قد في مدينة ستوكهولم في السويد مؤتمر تحالف القوى الديمقراطية الاشتراكية بتاريخ ١٥ - ١٧ نوفمبر ٢٠١٩ وقد شارك وفد رفيع المستوى يمثل حزب الشعب الديمقراطي الإرتري برئاسة السيد منقستآب أسمروم مسئول الشؤون التنظيمية وعضوية الدكتور هبتي ميكائيل تخلي برهان مسؤول الدائرة الاقتصادية . وقد قام الوفد بتوزيع مسودة لجميع المؤتمرين تتعلق بشرح وافي وكافي عن معانات الشعب الإرتري  من الاستبداد والديكتاتورية من قبل النظام الإرتري ورؤية حزب الشعب الديمقراطي الإرتري عن عملية السلام المزيف بين النظام الإرتري والأثيوبي وانه لايوجد اي تحسن فيما يعرف بحقوق الانسان والحريات في ظل هذا السلام المزعوم  . وبعد ذلك اشترك الوفد في ورشة عمل تعنى بقضية الشعب الارتري . واخيرا شارك الوفد في انتخاب إدارة لمؤتمر تحالف القوى الديمقراطية الاشتراكية .                                                                                                                                                                                                                                                

18 ሕዳር 2019

ካብ ኵሉ ክፍለ-ዓለም ዝመጹ ማሕበረ-ዲሞክራስያውንን ማሕበራውያንን ሰልፍታት ዝተሳተፍዎ ዋዕላ ካብ ዕለት 15-17 ሕዳር 2019 ኣብ ስቶክሆልም፡ ርእሰ-ከተማ ሽወደን ተኻይዱ። ሓው መንግስተኣብ ኣስመሮም፡ ሓላፊ ቤት ጽሕፈት ውደባን ሓው ዶክተር ሃብተሚካኤል ተኽለብርሃን፡ ሓላፊ ቤት ጽሕፈት ገንዘባዊ ጕዳያትን ዝርከብዎ ልኡኽ ሰልፊ ዲሞክራሲ ህዝቢ ኤርትራ (ሰዲህኤ) ኣብ’ቲ ዋዕላ ተኻፊሎም።

MA and HBT

ዶር ሃብተሚካኤል ተኽለብርሃን፡ ሓላፊ ቤ/ጽ ገንዘባዊ ጕዳያትን ሓው መንግስተኣብ ኣስመሮም ሓላፊ ቤ/ጽ ውደባን ኣብ ኣዳራሽ ዋዕላ

ልኡኽ ሰዲህኤ፡ ንህልዊ ኵነታት ኤርትራ ዝገልጽ ጽሑፍ ንተጋባእቲ ዋዕላ ዓዲሉ። እቲ ዝተዘርግሐ ጽሑፍ ብሓደ ሸነኽ መራሕቲ ኤርትራን ኢትዮጵያን ዝፈጸምዎ ውዕል ንኤርትራን ህዝባን ዘምጽኣሉ ዝዀነ ይኹን ለውጢ ከምዘየለ ዝገልጽ ክኸውን ከሎ፤ ብኻልእ ሸነኽ ከኣ፡ እቲ ስርዓት ኣብ ልዕሊ ህዝቢ ኤርትራ ዝፍጽሞ ዘሎ ግህሰታት ሰብኣዊ መሰላት ዘቃልዕን ኢዩ ነይሩ። ናይ ሎሚ ኤርትራ ከም ትማሊ፡ ቅዋምን ግዝኣተ ሕግን ዘይብላ፡ ሓደ ውልቀ መላኺ ከም ልቡ ዝዕንድረላ፡ ናይ ፕረስ፡ ምዝራብ፡ ምእካብን ምውዳብን ናጽነታት ዝበዀረላ፡ ሰባት ብሃይማኖታዊ ይኹን ፖለቲካዊ እምነታቶም ዝህደኑላ፡ ተወዳደርቲ ሰልፍታት ክህልዉላ ዘይድለዩላ፡ ሃይማኖታዊ ንብረትን ትካላትን ዝህገሩላን ህዝባ ግዳይ ስደትን ነጋዶ ደቂ ሰባትን ዝዀነላ ሃገር ምዃና ዘረድእ ኢዩ።

ኣብ ርእስ’ዚ፡ ልኡኽ ሰዲህኤ፡ ኣብ ምትላም ናይ ፖለቲካዊ ውሳኔታትን ግብራዊ መደብ ዕዮን፣ ኣብ ምምራጽ ቦርድን ዝተፈላለዩ ንሰልፊን ኤርትራን ዘገድሱ ዛዕባታትን ኣብ ዝተኻየዱ ናይ ጠረጴዛ ክትዓት ተኻፋልነቱ ዕዙዝ ነይሩ። ንሓደ ሰልፊ ሓደ ድምጺ ኣብ ዝብል ቅዋም ምሕዝነት ተመርኵሱ ሰዲህኤ ኣብ ምምራጽ ኣባላት ቦርድ፡ ምጽዳቕ ንድፍታትን ናይ ስራሕ መደብ ዕዮታትን ተሳቲፉ።

MA electing 1

ሓው መንግስተኣብ ኣስመሮም፡ ሓላፊ ቤት ጽሕፈት ውደባ እናድመጸ እንከሎ

ሰዲህኤ፡ ብ22 ግንቦት 2013 ኣብ ከተማ ላይፕዚግ፡ ጀርመን ኣብ ዝተኻየደ መስራቲ ጕባኤ ኣባል ገስጋሲ ምሕዝነት ከምዝዀነ ዝዝከር ኢዩ። ብድሕር’ዚ፡ ኣብ ቱኒዝያ፡ ኣብ ሮተርዳም (ሆላንድ)፡ ኣብ ስቶክሆልም (ሽወደን) ዝተኻየደ ዋዕላታት ገስጋሲ ምሕዝነት ምክፋሉ ድማ ዝፍለጥ ኢዩ።

ካብ’ዚ ብምቕጻል፡ ጽሙቕ ዝበለ ሪፖርታጅ ናይ’ቲ ዋዕላ እንሆ።

**************************************

ሪፖርታጅ ዋዕላ ገስጋሲ ምሕዝነት ኣብ ከተማ ስቶክሆልም፡ ሽወደን

ካብ ኵሉ ክፍለ-ዓለም ዝመጹ ማሕበረ-ዲሞክራስያውንን ማሕበራውያንን ሰልፍታት ዝተሳተፍዎ ዋዕላ ካብ ዕለት 15-17 ሕዳር 2019 ኣብ ስቶክሆልም፡ ርእሰ-ከተማ ሽወደን ተኻይዱ።

ብዕለት 15 ሕዳር 2019 ብሽወደናዊ ኣቶ ዮሃን ሃሰል፡ ጀርመናዊ ኣቶ ኮንስታንቲን ቮይኖፍ፡ ኣውሃሃዲ ስርሓት ገስጋሲ ምሕዝነት፡ ጀርመናዊ ኣቶ ኮኒ ሮይተር፡ ዋና ጽሓፊ ናይ ሶሊዳር (SOLIDAR) ዝተመርሐን ኵሎም ኣባላት ገስጋሲ ምሕዝነትን ተሓባበርትን (associated members) ዝተወከልሉን ናይ ምምሕዳራዊ ኮሚቴ ኣኼባ: እዞም ዝስዕቡ ስራሕት ተሰላሲሎም።

  1. 40 ዝኣባላቱ ንዝመጽእ 3 ዓመታት ዝመርሕ ቦርድ ተመሪጹ፤
  2. ንውሳኔታት ዝቐረቡ ንድፍታት ተመያይጦምን ኣጽዲቖምን፤

ብድሕር’ዚ እቲ ቦርድ ተኣኪቡ፡ ብኣቦ መንበርነት ናይ ቀዳማይ ሚኒስተር ሽወደን፡ ኣቶ ስተፋን ሎቨን፡ ተመሪሑ።

  1. ገስጋሲ ምሕዝነት ዝምርሓሉ ፖለቲካዊ መምርሒታት ተሊሙ፤
  2. ንኣባልነት ዝቐረቡ ጠለባት ሓደስቲ ሰልፍታት ውሳኔታት ሂቡ፤
  3. ሓድሽ ኣተሓባባርን (coordinator) ኦዲተርን መሪጹ፤ ኣተሓባባሪ ዝነበረ ኮንስታንቲን ቮይኖፍ ብኮኒሮይተርስ ተተኪኡ፤
  4. ንዝቐረበ ትልሚ ናይ ፖለቲካዊ ስራሕ ኣጀንዳ ኣድሚጹ፤ እቲ ኣጀንዳ ነዞም ዝስዕቡ ነጥብታት ዘጠቓለለ ነይሩ።
  • ናይ ገስጋሲ ምሕዝነት ፖሊሲታት ኣብ 21 ክፍለ-ዘመን፤
  • ንንቓባዊ ማሕበራትን ሲቪላዊ ማሕበራትን ዝምልከት ስትራተጂታትን ኣህጕራዊ ምሕዝነታትን፤
  • ንክሊማ፡ ዕዮን ምድግጋፍን (Solidarity) ዝምልከት ስትራተጂታት፤
  • ንቃልስታት ኣንጻር መለኽቲ፡ የማናውያንን ህቡባውያንን ምንቅስቓሳትን ዝምልከት ስትራተጂታት፤
  • ናይ ሰላምን ኣህጕራዊ ምትሕብባር ብድሆታትን ዝምልከቱ ስትራተጂታት ኣጽዲቑ።

ንዅሉ ክፉት ዝዀነ ኣኼባ (Plenary Session)

ኣቶ ስተፋን ሎቨን፡ ኣቦ መንበር ማሕበረ ዲሞክራስያዊ ሰልፍን ቀዳማይ ምኒስተርን ሽወደን፡ ነቲ ኵሉ ኣባል ገስጋሲ ምሕዝነት ዝሳተፈሉ ኣኼባ ብናይ እንቋዕ ደሓን መጻእኩም ዝብል መልእኽትን ንዕላማታት ማሕበረ ዲሞክራሲ ንምዕዋት ዝዕድም መልዓዓሊ መግለጺ ብምቕራብን ከፊትዎ።

Stefan Lovfenኣቶ ስተፋን ሎቨን፡ ቀዳማይ ሚኒስተርን ኣቦ መንበር ማሕበረ-ዲሞክራስያዊ ሰልፍን ሽወደን

ኣቶ ኣንቶንዮ ኮስታ፡ ዋና ጽሓፊ ማሕበራዊ ሰልፍን ቀዳማይ ሚኒስተር ፖርቱጋልን “ሓድሽ ገስጋሲ መዋእል” ብዝብል ቴማ ወይ ኣርእስቲ መሰረታዊ መደረ (keynote speech) ኣቕሪቡ።

ብድሕር’ዚ፡ ኣብ’ቲ ቴማ ዝተመርኰሰ ናይ ጠረጴዛ ክትዕ ኣብ መንጐ እዞም ዝስዕቡ መራሕቲ ተኻይዶ።

  1. ስተፋን ሎቨን፡ ኣቦ መንበር ማሕበረ ዲሞክራስያዊ ሰልፍን ቀዳማይ ሚኒስተር ሽወደንን፤
  2. ኣንቶንዮ ኮስታ፡ ዋና ጽሓፊ ማሕበራዊ ሰልፍን ቀዳማይ ሚኒስተር ፖርቱጋልን፤
  3. ሪዛ ሆንቶርዮስ፡ ሰነይተርን ኣደ መንበርን ሰልፊ ተግባር ዜጋታት (Citizens’ Action Party (Akbayan)) ካብ ፊሊፒንስ፤
  4. ካርሎስ ሎፐዝ፡ ፕሮፈሰር ቤት ትምህርቲ ማንደላ፡ ኣብ ደቡብ ኣፍርቃ፤
  5. ፓመላ ረንዲ ቫግነር፡ ኣደ መንበር ማሕበረ ዲሞክራስያዊ ሰልፊ ኣውስትርያ፤
  6. ኡሎፍ ሹልዝ፡ ምኽትል ኣቦ መንበር ማሕበረ ዲሞክራስያዊ ሰልፍን ምኽትል ቻንስለር ጀርመንን፤
  7. ማኒሽ ታዋሪ፡ ኣባል ፓርላማን ሃገራዊ ኣፈኛን ናይ ህንዲ ሰልፊ ጕባኤን (Indian National Congress)

Stefan and Schultz 20191115 144619

ኣብ የማን ስተፋን ሎቨን፡ ቀዳማይ ሚኒስተር ሽወደንን ማርቲን ሾልስ፡ ምኽትል ቻንስለር ጀርመንን

ነዚ ተኸቲሉ

  1. ክሊማዊ ልውጥታትን ጽልዋታቱ ኣብ ሕብረተሰብን፤
  2. ግሎባላዊ ውዕል ዕዮ ኣብ ዲጂታላዊ መዋእል
  3. ሰላምን ጸጥታን (Peace and security)

ብዝብል ቴማታት ሚኒስተራትን መራሕቲ ሰልፍታትን ዝተኻፈልዎ ናይ ጠረጴዛ ክትዕ ተኻይዱ። ንኣብነት ወይዘሮ ማግድለና ኣንደርሸን፡ ሚኒስተር ፋይናንስ ናይ ሽወደን ሓንቲ ካብ’ቶም ዝተኻፈሉ ነይራ።

እታ ቀዳመይቲ መዓልቲ፡ ነቲ ኣብ ቱርኪ ኣብ ማእሰርቲ ዝርከብ ሰልሓቲን ዲሚትራስ፡ ኣቦ መንበር ማሕበረ ዲሞክራስያዊ ሰልፊ፡ ሽልማት ብምሃብን ናይ ደገፍ መግለጺታት ብምሃብን ኣኽቲሙ። ነቲ ሽልማት ከኣ በዓልቲ ቤቱ ንሰልሓቲን ዲሚትራስ ኢያ ተቐቢላቶ።

ንጽባሒቱ ቀዳም ዕለት 16 ሕዳር 2019 መራሕቲ መንግስታት፡ መራሕቲ ሰልፍታት፡ መራሕቲ ንቓባዊ ማሕበራትን ሲቪላውያን ማሕበራትን ….ወዘተ ዝተኻፈልዎ ጽዑቕ ናይ ጠረጴዛ ክትዓት ኣብ’ዞም ዝስዕቡ ቴማታት ተኻይዱ።

  1. ቀዳማይ ሚንስተር ሽወደን ዝተኻፈሎ፡ “ብድሆታት ማሕበረ ዲሞክራሲ ኣብ መዋእል ግሎባላውነት” ዝብል ቴማ፤
  2. ሚኒስተር ወጻኢ ጕዳያት ሽወደን ወይዘሮ ኣን ሊንደ ዝተኻፈለቶ፡ “ግሎባላዊ ፍትሒ” ዝብል ቴማ፤
  3. ዋና ጽሓፊት ማሕበረ ዲሞክራስያዊ ሰልፊ ሽወደን፡ ወይዘሮ ለና ሮድስትሮም ብዩስታድ ዝተኻፈለቶ “ንሓደጋታት ክሊማዊ ለውጢ ንምቕልባስ ካብ ራኢ ናብ ተግባር ዘሰጋግር ቅኑዕ ጐደና”፤

ብድሕር’ዚ፡ በብኣጀንዳታት ዝተኸፋፈለ ብሓደ ግዜ ኣብ ሰለስተ ክፍልታት ን45 ደቓይቕ ዝወሰደ ናይ ጠረጴዛ ክትዓት ተኻይዱ።

  1. ካብ ሰዓት 13፡00 ክሳብ 13፡45 “ቃልሲ ንዲሞክራስን ማሕበራዊ ፍትሕን” ኣብ ትሕቲ ዝብል ኣርእስቲ ዝተኻየደ ክትዓት፡-

ሀ. ኣብ ምብራቕ ኣውሮጳ፤

ለ. ኣብ እስራኤልንን ፍልስጢምን ፤

ሐ. ኣብ ኢትዮጵያ (መግለጺ ዘቕረቡ ኣሕመድ ዓሊ ዝተባህለ ናይ ረድዮ መደብ ኣካያዲ ኣብ ስቶክሆልምን ትዝታ ኣብርሃምን እተባህለት ነርስን ኢዮም)።

  1. ካብ ሰዓት 14፡00 ክሳብ ሰዓት 14፡45 ዝተኻየደ “ገስጋሲ ማዕበል ብኸመይ ነበጋግሶ” ዝብል መንቀሊ ዘለዎ ክትዕ፡-

ሀ. ኣብ ልዕሊ ዲሞክራሲ ዝወርድ ዘሎ መጥቃዕቲ፤

ለ. ኵነታት ቱርክን ሶርያን

ሐ. ንጾታዊ ማዕርነት ዝምልከት ገስጋሰን ንድሕሪት ዝጐቱ ተረኽቦታትን።

  1. ካብ ሰዓት 14፡45 ክሳብ 15፡15 “ናይ ሓባር ጸጥታን ልዝብ ምእንቲ ሰላምን” ኣብ ትሕቲ ዝብል ኣርእስቲ ዝተኻየደ ክትዕ ከኣ፡-

ሀ. መንታ ሓደጋታት፡ ኑክልያራዊ ኣጽዋርን ክሊማዊ ለውጥታትን፤

ለ. ማሕበራዊ ልዝብ፤

ሐ. ደቂ ኣንስትዮ፡ ሰላምን ጸጥታን

ኣብ ዝብሉ ኣጀንዳታት ኢዩ ተመያይጡ።

ኣብ’ቲ ናይ መወዳእታ ሰዓት ኵሉ ተጋባኢ ኣብ ሓደ ኣዳራሽ ተኣኪቡ፡ ናይ ቀደም ናይ ሽወደን ሚኒስተር ወጻኢ ዝነበረ ያን ኤሊሰን ዘቕረቦ “ግሎባላዊ ዝምባለታትን (trends) ሓባራዊ መልስታትን ብዝብል ኣርእስቲ መደረ ኣቕሪቡ።

Jan Elliassonያን ኤሊሰን፡ ናይ ቀደም ናይ ሽወደን ሚኒስተር ወጻኢ ዝነበረ

ኣብ ዕለት 17 ሕዳር 2019

  1. ምስ ክሊማዊ ፖሊሲታት ዝምድና ዘለዎ ጕዳያት ሰብኣዊ መሰላት። ኣብ ልዕሊ ክሊማ ዝግበር ገበናት፡ ዘኽስስ ገበን ንምግባሩ፤
  2. ሓምላይ ቍጠባ፣ ሕልሚ ድዩ ወይስ ክግበር ይከኣል ኢዩ።
  3. ገስገስቲ ምንቅስቓሳትን ናይ ለውጢ ናውትን

ኣብ ዝብሉ ቴማታት ተመያይጦም። በዚ እቲ ዋዕላ ብዓወት ተዛዚሙ።

ብብጻይ ኣሰፋው በርሀ ኣባል ማእከላይ ባይቶ ዝምራሕን ብጻይ ጐይተኦም መብራህቱ ሓላፊ ዜና ዞባ ኤውሮጳ ብኣባልነት ዝነበሮን ልኡኽ ሰልፊ ዲሞክራሲ ህዝቢ ኤርትራ (ሰዲህኤ) ኤርትራዊ ዲሞክራስያዊ ሰልፊ ሃገር (ኤዲሰሃ) ብ16 ሕዳር 2019 ኣብ ከተማ ለንደን ኣብ ዝጸውዖ ጽንብል 6ይ ጉባአኡ ተሳቲፉ። ኣብዚ ኣጋጣሚ ቃል ሰዲህኤ ዘስመዐ ብጻይ ኣሰፋው፡ ብስም ኣቦመንበርን መሰረታትን ሰልፉ ሰላምታ ምስ ኣቕረበ፡ ስለቲ ንሰዲህኤ ዝተገብረ ናይ ምስታፍ ዕድመ ምስጋና ኣቕሪቡ።

ብጻይ ኣሰፋው ኣብዚ ዘቕረቦ ናይ ምሕዝነት ቃል፡ ኤዲሰሃ፡ ኣብዚ ወሳኒ ግዜ፡ ኣብ 6ይ ጉባአኡ ሓድሽ ፖሊሲ ሒዙ ከም ዝወጸ ብምሕባር፡ ንቐንዲቀንዲ ካብቲ ጉባአኦም ዝወሰኖ ውሳነታት ብምጣስ “ዩሃና” ኢልዎም። ኣተሓሒዙ ከኣ ሰልፍናን ሰልፎም ናይ ነዊሕ ግዜ ርክብ ከም ዝጸንሖም ኣመልኪቱ ንመጻኢ እውን ብሓደ ከስረሓና ዝኽእል ተመሳሳልነት ከም ዘለና ጠቕቒሱ ናይ ሰዲህኤ ብሓባር ናይ ምስራሕ ቅሩብነት ኣቃሊሑ።

ነዚ ዝያዳ ንምብራህ ከኣ ሰዲህኤ ኣብቲ ቅድሚ 4ተ ኣዋርሕ ዘሰላሰሎ 3ይን ሓድነታውን ጉባአኡ ምስ ተቓወምቲ ፖለቲካዊ ውድባት ኤርትራ ብሓባር የስረሓኒ ኢሉ ንዘሕደሶ እማመ ብዝርዝር ኣስፊሩ። (ክቡራት ኣንበብቲ ናይቲ ኣብቲ ጽንብል ዝቐረብ ቃል ምሉእ ትሕዝቶ እዚ ዝስዕብ እዩ)

ቃል ሰዲህኤ ኣብ ጽንብል 6ይ ጉባአ ኤዲሰሃ

ዝኸብርኩም ኣባላት መሪሕነትን መሰረታትን ኤርትራዊ ዲሞክራስያዊ ሰልፊ ሃገር

ዝኸበርኩም ናይዚ ጽምብል በዓል ተሳተፍቲ

ብቐዳምነት ካብ ኣቦ መንበር ሰልፊ ተጋዳላይ ተስፋይ ወልደሚካኤል ደጊጋን መላእ ኣባላት ሰልፊ ደሞክራሲ ህዝቢ ኤርትራን ምዉቕ ናይ ቃልሲ ሰላምታ ተቐበሉ።

ብምቕጻል ኣብዚ ነጥበ-መቐይሮ ንጉዕዞ ቃልስኹም ክኸውን ዝኽእል ውሳኒታት ሒዙ ዝወጸ ጽንብል ዕዉት 6ይ ጉባአኹም ክንሳተፍ ስለ ዝዓደምኩምና ከም ሰልፊ ዲሞክራሲ ህዝቢ ኤርትራ (ሰዲህኤ)  ልባዊ ምስጋና ነቕርበልኩም።

ጉባኤኹም ኣብዚ ብደረጃ ሃገር ኮነ ከባቢና ክምዘን እንከሎ፡ ኣዝዩ ጽንኩር ኩነታት ተጋቢኡ ንህልዊ ኩነታት ሃገርና ኣብ ግምት ዘእተወ ሓድሽ ፖሊሲ ብምትእትታው ብዓወት ስለ ዝተጸንበለ ዝተሰመዓና ሓጐስ ልዑል ምዃኑ እንዳገልጽና፡ ዩሃና ንብለኩም። ውሳኔታት ጉባኤኹም ካብ ሕሉፍ ተመክሮ ዝተማህረ፡ ንመድረኻዊ ብድሆታት ዝገጥም ኮይኑ ረኺብናዮ። ካብቶም ኣገደስቲ ኮይኖም ዝመሰጡና ድማ፡

1 ሓድነት ህዝቢ ኤርትራ ምሕላው

2 ንኹሎም ኤርትራውያን ክፉት ናብ ዝኾነ ሰልፊ ምስግጋር

3 ዕላማታቱ ንምርግጋጽ ሰላማዊ ኣገባብ ቃልሲ ምጥቃም

4 ከም ሰልፊ ሒዝክሞ ዝነበርኩም ስም፡ ናብ ኤርትራዊ ደሞክራስያዊ ሰልፊ ሃገር ዝብል ምቕያር። ዝብሉ ውሳኔታትኩም ኢዮም።

ምስ ውድብኩም ተቐራሪብካ ኣብ ምስራሕ፡ ናይ ነዊሕ ግዜ ተመኩሮ ከም ዘለና ንኹላትና ፍሉጥ እዩ። ተመኩሮና ኣብ ምሕዝነት ሃገራዊ ሓይልታት ኤርትራን ኣብ ኤርትራዊ ዲሞክራስያዊ ኪዳንን ነዚ ዘመልክት እዩ። ኣብቲ መስርሕ ክልቴና ካብ መስረቲ ናይቲ ከምቲ ዝተጸበናዮ ዘይተዓወተ ግንባራት ከም ዝነበርናን ግደታትና ውን ዕዙዝ ምንባሩ  ዝሰሓት ኣይኮነን። ኣብቲ  ብሓባር ንዋሳኣሉ ዝነበርና መስርሕ ግን፡ ብፍላይ ኣብ ኣተሓሕዛ ዝምድና ሃይማኖትን መንግስትን ፍልልይ እንዳሃለወና እዩ ነይሩ። እንተኾነ ብክልቴና ወገናት እዚ ፍልልያት ኣብ መጻኢ ምዕባለ ክረአ ዝግበኦ ከምዝኾነ ብምርዳእ ኣብቲ  ዘሰማመዕና ናይ እዋኑ ስራሓት ካብ ምስራሕ ኣይክልክለናን ኢዩ ዝብል እምነት ኔሩና። ግን ክንድቲ ክንከዶ ዝነበረና ርሕቀት ክንከይድ ኣይከኣልናን።

ሎሚ ግና እነሆ 6ይ ጉባኹም ብዘተኣታተዎ ሓድሽ ፖሊሲ እሞ ድማ በቲ ክሳብ ሕጂ ዝተመኮርናዮ ብሓባር ከይንሰርሕ ዝነበረ ዕንቅፋት ተጸሪጉ እዩ ኢልና ንኣምን።

ሰልፊ ዲሞክራሲ ህዝቢ ኤርትራ (ሰዲህኤ)፡ ከም ኣካል ሓይልታት ለውጢ ኤርትራ፡ ብዘይካ ሓቢርካ ምስራሕ ካልእ እንዕወተሉ መንግዲ ከምዘየለ ኣሚኑን ብፖሊሲ ኣሰንዩን ካብ ዝሰርሕ ነዊሕ ግዜ ኮይኑ እዩ። ተግባራዊ መግለጺ ናይዚ እዩ ከኣ  ብ2017 4ተ ነጥብታት ዝሓዘ ብሓባር ናይ ምስራሕ እማመ ሒዙ ዝቐረበ። ዋላኳ ብትብዓት እንተዘይቀጸልናዮ ካብቶም ንእማመና ከም ኣገዳሲ ጉዳይ ወሲዶም ዝመለሱልና ሰልፍኹም ሓደ ምንባሩ ኣብዚ ኣጋጣሚ ምጥቃሱ ኣገዳሲ እዩ።

እቶም ኣብ መዳያት ዜና፡ ህዝባዊ ስራሓት፡ ከምኡ ውን ዲፕሎማስያዊ ዝምድና ብሓባር የስሩሑና ኢልና ኣብ እማመና ዘስፈርናዮም ኣብ 3ይን ሓድነታውን ጉባአና ድማ፡ዲስና ንሰርሓሎም ዘለና እዞም ዝስዕቡ እዮም።

  1. ምዕቃብ ልኡላዊ ግዝኣት ኤርትራ፤
  2. ምውዳቕ ዲክታቶርያዊ ስርዓት ህግደፍን ምልጋስ መሓውራት ጭቆናኡን፤
  3. ድሕሪ ውድስርዓት ህግደፍ ኣብዝሓ ሰልፋዊ ስርዓት ዝሰረቱ ህዝባዊ ዲሞክራስያዊ ስርዓት ምቛም፤
  4. ግዝኣተ ሕግን ዲሞክራስያዊ መሰላትን መላእ ሓርነታትን ህዝቢ ምቕባል፤

እዞም ነጥብታት ናይ ሰልፍና ርኢቶ እነንጸባርቐሎም ኮይኖም፡ ካብዚኣቶም ዝያዳ ብሓባር ከቃልሱ ዝኽእሉ ብኻልእ ወገን ዝቐርብ ርኢቶታት ክንሰምዕ እውን ቅሩባት ምዃና ኣብዚ ኣጋጣሚ ከነነጽር ንፈቱ።

ብመሰረትዚ ኣቐዲሙ ዝተጠቕሰ እማመ ኣብ ዝገብርናዮ ምንቅስቓስ ክንድቲ ትጽቢትናን ህርፋናን’ኳ እንተዘይኮነ ዓወት ሓፊስናሉ ኢና። ንመጻኢ ክዕወቱ ዓብይ እምነት ዘንበርናሎም ብሓባ  ንምስራሕ ኣብ ሓይሎ ናይ ዘተ ጽምዶታት እውን ኣብ መስርሕ ኣለና።

ዕዉት 6ይ ጉባአኹም፡ ምስቲ ቅድሚ 4ተ ኣዋርሕ፡ ኣብ 3ይን ሓድነታውን ጉባአ  ምስ መላእ ደምበ ተቓዉሞ ኤርትራ ብሓባር ዘስርሕ ዝሓንጸጽናዮ ፖሊሲ ንምትግባሩ ኩነታት ንምፍጣር ኣብ እነመቻቻኣሉን ብሓድሽ መንፈስን ስምዒትን ኣብ ዝተበገስናሉ ምምጻኡ ከኣ ጽቡቕ ኣጋጣሚ እዩ።

ሰልፍኹም ሓንጺጽዎ ዘሎ ፖሊሲ፡ከም ዝተረዳእናዮብኹላትና፡ ቅሩብነት ጽቡቕ ድሌትን ሃገራዊ ሓልዮትን እንተተወሲኽዎ ኣይኮነንዶ ኣብ ናይ ሓባር ጽላል ኮይንና ምስራሕ ሓደ ውድብ ንምዃን እውን ዘኽእለና ኢዩ።

ኣብ መደምደምታ ክንብሎ እንኽእል፡ በዚ ኹን በቲ፡ ከም ኣካል ናይቲ “ ምስ ኩሉ ኤርትራዊ ፖለቲካዊ ውድባትን ሰልፍታትን ኣብቲ ዘረዳድኣና ነጥብታት ብሓባር ምስራሕ” ዝብል ፖሊሲና ምሳኹም እውን ክንሰርሕ ቅሩባት ምዃና በዚ ኣጋጣሚ ንገልጸልኩም።

እንደና እንኳዕ ኣወተኩም

የቐንየልና

ልኡኽ ሰዲህኤ ሎንዶን

 16 ሕዳር 2019

ማእከላይ ባይቶ፡ ሰልፊ ዲሞክራሲ ህዝቢ ኤርትራ (ሰዲህኤ) ብ2 ሕዳር 2019 ብኣቦመንበሩ ብጻይ ተስፋይ ወልደሚካኤል (ደጊጋ) ዝመርሐ ፍሉይ ኣኼባኡ ኣካይዱ። ማእከላይ ባይቶ ኣብ ኣኼባኡ፡ ብፈጻሚ ሽማግለ ዝቐረበ ንድፊ ኣገዳሲ ሓሳባት ብምትእትታውን ምምሕያሻት ብምቕራብን ናይ ነፍሲ ወከፍ ፍጻሚ ቤት ጽሕፈት ዓመታዊ መደብ ዕዮ ኣጽዲቑ።  ኣባላት ማእከላይ ባይቶ ናይቲ ኣቐዲሙ ብፈጻሚ ሽማግለ  ዝተዳለወ ንድፊ ዓመታዊ መደብ ዕዮ ቅዳሓት ተዘርጊሕሎም ኣብ ልዕሊ ምጽንሑ፡ ኣብዚ ኣኼባ ብነፍሲ ወከፍ ሓላፊ ቤት ጽሕፈት መእተዊ እናተገብረሉን ኣብ መወዳእታ ብኣቦ-መንበር መጠቓለሊ ሓሳብ እናተዋህበሉን እዩ ፡ ሓደ ብሓደ ተመያይጡ ኣጽዲቕዎ።

ባይቶ ንትሕዝቶ እቲ ዓመታዊ መደብ ኣብያተ-ጽሕፈት ጥራይ ዘይኮነ ናይ ኣተገባብራኡ ስልትታትን ንነፍሲ ወከፍ  ቤት ጽሕፈት ዝተመደበሉ ዓቕሚ ሰብ እውን ብግቡእ ርእዩ ኣጽዲቕዎ። ሓለፍቲ ኣብያተ-ጽሕፈት ብወገኖም ኣብ ነናይ ቤት ጽሕፈቶም ዓመታዊ መደብ ንዝተሓተ ሕቶታት ኣብሪሆም፡ ብኣባላ ባይቶ ንዝቐረቡ ሃነጽቲ ርኢቶታትን ለበዋታትን ከኣ መዝጊቦም። ኣብቲ መደብ ዕዮታት፡ ምዕዛዝ ተሳትፎ መንእሰያትን ደቂ ኣንስትዮን፡ ቁጠባዊ ዓቕሚ ሰልፊ ምድንፋዕ፡ ስርርዓዊ ስረሓት ምስፋሕ፡ ዜናዊ ዓቕሚ ምምዕባል፡ ዲፕሎማሲታዊ ርክባት ምስፋሕን፡ ኣብ ደንበ ተቓውሞ ክልተኣውን ካብኡ ንላዕልን ሓባራዊ ስራሓት ንምሕያል ምቅላስን ካብቶም ዝያዳ ቆላሕታ ዝተገብረሎም እዮም።

ብዘይካዚ፡ ኣብዚ ፍሉይ ኣኼባዚ፡ ኣብ ቅዋም ዝተመርኮሰ ማእከላይ ባይቶ ኣብ መጻኢ ኣርባዕተ ዓመታት ዝምረሓሉ መሰልን ግቡእን ኣባል ባይቶ ዘነጽር፡ ውሽጣዊ ሕጊ ተመያይጡ ኣጽዲቑ። ኣብዚ ዛዕባዚ እውን ባይቶ ቤት ጽሕፈት ኣቦ-መንበር ነቲ ክሳብ 3ይን ሓድነታውን ጉባአ ክስረሓሉ ዝጸንሐ ውሽጣዊ ሕጊ ባይቶን ቅዋም ሰልፍን መሰረት ገይሩ ናብ ተሳተፍቲ ኣኼባ ዘርጊሕዎ ዝጸንሐ እሞ፡ ኣባላት ባይቶ ብርኢተኦም ከማዕብልዎ ዝጸንሑ ንድፊ  ድሕሪ ምምይያጥ እዩ ኣጽዲቕዎ።

ኣብ መወዳእታ ባይቶ ብድምር ነቲ ዓመታዊ መደባት ኣብያተ-ጽሕፈትን  ባይቶ ዝምረሓሉ ውሽጣዊ ሕግን ብዲሞክራስያዊ ኣገባብ ብድምጺ ብምጽዳቕ ኣኼባ ተደምዲሙ። ስሩዕ ኣኼባ ማእከላይ ባይቶ ሰዲህኤ ኣብ ዓመት ሓደ ግዜ እዩ ዝካየድ ክኸውን ከሎ፡ ከም ኣድላይነቱ ፍሉይ ኣኼባታት ድማ የካይድ።

ኣብ ዋና ከተማ ሱዳን ካርቱም ብ30 ጥቅምቲ 2019 ንጉዳይ ስደተኛታት ዝምልከት ዓወደ-መጽናዕቲ ከም ዝተኻየደ ምንጭታትና ካብቲ ቦታ ሓቢሮም። ኣብዚ ዓውደ-መጽናዕቲ፡ ወከልቲ፡  ቤት-ጽሕፈት ላዕለዋይ ኮሚሽን ጉዳይ ስደተኛታት ኣብ ካርቱም፡  ቤት ጽሕፈት ስደተኛታት ሱዳን፡ ላዕለዋይ ባይቶ ንሰብኣዊ ዕብየት፡ ምኒስተር ዕዮን ማሕበራዊ ዕቤትን ተሳቲፎም።  ብዘይካዚ ኣብ ሰዳን ካብ ዘለዉ ስደተኛታት፡ ኤርትራ፡ ደቡብ ሱዳን፡ ኢትዮጵያ፡ ኮንጎ፡ የመንን ሱርያን ኣብዚ ዓውደ- መጽናዕቲ ነፍሲወከፎም ብሓደ ሰብ ከም ዝተወከሉን ጠቕላላ ተሳተፍቲ ናይቲ ዓውደ መጽናዕቲ 50  ከም ዝነበሩን እቲ ዝበጸሓና ሓበሬታ ጠቒሱ።

ኣብ መኽፈቲ’ዚ ዓውደ መጽናዕቲ፡ ሰለስተ ኣገደስቲ መጽናዕታዊ ጽሑፋት ከም ዝቐረቡን፡ ካብቶም ኣብቲ ወረቓቕቲ ዝተላዕሉ ዛዕባታት፡  መሰላትን ግቡኣትን ስደተኛታት ዘነጽር ብ2014 ዝጸደቐ ሕጊ ሱዳን ብሓላፊ ቤት-ጽሕፈት ስደተኛታት (COR) ዝቐረበ፡ ስደተኛታት ድራር ዕለቶም ክረኽብሉ ዝኽእሉ ሞያን ጥበባትን ንኽውንኑ ሞያዊ ስልጠናታት ምሃብን ኣብ ህይወቶም ከጋጥምዎም ካብ ዝኽእሉ ጸገማት ዝከላኸልሉ መንግድን ብወኪል ላዕለዋይ ኮሚሽን ስደተኛታት ዝቐርበ፡ ስደተኛታት ናይ ስራሕ ፍቓድ ወረቐት ከውጽእሉ ዝኽእሉ ሕጋዊ መንገድታት ዝምልከት ብወኪል ቤት-ጽሕፈት ዕዮ ዝቐረበ ይርከብዎም።

እዞም ኣብዚ ዓውደ-መጽናዕቲ ዝቐረቡ ሓሳባት ቅድሚ ሕጂ ብሓፈሻ ብኹሎም ኣብ ሱዳን ንዘለዉ ስደተኛታት ብፍላይ ከኣ ብኤርትራውያን ስደተኛታት ክለዓሉ ዝጸንሑ ምዃኖም እቶም ምንጭታት ሓቢሮም፡ እንተኾነ ንተግባራውነቶም ቃል ክእተወሎም’ኳ እንተጸንሐ ክሳብ ሕጂ ብግቡእ ከይተተግበሩ ከም ዝጸንሑን ብሰንክዚ ስደተኛታት ክጽገሙ ከም ዝጸንሑን ሓቢሮም። ኣብ መወዳእታ’ቲ ዓውደ መጽናዕቲ ተሳተፍቲ እቲ ቃል ዝተኣትወሉ መሰል ስደተኛ፡  ዘረባ ጥራይ ኮይኑ ከይተርፍ ለበዋታት ኣቕሪቦም።

ናይ ኢትዮጵያ ናይ ባሕሪ ትራንስፖርትን ሎጅስትክን ኣካያዲ ስራሕ፡ መራኽብ ኢትዮጵያ ናብ ወደብ ባጽዕ ምእታው ከም ዘቋረጻን ድሕሪ ሕጂ ናብኡ ከምዘይገሻን ሓቢሮም። እቶም ኣካያዲ ስራሕ ኣቶ ሮባ መገርሳ “ሸገር” ንዝተባህለት ሬድዮ ኤፍኤም ብ30 ጥቅምቲ 2019 ከም ዝገለጽዎ፡ ብወገን ኢትዮጵያ እዚ ናይ ምቁራጽ ስጉምቲ ዝተወስደ፡ መንግስታት  ኤርትራን ኢትዮጵያን ኣብ ኣጠቓቕማ ወደብ ኣብ ናይ ሓባር ስምምዕ ክበጽሑ ስለ ዘይከኣሉ እዩ።

እዞም ኣካያዲ ስራሕ ኣብ ዝሃብዎ ዝርዝር መግለጺ፡  ብወገን መንግስቲ ኢትዮጵያ ኣብቲ ዝምድና ክፍሊታት ብናይ ወጻኢ ሸርፊ ንጠቐም ዝብል ሓሳብ ክቐርብ እንከሎ፡ መንግስቲ ኤርትራ ግና ብሓደ ናቕፋ ኤርትራ ንክልተ ብር ኢትዮጵያ ሸርፊ ንጠቐም ስለ ዝበለ ኣብ ስምምዕ ከምዘይተበጽሐ ኣነጺሮም። ንሶም “እሞ መዓስ ኣብ ስምምዕ ተበጺሑ እቲ መስርሕ ተመሊሱ ክቕጽል ይኽእል”? ዝብል ሕቶ ቀሪብሎም ክምልሱ እንከለዉ “ ኣብ ቀረባ ግዜ ንሰማማዕ ኣይመስለንን” ዝብል መልሲ እዮም ሂቦም።

ነዚ ኣብ መንጎ ህግዲፍን መንግስቲ ኢትዮጵያን ዝተጀመረ ዘይግሉጽን ዘይትካላውን ዝምድና ብቐረባ ክከታተልዎ ዝጸንሑ ናይቲ ሰክተር ክኢላታት፡ እዚ ምቁራጽ ኣብ መራክብ ዝድረት ዘይኮነ፡ ናብ ከም መንገዲ ኣየር ኢትዮጵያ ከይልሕም ዘለዎ ስግኣት ይገልጹ ኣለዉ።

28 ጥቅምቲ 2019

ሓው መንግስተኣብ ኣስመሮም፡ ሓላፊ ቤት ጽሕፈት ውደባ ሰልፊ ዲሞክራሲ ህዝቢ ኤርትራ (ሰዲህኤ)፡ ብ27 ጥቅምቲ 2019 ዓ.ም ድሕሪ 3ይ ሓድነታውን ጕባኤ ሰልፊ፡ ኣብ ኣውስትራልያ ኣብ ከተማታት መልበርን፡ ፐርስ፡ ብሪስበይንን ምስ ዝርከባ ጨናፍር ሰልፊ በዅሪ ኣኼባኡ ምስ ጨናፍር ሰዲህኤ ብሳይበር ኣካይዱ።

ሓው መንግስተኣብ ኣስመሮም ዝተዛረበሎም ዛዕባታት መስርሕ ሓድነት ሃገራዊ ድሕነት ኤርትራ ሕድርን (ሃድኤ-ሕድሪ) ሰዲህኤን፤ ፖለቲካዊ ውሳኔታት 3ይን ሓድነታውን ጕባኤ፤ ኣቋቝማ ቤት ጽሕፈት ውደባን ዕማማቱን ዝብሉ ነበሩ።

3ይን ሓድነታውን ጕባኤ ዕዉት ኰይኑ ንኽወጽእ ካብ ዝሓገዙ ረቛሕቲ ድማ፡>-

  1. ብሽማግለታት ዘተ ክልቲኡ ውድባት እተኻየደ ጽፉፍ ናይ ልዝብ መስርሕ፤
  2. ብሓባራዊ ኣሰናዳኢት ሽማግለን ሓባራዊት ሓጻዪት ሽማግለ እተገብረ ዕቱብ ምድላዋት፤
  3. መሪሕነታትን መሰረታትን ክልቲኡ ውድባት ዝተጻወትዎ ሃናጺ ግደን ዘበርከትዎ ኣወንታዊ ተሳትፎን፤
  4. ነፍስወከፍ ውድብ ኣቐዲሙ ንተመክሮታቱ ዝገምገመሉ ዋዕላታት ምድላዉ፤
  5. ካብ ኣባላትን ደገፍትን ክልቲኡ ውድባት ብፍላይ ድማ ካብ መንእሰያት ዝተበርከተ ገንዘባዊ ወፈያታት፤
  6. ተለቪዥን ኣሰናን ኤሪ-ሳትን ንውጽኢት ጕባኤ ኣብ ምንጽብራቕ ውጽኢት ጉባኤ ዝገበርዎ ኣበርክት፤
  7. ልዕሊ ኵሉ ድማ ንሓድነት ዝነበረ ድሌትን ባህግን ክልቲኡ ውድባትና…ወዘተ ምንባሩ ጠቒሱ።

ቀጺሉ ነቲ 12 ነጥብታት ዝሓዘለ፡ ንጕዳይ ሓድነት ደምበ ደለይቲ ፍትሒ፡ ልዑላውነት፡ ሰብእዊ መሰላት፡ ህዝባዊ ምንስቅስቓስ “ይኣክል”፡ ሓይልታት ምክልኻል ኤርትራ፡ ጕዳይ ስደተኛታት፡ ዝምድና ኤርትራ ምስ ጐረባብቲ ሃገራትን ኣብ መንጐ መንግስቲ ኤርትራን ኢትዮጵያን ዝተገብረ ዘይንጹር ውዕላትን ዝምልከት ጕባኤ ዘጽደቖም ፖለቲካዊ ውሳኔታት ብዝርዝር መግለጺ ኣቕሪቡ። (ዝርዝራቱ ኣብ ሓርነት.ኦርግ ክትረኽብዎ ትኽእሉ ኢኹም።

ኣብ ርእስ’ዚ ኣብ መንጐ ደለይቲ ፍትሒ ዝግበር ዘሎ ምቅርራባትን ምትሕብባራትን ተስፋ ዝህብ ምዃኑ ድሕሪ ምብራህ ከም ኣብነት፡ ነቲ ኣብ መንጐ ሰዲህኤን ኤርትራዊ ሃገራዊ ባይቶ ንደሞክራስያዊ ለውጢ፤ ከምኡ’ውን ኣብ መንጐ ግንባር ሃገራዊ ድሕነት ኤርትራን ሰዲህኤ ዝተኻየደ ፈላሚ ርክባትን ንልዝብ ዘርኣይዎ ድልውነትን ጠቒሱ።

ሓው መንግስተኣብ ኣስመሮም ኣብ መወዳእታ ናይ’ቲ ዝመርሖ ቤት ጽሕፈት ውደባ ኣቋቕማን ናይ ሓደ ዓመት ዕማማትን መግለጺ ኣቕሪቡ። ነዚ ዕማማት’ዚ ኣብ ኣውስትራልያ ንምስላጥ ድማ፡ እተን ጨናፍር ብመሰረት ቅዋም 3ይን ሓድነታውን ጕባኤ ዳግመ-ስርርዕ ክገብራ መምሪሒ ሂቡ።

ብድሕር’ዚ ኣኼበኛታት ክበርሃሎም ንዝደልይዎ ጕዳያት ሕቶታት ኣቕሪቦም። ከምኡ’ውን ንዕብየትን ሓያልነትን ሰልፍን ደምበ ተቓውሞን ይሕግዙ ኢዮም ዝበልዎም ዝተፈላለዩ ሃነጽቲ ርእይቶታትን ለበዋታትን ኣቕሪቦም።

ኣቦመንበር ሰልፊ ዲሞክራሲ ህዝቢ ኤርትራ (ሰዲህኤ) ብጻይ ተስፋይ ወልደሚካኤል (ደጊጋ) ናብ  ኣቦ መንበር ሰልፊ ዲሞክራሲ ሃገረ ኤርትራ (ሰዲሃኤ)  حادي - حزب الوطن الديمقراطي الإرتري) ክቡር  ዶር. ኣሕመድ ሳልሕ ናይ ዮሃናን ምሕዝነትን መልእክቲ ልኢኹ። ኣቦመንበር ተስፍይ ደጊጋ፡ ነዚ መልእኽቲ ዝለኣኸ፡ ሰዲሃኤ 6ይ ጉባአኡ ብዓወትን ሓዲሽ ፖሊስታት ብምትእትታውን ስለ ዝኸምተአ ንምምጓሱ እዩ።

ኣቦመንበር ሰዲህኤ፡ ሰዲሃኤ ኣብዚ ዕዉት 6ይ ጉባአኡ 37 ኣባላት ባይቶን 9 ዝኣባላቱ ፈጻሚ ሽማግለን መሪጹ፡ ኤርትራዊ እስላማዊ ሰልፊ ንፍትሕን ልምዓትን ዝነበረ ስሙ፡ ናብ ሰልፊ ዲሞክራሲ ሃገረ ኤርትራ (ሰዲሃኤ) ቀይሩ፡ “ሓድነት ህዝቢ ኤርትራ ምሕላው፡ ንኹሎም ኤርትራውያን ክፉት ናብ ዝዀነ ሰልፊ ምስግጋር፡ ዕላማታቱ ንምዕዋት ዘይጐነጻዊ ኣገባብ ምጥቃም ,,,,,, ወዘተ” ዝብሉ ውሳነታ ብምትሕልላፉ ዘለዎ ደገፍ ብምግላጽ እዩ ነቲ መልእኽቲ ሰዲዱ።

ብጻይ ተስፋይ ኣብቲ መልእኽቱ እዚ ተባዕባ ውሳነታት 6ይ ጉባአ ናይቲ ሰልፊ፡ ኣብ ቃልሲ ደንበ ተቓውሞ ኤርትራ ሓድሽ ምዕራፍ ከም ዝኸፍት ጠቒሱ፡ “ሰልፊ ዲሞክራሲ ህዝቢ ኤርትራ፡ ንዝውሰንኩሞ ውሳኔታት ኣብ ምትግባር ዓወት ከሰንየኩም እናተመነየ፡ ምስ ሰልፍኹም ኰነ ምስ መላእ ደምበ ተቓውሞ ንሓባራዊ ዕዮ ዘለዎ ድልውነት የረጋግጸልኩም” ዝብል ሓሳብ እውን ኣብ መልእኽቱ ኣስፊሩ።

   

ጨንፈር ኖርወይ  ሰዲህኤ  ብዕለት 19 ጥቅምቲ 2019 ኣብ ከተማ ኦስሎ ንመበል 9ይ ግዜ ዕዉት ጉባኤ ኣካይዱ። 9ይ ጉባኤ ጨንፈር ኣብ ከባቢ ሰዓት 9:30 ናይ ቅድሚ ቀትሪ ብዝኽረ ሰማዕታት ጀሚሩ ንኣስታት 6  ሰዓታት ቀጺሉ።

ኣቦ መንበር ጨንፈር ብጻይ ማሕደር ዕቁባዝጊ ኣብ መኽፈቲ ናይቲ ጉባኤ ኣብ ዘስምዖ መደረ፣ ምስ ብጻያዊ ሰላምታን ናይ እንቋዕ ብደሓን መጻእኩም ቃልን፣ ትርጉም ጉባኤ እንታይ ምዃኑ ኣስፊሑ ብምብራህ፣ ጉባኤኛታት ብመሪሕነት ንዝወሃቦም ዓመታዊ ጸብጻባትን ሓበረታን ክሰምዑ ጥራሕ ዘይኮነስ፣  ስለምንታይን ብኸመይን ዝብሉ ሕቶታት ብምልዓልን፣ ኣብ ስራሕ ንዝጸንሐ መሪሕነት ጉድለታት እንተደኣ ነይሩዎ ብጉድለታቱ ብምንቃፍን  ንጡፋት ተሳተፍቲ ጉባኤ ክኾኑ ከምዘለዎም ኣቀዲሙ ኣዘኻኺሩ።

ብምቅጻል ኣባል ማእከላይ ባይቶ ዝኾነ ብጻይ መድሃኔ ሃብተዝጊ ኣብቲ ጉባኤ ተረኺቡ፣ ንኣኼበኛታት ኣብ ምስጢር ትርጉም ቃልስን፣ ኣብ ህልው ሰብኣውን፣ ፖለቲካውን፣ ቁጠባውን ኩነታት ሃገርናን፣ ዕዉት 3ይን ሓድነታውን ጉባኤ ሰልፍናን፣ ድሕሪ ጉባኤ ሰልፊ ኣብ ዝተመዝገቡ ዓወታትን ዝተወስዱ ስጉምትታትን፣ ኣብ ኩነታት ደምበ ደለይቲ ፍትሒን ዘተኮረ ሰፊሕ መደረ ኣስሚዑ።

ዋና ጸሓፍን ተሓዝ ገንዘብን ንብረትን ጨንፈር ብጾት ኸሊፋ ዓብደላን ሙሴ ዓማርን እውን ብቀደም ተኸተል ሰብኣውን፣ ፖለቲካውን፣ ምጣኔ ሃብታውን፣ ጸብጻባቶም ብዝርዝር ኣቅሪቦም።

ኣስዒቡ ሓንቲ ጓል ኣንስተይቲ እተማእክሎ 3 ዝኣባላቱ ሰክረታር ጉባኤ ብሕርያ ቆይሙ፣ ኣኼበኛታት ኣብ ዝተዋህቦም ጸብጻባትን ሓበረታን ሰፊሕ ምምይያጥ ኣካይዶም። ንኹሎ ዘልዓልዎ ሕቶታት ድማ እኩል መብሪህን መልስን ረኺቦም።

ጨንፈር ንብድሕሪ ሕጂ ኣብ ቀጻሊ ጉዕዞኡ ክዓሞም ኣለዎም ንዝበልዎ ሪእቶታቶም እውን ኣመዝጊቦም።

ኣብ መወዳእታ ጉባኤኛታት ክልተ ደቂ ኣንስትዮ ዝርከብዎ 5 ዝኣባላቱ ፣መሪሕነት ጨንፈር ብደሞክራስያዊ ኣገባብ መሪጾም። ጉባኤ ብዓወት ተሰላሲሉ።

ፈጻሚ ሽማግለ ሰልፊ ዲሞክራሲ ህዝቢ ኤርትራ (ሰዲህኤ) ብ12 ጥቅምቲ 2019 ፍሉይ ኣኼባ ኣካይዱ። ኣብ ኣኼባኡ ናይ ነፍሲ ወከፍ ቤት ጽሕፈት ፈጻሚ ሽማግለ ዓመታዊ መደባትን ኣገባብ ኣተገባብራኡን ብደቂቕ ተመልኪቱን ኣጽኒዑንቑ። ንድፊ ናይቲ ዝጸደቐ ዓመታዊ መደባት፡ ኣቐዲሙ ናብ ኣባላት ፈጻሚ ኣብያተ ጽሕፈት ተዘርጊሑ ኣብ ልዕሊ ምጽንሑ፡ ኣኼባ ብደቂቕ ኣብ ነፍሲ ወከፍ ንድፊ ብምምይያጥን ኣድላይ ዝበሎ ምምሕያሻት ድሕሪ ምግባር እዩ ኣጽዲቕዎ። ምስዚ ብዝተተሓሓዘ ከኣ ዝርዝር ናይተን ነዚ መደብ ዕዮ ኣብ ግብሪ ንምውዓል ዝቖማ ምምሕዳራት ነፍሲ ወከፍ ቤት ጽሕፈት ብግቡእ መርሚሩ ኣጽዲቑ።

ፈጻሚ ሽማግለ ሰዲህኤ ኣብዚ ኣኼባኡ፡ ምስ ዝተፈላለዩ ኤርትራዊ ውድባትን ግንባራትን ዝራኸባ ናይ ዘተ ሽማግለታት ኣቚሙ፡ ነተን ኣብ ስራሕ ዝጸንሓ ከኣ ኣሕዲሱ። ምስዚ ብዝተተሓሓዘ፡ ኣኼባ ነቲ ኣብ 3ይን ሓድነታውን ጉባአ ሰዲህኤ ንሓድነት ሓይልታት ለውጢ ኤርትራ ብዝምልከት ዝተወሰነ ውሳነታት ኣብ ግብሪ ንምውዓል ዘለዎ ቅሩብነት ኣረጋጊጹ።

ኣኼባ ኣብ ርእሲዚ ዝተጠቕሰ ዛዕባታት፡ ብሓፈሻ ኣብ ዓለምን ዞባናን ዝረአ ዘሎ ምዕባለታት ዳህሲሱ፡ ብፍላይ ከኣ ጉጅለ ህግዲፍ ዝኽተሎ ዘሎ  ክብርን ልዑላውነትን ኤርትራ ኣብ ሓደጋ ዘውድቕን ንህዝቢ ኤርትራ ዘዋርድን ዘንዕቕን ኣካይዳ ዳህሲሱ ዘለዎ ተቓውሞን ቁጠዐን መዚኑ። ኣብ ርእሲዚ፡ ምስ ኩሎም ኤርትራዊ ሰልፍታትን ውድባትን ብሓባር ኮንካ ኣዕናዊ ኣካይዳ ናይቲ ጉጅለ፡ ዝምከተሉ ኣገባብ ርእዩ።

እዚ ብመሰረት ቅዋም ሰልፊ፡ ኣብ ነፍሲ ወከፍ 4 ኣዋርሕ ስሩዕ፡ ከም ኣድላይነቱ ድማ ፍሉይ ኣኼባታት ዘካይድ ፈጻሚ ሽማግለ፡ ኣኼባኡ ክዛዝም እንከሎ፡ ኣባላት ሰልፍን ኩሎም ኣብ ለውጢ ረብሓ ዘለዎም ኤርትራውያንን ጉጅለ ህግዲፍ ንምውጋድ ኣብ ዝካየድ ቃልስን፡ መደባት ሰዲህኤ ኣብ ግብሪ ኣብ ምውዓል ከም ናይ ቅድሚ ሕጂ ብትግሃትን ትብዓትን ክሳተፉ ጸዊዑ።

Page 2 of 86