ኣርዓዶም በርሀ
ብሓፈሻ ኣብ ኤርትራዊ ብፍላይ ድማ ኣብ ናይ ደንበ ተቓውሞና ፖለቲካዊ ጉዕዞ በብግዜኡ ዝዝውተሩ፡ ብመልክዕ፡ ጉባአ፡ ኣኼባ መሪሕነታት፡ ሰላማዊ ሰልፍታትን ተራ ኣኼባታትን ዝግለጹ መድረኻት ምፍጣሮም ኣዝዩ ዝተለምደ እዩ። እዞም ፖለቲካዊ ኣጋጣሚታት እዚኣቶም ክንድቲ ምብዘሖምዶ ውጽኢት ይህልዎም ወይስ ገበርና ንምባል ጥራይ ዝፍጠሩ ፍረ ኣልቦ መድረኻት እዮም? ዝብል ሕቶ ኣቕሪብካ ክትምልስ እንከለኻ ግና እቲ ዝርዝር ናይቲ መልሲ ኣዝዩ ዘዘራርብ ጥራይ ዘይኮነስ ዘተዓዛዝብ እውን እዩ። ከምቲ ግቡእ ካብዞም ዝጠቐስኩዎም ኣጋጣሚታት ሓደ ክድኮን እንከሎ ብፍላይ ድማ ጉባአታትን ናይ መሪሕነታት ኣኼባታትን ክጋባእ እንከሎ ንስለ ምግባር ጥራይ ክኸውን ኣይመተገብአን። ናይ ሓደ ፖለቲካዊ ውድብ ወይ ማሕበር ጉባአ ኣብ ክከንድዚ ዓመት ክግበር ኣለዎ ስለ ዝተባህለ ጥራይ ዝጋባእ ክኸውን ኣይግበኦን። ናይ ሓደ መሪሕነት ኣኼባ እውን ከምኡ “ኣብ ክከንድዚ ኣዋርሕ ክግበር ይግበኦ” ዝብል ዓንቀጽ ኣብ ውሽጣዊ ሕጉ ስለ ዘሎ ጥራይ ዝጽንበል እንተደኣ ኮይኑ፡ ልሙድ መዓልቲ ቆጺርካ ዝካየድ ዝኽሪ ጥራይ ኮይኑ እዩ ዝተርፍ።
ፈስቲቫላት ፍትሒ ይብዛሕን ይዓምብብን
ፈስቲቫል ፍራንክፈርት፡ ፍትሒ ንምንጋስ ኣንጻር ምልስኪ ኣብ እነካይዶ ዘለና ቃልሲ፡ ኣድማዒ ናይ ቃልሲ ዓውዲ ንምግባሩ እነካይዶ ዘለና ቃልስታት ኣሳልጦ እናረኸበ ኢዩ። ኵሎም ዝዓደምናዮም ተቓለስቲ፡ ብዘይካ'ቶም ብርዱእ ምኽንያት ክሳተፍዎ ዘይከኣሉ፡ መብዛሕትኦም ክሳተፉ ምዃኖም ኣረጋጊጾምልና ኢዮም። ኵላትና ከምእንርድኦ፡ እዚ ናይ ኵሎም ደለዪቲ ፍትሒ ፈስቲቫል'ዚ፡ ሰረታት ምልካዊ ምልካዊ ስርዓት ሰቢርና፣ ሰረታት ፍትሕን ዲሞክራስን ንምህናጽ እንጥቀመሉ ናውቲ ቃልሲ ኢዩ። ዓወት ፈስቲቫልና ኣብ ምድላው ጥራይ ዝሕጸር ኣይኰነን። እቲ ቀንዲ ዓወቱ ዝሕፈስ ንዝተዳለወ መደባት ኵሉ መጺኡ ንምዕዋቱ እጃሙ ከበርክት ከሎ ኢዩ። ናትኩም፡ ናይ'ቶም ደለይቲ ፍትሒ ተሳትፎ ወሳኒ ኢዩ።
