ ከተማታት/ States/provinces፡ ሰሜን ኣሜሪካ ኣብ ዝሰላሰል ኣኼባታት፡

-    ክጭበጡ ዝድለዩ ውጽኢታት ምንጻር፡

-    ንከመይነት መለክዒ ናይ ዓወታት መራሒ ሓሳብ ኣብ ባይታ ምቕማጥ፡

-    ብከመይ ነረጋግጾን፡ ንምርግጋጾም ዘድልዩ ናውቲን መሳለጥያታትን ምውናን፡

1. ልዑል ጽልዋ ክፈጥሩ ተኽእሎ ኣሎዎም ዝበሃሉ ውልቀሰባትን ባእታትትን ኣለሊኻ ፍሉይ ጎስጓስ ምክይድ።

ብዞባዊ ደረጃ/North America

1. ብምሉእ ደገፍ ደለይቲ ፍትሒ: ኮሚሽን መርማሪት ው.ሕ.ሃ: ሓቀኛን ዝተማለኤን ጸብጻብ ከተርቐብ ምኽኣል፣ ስለዚ ሓቢርናን ሰሚርናን  ነዚ ፕሮጀክት  ከነተግብር ምኽኣል።
2. ዜጋታት ንጡፍ ግደ ተጻዊቶም: ተወሳኺ ሓቀኛን ዝተማለኤን ሓበሬታ ክልግሱ: ጽዑቕ ጎስጓስ ምኽያድ፣ ምንጪ ሓበሬታ ካብ ኣብ ግዳም ዝርከብ ህዝብና ጥራይ ከይተሓጽረ ካብ ውሽጢ ሃገር`ውን ዝርከበሉ ኩነታት ምፍጣር።
3. ምስናድ ዝተኣከበ ሓበሬታ: ናብ ቛንቛታት ኤርትራ ምትርጓምን ምዕቃብን።
4. መብዛሕቲኡ ህዝብናን ሕብረተሰብ ዓለም: ነቲ ጽዩፍ ተግባር ምኹናን ምውጋዝን: ከምኡ`ውን ኣብ ልዕልቲ ስርዓት: ቁጠባዊን ናይ ምንቅስቅስን ትጽዕኖ ምፍጣር::
5. እቲ ዋኒን ዋኒና: እቲ ጉዳይ ከኣ ጉዳይና ስለዝኾነ: ግዜ ምስ ፈቐደ: ኣብ ልዕሊ ኤርትራን ኤርትራውያንን ዓብን ዘነውርን ገበን ዝፈጸሙ ኩሎም (ኣብ ሃገርና) ባህልናን ያታናን ኣብ ግምት ብዘእተወ ኣገባብ (ንመምሃሪ ክኸውን): ኣብ ፍርዲ ንምቕራብ ሰረት ምንጻፍ።
6. ጸብጻብ ኮሚሽን: ናይ ዝበዝሔ ክፋል ሕብረት ሰብ ዓለም ደገፍ ምርካብ። ካብ መንግስቲ ኣሜሪካ: መንግስቲ ካናዳ፡ ው.ሕ.ሃን ንሰብኣዊ መሰል ደቂ-ሰብ ዝጣበቓ ኣህጉራውያን ትካላትን:  ጽኑዕን ተሪርን ደገፍ ኽረክብ ዝሕግዝ ስራሕ ምስልሳል።
7. እቲ ጸብጻብ ደገፍ ናይ ኤርትራውያን ክረኽብ ስለዘለዎ: ብሰላማዊ ሰልፊ መልክዕ ጥራይ ዘይኮነስ ብPetition  መልክዕ`ውን ደገፍ ክረከብ ጽዑቕ ጎስጓስ ምኽያድ።

በዚ እነቕርቦ ዘለና እማመ መሰረት ይኹን ወይ ካብ`ዚ ነቕርቦ ዘለና እማመ ኣብ ህዝባውነቱ ይኹን ተግባራውነቱ ብልጫ ዘለዎ እማመ፡ ህዝባዊ ምልዕዓል ኤርትራውያን ንፍትሒ፡ ኣብ  ምቛም ሓይሊ ዕማም ንደገፍ መርማሪት ኮሚሽን፡  ዘድሊ መሳለጥያታት ከበርክትን ክተሓባበርን ድልውነቱ ይገልጽ።

ምሉእ ዓወት ንሰላማዊ ሰልፊ ኒው ዮርክ!!

ቃልሲ ደለይቲ ፍትሒ ኤርትራውያን ክዕወት`ዩ!!!

ህዝባዊ ምልዕዓል ኤርትራውያን ንፍትሒ

ጥቅምቲ 26 2015

ሎሚ፡ እዚ ኣብ ኤርትራ ዝዕንድር ዘሎ እከይ ስርዓት ንድቅኻን፡ ማልካን፡ ንብረትካን ኣወፊኻ ኣብ ዘውሓስካዮ ናጽነት፥ ደም ጀጋኑ ደቅኻ ከይነቐጸ፡ በቲ ካብ ቀደም ዝለመዶ ኣገባብ ምሕደራ ሓመድ ድፋጫ የስሕነካ ኣሎ። ሰርዓታት ይመጹ ስርዓታት ይኸዱ ከመይሲ ዝነብር ህዝብን ሃገርን እምበር: ዝነብር ስርዓት የለን። ህዝቢ እንተዘየልዩ ድማ መንግስቲ ከምዘየለ ርዱእ ብምዃኑ ደጊም ከምቲ ናይ ዝሓለፈ ከይትታለል ስልጣንካ ኣብ ኢድካ ክትጭብጦ ኣሎካ።

እዚ ወጻዒ ጉጅለዚ በታ ካብ ነዊሕ ግዜ ጀሚሩ ‘’ንብጽይካ ፍተዎ እምበር ኣይትእመኖ’’ እትብል ሰራም ሓረግ እናተመርሐ እነሆ ሎሚ’ውን ንመላእ ሕብረተሰብ ኤርትራ ኣብ ነንሓድሕዱ ከምዘይተኣማመንን ከምዘይዛተን ገይሩ ከይተኣሰረካ እሱር ኰንካ ትነብር ኣሎኻ። ኢሰያስ ከምስል ሽዳ ሳእንን ሓጺር ዝእጅግኡ ሳርያንን ተኸዲኑ ኣብ ቅድመኻ ባንን በናናን እንተበልዐ፥ ካብ ኣብ ርእሲ ከተማ ኤርትራ ኮፍ ኢሉ ዘመሓድር ኣብ ዓዲ ሃሎ ተሓቢኡ፥ ንሱ ደኣ ሓላዪ እንድዩ ክበሃል ዝገብሮ ምትላል ደጊም ትርጉሙ ኣይስወረካን እዩ። ነኣኻ ኣፍካ ዝሓትመሉ ሜላ ተጠቒሙ በቶም መጋበርያታቱ በዓል፥ ኣልኣሚን መሓመድ ስዒድ፥የማነታት፡ ካሕሳይ ገብረህይወት፥ ኣስካሉ መንቆርዮስ፥ ብርገደድር ጀነራል ስምኦን ገብረድንግል፥ ኣብረሃ ካሳ፥ ሓጎስ ክሻ፥ ጀነራል ፊሊጶስ፥ ዑስማን ሳልሕ፥ ወዘተ ካልኦት እውን ኣስማቶም ዘይተጠቕሱ ሰብ መዚ ብኢሰያስ ጥራሕ ዝእዘዙ ቅተል እንተተባህሉ ዝቐትሉ፥ እሰር እንተተባህሉ ዝኣስሩ ብብርሃን ገዲፎም ብጸልማት ዝዋፈሩ ኣቢሉ ድከትካ የስትየካ ኣሎ።

ከምኡ’ውን ነዛ ሃገር ደው ከብላ፡ ከማዕብላን ክከላኸለላን ዝኽእል መንእሰይ ሃገሩ ገዲፉ ሃጽ ከምዝብል ገይሩ እታ ሃገር ብዕድመ ዝደፍኡ ጥራሕ ክተርፍዋ እሞ ናብ ስልጣኑ ገጹ ዝጥምት ከይርከብ ዝገብሮ ምዃኑ ርዱእ እዩ። ምኽንያቱ ንሱ እዚ ሃጽ ኢሉ ዝጠፍእ ዘሎ መንእሰይ ኣብ ስልጣኑ ሰላም ዘይህቦ ምዃኑ ስለዝፈልጥ፡ እታ ሃገር ብዘይ መንእሰያት ክትተርፍ ይገብር ኣሎ። ነዚ እውን ብሜላ ካብ ሕቚፊ ወለዱ ኣውጺኡ ኣብ ሳዋ ዳጒኑ ነንሓድሕዱ ከምዘይዛተን ዘይሰማማዕን ገይሩ ንህዝበይን ንሃገረይን ከምዘይብል ገይሩ ከዕውኖ ይጽዕር ኣሎ።

ሎሚ ካብ ህዝቢ ኤርትራ ኣብ ፈቐዶ ግሁድን ስዉርን ኣብያተ-ማእሰርቲ ተዳጒኑ ዘሎ ኣዝዩ ብዙሕ እዩ። ምኽንያቱ ሕግን ፍትሕን ዘኽብር ቅዋም ዘይብሉ ስርዓት ህዝቢ ከሳቒ እምበር ንሃብቲ ወይ ንብልጽግና፡ ንራህዋን ንቅሳነትን ክሰርሕ ማለት ዘበት ስለ ዝኾነ። እቲ ዝገደደ ድማ እቲ ቅድም ዝገበሮ ምስ ዘይኤርትራውያን ተሻሪኹ ንደቅኻ ካብ ሜዳ ምውጻኦም ከይኣኽሎ፥ ሎሚ’ውን ተመሊሱ ደምህት ኣምጺኡ ኣይሰለጦን ደኣምበር ብኣኣቶም ንኽትርገጽን ሕማቕ ክትርእን ፈሪዱካ’ዩ። ደምህት ካብ ኤርትራ ብምውጽኡ እቲ ጉጅለ ሕቖኡ ተጐዚዙ እዩ። እቲ ዝተረፈ ዕማም ድማ ናባኻን ናብ ሓይልታት ምክልኻል ሃገርን ዝተርፍ እዩ።

ብዝወልድካዮም ደቅኻ ክንድዚ ዝኣክል መከራን ግፍዕን ጭቖናን የጋጥመካ ኣሎ። ሓንቲ ሓጥያት ዘይብልካ ክንስኻ ከምዚ ክትረክብ ዘይግባእ ነይሩ። ግን ከኣ እቲ ካብ ፈለማ እትሒዝካ እንቋዕ ደኣ ካብቲ ክፉእ መግዛእትን ወግሐ ጸብሐ ተዂሲ ቦምባታትን መዳፍዕን ደሓንኩ እምበር ዝሕሸሉ ይኹን ዝብል ዝነበረ ሕልናኻ ካሳብ ሕጂ ኣየቕሰነካን። ስለዚ መላእ ህዝቢ ኤርትራ ብዘይካ እቶም ኣብ ላዕሊ ተረቚሖም ዘለዉ በጻብዕ ዝቑጸሩ ዕሱባትን ንኸብዶም ዝተግዝኡን ንዓይ ጥራይ ይጥዓመኒ በሃልትን ገለ ቁንጣሮ ኣሰሮም ዝሕዙ ወሲኽካ እንተዘይኮይኑ፡ ዒሕ ከይበልካን “ኣምላኽ የጥፋእዮ” ኢልካ ከይተራገምካን ዝሓለፈትካ መዓልትስ የላን። እዚ ኩነታት ህዝብናን ሃገርናን ናይ ምቕልጣፉን ምድንጓዩን ኣብ ኢድካ ዘሎ ኮይኑ ከም ዝሓልፍ ግና ዘጠራጥር ኣይኮነን።

ልክዕ እዩ በቲ፥ እቲ ስርዓት ዝፈጠሮ ሰራም ስለያዊ ተግባራት ብኣዝዩ ጽንኩርን መሪርን ጭቖና ስለዝተተሓዝካ ሱቕ ክትብል ተገዲድካ ኣሎኻ። ይኹን እምበር እቲ ሽግር ንግዚኡ ጥራሕ እዩ እምበር ንዘልኣለም ስቅያትን፥ ግፍዕን ሓንጎፋይ ኢልካ ክትነብር ኣይኮንካን። ነዚ ጨቋኒ ስርዓት እዚ ክትምሕዎ ምዃንካ ዘጠራጥር ኣይኮነን። ንግዚኡ ብዝወርደካ ዘሎ ንኸይትዛርብን ከይትራኸብን ብፍርሓት ተዓጊትካ’ኳ እንተሎኻ፥ እዚ ስቕታ እዚ ከም እሳተ ጎመራ ገንፊሉ ዝትኮሰሉ ግዜ ቀረባ እዩ።

ካልእ ኣብ ውሽጢ ዘሎኻ ህዝቢ ኤርትራ ክተስተብህለሉ ዝግባእ ኣሰካፊ ጉዳይ ተገዲድካ ብረት ምዕጣቕካ ኣዩ። እዚ እከይ ስርዓት እዚ፡ ነዚ መደብ ዘውጸአ ህዝቢ ኤርትራ ኣብ ዓቢይ ጸገም ንክወድቕ ብዘለዎ ስዉር ተንኮል እዩ። ነፍሲ ወከፍ ኤርትራዊ ብረት ዓጢቑ ዘሎ ጽባሕ ንግሆ ክርሁ ምዃኑ ክዝንግዕ ኣይግበኦን። እዚ ብረት እዚ መሕለዊ ህዝቢ እምበር ነንሓድሕድካ መጣፍኢ ክኸውን ከምዘይብሉ ተረዳእ። ብተንኮል እቲ ኩሉ ግዜ ንሕማቕካ ዝሰርሕ ጉጅለ ከይተዓሸኻ፡ ከምታ ቀደምካ ተሓቛቚፍካን ተኸባቢርካን ምንባር ዝብል ሃገራውነትካ ከንጸባርቕ ኣለዎ። በዚ ናይ ኩልኻ ጸላኢ ዝኾነ ጉጅለ ህግደፍ ዝኽተሎ ዘሎ ኣገባብ፡ ነቲ ብረት ንሕነ ምፍዳይ ይኹን ወይ ንኸትሪ ምጥቃም ንሓድነት ህዝቢ ስለ ዝዘርግ ኣብ ከምዚ ኣዕናዊ ተግባራት ንኸይትወድቕ ሓደራ ብሰማይ ሓደራ ብምድሪ። እቲ ኩሉ ብዘይድሌቱ ብረት ዝዓጠቐ ኤርትራዊ መሳርሒ እቲ ጉጅለ ከይከውን ብስም ሰማእታት ኤርትራ ክምሕል ይግባኦ። እዚ ኣብ ኤርትራ ዝውጽዕ ዘሎ ስርዓት ነባሪ ከምዘይኮነ ፈሊጥካ፡ እታ ሃገር ግና ዋናኣ ንስኻ ህዝቢ ባዕልኻ ስለ ዝኾንካ   እቲ ስርዓት ለጊሱ፥ ርግኣትን ጸጥታን ንምስፋን ዝትክእ ሓይሊ ክሳብ ዝህሉ፥ ናይ ህዝቢ ሓላፍነት ምዃኑ ከይዘንጋዕካ፥ ናተይ ኢልካ ሓላፍነት ክትስከም ንጽወዓካ። ንሕና ድማ ወትሩ ምሳኻ ኣለና።

23 ጥቅምቲ 2015

ኤርትራ ኣብ 1991 ነቲ መግዛእታዊ ሓይሊ ሰራውሩ ሓግሒጋ ምስ ጸረገት፥ ህዝቢ ኤርትራ ንመጀመርያ ግዜ እፎይ ኢሉ ዘዕረፈላ ዓመት ኢያ ነይራ። ኣብዚ እዋን ኮይና ክንዝክሮ እንከለና፡ ታሪኻዊ ዝኾነ ውሳኔ ተጋድሎ ሓርነት ኤርትራ ሰውራዊ ባይቶ ሓይሊ መግዛእቲ ብክልቲኡ ሓይልታት ህዝባዊ ወያኔን ህዝባዊ ግንባርን ብዓብይኡ ድማ ሳላ ጽንዓትን ተወፋይነትን ህዝቢ ኤርትራ ተደፊኡ ካብ መሬትና ምስ ወጸ ዝተኣወጀ ኣዋጅ እዩ። እቲ ኣዋጅ’ቲ ሽዑ ተተግቢሩ እንተዝኸውን ምናልባት እዚ ሎሚ ኣብ ልዕሊ ሃገርናን ህዝብናን ወሪዱ ዘሎ ሽግር ኣይምወረደን። እቲ ኣዋጅ ’’ እቲ ቀዳማይ ምዕራፍ ናይ ናጽነት ቃልሲ ማለት ብረታዊ ቃልሲ ደጊም ኣብቂዑ እዩ። ዝተረፈ ቃልሲ ሓርነታዊ ቃልሲ ስለዝኾነ ኣብ ክንዲ ብረታዊ ቃልሲ ፖለቲካውን ሰላማውን ቃልሲ እዩ ክካየድ ዘለዎ።’’ ዝብል ነበረ።

ኣብዚ ቀረባ እዋን በቲ ጅግና ተጋዳላይ ብትወደድ ኣብረሃ ምእንቲ ሃገሩን ህዝቡን ህይወቱ ክሳብ ንመስዋእቲ ዝተበጀወ ኣብ ማእሰርቲ ህግድፍ ዝበሊ ዘሎ ዝወጸት ካሴት እውን ነዚ ኣብ ላዕሊ ዝተጠቕሰ ብዝያዳ እተብርህ እያ። ብተወደድ ኣብረሃ ናይ ናጽነት መቐረት ከየስተማቐረ ምስ ስዕረት ሰራዊት ደርግ 1991 ኣብ ሸላ ቤት ማእሰርቲ ህግዲፍ ን6 ዓመታት ተኣሲሩ ንቑርብ ግዜ ወጺኡ ዝተዛረቦ ቃላት እዩ። እቲ ቃላት እቲ ኣብ ኣፍ ሓርገጽ ኰንካን፥ ካብ ማእሰርቲ ወጺእካ ነቲ ዝነበርካዮ ከይዘከርካን ኣብ ቅድሚ ጉጅለ ህግደፍ ምእንቲ ፍትሓን መሰልን ክትዛረብ ክሳብ ክንደይ ሓያል ጽንዓት ከምዝውንን እዩ ዘመስክር። ተመሊሰ ናብታ ዝነበርክዋ ሸላ ክምለስ እየ ኢሉ ድምብርጽ ከይበሎ ንህዝቢ ክንድቲ ዝኣክል ኣስተምህሮ ሂቡ።

እታ ካሴት ብትወደድ ኣብረሃ ብዝተዛረቦ ወርቃዊ ቃላት ዝመልአት ከምዝኾነት ዝከሓድ ኣይኮነን። እቲ ትሕዝቶን ቊምነግርን ዓቂባቶ ዘላ መሃርን ትርጉም ዘለዎ ፖለቲካዊ ሓዘልን ከም ምዃኑ መጠን ነቲ ኣብ ትሕቲ ኣርዑት ምልኪ ተጸቒጡን ጅሆ ተታሒዙን ዘሎ ንፍርሃት ክሰግራ ዘተባብዕ እዩ።

ጅግና ብተወደድ ኣብረሃ ’ንሃገረይ ኣሕሊፈ ኣይህብን ብምባለይ እምበር ካልእ ዘሕትተኒ ሓጥያት የብለይን’ ዝበሎ እቲ ስርዓት ነዛ ሓረግ እዚኣ ስለምንታይ ተጻቢኡዋ ኩልና ክንመራመረላ ዝግባእ እዩ። ምኽንያቱ ብትወደድ ካብ ባዶ ነቒሉ ኣይኮነን ከምኡ ኢሉ ተዛሪቡ። ቀጺሉ እውን ነዛ ንሱ ዝበላ ብዝያዳ እተራጉድን እቲ ስርዓት እውን እትህድድን ከኣ‘’ወደብና ንኢትዮጵያ ኣሕሊፍና ኣይንሃብን፡ እትብል እቲ ስርዓት እንታይ መደባት ከምዝነበሮ እትእምት እያ።

ቀጺሉ ብትወደድ ንኹልና መሃሪት ዝኾነት ሓረግ ማለት ‘’ግርጭታትን ናይ ኣረኣእያ ፍልልያትን ብዲሞክራሲያውን ሰላማውን ኣገባብ ክፍታሕ ኣለዎ’’ ክብል ኣተንቢሁ። እዛ ሓሳብ እዚኣ መትከል እምበር ሜላ ኣይኮነትን። ምኽንያቱ ነቲ ስርዓት ኣብ ትሕቲ ህዝቢ ከምዝንብርከኽ እትገብር እያ እንተደኣ ብግቡእ ተጠቒምናላ። ንግርጭታትናን ናይ ኣረኣእያ ፍልልያትናን ብኣፈ-ሙዝ ዝፍታሕ ዘይኮነስ እንታይ ደኣ ብዕርቅን ይቕረ ምባልን እዩ ሰላም ዝነግስ። እዚ ግን ከም ጽገና ወይ ኣውን ከም ተንበርካኽነት፥ ወይ ኣውን ኣላሽ በሃልነት ዘይኮነስ እቲ ህዝቢ ኣብ ነንሓድሕዱ ተኣማሚኑ ነቲ ምልኪ ፎእ ንኽብል ዝገብሮ እዩ። እታ “ዲሞክራሲያውን ሰላማውን ኣገባብ ኣፈታትሓ ግርጭት” እትብል ብፍላይ ብሰልፊ ዲሞክራሲ ህዝቢ ኤርትራ ብሓፈሻ ከኣ ሰላማውን ዘይጎነጻውን ኣገባብ ምኽታል ናይ ዝብሉ ሸነኻት እምንቶ ስለዝኾነት ኩልና ደለይቲ ፍትሒ ክንሰርሓላ ዝግባእ ኣምር እያ። ምኽንያቱ “ብዘይጎነጻዊ ኣገባብ’’ እምበር ብጎነጽ ዝመጽእ ዘተኣማምን ፍትሒ የለን።

እዛ ካሴት እንታይነት እቲ ስርዓት ግርም ገይራ እተቃልዕ እያ ‘’ናይ ጅግና መራሒ መምዘኒ ዝበሃል ብስለት ኣኣምሮ ዘለዎ እዩ። ፈተውቱ ዘብዝሕን ርሑቕ ዘለዉ ዘቕርብን ምሕረት ዝግበርን እዩ።’’ ዝብል ምሉእ ሓሳባት ናይታ ካሴት መልእኽቲ ብስለት ዘመልክት እዩ። ልክዕ እዩ እዘን ምሉእ ሓሳባት እዚኣን ነቲ ምልካዊ ስርዓት ጥራሕ ዝምልከታ ኣይኮናን። እንታይ ደኣ እንኮላይ ነቶም ኣብ ደምበ ተቓውሞ ዘለና ኩልና ዝምልከታ እየን’ሞ እዚኣ እውን ከባድ መጠንቀቕታ ምዃና ክንርዳእ የድሊ። ካልእ ዓባይ ነጥቢ ድማ ኣላ። ማለት ህዝብና ካብቲ ራዕድን ፍርሕን ንክላቐቕ እተተባብዕ። ‘’ወዲ ሰብ እንተፈሪህካዮ ኣብ መፈንጠራ እዩ ዘእትወካ እንተፍሪህካ ግን ኣብ ትሕቴኻ እዩ ዝኣቱ’’ እትብል። ብናይ ኣጽዋር ወይ ቦምባታት ሓይሊ ዘይኮነስ እንታይ ደኣ እቲ ህዝቢ ካብ ፍርሃት ተላቒቑ ልዕሊ ዘፈራርህ ኣጽዋር ‘’እምቢ-እምቢ’’ ትብል ቃል ንኸውጽእ ተተባብዕ ኣስተምህሮ እያ። ቀጺሉ ብትወደድ ንኹልና ደንምበ ተቓውሞ ይኹን ካልእ ተቓዋሚ ዝኾነ ሓሳብ ዘቕረቦ ‘’ምንጻል ይኹን ዓፈና ካብ ሕጊ ወጻኢ ስለዝኾነ ጉጉይ ኣፈታትሓ ግርጭት እዩ መፍትሒ እውን ኣይኮነን።’’ እትብል ጽባሕ ንግሆ እዚ ስርዓት እዚ ምስ ኣልገሰን፥ ሕጂ ቅድሚ ምልጋሱን ኣብ ኣእምሮና ክነስርጻ ዝግባእ እዩ። ምኽንያቱ ፍትሕን ሕግን ንኸይገሃስን ኣብ ህውከትን ነውጽን ንኸይንበርን እትእምት ስለዝኾነት።

እዛ ካሴት ሒዛቶ ዘላ ጥዑይን መሃርን ሓሳብ ንኹሉ ደላይ ፍትሒ ኣብ ክንዲ በበይኑ ክይኑ ሒዅ ዝብል ሓቢሩ ክቃለስን ክወሃሃድን እትዕድም እያ። ንኣብነት ንምጥቃስ ዝኣክል ‘’ ማሕበራዊ ሕጊ ክነግስ ምውፋይን ንሃገራውን ንህዝባውን ረብሓ ምጥባቕን ግዴታ ምዃኑ፡ ንሓደ ኣካል ተቓዊምካኒ ኢልካ ክትዓጽዎ የብልካን። ኮፍ ኢልካ ብዝተ ክትፈትሖ ኣሎካ። ለውጢ ክነምጽእ ክንውፈን ክንቃለስን ኣሎና። ክንፈርህ የብልናን ክንተብዕ እዩ ዝግባእ። ንሰብ ኣይንፍራሕ ንሕግን ንእግዚኣብሄርን ንፍራህ። ንግርጭት ብሰላማውን ዲሞክራሲያውን ኣገባብ ምፍታሕ።’’ ዝብሉ ወርቃዊ ምዕዶታት ንረክብ። ከምዚ ዝኣመሰለ መዓድን መሃርን ዝኾነ ሓሳባት ንድሕነት ህዝብን ሃገርን ኢና ንቃለስ ዘለና ንእንብል ደለይቲ ፍትሒ ናትና ዕጥቂ፡ መትከላዊ ራኢ፡ ዕላማን እምንቶን ምዃኑ ተገንዚብና ኣብ ተግባር ክነውዕሎ ክንጽዕር ይግባእ።

ድራር መንታይ

Why is strategic planning important?

Depersonalizing the Eritrean Politics

What we need is not leaders but leadership
                                                 

ኣብ ዝኾነ ውድባዊ ኣሰራርሓ፣ መንግስታዊ ይኹን ግላዊ፣ መኽሰባዊ ኩባንያ ይኹን ኢ-መኽሰባዊ ማሕበር ገለ ተመሳሳሊ መሰረታዊ ናይ ሓባር መለለይታት ኣለዎም። ናይ ሓደ አኩብ ሕዝቢ ወይ ጉጅለ ንሓደ ውሱን ዕላማ ወይ ንገለ ዕላማታት ንምዕዋት ብሓንሳብ ዝሰርሑሉ ብኡ ዝጽለዉን ወይ ድማ ንሳቶም ክጸልውዎ ዝኸአሉ ኩሉ ግዜ ዝቀያየር ኣካባቢ ዝሰርሑሉ ኣገባብ ማለት ኢዩ።

ስትራተጂካዊ ፕላን ምውጻአ ማለት ድማ መገዲ ኣተሓሳስባኻን፣ኣሰራርሓኻን፣ኣመሃህራን፣ንዕላማታት ውዳበኻ ብዝሔሸ ኣገባብ ከመይ ገርካ ኣብቲ ዘይተረጋግኤ ዘይተረጋገጸን ናይ ውሽጥን ደገን ተጻቦታት ቀጻልነቱ ተረጋግጽ ማለት ኢዩ። ስትራተጂካዊ ፕላን ነቲ ሓያል ዝኾነ ብድሆታት ገጢምካ ከመይ ገርካ ናብ ዕድላት ትቅይሮ ዝሕግዝ ኣገባብ ኣቀራርባ ኢዩ።

መስርሕ ስትራቲጂካዊ ምውጻአ ንውዳቤኻ ብናይ ርሑቅ ጠመተ ብሰፊሑ አቲ ዝግድሶ ዓቢይ ስአሊ አቲ  አቲ ውድብ አንታይ ሰለምንታይ ከመይከ ይሰርሕ ኢዩ፣ሓሓንሳብ ግን ፍሉይ ስራሓት አውን ክህልዎ ይከኣል ኢዩ።

አምበኣርከስ ስትራተጂካዊ ፕላን ማለት፣ሓደ ኣገዳስን ስርዑን ጻዕሪ ንመሰረታዊ  ውሳነታትን ስራሕትን ንክትፍጽም አቲ ውደባ አንታይ ኢዩ፣ አንታይከ ኢዩ ስራሑ፣ ስለምታይከ ከምዚ ይሰርሕ ኢልካ ትልምታት ምውጻአ ማለት ኢዩ። ራአይ ዘለዎ ብሓደ ሸነኽ ኮይኑ፣ ኣብ ወድዕነት ዝተመርኰሰ ኣገባብ ኣሰራርሓ ምኽታል ማለት ኢዩ።ራአይን ኣፍልጦን ነንሕድሕዱ መታን ክሕይል፣አቲ ፕላን ተዓጻጻፍን ግብራውን መሪሕ ኮይኑ ንውሳነታትን ምምቅራሕ ምንጭታት ብጽፈት ከምዝዋፈር አኸአሎ ይህበካ።

ስትራተጂካዊ ኣተሓሳስባ ንትካላዊ ዓቅምታት የዕዝዝ ንጹር ዝኾነ ጸጋታት ድማ ኣለዎ፣ እንታይ ኢዩ እዚ ጸጋታት ብስትራተጂካዊ ኣተሓሳስባ ዝርከብ፣
I. ትካላዊ
1. ንውዳባኸ ይኹን ንጥፈታት ውደባ ብጽፈትን ክእለትን ንኽተትግብር ይሕግዘካ
2. ናብ ስትራትርጂካዊ ኣሰራርሓ ባህሊ ንክትፈጥር ይሕግዘካ
3. ብዛዕባ ኣካባቢኻ ኣፍልጦ ንክትረክብ ይሕግዘካ
4. ኣፍልጦ ብዛዕባ ርእይቶታትን ዕላማን/ ናብ ዕላማ ዘምርሕ ስራሕ ንክትሰርሕ ይሕግዘካ
5. ኣመራርሓ ናይ ዝተፈላለየ ውልቀሰባት

II. ን ኣመራርሓ ብቅዓታት ሓፍ ንምባል ይሕግዝ- Enhances the capacity of leadership
ኣብ ሓደ ጥዑይ ኣመራርሓ ዝርከብ ኣርባዕተ ክፋላት- Components of good leadership
1. ናይ ምውህሃድ ብቅዓት ወይ ከኣ ማሕበራዊ ብቅዓት- Integrator
2. ምምሕዳራዊ ብቅዓት፣ ናይ ስራሕ ብቅዓት- Aministrative
3. ኣፍራዪ ብቅዓት/ ስትራተጂካዊ ብቅዓት- producer
4. ናይ መሃዚ ብቅዓት- entrepreneur    
 ሰለስተ መሓውር ኣብ ምሕደራ ሕዝባዊ ጉዳያት
1. ኣፍልጦ ብዛዕባ ኣካባቢኻ- ምስ  ግዜን ኩነታትን እናሰማማዕካ ምስራሕ
2. ኣፍልጦ ብዛዕባ ኣረኣእያኻን ዕላማን- ስራሕካ ናብ ዕላማ ዘትኰረ ይኹን
3. ኣመራርሓ ብዝተፈላለየ ኣገባባት- ውልቃዊ ኣመራርሓ- ዘቡናዊ ኣመራርሓ

ናይ ሓደ ውደባ ሓያልን ድኹምን ጐድኒ
1. ቅርጻ ውደባ
2. ምሕደራ
3. ኣባልነት
4. ተሳትፎ /ክፍትነት
5. ቅዋምን መደብ ዕዮን
6. ውሽጣዊ ደሞክራስያ
7. ናይ ምትሕብባርን ዘተን ልምድታት
8. ናይ ውደባ ምንጭታት/ ሰብኣውን ማላውን
9. ዝምድና ምስ መራኸቢ ብዙሓን
10. ዝምድና ምስ በርገሳዊ ማሕበራት
11. ግዳማዊ ዝምድናታት

ሎሚ ንኣወዳድባ  ፖሊቲካዊ ይኹን በርገሳዊ እንተሪኢና ክንደይ ኢየን ነዘን ኣብ ላዕሊ ዝተጠቅሳ ዘማልኣ መጽናዕቲ ዘድልዮ ጉዳይ ኢዩ።
ነፍስ ወከፍ ውደባ ሰለስተ ጸፍሕታት ናይ ስራሕ ኣለዎ፣ Three levels of organizational actions
1. ስትራተጂካዊ ጸፍሒ/ Strategic፣ ኣብዚ ጸፍሒዚ፣ ራእይን፣ተልእኾን፣ መደብ ዕዮን፣ እምነታትን/ Principles/ Values ውደባ ይካየድ
2. መርሕነታዊ ጸፍሒ/ Management፣ ኣብዚ ጸፍሒዚ ድማ ምንጭታት ውደባ ይመቃራሕ፣ ስራሓት ውደባ ምክትታልን ምፍጻምን ይፍጸም
3.  ስርሒታዊ ጸፍሒ/ Operational፣ ኣብዚ ጸፍሒዚ ድማ፣ መዓልታዊ ስራሓት ውደባ በብቦታኡ ይካየድ

መግለጽታት
ራእይ ማለት፣ ኣበይን እንታይን ክትከውን ትደሊ፣ ንኣብነት ፣ ኤርትራ ኣበይን እንታይን ክትከውን ኢኻ ትደልያ Vision statement answers the question; where and what do we want to be.

ተልእኾ፣ እንታይ ኢዩ ነዚ ክንገብር ዝድርኸና ሰለምንታይክ ኢዩ፣ እንታይ ከነዕውት፣ Mission statement answers the question: what are we here to do.

ክብርታት፣እምነታት፣ ንካልኦት ከመይ ንሓልዮም ካብኦም ከ እንታይ ሓልዮት ንጽበ፣ Value statement answers the question: how do we want treat others and how do we want to be treated ourselves. it is not in what we do but how we do and with whom we do. Values include honesty, integrity, caring,  trust and respect.

Enough for today-----------------continues

ሰላማዊ ሰልፊ ኒው ዮርክ 2015 ምሉእ ዓወት ክጓናጸፍ ዕላማ ህዝባዊ ምልዕዓል ኤርትራውያን ንፍትሒ እዩ። ህዝባዊ ምልዕዓል ኤርትራውያን ንፍትሒ፡ ንብደረጃ ከተማታት ሰሜን ኣሜሪካ ዘማእክል ዞባዊ ናይ ህዝቢ ጥርናፈ`ዩ። ኩሎም ኣካላት ናይ`ዚ ምልዕዓል`ዚ፡ በብከተምኡ ብውልቂ ይኹን ብጥርኑፍ፡ ንሰላማዊ ሰልፊ ኒው ዮርክ ከም ገዛእ ዋኒኖም ክጉስጉሱ፡ ክሳተፉ ነማሕጽን።

ሃብሮማትን ሓርበኛታትን ኤርትራውያን ንነውሕ ክጽዕርሉ ንዝጸንሑ ጅግና ቃልሲ ፡ መርማሪ ኮሚሽን ውድብ ሕቡራት ሃገራት፡ ኣብ ልዕሊ ህዝብና ንዝወርድ ዘሎ ዘስካሕክሕ ግህሰታት ሰኒዱ ዘቕረቦ ጸብጻብ፡ ዝልለ ፍሩይ ዓወት ናይ ደለይቲ ፍትሒ ናይ`ዚ መድረኽ `ዚ እዩ። እቲ ዝቐረበ ጸብጻብ ዝተማለአ ኮይኑ ክድምደም፡ ቀጻልን ንጡፍን ደገፍ ናይ ደለይቲ ፍትሒ ኤርትራውያን ይሓትት። ስለዚ፡ ኣብ 29 ጥቅምቲ 2015 ኣብ ኒውዮርክ ዝካየድ ሰላማዊ ሰልፊ፡ ከም ሓደ ህዝባዊ መደብ (ፕሮጀክት)፡ ህዝባዊ ዓወት ኣረጋጊጹ ንቕድሚት ክምርሽ ሓላፍነት ናይ ኩሉ ህዝቢ`ዩ።

ህዝባዊ ምልዕዓል ኤርትራውያን ንፍትሒ፡ ከም ናይ ህዝቢ ምትእስሳርን ምጥናፍን፡ ኣብ`ዚ መደብ/ፕሮጀክት`ዚ (ሰላማዊ ሰልፍን ምድግጋፍ ንመርማሪት ኮሚሽንን) ኮነ ኪንኡ ዝቕጽል ስራሕ፡ ተዓዊቱ ክወጽእ ኣበርቲዑ ክሰርሕ`ዩ። ንግሉጽነትን ተሓታትነትን ኣነጺሩ ዘቐመጠ ህዝባዊ ትካላዊ ኣገባብ ኣሰራርሓ ኣታኣታትዩ እናማዕበለ ፡ ንዘየቋርጽ ወሓዚ ናይ ህዝቢ ደገፍ ንምርግጋጽ ጻዕርታቱ ክቕጽል`ዩ። እዚ ኣሰራርሓ`ዚ፡ እምነ-ኩርናዕ ናይ ቀጻልን ዘላቒን ህዝባዊ ዓወታት ከመዝግብ ዝኽእል መዋጸኦ ኢዩ ኢሉ ይኣምን።

ህዝባዊ ምልዕዓል ኤርትራውያን ንፍትሒ፡ ንመርማሪት ኮሚሽን ምድግጋፍ፡ ከም ሓደ ኣዝዩ ኣገዳሲ ፕሮጀክት ይወስዶ። ስለዝኾነ፡ ንኩሎም ደለይቲ ፍትሒ ኤርትራውያን ኢድ-ንኢድ ኣተሓሒዙ ክሰርሕ ዝኽእልን ንትግባረ- ኣሰራርሕኡ ዘገልግልን እማመ ኣብ ምድላው ከምዘሎን፡ ኣብ`ዚ ቀረባ መዓልታት ንስራሕ ክዋፈረሉ ምዃኑን በዚ ኣጋጣሚ`ዚ ንሕብር።

ኣብ መደምደምታ ፡ ብሕኑን ወኒን ተወፋይነትን ክዕወት ዝግበኦ ሰላማዊ ሰልፊ ኒውዮርክ፡ ኩሎም ደለይቲ ፍትሒ ኤርትራውያን ብብዝሑ ቁጽርን ብዝለዓለ ፍናን ንክሳተፍዎ ደጊምና ብትሕትና ነማሕጽን።

ህዝባዊ ጥርናፈ፡ መድሕን ህዝብን ሃገር`ዩ!!

ውድቀት ንኹሉ መልክዓት ምልኪ!!!

ህዝባዊ ምልዕዓል ኤርትራውያን ንፍትሒ

10/10/2015

ቢተው ሓወይ ዓመታት ኮይኑ ካብ ትእሰር
ምእንቲ ሃገር ክትብል ሰላም ክብሰር
ሱር መግዛእቲ መሓውር ሕቘኡ ክስበር
ዓንዲ ዲሞክራሲ ክትከል ህዝቢ ክተሓባበር
ርብዒ-ዘመን ኮይኑ ኣልቦ ጥዑይ ኣየር።

          ኣለዉ እውን ምሳኻ ኣብ ጉድጓዲ ዝበለዩ
          23 ዓመት ኮይንዎም ብግፍዕን ጨቖናን ክእለዩ
          ዝገበርኩሞ በደል ኣይነበረን ክንዲዚ ዓመት ክትሳቐዩ
          ወዲ ባህልቢ ኣሎ ጥቓኻ እስከ ተዛተዩ
          ወዲ ባሻይ እውን ኣሎ እስከ ተላለዩ
          ግዜ ክፍርዶ እዩ ጸሓይ ብርሃን ክትርእዩ።

ጸሊም ተመንዶ  ረኺቡኩም
ንናጽነት ንፍትሒ  ስለ ዝበልኩም
ክትእሰሩ ስቕ ኢሎም ዝረኣዩኹም
ንገባር ክፉእ ኣምላኽ ክፈድየልኩም
ዓለም ክትርእይዋ ከመይ ክም ዝጸንሓትኩም
ኣኻእሎ፡ ጥዕናን ዕድመን ይሃብኩም።

          ኣይረሳዕናኩምን ኣሎኹም ኣብ ልብና
          ለይቲ ምስ መዓልቲ እናስተንተና
          ክወግሓልኩም  ቀጻሊ ቃልስና
          ኣይቀሰናን ብድሕረኹም ፍጹም ነይረሃወና
          ኣለዉዶ መይቶም ክንብል ፍጹም ነይደቀስና።

ኣድያም ተፈራ