http://ascenteq.com/project/epdp

ደቂ ሰባት ኣብዛ ሰናይን ግናይን ዝበራረዩላ ዓለም ኴንና፡ ዓመት መጸ ምቅይያራት ርሑስ በዓል ክኾነልና ወትሩ፤ ካብ ምምናይ ኣቋሪጽና ኣይንፈልጥን። እዚ ትምኒት‘ዚ ንዝጅመር ዓመት ብሓጎስ፡ ብሰላም፡ ብቅሳነትን ራህዋን ተፋቒርናን ተሓጒስናን ከነብዕሎ ዘመልክት፡ ሰናይን ጽቡቕን ድሌት‘ዩ። ይኹን‘ምበር ብመንጽር እቲ እንደልዮ ክዕቀን ከሎ፡ ንእኡ ዝቀራረብ ውጽኢት ስለ ዘይተረኽበሉ፡ ነፍስና ተመሊስና ክንሓትት ዘመልክት ውሽጣዊ ምስጢር ምህላዉ ዝሕብር ኣምር‘ዩ።

በዚ መሰረት፡ ሎሚ እንምነዮ ርሑስ ልደት፡ ከምቲ እግዚኣብሄር ዝሃበና ሰብኣዊ ተፈጥሮ ክብረትና ከይተተንከፈ፡ መሰልና ከይተጋህሰ ሰብ ኴንና፡ ከም ኩሉ ሰብኣዊ ፍጡር፡ ከምቲ ልሙድ ካብ ወለድና ዝወረስናዮ ባህላዊ ኣገባብ ንመዓልቲ ደስታ ብሓጎስ፥ ንመዓልቲ ሓዘን ከኣ ብሓባር ከነብዕሎን ከነሕልፎን ንምነ ኣሎና። እዚ ከኣ ናብቲ ኣብ ሂወትና ጎዲሉ ዘሎ ዕዮ-ገዛ ከነተኵር፡ ዓይንኻ ዓሚትካ ዘይሕለፍ እዋናዊ መልሲ ዘድልዮ ሕቶ‘ዩ ዘእትወና፤ ማለት፡ ወዲ ሰብ ክፍጠር ከሎ ካብ ኣዳም ብዝወረሶ ሓጥያት ምኽንያት፡ ነዛ ዓለም‘ዚኣ ብዘለዎ ዓቕሚ ጽዒሩን ደኺሙን ብሃፈ-ጻምኡ ርሂጹን ዝግባእ ዋጋ ከፊሉን፡ ሰባኣዊ ክብሩ ሓልዩ ክነብራ እምበር ከም ኣዕዋፍ ሰማይ፤ ብኮፉ ክበልዕ ኣይፈጠሮን። እዚ ማለት፡ ሰሪሕካን ኣፍሪኻን ክትበልዕን፡ ነቲ ብተፈጥሮ ዝተዋህበካ ክብሪ ሓሊኻን ተኸላኺልካን ቀሲንካ ክትነብር ዝብል መልእኽቱ፡ በቲ “ ስራሕ ክምሰለልካ፡ ኳሕኵሕ ክኽፈተልካ፡ ለምን ክወሃበካ „ ክብል ዝመሃረና፥ እዚ ኣብ ህዝብና ተጻዒኑ ዘሎ ሕሰምን መከራን እምበኣር፡ ባዕልና ሰብ ጉዳይ እምበር፡ ካልእ ክፈትሓልና ዘይንጽበዮ ዋኒን ስለ ዝኾነ፡ ብሓባር እንለዓለሉ መድረኽ ካብ ምዃን ሓሊፉ፡ ሓደን ዝሓምመሉ ካልእ ከኣ ዝዛነየሉ እዋን ኣይኮነን።

ብዘይካ‘ዚ፡ ዘሎናዮ ግዜ ከምቲ ዘበነ ምጅማር ሰውራ ወይ ዕጥቃዊ ቃልሲ፡ ሌላ ብረትን ኣፍልጦ በረኻን ዱርን ዘለዎም ተበዓት ዜጋታት ዘይኮነስ፡ ምዕቡል ዘበናዊ ፖለቲካውን ማሕበራውን ትምህርቲ ዝቐሰሙ፡ ብፍትሕን ፍትሓዊ ምሕደራን ዝበሰሉ ምሁራንን፥ ንመሰሉ ክጣበቕ ዝኽእል ብቑዕ ግንዛበን፡ ንለውጢ ዝብገስ ኣፍልጦ ዘለዎ መንእሰይ ወለዶ እዩ ዘድሊ። ኣብዚ መዳይ‘ዚ ድማ ግደ ምሁራን ኤርትራውያን፡ መተካእታ ዘይብሉ ረዚን ሓላፍነት ምዃኑ፡ ኣብ ሃገርና ዘሎ ድሕረት ዝፈጠሮ ጸገም ዝምስክሮ ዘሎ ሓቂ‘ዩ። ካብ‘ዚ ረማሲ ናይ ድሕረት ዓዘቕቲ ክንወጽእ፡ ውዳበን ቀጻሊ ኣስተምህሮን ማዕዳን ተበግሶን ምሁራን ዜጋታት ኤርትራ በዂሩ ኣሎ ምባል ንምብርባር ዝዓለመ እምበር፡ ከም ነቐፌታ ክውሰድ ዘለዎ ኣይመስለንን። ብነቐፌታዊ ዓይኒ ንዝርእዩዎ ድማ፡ ዘይግባእ ኣይኮነን ዝብል እምነት‘ዩ ዘሎኒ። እዚ ክብል ከለኹ፡ ነቲ ሓሓሊፉ ብጽሑፍ ይኹን ብመልክዕ ቃለ መሓትት ግዲኦም/ኤን ዘበርከቱን ዘበርከታን፣ ገና ዘበርክቱ ዘለዉን ዘለዋኣን፣ ብኣብነት ዝጥቀስ የለን ማለት ኣይኮነን። እዚ ግን ብመንጽር‘ዚ ኣብ ሃገርናን ህዝብናን ዝኸይድ ዘሎ ቀይዲ ኣልቦ ሸብዳዕዳዕ ክርአ እንከሎ፡ ኣበርክቶ ምሁራንና ካብ ማይ ባሕሪ ብጭልፋ ኣብ ርእሲ ምዃኑ፤ ውልዕ ጥፍእ ዝብልን ቀጻልነት ስለ ዘየብሉን፡ ኣብ ዕትሮ ዝተቐመጠት መብራህቲ ካብ ምዃን ሓሊፉ፡ ክንድ‘ቲ ዝግበረሉ ትጽቢት ምሉእ ብርሃን ኣይሃበን ዝብል እምነት‘ዩ ዘሎኒ። ኣብዚ ከይትሓጸርኩ ካብ ምሁራን ዝጽበዮ ኣበርክቶ ብምህላዉ፡ ገለ ምኽሪ ሓዘል ሓበሬታ ምቕራብ ጠቓሚ እመስለኒ።

ከም እንፈልጦ፡ ህዝቢ ኤርትራ ዝኸፈሎ ዋጋ፡ ኣብ ነጻ ሃገሩ ከቢሩን ኮሪዑን ብሕጊ ክመሓደርን ብሰላም ክነብርን‘ዩ። ነጻነት ብልጭ ኢላ ክትዓርብ ከላ ድማ፡ እዛ ኤርትራስ እምበርዶ ህዝቢ ብሓፈሻ ምሁራን ድማ ብፍላይ ኣለዉዋ እዮም ዝብል ሕቶ ዘልዕል ጥራሕ ዘይኮነስ፡ ንዓለም ዘዛርብ ዘሎ ጉዳይ‘ውን እዩ። እዚ ማለት ከኣ በብሞይኦም ኣብ ዓለም ተበታቲኖም ኣብ እንዳማቶም ሃገር ልዑል ኣበርክቶ ዝህቡ ዘለዉ ምሁራንና፡ ዝግባእ ክብሪ ከይረኽቡ ዝገትእ ኣብ ርእሲ ምዃኑ፡ ናይ ሕልና ቅሳነትን ድቃስ ለይቲ ዘይህብን በሰላ ዝገድፍ ዘሎ ስንብራት‘ውን እዩ። ካብ‘ዚ ንምውጻእ ከኣ ብፍትሒ እትመሓደር ሃገር ኣረጋጊጽና፡ ኣብ ዲያስፖራ ድማ ብኤርትራዊ መንነትና ኮሪዕናን ርእስና ኣቕኒዕናን ክንነብር መታን ክንክእል ፡-

1 - ኩሎም ምሁራንና ሓደ ዝጥርንፎም ሲቪካዊ ማሕበር ከቑሙ፤

2 - እዚ ኩሉ ሞያዊ ዓቕሚ ዝሓዘ ጥርኑፍ ማሕበር‘ዚ በብሞያኦም ኣብ ዘፍርዩሉ መደብ ዕዮ ክዋፈሩ ምግባር፤

3 - በዚ ሞያዊ መደብ ኣቢልካ ድማ ዝተፈላለየ መጽናዕቲ ምክያድ፤

4 - እዚ መጽናዕቲ፡ ሰብ ሞያ ሕጊ፡ ብሕጋዊ መገዲ ዝህሉ ተኽእሎታት ተጠቒሙ መሰል ህዝቢ ኤርትራ ክሕሎን፡ ብዘይ ሕጊ ዝገዝእ ዘሎ ስርዓት ዘልግሰሉ መጽናዕቲ ከቕርብ ንትግባረኡ ክሳብ ዓወት ከማእዝንን፤

5 - ካብ ኤርትራ ተጋሒጡ ዝወጽእን መእተዊኡ ዘይተፈልጠ ጸጋታት ሃገር ዝከታተልን ጽጹይ መጽናዕቲ ዝገብርን፡ ንረብሓ ህዝቢ ዝውዕለሉ መገዲ ዝሕብር ኣካል ከቕውም፤

6 - እቲ ናይ ስነ-ሕብረተሰብ ሞያዊ ዓቕሚ ዝዓጠቐ  ክፋል ከኣ፡ ብመሰረት ሞያኡ ኣብ ዝነጥፈሎም ሕጋዊ ናይ መሰልን ክብሪ ደቂ ሰባትን ምስ ዝነጥፉ ማሕበራት ተኣሳሲሩ፡ ነዚ መሰል ህዝብና ብምግሃስ ዓለም ዝመስከረትሉ ኣሸባሪ ስርዓት፡ ብውሑድ ክሳራን ኣብ ሓጺር ግዜን ዝለግሰሉ ጽጹይን ውዱእን መጽናዕቲ ብምውዳድ፡ ጽባሕ ምቕያር‘ዚ ግፍዐኛ ውልቀ-መላኺ፡ ኣብቲ ወትሩ እንሓልሞ ፍትሓውን ሰላማውን ምስግጋር ደሞክራስያዊ ስርዓት ዘእቱ መደብ-ዕዮ ናይ ምድላው ሞያዊ ሓላፍነት ምሁራን‘ዩ።

ኣብዚ‘ዩ ድማ እቲ ኣብ ዕትሮ ተቐሚጡ ዝነበረ ብርሃን ዝተመሰለ። ንምሉእ ህዝቢ ኤርትራ ካብ መዓሙቕ ጸልማት ኣውጺኡ ናብ ብርሃን ነጻነት ዘሰጋግርን ኣንጸባራቒ ዓቕሚ ምሁራንና ወሊዑ፡ ልዑል ክብርን መጎስን ህዝብና ብፍላይ፡ ህዝቢ ዓለም ድማ ብሓፈሻ ክረክብ ዝኽእል። ኣብ‘ዚ ሃገርና ኣብ ቃራና መገዲ እትርከበሉ ዘላ እዋን፡ ብሓባር ንድሕነታ ከይንቃለስ ሓሊኹ ሒዙና ዘሎ ሕዱር ሕማም፡ ድሕረት ምዃኑ ኩልና ዘይንስሕቶ ሓቂ‘ዩ። ነዚ ዘይርዳእ እንተልዩ ግን፡ ክርዳእ ድሌት ዘይብሉን ምስቲ ስርዓት ክጐሓፍ ዝመረጸን ስለ ዝኾነ፡ ኣብ ንቡር ሂወት ክሳብ ዝምለስ ከም ዘይመጓዕዝትና ክንቆጽሮ ናይ ግድን‘ዩ። ኣብዚ መዳይ‘ዚ እምበኣር፡ ንስድራ ቤት ኖህ ካብ ጥፍኣት ዘድሓነት መርከብን፡ በትሪ ሙሴ ዝዓተረ ካሪዝማቲክ መራሒ ከነለልን፡ ንእኡ ተኸቲልና ብምስዓብ፡ ኣብ ሓደጋ ኣትያ ንዘላ ሃገርናን፡ ተጋሂሱ ንዘሎ ክብርናን፡ ተሓምሪጉ ንዘሎ ባህልናን፡ ዳግማይ ከነምልስ ምርጫ ዘይኮነስ ግድነት‘ዩ። ነዚ ዘሎ ናይ ለውጢ ዕድል ንረብሓና ክንሓፍሶ እንተዘይክኢልና ግን፡ እንተሎና ብሕልና ክንክሰስ፡ እንተሞትና ድማ ዓጽሚ ሰማእታትና እሾዅ ኮይኑ ከም ዝወግኣና ምግንዛብ ከድልየና‘ዩ።

ኣብ‘ዚ መስርሕ‘ዚ ግደ ሓይልታት ምክልኻል ወሳኒ ስለ ዝኾነ፡ ነታ ፍልይቲ ግራት ኢሳያስ ኮይና ዘላ ሃገር፡ ንድሕነት ህዝባን ንልዑላውነታ ዝተረጋገጸ ሃገርን ትከላኸሉ ከም ዘየሎኹም፡ ካብ‘ዚ ስልጣን ሂበካ ኣለኹ ምርሓና፡ ቀዳምነታት ጉዳይ ዶብ ዘይኮነስ ምርግጋእ ኢትዮጵያ ዘገደሶ፡ ዕሸላዊ ኣዘራርባ ከረድእ ዝኽእል ንላዕሊ ዝተጋህደ ሓቂ ክህሉ ኣይክእልን‘ዩ። ካብ‘ዚ ተበጊስኩም እምበኣር፡ እትሕልዉዎ ዘሎኹም ዶብ ሰጊሩ ብነጻነት ኤርትራ ክጣላዕን ክዋገን እንከሎ፡ ንዘሎኩም ወተሃደራዊ ዓቕሚ ተጠቒምኩም፡ ከምቲ ሓይልታት ሰራዊት ምክልኻል ዚምባብወ፡ ነቲ 40 ዓመታት ዝገዝኦ ውሒዱዎስ፡ ስልጣን ንበዓልቲ-ቤቱ ከረክብ ምስ ወሰነ፡ ስልጣን ናይ ህዝቢ‘ምበር ርስቲ ናይ እንዳ ሙጋበ ኣይኮነን ኢሎም ዘውረዱዎ ኣብነት ክትክተሉ ምተገብአ። እዚ ብዘይምግባርኩም፣ ንህዝቢ ኤርትራ ብተግባር ዘዕግብ ሃገራዊ ኣበርክቶ ክሳብ ዘይረኣየ፡ ካብ መሳርሕቲ ጨቋኒ ስርዓት እንተቆጸረኩም፡ ከም ዘይተጋገየ ክርድኣኩም ይግባእ። በዚ ከኣ ነቲ ልዑል ኣኽብሮትን ተቐባልነትን ዝነበሮ ናይ ተጋዳላይ ስምኩም፣ ስም ናይቶም መሪሖምኹም ዝተዋግኡን ዘዋግኡን፡ ኣብ መወዳእታ ድማ ንጀግንነትኩም ኣሚኖም ስልጣን ንህዝቢ ክርከብ ዝሓተቱን፡ ዝተቓለስሉ  ነጻነት፥ ብርሃን ጸሓይ ተሓሪሙዎም ኣብ ኣረሜናዊ ማእሰርቲ ዝበለዩን ዝበልዩ ዘለዉን፡ እቕረ ዘይበሃሎ ዳግማይ ጥልመት  ይፍጸም ምህላዉ ክርድኣኩም ምተገብኤ።

ይኹን‘ምበር ሕጂ‘ውን “ድንክል በለ‘ምበር ኣይተኻዕወን“ ከም ዝበሃል፡ ትጽቢት ምሉእ ህዝቢ ኤርትራ ጌና ካብ ዝሓለፈ ጕድለትኩም ተማሂርኩም ብዕጽፊ ክትክሕስዎ ተስፍኡ ኣይጸንቀቐን። ከምቲ “ተመን ኣብ እግርኻ በትሪ ኣብ ኢድካ ከሎስ ትገብሮ ምንጋር ኣድላይነት የብሉን“ ዝበሃል ምስላ፡ ካብዚ ንጀግንነትኩምን መሰል ህዝብኹምን እናበላሸወ ንዘሽካዕልል ስርዓት፡ በየናይ መገድን ኣበየናይ ግዜን፡ ናይ ምልጋሱ ስጉምቲ ትወስዱ፡ ማዕዳን ምኽርን ዘድልየኩም ኣይመስለንን። ነዚ መደብ‘ዚ ኣብ ትብገሱሉ ህሞት ድማ፡ ኣብ ውሽጥን ወጻእን ዘሎ ውጹዕ ህዝብኹም ዝድለ ደገፍን ልዑል ኣኽብሮትን ከም ዝገብረልኩም ኣይትጠራጠሩ።

ዝኸበርኩም መንእሰያት ኤርትራ ኣብ ደገን ኣብ ውሽጥ ሃገርን ዘሎኹም፡ እዚ ሰዊት ዕድመኹም ጅሆ ሒዙ፡ ሓንሳብ ይከኣሎ ሓንሳብ ዋርሳይ ቀጺሉ ጻጸ ፍልሖ ዝብል ኣስማት እናሃበ፡ ክትምዕብልሉ ዝግባእ ዕድልኩም ረሚሱ፡ ካብ ሃገር ሃጽ ኢልኩም ክትዓርቡ ዝገበረ ጨካን ስርዓት ክሳብ ዘሎ፡ መቐረት ዘለዎ ሂወትን ቀሲንካ ዝሕደር ለይትን ከም ዘየሎ ካባኹም ንላዕሊ ምስክር የሎን። ብእኡ ከየኽተመ እቲ ሰንካም መሓውሩን ሓሳድ ኣሰራርሕኡን ምስ ናብራ ስደት ተደማሚሩ፡ ርግእ ኢልኩም ሰላማዊ ናብራኹም ንምቕጻል ኩርኳሕ ኮይኑ፡ ብዘይሃገር ክብረት ብዘይሰላም መቐረት ዘለዎ ሂወት ምሕላፍ ከም ዘየሎ ተረዲእኩም፡ በብዝመስለኩም መልክዕ ውደባ ኣብ መሳርዕ ደለይቲ ፍትሒ ትጽምበሩ ምህላውኩም ዝምስገን‘ዩ። እቲ ኣብ‘ዚ እዋን‘ዚ ተሪፉና ዘሎ ወሳኒ ቀዳማይ ዕዮ-ገዛ ግን፡ ኩሉ ፖለቲካዊ ኣማራጽታት ንመራጺኡ ዝግደፍ ኮይኑ፡ ብምሉኡ ዓቕምና ብሓደ ሓቢሩ፡ ኣንጻር ምልኪ ከጥቅዕ፡ ዝዓጠቐ ሓይሊ ክኸውን ከም ዘለዎ ምግባር‘ዩ። እዚ ማለት ከኣ ውደባ ንሓደ ውሱን ዕላማ ንምዕዋት ዝተጠርነፈ ቍጽሪ ሰባት ዝሓዘ መቃለሲ ባይታ‘ምበር ንባዕሉ ዕላማ ክኸውን ከም ዘየብሉ ኩልና ክንርድኦ ይግበኣና። ነዚ ተግባራዊ ንምግባር ከኣ፡ ኣብ ቀዳማይ ቦታ ዝስራዕ፡ እቲ መኣዝኑ ጠፊኡ ዘሎ ባህሊ ምክብባርን ምድምማጽን ኣብ ንቡር ምምላስን፡ ኣብ ዝሓለፈ ሓርጐጽጐጽ ዝመለለይኦምን ኣወንታውን ኣሉታውን ውጽኢቶም ብልቦና ገምጊምናን ከም ታሪኽ ሰኒድናን፡ ነቲ ኣዎንታ ኣማዕቢልና ክንሰርሓሉን፡ ነቲ ኣሉታ ድማ ከይደግሰና ክንጥንቀቐሉ ከም ዘሎና‘ዩ።

ኣብ ዘሎናዮ እዋን፡ ዘሪእና ከይነፍሪ ወሊድና ከይነዕቢ፡ ሕማም አይድስ ኮይኑ ደኒሱና ዘሎ ስርዓት ኣብ ምልጋስ ዓቢ መልእኽቲ ዝሓዘት እዋናዊ ደርፊ ምዑት ድምጻዊ ስነ ጥበባዊ ተኽለሚካኤል ገብሩ ተኸቲልና፡ ነታ ምስ ምሉእ ጸጋኣን ህርኩት ህዝባን ጽማልያ መሲላ ዘላ ሃገርና ኤርትራ ብስርዓተ ሕጊ ትምራሕ ክንገብራን ኣብ ሓምላይ ክንቅይራ ዘብዘብ ክንብልን ይንገረና ኣሎ፡ ሃየ ንስዓቦን።

ኣብ መደምደምታ፡ እዛ እንጅምራ ዘሎና ዓመት፡ ኩሉ ጻህያይ ግራትና ኣሊና ነጻን ዲሞክራስያዊትን ኤርትራ ኣረጋጊጽና ከም ሰብ ኮሪዕናን ከቢርናን ብሓጎስ ኣብ እነብዕላ ዓመተ - 2020 ከተሰጋግረና ድማ እምነ።

ምልኪ ይፍረስ፡ ፍትሒ ይንገስ!

29.12.2018

ኣብ ተለቪዥን ቀሪቦም ናብ ህዝቢ መልእኽቶም ዘሕለፉ ኣካየድቲ እቲ ዕልዋ

ታሕተዎት ወተሃደራውያን ሓለፍቲ ጋቦን ስልጣን እታ ሃገር ከም ዝተረከቡ ኣፍሊጦም፡

ኣብ ምዕራብ ኣፍሪቃ እትርከብ ሃገረ ጋቦን፡ ንዝሓለፈ ሓመሳ ዓመታት ብሓደ ስድራ'ያ ክትምራሕ ጸኒሓ።

እዞም ወተሃደራዊ ዕልዋ ዝገበሩ ታሕተዎት ወተሃደራውያን መራሕቲ፡ እዚ ተግባራ ''ዲሞክራሲ ንምውሓስ'' ከም ዘካድዎ ሓቢሮም።

እዞም ብኣቆጻጽራ ጋቦን ስዓት 4 ወጋሕታ ንሃገራዊት ሬድዮ እታ ሃገር ዝተቆጻጸሩ ታሕተዎት ሓለፍቲ፡ ''ሃገራዊ ዳግመ ምምሕያሽ'' ኣዊጆም ኣለዉ።

• ፕረዚደንት ጋቦን ብፅኑዕ ሓሚሞም
• ወፃእታት ብዘይምኽፋል፡ ንኣዋርሕ ዝተዓገተት ህፃን ተፈቲሓ

ኣብ ጎዶናታት ዋና ከተማ ጋቦን ሊበረቪል፡ ታንክታትን ድሩዓት መካይንን ብብዝሒ ይርኣያ ኣለዋ።

ፕረዚደንት ዓሊ ቦንጎ ኣብ 2009 ካብ ኣቡኡ ዑመር ቦንጎ ስልጣን ብምርካብ፡ ንጋቦን ክመርሓ ድሕሪ ምጽናሕ ካብ ወርሒ ነሓሰ ጅሚሩ ብጽኑዕ ሓሚሙ ይርከብ።.

ፕረዚደንት ዓሊ ቦንጎ፡ ካብ ኣቡኡ ስልጣን ድሕሪ ምርካብ ኣብ 2016 ኣብ ዝተገበረ ምጥፍፋእ ነይርዎ ዝተብሃለ ፕረዚደንታዊ ምርጫ ዳግም ተዓዊቱ'ዩ ንጋቦን ክመርሓ ጸኒሑ።

ፕረዚደንት ዓሊ ቦንጎ ዝሓለፈ ክልተ ወርሒ ድሕሪ ዘጋጠሞ ወቕዒ ኣብ ሕክምና ሞሮኮ'ዩ ክእለ ጸኒሑ።

ፕረዚደንት ጋቦን ዓሊ ቦንጎ

ጻሓይ ሪኹም ኣይትፍረዱ

ኣብ ዕራርቦ ኣይትፍረዱ

ጥልመት ሱር ሰዲዱ

ግፍዒ ብድዔ ሰዊዱ

መጋርያ ተንኮል ተኣጊዱ

             ዕቁር ዝወዓለቶ ጸጋማ

             ለይቲያ ትድሕድሖ እዛ ከተማ

             ትምኒት ኣለዋ ዕላማ

              ትነግር ኣላ ሕሰማ

              ናይ ዕዳጋ ቃላት ነይጠቅማ

              ኣንፈት መጻኢኣ ብደዋ ሓሊማ

              ንሰላም ቅሳነት ኢላ ደምዲማ

ሎሚ እያ ኤርትራ ንብዓታ ተውሕዞ

ጸልማት ተኸዲና ተነብዕ ትቁንዞ

ግን ብሕልና እዩ ዝስማዕ

ኣብ ልቢ ሰብ ምስ በለ ረማዕ፣

                  ንምንታይ ተጫኻኺኑ

                  ዓገብ ባሃሊ ተሳኢኑ

                  ሰብ ንሰብ ክገዝኦ እዋኑ

                  ረኤይዎሞ ክትኣምኑ

                  ኩሉ ክሓስብ ንዕምሩ

                  ከም መንዳዓት ኣብ ሕቆ ሰብ ሰፊሩ

                  እንታይ ድኣሉ  ጉዱ እንትይ ነገሩ

                   ሃገርካን ባህልኻን ክፈርስ እናራኣኻ ምስጋሩ

                   ሃሲስካ ምጥፋእዶ ኣይኮነን ንሓዋሩ

                   ህዝብና እውን በብሓደ ከይዱ ጸሪሩ።

ሓርነት ዋሕስ ኢኺ ክንድኹሉ

ንስኺ እንተለኺ ንህሉ

እንተዘየለኺ ንጽምሉ

ያዕ በልዮም ነቶም ዘታልሉ

ድሕሪ ሃገር ይሕሊፍካብ ምሃብ እንታይ ክገብሩ

                     ቅድም ኣብ ገድሊ

                     ሕሰም ጎሲዔ

                     መሰላተይ ውን ተዘሪዔ

                     ኣጉሲዔ ምረት

                     መሲለ ቓረት

                     ሎሚ ወን ገድሊ

                     ንቃለስ ብዕሊ

                     ሕድሪ ስውኣትና ከነለሊ

                     ክነድሕኖ ንህዝብና ካብ ነውራም ሃላሊ።

ብ ሚካኤል ኣጎስቲኖ / ጀርመን

    06.01.2019

ዝምድና ኤርትራን ኢትዮጵያን፡ ናይ መዋእል ክበሃል ብዝኽእል ናይ ህዝቢ ኤርትራ  ኣጀንዳ ኮይኑ ዝጸንሐ እዩ። እቲ ዝምድና ንሓንሳብ ክብ ዝብል ንሓንሳብ ከኣ ለጠቕ ዝብል፡ ወይ ንሓንሳብ ዝሕርፍፍ ንሓንሳብ ከኣ ዝለምጽ እኳ እንተነበረ፡ ብሓፈሻ ግና ብቓልሲ ዝግለጽ ዘይርጉእ ምዃኑ ምጥቃስ ይከኣል። ብፍላይ ከኣ ድሕሪ ነዊሕን መሪርን ቃልሲ ኣንጻር መግዛእቲ ኢትዮጵያ፡ ኤርትራ ልኡላዊት ሃገር ምዃና ምስ ኣረጋገጸት፡ እቲ ዝጸንሐ ምትፍናን ናይ መወዳእታ መልክዑ ሒዙ እዩ፡ ምስ ተባህለ ዝተፈጥረ ሓድሽ ሓጐጽጐጽ ዝምድና ኤርትራን ኢትዮጵያን ሓደ ካብ ኣጀንዳታት ዓለምና ኮይኑ። ብፍላይ ከኣ ድሕሪቲ ግቡእን ኣብ መጽናዕቲ ዝተመስረተን ስም ዘይተዋህቦ ንግዜኡ ግና ከም ናይ ዶብ እንጠቕሶ ውግእ ምስ ተባረዐን ቀያድን ናይ መወዳእታን መዕለቢ ምስ ተገብረሉን ኣጀንዳነት ጉዳይ ኤርትራን ኢትዮጵያን ዝያዳ ሰማይ ዓሪጉ።

እቲ ብናይ ቅድም ሚኒስተር ፋይናንስ ኤርትራ ዳርጋ ንዕኡ ዝምጥንን ንተግባራቱ  ዝገልጽን “ዘራጊቶ” ዝብል ስም ዝተዋህቦ ዲክታቶር ኢሳይያስ ኣፈወርቂ፡ ኣብ ኣተሓሕዛ ዝምድና ኤርትራን ኢትዮጵያን፡ ባዕላውን ተጋላባጥን መርገጻት ክወስድ ጸኒሑ። ንሓንሳብ ብጉዳይ ልኡላውነትን ክብርን ኤርትራ ይምሕልን ይጥሕል። ንሓንሳብ ድማ ንህዝብታት ኤርትራን ኢትዮጵያን ናይ  ክልተ ሃገራት ህዝቢ እዮም ንዝብሉ “ነቲ ሓቂ ዘይፈልጡ እዮም” ብዝብል ውርጽጽና ክገልጾም ሰሚዕናዮ። እዚ ምድብላቕ ናይ ዘይጠዓየ ሰብ እምበር ሓላፍነት ህዝብን ሃገርን ወሲዱ ናይ ዝመርሕ ኣካል ኣበሃህላ ከምዘይኮነ ብዙሓት ዝሰማምዕሉ እዩ። እንተኾነ ከምኡ ኢልካ ዝሕለፍ ዘይኮነስ፡ ዘራጊቶ ኢሳይያስ፡ ኮነ ኢሉ ኣተሓሳስባ ናይ ህዝቢ ንምድብላቕን ኣብ ናቱ ኣጀንዳ ንምጽማድን  ዝፈጥሮ ዘርጊ ምዃኑ እውን ምስትብሃል ዘድልዮ እዩ።

እቲ ክብ ለጠቕ ቀጺሉ ድሕሪ ናይ ዲክታቶር ኢሳይያስን መራሒ ኢትዮጵያ ዶ/ር ኣብይ ኣሕመድ ናብን ካብን ኤርትራን ኢትዮጵያን ምምልላስ ቅድሚ ሰለስተ ወርሕን ፈረቓን ኣቢሉ ይኸውን ዶብ ኤርትራን ኢትዮጵያን ተኸፊቱስ ህዝቢ ብናጻ ክሰጋገር ጸኒሑ። እቲ ዶብ ምስተኸፍተ፡ ናይ ህዝቢ ኤርትራ ናብ ኢትዮጵያ ኣወሓሕዛ ከምዚ ቤት ማእሰርቲ ዝተኸፍተሉ እሞ ዳግማይ ከይዕጸዎ ስጊኡ ዕጉግ ኢሉ ዝወጽእ እሱር ይመስል ከም ዝነበረ ተዓዚብናዮ ኢና። እሞ ከኣ መብዛሕትኡ ዝምለስ ዘይኮነ ንኤርትራ ኩቦ ዝደርበያ እዩ ነይሩ። ነዚ ኩነታት ኢሳይያስ ኣይተጸበዮን እኳ እንተዘይተባህለ፡ ካብ ትጽቢቱ ንላዕሊ ከም ዝኾኖ ምርዳኡ ዘጸግም ኣይነበረን። በቲ ዋሕዚ ዓይኑ ደም ዝነጠቦን ካብ ህዝቢ ከም ዝተነጸለ ዝተቓልዐን ኢሳይያስን ጉጅለኡን ኣንጻር ድሌት ህዝቢ ምዃን መለለይኦም ስለ ዝኾነ፡ ነዚ ኩነታት ክዘርግዎ ክሓልሙ ምስ ጸንሑ፡ እነሆ ቅድሚ ሓደ ሰሙን “ብናይ ይሕለፍ ፈቓድ እምበር ከም ድላይካ ምዃድ የለን” ብዝብል ነተን ብዙሕ ህዝቢ ክኣትወለንን ክወጸለንን ዝጸንሓ ፍደገታት ዛላንበሳን ራማን ዓጽየምወን። ነቲ ምዕጻው ንምምልኻዕ ከኣ “ተዕጽዩ ዘይኮነስ ሕጋዊ መልክዕ ክሕዝ እዩ” ተባሂሉ ክበሃለሉ ንሰምዕ ኣለና። ንገዛእ ርእሱ ሕጋዊ ዘይኮነ ዘትሕዞ ሕጋውነት ከመይ ምዃኑ ደሓር ንርእዮ እዩ።

እዚ ወረ ብወገን ኤርትራ ኣብቲ ዶብ ዘለዉ ወተሃደራት ዝብልዎ እንተዘይኮይኑ፡ ነዚ ዝምልከት ዝወጸ ወግዓዊ መግለጺ የለን። እቲ ዘይግሉጽ ኣካይዳ ዝመረጾ ዘይኮነስ ዝለመዶ ስለ ዝኾነ፡ ንህዝቢ ኤርትራ ሓድሽ ኣይኮኖን። “በሉ እቲ ዝበልኩምዎ ይሕለፍ ሃቡና” ይብሉ ንዘለዉ ኤርትራውያን ክሳብ ሕጂ ዝምልስ ኣካል የለን። ብወገን ኢትዮጵያ ከኣ ዝለዓሉ ናይ መንግስቲ ኣካላት “ንሕና ብዛዕባዚ ብወገን ኤርትራ ኣብ ዶባት ዝውሰድ ዘሎ ስጉምቲ  ንፈልጦ የለን፡ ሓበሬታ ምስ ረኸብና ክንነግረኩም ኢና” ዝብል መልሲ እዩ ተዋሂቡ። ካብዚ ብውሕዱ ኣብ መንጎ ክልቲኦም ወገናት ምንባብ ከምዘየለ ምግንዛብ ይከኣል። ከምዚ ምዃኑ ዝተረድኡ ተዓዘብቲ እዮም ከኣ፡ ነቲ ኩነታት “ብገልታዕታ ዝተኸፍተን ብገልታዕታዕ ዝተዓጽወን” ዝብልዎ ዘለዉ።

ኣብዚ ኩነታት ብወገን ኤርትራ ኢሳይያስ ኣብቲ ንህዝቢ ኤርትራ ዝምልከት “ድላየይ እንተገበርኩ ዝእውደኒ የብለይን” ዝብል ትዕቢቱ መመሊሱ የራጉዶ ከም ዘሎ’ዩ ዘረደኣና። እዚ ከኣ ኣብ ልዕሊህዝቢ ኤርትራ ካብ ዘለዎ ሕዱር ንዕቀት ዝነቅል እዩ። እቲ ከምስል ሓሓሊፉ ንህዝቢ ኤርትራ ዝንእዶ ናይ ሓሶት ሽሕጣን ምዃኑ ከኣ ምስትብሃል ይከኣል። ይዝከረኒ ብዙሓት ዘይቀብጹ ኤርትራውያን ነቲ ኢሳይያስ ብናቱ ናይ ሓሶት መስመራት ዝዝርገሖ መደንዘዚ ወረ እንዳተቐባበሉ “ ኣብ ባሕቲ ሓድሽ ዓመት 2019 እሞ እዚ ሰብኣይ ገለ ክገብር እዩ፡ ከምኡ እንተዘይገይሩ ካልእ ነገር ክፍጠር እዩ” ክብሉ ምስ ጸንሑ፡ ነዚ ወረዚ ማይ ንምጅላሕ እነሆ ጉዳይ ኣተሓሕዛ ዶብ ኤርትራን ኢትዮጵያን ቅድሚት ዝስራዕ ኣጀንዳ ከም ዝኸውን ገይሩ። ስለዚ ንጉዳይ ዶብ ሓድሽ መልክዕ ምትሓዙ ትጽቢትን ኣቕጣጫን ህዝቢ ንምቕያር ዝተሃንደሰ ምዃኑ በሪሁ። ነቲ ጀነራል ስብሓት ኤፍረም ተወጊኡዶ ተሳሒቱ ዝብል ድራማ እንተወሲኽካሉ ከኣ ነቲ ቀንዲ ኣጀንዳ ህዝቢ ኤርትራ ክሳብ ክንደይ ታሕቲ ከም ዝሰርዖ ምርዳእ ይከኣል። ናይ ህዝቢ ናይ ኣተሓሳስባ ኣቕጣጫ ምቕያር ህግደፍ ካብ ነዊሕ ግዜ ጀሚሩ ዝጥቀበሉ መዳህለሊ ሜላ እዩ።

ከምቲ ኩሉ ግዜ እንብሎ ኢሳይያስን ጉጅለኡን ካብ ህዝቢ ተሓቢኦም ስረሖም እዮም ዝሰርሑ ዘለዉ። ኩሉ ስረሓም ከኣ ብዋጋ መሰልን ናጽነትን ህዝብና ዝካየድ እዩ። እቲ ከዛርበና ዝግበኦ ቀንዲ ጉዳይ እምበር ብዛዕባና ብዛዕባቶም ኤርትራዊ መሰልና ስለ ዝተነፍገና ንምምላሱ ንቃለስ ዘለና እዩ፡ ህግደፍ በኣና ክጻወት እነከሎ፡ ሕነ ክንፈዲኳ ከምቲ ንሱ ዝገብሮ ንግበር እንተዘይበልና፡  ግዳዩ ንዘይምዃንን ዝተጠልመ ኤርትራዊ መሰልና ንምምላስን ክንቃለስ ግና ግደታና እዩ። ነቲ ዘይናትና ምዃኑ እንፈልጦ ህግደፍን ዘራጊቶ መራሒኡን ብውሕዱ “ንሕና ኣይናትኩምን ንስኻትኩም’ውን ኣይናትናን” እንብሎም ባዕልና እምበር፡ ካልእ ክዓመልና እንጽበየሉ ሓላፍነት ኣይኮነን። ከምዚ እንተዘይጌርና ግና ህግደፍ ዘይኮነ ዝውጸዓና ዘሎ ንሕና ኢና ንወጽዓ ንጠዓዓመሉ ዘለና።

ዋሽንግተን — 

ከም ሓበረታ ነበርቲ ቡረ ኤርትራ ንመስመር ዛላምበሳ-ሰርሓን፡ ራማ-ክሳድ ዒቃን ብምዕጻው መእተዊ ፍቓድ ክትሓትት ከላ፡ እቲ መጀመርያ ዝተኸፈተ መስመር ቡረ-ዓሰብ ግን ከም ቀደሙ ምሉእ ንምሉእ ክፉት ኮይኑ ቀጺሉ`ሎ።

ካብ ሚንስትሪ ዜና ኤርትራ ሓበረታ ምርካብ ኣይተኻእለን ፡ ነገር ግን ኣብ ጃፓን ኣምባሳደር ኤርትራ፡ ብትዊተር ኣብ ዝለኣኾ መልእኽቲ፡ ናብ ኤርትራ ዝኣትዉ ዘይ-ዜጋታት ቪዛ ይሕተቱ ኣለዉ`ምበር (ዶብ ከምዝተዓጽወ ኣምሲልካ) ነገራት ምጥምዛዝን ንሰብ ምድንጋርን ይተረፍ ክብል ሓቢሩ።

ሰብ-ስልጣን ኢትዮጵያ ብወገኖም፡ ብዛዕባ ኣብ ዶባት ደረት ምግባር ዝፈልጥዎ ሓበረታ ከም ዘይብሎም`ዮም ዝገልጹ ዘለዉ።

Source=https://tigrigna.voanews.com/a/ኤርትራ-ንመስመር-ቡሬ-ዓሰብ-ከምዝነበሮ-ክፉት-ገዲፋቶ/4723337.html

ፍሉይ ምስጋና

ደቂ ሰባት ካብ ቅዱስ ሕልናኦም  ተበጊሶም፤  ንሰናይ ትምኒቶምን ድሌቶም ንምፍጻም ንውጹዓት ኣካላት ሕብረተ-ሰቦምን፣  ብጾቶምን ንምርዳእ በቲ ዘለዎም ዓቕሚ ክጽዕሩን ክተሓባበሩን ትርኢ ኢኻ።  ከምዚ ዝኣመሰለ ሰናይ ድልየትን ኒሕን ክትርኢ ኰሎኻ ድማ ንሰማዒኡን ራኣይኡን እውን ኣዝዩ ደስ ዘብል ኰይኑ ትረኽቦ። ናይ ሎሚ ምስጋናና ካብ ኩሉ ፍሉይ ዝገብሮ ግን፡ ነቲ ጉልበታውን፣ ኣእምሮኣውን፣ ንዋታውን ጻዕርታት ዘጥፈኣሉ ንብረት/መጻሕፍቲ፡ ሓው ግርማይ በኹረ ንውልቃዊ ረብሓኡ ከይጠመተ፤ ሓጋዝን ረዳእን ዘይብሎም ኣካለ ስንኩላን ብጾቱ ምህላዎም ከይዘንግዐ ብርኩት ሓገዝ ምውፋዩ ኢዩ። እዚ ከኣ ነቶም ከምዚ ዝኣመሰለ  ኣተሓሳስባን ሕልናን ዘለዎም ንእግረ መንገዱ መተባብዕን መዘኻኸርን ዝኸውን ትምህርቲ እዩ። 

ሓው ግርማይ ቦኹረ ተቐማጣይ  ክተማ ቦስቶን ሕቡራት መንግስታት ኣመሪካ፤ ንዝሓተሞ ናይ ስዉእ ጀግና ተጋዳላይ መልኣከ ተኽለ ታሪኽ ህይወት  መጻሓፍቲ  ሽያጥ ውጽኢት፤ ኣብ ኣገልግሎት ማሕበር ኣካለ ጽጉማን ኤርትራ ንኽውዕል €1.280.00 ( ሓደ ሽሕን ክልተ ሚእቲን ሰማንያን  ኤውሮ) ንማሕበር ኣካለ ጽጉማን ኤርትራ ጨንፈር ጀርመን ኣወፊዩ፣ ዛጊት ኣብ ሳጹን ማሕበር ኣታዊ  ከምዝዀነ እንዳሓበርና ንስለቲ ሰናይ ተግባሩ ኣመስጊና ንኣመስገንቲ ክህቦ ንፈቱ። 

ብዘይካ እዚ፡ ሓው ግርማይ ቦኽረ ብተመሳሳሊ ንማሕበር ኣካለ ጽጉማን ኤርትራ ጨንፈር ሰሜን ኣመሪካ ኣበርኪቱ  ከም ዘሎ ሓበሬታ በጺሑና  ምህላዉ እንዳገለጽና፣ ወጽኢቱ ብወገኖም  ከቃልሕዎ  ምዃኖም ኣይንስሕቶን።  ንዝገበረልካ ግበረሉ ወይ ንገረሉ ስለዝኮነ ድማ፡ ማሕበር ኣካለ ጽጉማን ኤርትራ ጨንፈር ጀርመን፡ ንሓው ግርማይ ቦኹረ ስለቲ ሰናይ ግብሩ፡ ብስም ማሕበርን ሓገዙ ብዝበጽሖም ጽጉማትን ልባዊ ምስጋናና ነቕርብ።

 ማሕበር ኣካለ ጽጉማን ኤርትራ  ጨንፈር   ጀርመን

29.12.2018

ኣብ ሓደ ሕማቕ ኣጋጣሚታት ባህርያዊ ጸጋታትካን ተፈጥሮኣዊ ኣቀማምጣኻን ክዘርዩኻ ከም ዝኽእሉ እዙ ናትና ኣብነትን  ከም ጭቡጥ መርኣያን መረዳእታን ይሕግዝ‘ዩ። 

<<መሰረተ-ምዕብልናታት ሓበሻ! ጎይታን ዋናን ኣኽሱመ-ኣዶሊስ ዝነበረ ሕብረተ-ሰብ፣ 

<<ፊደል ቀሪጹ፣ ብራና ኣንጺፉ፣ ቀለም ጠሚዑ፣ ምስ ቋንቁኡ ዘናበበ ሕብረተ-ሰብ። 

<<ክልቲኡ ዓበይቲ ሃይማኖታት ተቐቢሉ መንፈሳዊ እምነታቱ ዝዓቀበ ሕብረተ-ሰብ፣ 

<<ኣብ ዓለምና ታሪኻውን ጥንታውን ቅርስታት ዘበርከተ! ጥንታዊ ሕብረተ-ሰብ፣ 

ሎሚ ውሽጣዊ ጉዳያቱ ምጽውዋር ስኢኑ‘ስ ኣብ ሕድሕድ ምብልላዕን ክምሳስን ተረግሪጉ፣ መሳርሒ ምዕራባዋንን ኣሳሰይቶም ዝኾኑ ኣዕራብን ክኸውን ከሎ ኣዝዩ ዘሕዝንን ዘሕፍርንው‘ዩ። ህዝብታት ሓበሻ ብፍላይ ሰሜናዊ ክፋሉ! ሰለስተ ዓበይትን መሰረታውን ጸላእቲ እዮም ዘለዉዎ፣ ንሳቶም ድማ! 

1ይ ምዕራባውያን ሓይልታት፣ 

2ይ ኣዕራብን ናይ ምስፍሕፋሕ ሕልምታቶምን 

3ይ ውሽጣዊ ድኽነታትን እዮም።

ኣዚኣቶም ምስ ተፈጥሮኣዊ ጸጋታትን ስትራተጅያዊ ኣቀማምጣን ተደማሚሮም ነዙ ሎሚ ንሪኦ ዘሎና ጭቡጥ ናይ ጥፍኣት ጎደና ከም ዝመርሑዎ የረጋግጹልና። መንግስትነት ኣኽሱም ምፍራስን እቶት ወደብ ኣዱሊስ ምቁራጹን ንህዝቢ ሓበሻ ታሪኻዊ ውድቀቱ ኮይኑ እዩ ጸኒሑ።

ስልጣኔ ማእከላይ ምብራቕን፣ ምብራቕ ኤውሮጳን ተዳኺሙ ብምዕራብ ኤውሮጳ ምስ ተ‘ተከአ፣ ካብ 15ተ ክፍለ-ዘመን ንደሓር ኣብ ምጉህጓሕ ተፎጥሮኣዊ ጸጋታትን ንግዲ ባራዩን ክነጥፉን ክህብትሙን እተወዳደሩ ምዕራባውያን፣ ኣብ ሞባእታ 19ተ ክፍለ ዘመን ድማ ዓለም ኣብ በርሊን ጠቅሊሎም  ተማቂሎማ። ብኣንጻሩ ኣብ ልዕሊ ህዝቢ ሓበሻ ንሓንቲ መዓልቲ ደቂሶም ዘይፈልጡ ኣዕራብን፣ ብንግዲ ባራዩ እተዛመዶም፣ ዛይላዊ መቦቆል ዝነበሮ መሓመድ-ግራኝን፣ ብቱርክን ዙቤይዳውያን እተደገፈ ናይ ሰብን ኣጽዋርን ዝረኸቦ ሓያል ደገፍ ተኣማሚኑ፣ ኣብ ልዕሊ ህዝቢ ሓበሻ ብፍላይ ኣብ ክርስትያናዊ ሰሜናዊ ሓበሻ ዘውረዶ ዕንወት ታሪኽ ኣይርሰዖን። ኣብ‘ዙይ ክንሪኦ ዘሎና፣ ኣብ 15ተን 19ተን ክፍለ ዘመናት ኣብ ልዕሊ ህዝቢ ሓበሻ ዝወረደ ዕንወትን ጥፍኣትን ደረት ኣይነበሮን።

ድሕሪ ምዝዛም 2ይ ኲናት ዓለም ዝሰዓበ ዝሑል ኲናት‘ውን ኣዝዩ ተሃስዩ እዩ ህዝቢ ሓበሻ። ብህንጥሻ ምዕራባያን ትነቓነቕ ኢትዮጵያ፣ ህወሓት ጸጋጊኑ ከም ሓንቲ ሃገር ደው ከብላ ከሎ፣ ኤርትራ ድማ መግዛእቲ ኣምሓራ ዝለቐቐላ ሓራ መሬት ክትከውን ከኣለት። ኣብ‘ዙይ ክረአ ዘለዎ ዓለማዊ ፖለቲካውን ወታደራውን ውድድራት ንኤርትራን ኢትዮጵያን ፈላልዩ ኣየጥቅዕን፣ ንህዝቢ ሓበሻ ሓደ ዓይነት ናይ ጥፍኣት ብዪን እዩ ዝብየኖ። 

ኣብ‘ዙ እዋን‘ዙይ ከኣ! ልኡዃት ምዕራባውያንን ኣዕራብን፣ ብደረጃ ኣመራረሓ ኣብ ዓዲ ኣምሓራን ምድረ-ኦሮምን ኣዝዮም ተበራኺቶም እዮም ዘለዉ። ነዙ ኣጋጣሚ ከም ዓብዪ ዕድል ብምጥቃም ብፍላይ ሊቃውንቲ ኣምሓራ፣ ኤርትራ ትበሃል ሃገር ረሲዖም ኣፍ ልቦም ነፊሖም <ቀይ ባህር የኛ ነው< ካብ ዝብሉ፣ ብርክት ዝበለ ኣዋርሕ ኮይኑ‘ሎ። ኣብ ሞንጎ ሕልምታት ኣምሓራን ጋህዲነት ኤርትራን ዘሎ ፍልልይ ርሕቀቱ ክልካዕ ኣይከኣልን። እንተ‘ኾነ ከቢድ ዋጋ ከም ዝሓትት ምዝንጋዕ ኣዪግባእን። መወዳእታኡ ድሒሩ ዝግምገም ኮይኑ! ብሰንኪ ፖለቲካ ምዕራባውያንን ኣዕራባውያንን፣ ኢትዮጵያ ኣዝያ እናተሓመሰት ትርከብ። ብዘይካ ኣብ ሓንቲ ክልል፣ ኣብ ትግራይ ኣብ ኩለን-ተን ክልላት ህዝቢ ንህዝቢ ብዓሌትን ቀቢላን ክፋለስ ይርከብ‘ሎ። ከምዙይ ኢሉ ከሎ እዩ ድማ! ኢትዮጵያ ኣብ ለውጢ ትምርሽ ምህላዋ ንጉጅለ ኣብዪን ለማን ብምዕራባውያን ሞጎስ ዝልገሰሎም ዘሎ። በቲ ካልእ መዳይ ከኣ ኣምሓራ ንተጋሩ ካብ ዝሕነዩሎምን ርእሶም ካብ ዝሕንሕኑሎምን ነዊሕ ኮይኑ፣ ተጋሩ ድማ ታ‘ሩባ እንዶ‘ሞ ስግር በሉዋ ይብሉዎም ኣለዉ፣ እዙይ ካብ ምዕራዩ ሓደገኛነቱ‘ዩ ዝጎልህ።

በዙ ዝረአ ዘሎ ታህዲድን ፖለቲካዊ መጥቃዕትታት ኣዪበሎ፣ ረጽሚ እንተተላዒሉ ኢትዮጵያ ኣብ ሓደ መንግስቲ ከም ዘይትቐውምን ንምብትታን ዘቃላጥፍን እዩ ዝኸውን፣ ኣብ ሕድሕድ ግርጭታትን ምፍላስን ኢትዮጵያውያን ብፍላይ ተጋሩን ኣምሓሩን፣ ኤርትራን ህዝባን ከመይ ክኸውንዩ ዝብል ሕቶ ቀዳማይ እዩ ዝኸውን። ኣዚና ተጎዳእቲ ምዃንና ጠንቂቕና ክንርደኦ ይግበኣና። ኣብ ጥቓ እተበታተነት ኢትዮጵያ እተረጋገአት ኤርትራ ክትቅጽልያ ኢልካ ኣይሕሰብን። ብዓብይኡ ድማ ቂምታኡ ዘይተላቐቆን ዘይሓወየን መራሒ ኤርትራ፣ ኣብ ባእሲ ተጋሩን ኣምሓሩን፣ ናብ ኣምሓራ ከም ዝውግን ብኣጋኡ ይንገረና‘ሎ። 

ኣብ መደምደምታ ዝህቦ ርኢቶ እንተሎኒ! ምዕራባዊ ስትራተጅያዊ ዓብላልነትን ኢድ ኣእታውነት ኣዕራብን፣ ምስ ምእዙዝነት መራሕቲ ቀርኒ ኣፍሪቃ፣ ብፍላይ መራሕቲ ኢትዮ-ኤርትራ ዝህንደድ ዘሎ ቅጥዒ ዝሰኣነ ፖለቲካ ተደማሚሩ፣ በዚ ዝንህር ዘሎ ኣሉታዊ ዕንደራታት ኣብ ረጽሚ እንትተኣትዩ እተበታተነት ኢትዮጵያን ነጻነታ ዘይተዕቁብ ኤርትራን ኢና ክንርኢ። ኣብ ዓለምና ምፍሻል ሃገራትን፣  ምቅያር ታሪኽን ኣብ ብዙሕ ከባቢታት ኣጋጢሙን ተራእዩን‘ዩ።

ሓደ ኣብነት ንምጥቃስ፣ ዓባይ ዩጎዝላቭያ ንምብትታን ኣብ ልዕሊ‘ቱ ዝሓየለ ጉጅለ ሰርቪያ እዩ ሰፍ ዘይብል መጥቃዕቲ ተፈጺሙ። ኣብ ማሕበራዊ ትካላቱን መራሕቱን እተፈጸመ ሓደጋ ምዕራባውያን እዛ ሎሚ እተብታተነት ዩጎዝላቭያ ክትረአ ክኢላ። እዙ ሎሚ ኣብ ልዕሊ ህዝቢ ትግራይን መራሕቱን ዝወጣወጥ ዘሎ ኣብትርቲ ምስቱ ናይ ዓባይ ዩጎዝላቭያ ይመሳሰል‘ዩ። ስለ‘ዙይ እዙ ዝንህር ዘሎ ሕማቕ ፖለቲካ ሽትኡ እንተወቒዑ እቱ ናይ ሰለሰተ ኣርባዕተ ኣሸሓት ዓመታት ታሪኽን ዱልዱል መንነት ዘለዎ ብፍላይ ሓበሻ/ትግሪኛ ነበረ ክበሃል‘ዩ። ከምኡ ከይኸውን እንኮ ፍቱን መድሃኒት ኣብ ኢዱ ጥራይ እዩ ዘሎ። እምበኣር! ምዕምራር ምዕራባውያንን ምትእትታው ኣዕራብን ነዚ ዝጥቀስ ዘሎ ሓደጋታት ከምጽእ ይመስል፣ ብኣንጻሩ ጠቕምታት ሩስያን ቻይናን ኣብ‘ዙ ዞና‘ዙይ እንታይ ክመስል‘ዩውን ምርኣዩ ኣገዳስነት ኣለዎ።

ክሳብ ተመሳሳሊ ጽሑፍ ሰ‘ሰናዩ፣ 

ወዲ ባሻይ።

ወጻዕቲ ካብቲ ኣብ ባይታ ዘሎ ክውንነት ንምህዳምን ንምድንጋርን ካብ ዝጠቀምሎ ሜላታት ሓደ ናይቶም ኣንጻሮም ዝቃለሰኡ ውጹዓት ኣቕጣጫ ምስሓት እዩ። እዚ ማለት እቲ ዓሚቕ ህዝባውን መሰረታውን ናይ ለውጢ ኣተሓሳስባ ዕምቆት ዘየብሉ ኣንጻር ውልቀ ሰባት ዘተኮረ ኮይኑ ከም ዝውሰን ምግባር እዩ። ነቲ ወጻዒ ውልቀሰብ ኮነ ጉጅለ ንገዛእ ርእሱ ዕላማ ገይሮም የቕርብዎ እሞ፡ ወጻዕቲ ምስ ናይዞም ውልሰባት ወይ ጉጅለ ተሰከምቲ ወጽዓ ምእላይ መሰረታዊ ፍታሕ ከም ዘምጽእ ኣምሲሎም ክጸልዉዎም ይጽዕሩ። እዚ ከበሃል እንከሎ ግና እቲ መሰረታዊ ጸገም ኣብቲ ናይ ወጽዓ ኣተሓሳስባ ኮይኑ እዚ ጸረ ህዝቢ ኣተሓሳስባ ሰሪሩ ዘጋልቦም ሰብ  ጽልዋን ግደን የብሉን ማለት ኣይኮነን።

ኣብ ተመኩሮና ወጻዕቲ ነቲ ኪኖ መሰረታዊ ናይ ኣተሓሳስባ ለውጢ ካልእ ምርጫ ዘየብሉ ውጹዕ ህዝብና ምስ ውልቀሰባት እንዳተሓሓዝካ ምድንጋራት ምፍጣር ዝተለምደ እዩ። ንኣብነት ምእንቲ ህዝቢ ኤርትራ ከምዚ ካብ ኮነስ ወዮ ናይ ለውጢ ኣተሓሳስባ መጺኡ ኢሉ ከራጥጥ ዝተመሃዝ ተንኮላት ብዙሕ እዩ። በብግዜኡ ኢሳይያስ ናይ ርእሲ ዓሶ ሒዛቶ፡ ኣካላቱ ለሚሱ፡ ንሓንሳብ እውን ሞይቱ እንዳተባህለ ብናይቲ ንሱ ዝመርሖ እኩይ ጉጅለ ተኸሽኑ ዝንዛሕ ወረ ዕላምኡ ከምዚ እዩ። ህዝቢ ንጉዳያት ኣብ ክንዲ ኣስፊሑ ብዓይኒ ኣተሓሳስባ ዝሕዞ ብውልቃዊ ጽልኢ ከም ዝርእዮ ንምግባር። እዚ ኣገባብ ናብቲ ምእንቲ ለውጢ ኣተሓሳስባ ዝቃለስ ወገና ጥራይ ዘይኮነ፡ ነቲ ደጋፊ ህግደፍ እውን ዘደናግር እዩ።

ኣብዚ እዋንዚ እንተተዓዚብና እቶም ዝርካቦም ደገፍቲ ህግደፍ፡ ንኢሳይያስ ብውልቂ ምናልባት እውን ንህግደፍ እምበር “እዚ እዩ እንድግፎን እንቃለሰሉን” ዝብልዎ ኣተሓሳስባ የብሎም። ድሕሪ ኢሳይያስ እትዓርብ ጸሓይ እያ ዘላቶም። ኢሳይያስ ኣብ  ጸረ ህዝቢ ኣተሓሳስባ ዝሰፈረ ሰይጣን ምዃኑ ዝርድኡ እውን ኣይመስለናን። “ኣንታ ንበረልና” ክብልዎ እንከለዉ ዕድመ  ኩሉ ወጽዓታት ኣብ ኤርትራ ክነውሕ ሰማዒ እንተረኺቦምስ ይጽልዩ ከም ዘለዉ ዝርድኡ እውን ኣይመስሉን።

ኣብ ናይ ሎሚ ኤርትራ፡ ኢሳይያስ ይኹን ስብሓት፡ የማነታት ድዮም ዑስማን ሳልሕ ምናልባት እውን ካለኦት ጀነራላት እንተሓመሙ ወይ’ውን እንተሞቱ እቲ ወጽዓ ብኡንብኡ የብቅዕ ማለት ኣይኮነን። ኣብ ካለኦት እውን ዝሰፈረ ጸረ ህዝቢ ህዋስ (ቫይረስ) ስለ ዝኾነ መልክዑ ቀይሩ ናይ ምቕጻል ዕድሉ ዕጽዊ ኣይኮነን። ስለዚ ናይ ውልቀሰባት ምእላይ ብኡ ንብኡ እቲ እንቃለሰሉ መሰረታዊ መፍትሒ ክመጽእ ኣይክእልን እዩ። እዚ ክበሃል እንከሎ ግና ኣብ ምስራጽ ናይቲ ወጻዒ ኣተሓሳስባ ገዚፍ ብጽሒት ዝነበሮም ኣካላት ክኽወሉ እንከለዉ ኣብ ደንበኦም ስንከልከል ኣይፍጠር ማለት ኣይኮነን። እንደጋና ከምዚ ጸምሊዩ ዝጸንሐ ዘራእቲ ሓጋይ ማይ ምስ ረኸበ ህይወት ዝመልስ ዳግማይ ኣይበራበርን ማለት ኣይኮነን። ኣብ ዝተወሰነ መድረኽ “ዝብእስ ክሳብ ዝደልዎ ይሕንክስ” ብዝብል ጥበብ እቶም ወረስቲ ዓራት ካብቶም ቅድሚኦም ዝነበሩ ዝሓሹ መሲሎም ዝቐርብሉ መረሳስዒ ኰነት ይፍጠር እዩ። ከምቲ ግቡእ ለውጢ ተረጋጊጹ ምባል እንኽእል ኪኖ ናይ ሰባት ምሕላፍ ምብሳር ናይቲ ሓድሽ ኣተሓሳስባ ብውሕስነት ክረጋገጽ እንከሎ እዩ። ንኣብነት ኣብ ኤርትራ ኣፍና መሊእና ልዕልና ሕግን ዲሞክራስን ተረጋጊጹን እንብል ዘይነበረ ጭርሖታት ዘስምዕ ሓድሽ ሓይሊ ክመጽእ እንከሎ ዘይኮነ፡ ለውጢ ብግብሪ ክረአ እንከሎ ጥራይ እዩ። ምኽንያቱ ዲክታቶር ኢሳይያስ እውን ኣብዚ ሕጂ ዘለዎ ሲኦል ንክበጽሕ ብብዙሕ ናይ ደሓን ዝመስል ሰላሕታዊ ስልታት እዩ ሓሊፉ።

ስለዚ ህዝቢ ኤርትራ ኪኖቲ ንምድንጋሩ ዝስናዕ ናይ ሕልሚ እንጀራ ግብራዊ ለውጢ ኣብ ምርግጋጽ ኣትኪሉ ክቃለስ ይግበኦ። ኩሉ ካብ እንዳ ህግደፍ ዝንዛሕ ወረ ከኣ ማእከሉ ዕድመ መግዛእቲ ምንዋሕ እምበር ምርግጋጽ ለውጢ ክኸውን ባህርያዊ ኣይኮነን። እዚ ነቶም ጉልባቦም ቀሊዖም ኣንጻር ኢሳይያስ ዝመራሒኡ ጉጅለ ህግደፍ ዝቃለሱ ዘለዉ ጥራይ ዘይኮነ፡ እቶም ብዝተፈላለዩ ምኽንያት ተደሪኾም ኣንጻር መሰረታዊ መሰላት ህዝቦም ተሰሊፎም ዘለዉ እውን ንኢሳይያስ ብውልቃዊነቱ ምምላኽ ጥራይ ዘይኮነ ነቲ ንሱ ተኾድጭሉ ዘሎ ኣተሓሳስባ ክድህስስዎ ይግበኦም። ከምኡ እንተገይሮም ከኣ ኣብ ጐኒቲ ህዝቦም ዝውጽዕ ዘሎ ውልቀሰብ ንበሎ ጉጅለ ክስለፉ ሕልናኦም ከምዘይፈቕደሎም ርግጸኛታት ኢና። ከምቲ ወለድና “ ንሰብ ሃገሩ ምግባሩ” ዝብልዎ ሰብነት ብተግባርዩ ዝግለጽ። ብመንጽር እዚ ሰብነት ኢሳይያስን ውሱናት ሰዓብቱን በቲ ኣብ ልዕሊ ህዝብና ዝፍጸምዎ ዘለዉ ወጽዓን ክሕደትን እዮም ክምዘኑ ዝግበኦም።

ኣብዚ እዋንዚ ኣብ ሃገርና ዝስማዕን ዝረአን ዘሎ ዓረበሰረቐ ጥቡቕ ምክትታል ዘድልዮ እዩ።  ንንቕሎ በዓል ወዲ ዓሊ ኮነ ተበግሶ ብርሃነ ኣብርሃ ኣብ መሰረታዊ ኣተሓሳስባዶ ኣብ ውልቃዊ ጽልኢ ዘትከለ ነይሩ ዝብል ከም ተመኩሮ ምድህሳሱ ኣገዳሲ እዩ። ኣብዚ እዋንዚ እውን (ሓቂ እንተደኣኮይኑ) ኣስማት በዓል  ኮ/ል ብርሃነ ሃይለ (ወዲ ውነሽ) ከምኡ `ውን ኮ/ል ደረስ ገብረኣምላኽ ምስ መውጋእቲ ጀነራል ስብሓት እንዳተዛመደ ይጥቀስ ኣሎ። ዒላምኦም ውልቀመላኺ ከም ሰብዶ ምልክነት ከም ኣተሓሳስባ ነይሩ ዝብል ከኣ ኣብ ግምት ክኣቱ ዝግበኦ እዩ። “ደሓን ኢሳይያስ ደኣ ከም ገለ ይኹን እምበር ካብኡ ዝኸፍእዶ ከይመጽእ” ዝብል ኣበሃህላ ኣብ ኤርትራውያን ዝውቱር እዩ። እቲ ኢሳይያስ ኣብ ልዕሊ ህዝቢ በደል ዝፍጽመሉ ዘሎ ጸይቂ ህዋስ (ቫይርስ) ኣብ ካለኦት እውን ስለ ዝህሉ ኣካይዳ ኢሳይያስ ብድሕሪኡ ምናልባት እውን ብዝኸፈአ ኣገባብ ከይቅጽል ውሕስነት የብሉን። እቲ ኣተሓሳባ ዳግማይ ግዜ ሓልዩ ከምዘይጥጥዕ እንተዘይተበቚቑ ናይ ውልቀሰብ ወይ ውልቀሰባት ምእላይ ንቐጻሊ ራህዋ ውሕስነት ክኸውን ኣይክእልን እዩ። ናይ ከም ኢሳይያስ ዝኣመሰሉ ዕሉላት መለኽቲ ምፍጥፋእ ኣብ ደንበ ወጽዓ ስንባደ ኣይፈጥርን ማለት ግና ኣይኮነን።

ብዕለት 15 ታሕሳስ 2018 ኣብ ፍራንክፎርትን ከባቢኡን ዝቕመጣ ግዱሳት ኣዴታትን ኣሓትን ኣባላት ማሕበር ኣካለ ጽጉማ  ኤርትራ ጨንፈር ጀርመንን  ዘዳለዉዎ፡  ነቶም ኣብ ቃልሲ ህዝቢ ኤርትራ ንራህዋን ሓርነትን ኣካላቶም ዘበጀዉን ንነዊሕ ዓመታት ኣብ መደበር ውጉኣት ሓርነት ከሰላ ሃገረ ሱዳን ዝነብሩ ኣባላት ውጉኣት ሓርነትን ኣካለ ጽጉማ ኤርትራውያንን ንምሕጋዝ ኣብ  ኣዳራሽ SAALBAU GALLUS Frankenallee  111፡  60326 Frankfurt  ዕዉት ናይ ድራር ምስዮት ተኻይዱ።

ኣብ ጀርመን ብፍላይ ድማ ኣብ ፍራንክፎርት፣ በዘን ሕድረን ዘይጠለማ፡ ኣሕዋት ብስም ውጉኣት ሓርነት መደበር ከሰላ ናይ ድራር ምስዮት ካብዝጅምርን ኣብ ዓመት እንተዋሓደ ክልተ ግዜ እንተዘይኮነውን ካብኡ ንላዕሊ እንዳተጸውዐ ካብዝካየድን ድሮ ዓስራይ ዓመቱ ሒዙ ምህላዉ ክዝከር ይግባእ። እዚ ናይ ድራር ምስዮታት‘ዚ፡ ብዜጋታቶምን ጽጉማቶምን ዝግደሱን፡ ክብሪ መውጋእትን ስንክልናን ዘለለዩን ኣሕዋትን ኣሓትን ሰማዒ ሕልና ስለዝረኸበ ድማዩ ክቅጽል ክኢሉ። 

ኣብዝተገብረ ናይ ድራር ምስዮት፡ ብርክት ዝበሉ እቲ መደብ ካብ ነዊሕ ዘገድሶምን ዕድመ ኣብ ዝተገብረሉ እዋን ብኣካልን ብትሕዝቶን ዘይተፈልይዎ ዕድመኛታት ተረኺቦም ዕዉት ዝዀነ ገንዘባዊ ውጽኢት ገይሮም። ኣብዚ ካብ ሰዓት 16.00 ክሳዕ 22.00 ዝተኻየደ ምስዮትዚ፡ እቲ ቀንዲ መእከብን መራኸብን ዝኮነ ጉዳይ፡ ንዉጉኣት ሓርነት ንምሕጋዝ እዃ ይኹን እምበር፡ ካብኡ ዝለዓለ፡ ነቲ ርክብ ዘደልድልን ዘብህግን ከኣ፡ እቲ ብተሳተፍቲ ኣሕዋትን ኣሓትን ዝቐርበ መዘናግዒ ዋዛ ምስ ቁም-ነገርን ላዛን፣ ማሕበራዊ ዝምድናታት ኣብ ምድልዳልን ፍቕርን ሕውነትን ኣብምርግጋጽን ኣገዳሲ ተራ ስለዘለዎ፡ እቲ ምስዮት ዝተደራረበ ውጻኢት ከምዝነበሮ ኣብ መንፍስ ተሳተፍቲ ዝረኤ ዝነበረ ደስታን ጸወታን ዝምስክሮ ብምንባሩ፡ ድርብ በዓል እዩ ነይሩ ክባሃል ይካኣል።

ተሳተፍቲ ምስዮት፡ ግዱሳት ኣሓት ንዝገበርኦ ዘይሕለል ጻዕርን ንዘተዳለወ ሽሻይን ምስጋና ድሕሪ ምቕራብ፣ ናይቲ ምስዮት ዕላማ ንምዕዋት ወፈያታት ከበርክሩ ከለዉ፡ ኣብቲ ምስዮት ዘይተረኽቡ ግን ከኣ ድሒሮም ኣስተዋጽእኦም ንዝለገሱ ወሲኽካ ብድምር  ክሳብ 1.150.00-ኤውሮ ( ሓደ ሽሕን ሚኢትን ሓምሳን ኤውሮ) ከምዝለገሱ ክንሕብር ከለና፡ ኣዳለውቲ መደብ ብሸነኸን፣ ንዝተገብረ ወፈያን ልግስን ብምምስጋን፡ ቀጻልነቱ ኣብተሳትፎ ዜጋታት ምዃኑን፣ ኩልና ብእንገብሮ ኣበርክቶ ጽጉማትና ከፊእዎም ክሓድሩ ከምዘይክእሉን ፍናን ብዝመልኦ ቃል ኣመልኪተን ምስዮት ብሰላም ተዛዚሙ። ብዝተፈላለየ ምኽንያታት ኣብዚ ምስዮት እዚ ክሳተፉ ዘይካኣሉ ድማ፡ ወፈያኦም ብባንክ ከበርክቱ ምዃኖም ትስፉዋት ኢና።

ኣብዚ ዓመት‘ዚ 2018፡ ኣብ ጀርመን ኣብ ዝተፈላለያ ከተማታት፣ ፍራንክፎርት፡ ኮለን፡ ሽቱትጋርትን ካስልን ንመደበር ውጉኣት ሓርነት ከሰላ ንምሕጋዝ ሓያሎይ ናይ ድራር ምስዮታትን ኣኼባታትን ተኻይዱ፣ እቲ ዕላማ ንጽጉማት ኤርትራውያን ንምሕጋዝ ብምዃኑ ድማ ብዙሓት ነቲ ሽግር ዝተገንዘቡ፡ ቃንዛ ኣሕዋቶም ዝተሰምዖም ዜጋታት ተሳቲፈሞ። እዚ ሞራላውን ሕልናውን ተሳትፎን ኒሕን ልግስን ክሳብ ዘሎ ድማ፡ ጽጉማትን ውጉኣትን ሓርነት መደበር ከሰላ፣ ካልእስ ይትረፍ መነባብርኦም ውሑስን ዝተማሓየሸን ክኸውን ተስፋ ኣሎ። ስለዚ ድማ ንኩሎም‘ቶም፡ ነዚ መደብዚ ኣብምዕዋት ግዲኦም/ግዲኤን ንዘበርከቱ/ንዘበርከታን ኤርትራውያን፡ መደባት ማሕበር ኣብምቅላሕን ሓበሬታት ኣብ ምዝርጋሕን ዝተሓባበራ ዜናዊ ትካላት፡ ምምሕዳር ኣብ ካስል ዝርከብ  ክበብ ቶጎሩባ ብዝገበሮ እንግዶትን ምትሕግጋዝን፡ ማሕበር ምትሕግጋዝ ኤርትራውያን  ኮለንን፡ ሽቱትጋርትን ብስም ማሕበር ኣካለ ጽጉማን ኤርትራ 2010 ጨንፈር ጀርመን  ልባዊ ምስጋና ነቕርብ።

በዚ ኣጋጣሚ፡ ኣብ መላእ ዓለም ዝርከቡ ግዱሳት ዜጋታትን ማሕበራትን ድማ ደገፎምን ጻዕርታቶምን ከዕዝዙ ንጽውዑ።

ርሑስ በዓል ልደትን ሓድሽ ዓመትን።

ማሕበር ኣካለ ጽጉማን ኤርትራ 2010  ጨንፈር ጀርመን