http://ascenteq.com/project/epdp

ጨንፈር ሰዲህኤ ፍራንክፎርትን ከባቢኣን ብዕለት 17.04.2016 ስሩዕ ወርሓዊ ኣኼባኡ ኣካይዱ። እቲ ኣኼባ ብሓው ታደሰ ኣስመላሽ ኣቦ መንበር ጨንፈር ሰላምታ ድሕሪ ምኽፋቱ፤ ነቲ ናይ ዕለት 03.04.2016 ኣብ ኣስመራ ብምልካዊ ስርዓት ዝተፈጸመ ቅንጸላ መንእሰያት ንምዝካር፡ ናይ ሓደ ደቒቕ ስቕታ ተጌሩ።

ካብኡ ቀጺሉ ብዛዕባ ህልዊ ኲነታት ሰልፍናን ሃገርናን ከባቢናን ሓበሬታታት ምልውዋጥ ተኻይዱ። እቲ ዝያዳ ንኣኼበኛ ዘነደረ ድማ እቲ ናይ ኣስመራ ናይ መንእሰያት ቅንጸላ ኔሩ። ኣኼበኛ‘ውን ድማ ብትሪ ኮኒኑዎ።

ቀጺሉ መንእሰይ ክብሮም ዓንዶም ኣባል ጨንፈር ሽማግለ፡ ንሓደጋታት ጉዕዞ መንእሰያት ዝገልጽ ኣብ ቪድዮ ዝተቐርጸ ተንቀሳቓሲ ፊልም ኣቕሪቡ። እቲ ሰዓትን ፈረቓን ዝወሰደ ቪድዮ ጠንቂ ስደት መንእሰያት፡ ህግደፍ ምዃኑ ዝገልጽ ፊልምን፡ መንእሰያት ኣብ ስደቶም ኣብ ሰሃራን ባሕርን ዘጓንፎም ዝነበረ ሓደጋታትን ዝገልጽ ኮይኑ፡ ኣብ መንጎ‘ውን ናይ ቃልሲ ንያትካ ዘበራብሩ ዜማታትን፡ ባዕሉ‘ውን መንእሰይ ክብሮም ነቲ ዝርአ ዝነበረ ቪድዮ ሓሓሊፉ መግለጺ እናሃበሉን ብሰፊሑ ገሊጹ።

መንእሰይ ክብሮም ዓንዶም ኣብ ዘቕረቦ መግለጺ፡-

ብዕለት 3 ምልካዊ ስርዓት ህግደፍ፡ ነቲ ኣብ ማእከል ኣስመራ ዝፈጸሞ ምርሻን ናይ መንእሰያትና ኣመልኪቱ ኣብ ቲቪ ኤረ ክዛረብ ከሎ፡ እቶም መንእሰያት ክሃድሙ ምስ ፈተኑ፡ እቶም ዘሰንይዎም ዝነበሩ ኣባላት ሰራዊትና ንላዕሊ ተኲሶም 2 ተሰዊኦም ገለ ድማ ተቐቲሎም ኢሉ። እዚ ኣበሃህላ እዚ ኣዝዩ ዘደንጹ እዩ። ህግደፍ ንህዝቢ ከመይ ጌርካ ትጠውዮ ካብ ነዊሕ ግዜ ዝተሞኰሩሉ እዩ። እቲ ባዕሎም ረሺኖም ተሰዊኦም ምባል ንህዝቢ ንምድንጋርን ነቲ ዕላማ ዘሎዎ ክብረት ናይ ምስዋእ ናይ ጀጋኑና ንምጥፋእን ዝገብሩዎ ዘሎዉ ገበን እዩ። ኣብ በረኻታት ኤርትራ ክንደይ ብተኲስካ ቅተል ዝጠፍኡ ኣለዉ። ንሱ ሰብ ዝርእዮ ኣይነበረን፤ እዚ ናይ ሎሚ ግና ኣብ ቅድሚ ህዝቢ ኣብ ማእከል ከተማ ኣስመራ እዩ ተፈጺሙ። ኣብ ግዜ ነጻነታዊ ቃልስና፡ ኣነኳ ዘየርከብኩሉ እንተኾንኩ፡ ታሪኽ ቃልስና ከም ዝምስክሮ፡ ተጋደልቲ ኣነ ክስዋእ ንስኻ ትረፍ እናተበሃሃሉ ብታንክታት ዝጠፍኡ ኔሮም‘ዮም። ሕጂ ግን ህግደፍ ነቲ ክቡር መስዋእቲ ዝበሃል ቃል አሕስሮን ንመደናገሪ ህዝቢ እጥቀመሉን ኣሎ። ንከምስልን ክብረት ስዉኣት ከም ዘገድሶ ክመስልን ግን ዝባን ስዉኣት እናበለ ንህዝቢ ብዘይ ሕጊ ክቕይዶ ይርአ። ሕጊ ስለ ዘይፈልጥ ዝባን ሕጊ ክብል ኣይክእልን እዩ። እቶም ስዉኣት ተመሊሶም እንተዝርእዩዎስ እንታይኮን ምበሉ? እንቋዕ ተመሊሶም ኣይርእዩዎ። እዚ ኩሉ ገበናት‘ዚ እምበኣር ውዒሎም ሓዲሮም ክሕተቱሉ እዮም። ህዝቢ ኤርትራ ክሓቶም እዩ።

ህግደፍ እዚ ኩሉ ገበናት እናገበረ፥ ንሕናኸ እንታ‘ዩ ግዴና ኢልና ንነፍስና ንሕተት። እቲ ናይ ኣስመራ ምርሻን ናይ መንእሰያት ምስ ተሰምዐ፡ ትማሊ ምሸት ኣብ ፍራንክፎርት ንዝኽሪ ናይቶም ዝተረሸኑ ተባሂሉ ሽምዓ ምውላዕ ኔሩ። ኣብኡ ብዙሓት መንእሰያት መጺኦም ኔሮም። ኣነ ግን ብዙሕ ተገሪመ። ዓመት ዓመት መንእሰያትና ጠፊኦም ኢልና ሽምዓ ንውልዕን ንቚዝምን። እቲ ፍታሕ ንሱ ድዩ? እዞም መንእሰያት እዚኣቶም እቲ ግብረ-መልሲ ናታቶም ሽምዓ ምውላዕ ጥራሕ ድዩ? ወይስ ካልእ መፍትሒ ኣሎ‘ዩ። ኣበየሎዉ እቶም ኣብ ሽምዓ ምውላዕ ተኣኪቦም ዝነበሩ መንእሰያት? ኣበየሎዉ እቶም ኣብኡ ተኣኪቦም ሽምዓ ክውልዑ ዘምሰዩ ዓበይቲ? ግዴና ግደ መንእሰያት ሽምዓ ምውላዕ ኣይኮነን። ግዴና ተግባራዊ ቃልሲ‘ዩ። ንሕና ኣብ ዘየድሊ ሓዲግ ቦታ ጠጠው ኣይንበል። ተወዲብና ንቃለስ።

ከመይ ጌርና ኢና እንቃለስ? ንሕና ቃልሲ ዘጽንሑልና ወለዲ ኣሎዉና። ተወዲብና ቃልሲ ወለድና ንውረስ። እቶም ዓበይቲ‘ውን ከውርሱ ኣለዎም። ስለዚ ኩላትና እንታይ ክወርስ‘የ እንታይከ ከውርስ‘የ ኢልና ንሕሰብ። ህግደፍ ጽልእን ፍርሕን ጥራሕ እዩ ኣውሪሱ። ኣብ ሰራዊት ከሎና ምስ መዳቕስትና‘ውን ኣይንተኣማመንን ኔርና። እንተተዛሪብና‘ውን ብኳሌታኡ ኣውጽኣዮ ንበሃል ኔርና። ወለድና ግን ቀደም ብሕጊ ነፍሶም የመሓድሩ ኔሮም። ሕጊ በትሪ ድኻታት እያ። ኣብ መንጎ ውልቀ-ሰባትን ዓድታትን ንዝተፈጥረ ግርጭታት ከይተረፈ ብዕርቂ የደቅሱ ኔሮም‘ዮም። ንሕናኸ እቲ ናይ ህግደፍ ጽልእን ፍርሕን ዘይምትእምማንን ዲና ክንወርስ ዝግበኣና ወይስ ናይ ወለድና? እቲ ንኣና ዘድልየና ዘሎ እምበኣር ባህሊ ወለድና ወሪስና፡ ውድበይ ውድብካ እናበልና ምትህልላኽ ገዲፍና ተጠርኒፍና ህዝብና ከነድሕን‘ዩ።

እቲ ኣዝዩ ዝገርመኒ ድማ፡ ኣነ እንታይ ክገብር ኣሎኒ ኢልና ንነፍስና ኣብ ክንዲ ንሓትት፡ 30-40 ዓመት ተቓሊሶም እንታይ ጌሮም ኢልና ንዝተቓለሱን ሕጂ ኣሪጎም ዝደኸሙን ነነኣእስ። ንሳቶምሲ ግብኦም ጌሮም፡ ንሕና መንእሰያት ግን  ኣብዚ ግዜ‘ዚ እቲ ዝኸፍአ ንገብር ኣሎና። ኣብ ህግደፍ እናኸድና ናይ ጣዕሳ ፎርም ንመልእ። እዚ ብምግባርና፡ ነቲ ዝጠፍእ ዘሎ ውጹዕ ህዝብና ንሞት ንፈርዶ ኣሎና። ባዕልና ኢና ንቐትሎ ዘሎና። ስለዚ ንሕሰብ ነስተውዕል።

ኣብ መወዳእታ ዘረብኡ መንእሰይ ክብሮም፡ ሓንቲ ኣብ ወጻኢ ዝዓበየት መንእሰይ ንቃልሲ ወለዳ ዝወረሰት፡ እናኣሕነቕነቐት ትግርኛን እንግሊዝኛን እናሓዋወሰት፡ ነቲ መንእሰያት ኣብ ሰሓራን ኣብ ባሕርታትን ዝጠፍኡ ዘለዉ እናገለጸት፡ መፍትሒ ካባና‘ዩ ተቢዕና ንቃለስ ብምባል ናይ ሰብኣውነትን ቃልስን ወራሲት ኮይና ዝተዛረበቶ ኣብ ቪድዮ እናኣርኣየ ተወሳኺ መግለጺ ሂቡሉ። ከም መዕጸዊ ዘረብኡ ድማ፡ ንሕና ኣብ ዓዲ ዲሞክራሲ ኣብ ጀርመን እናተቐመጥና፡ ካብኣቶም ክንመሃር ኣሎና። ብዙሓት ሰልፍታት ኣለውኦም፥ ከመይ ጌሮም ተሰማሚዖም ብሕጊ ተጠርኒፎም እኸዱ ኣለዉ ንርእዮም ኣሎና። ንሕና ድማ ነቲ ካብ ህግደፍ ዝወረስናዮ ፍርሒን ጽልእን  ኣወጊድና፡ ተጠርኒፍና፡ መንእሰያትናን ዓበይትናን ተቓወምቲ ውድባትናን ፍልልያትና ኣወጊድና ህዝብና ነድሕን፤ ሰልፍና ነዚ ዝጣበቕ ሰልፊ‘ዩ፤ ብሽምዓ ምውላዕ ዘይኮነስ ብቓልሲ ሽግርና ንፍታሕ፤ ኣብ ትርጉም ዘየብሉ ሂወት ኣይንንበር፤ ኤውሮጳውያን ሕጎም ይቕይሩዎ ኣለዉ ከምዚ ኢልና ክንነብር ኣይኮንናን፡ ስለዚ በርቲዕና ንቃለስ፤ 200 ሚልዮን ኤውሮ ዘይኮነስ ጥይት እዮም ሂቦሞ ዘለዉ ንመጥፍኢ ህዝቢ፤ ብዝብል ለበዋ መግለጺኡ ደምዲሙ።

ብድሕሪ‘ዚ ኣኼበኛታት ነቲ መንእሰይ ክብሮም ዘቕረቦ መሃርን ንቓልሲ ዘበራብርን መደብ እናኣሞጐሱ፡ ኩላትና ተቢዕና ውፉይ ቃልሲ ከነበርክት ከም ዘሎና ለበዋታቶም ድሕሪ ምቕራብ፤ ኣኼባ ሰዓት ብዝክረ ስዉኣት ተደምዲሙ።

ዓለምና፥ “ንዓይ ጥራሕ ይጥዓመኒ” ብዝብል ሃብትን ንብረትን ናብ ምኽዕባትን ምውናንን ገጻ ትጎዓዝ ብምህላዋ ናይ ውሑዳት ጸብለልትነት ኣብ ልዕሊ ብዙሓት ብዘምጽኦ መዘዝ ብውሑዳት ሰብ ሃብቲ ከም እትበሓት ኮይና ኣላ። እዚ ኣገባብ  ምሕደራ ምዝመዛን ወጽዓን ዝወልድ ብምዃኑ፡ ዓለም ርህይዋን  ቀሲናን እትነብረሉ ሃዋህው ይብከል እዩ ዘሎ። በቲ ካልእ ወገን እዚ ኩነታት፡  እቲ ሃብታም ነቲ ድኻ ዝውሕጠሉ ኣገባብ እምበር እቲ ርኹብን ስኡንን ብሓባር ዝረብሕሉ ኣመሓድራ ኣብ ምፍጠር ዕንቅፋት ዝፈጥር እዩ።

ንሕና ኤርትራውያን’ውን ካብዚ ሓደጋ’ዚ ናጻ ክንከውን ስለ ዘይንኽእል እቲ ክነምጽኦ እንደልዮ ለውጢ ካብ ብሕጂ ጽጹይን ጥጡሕን መንገዲ ክነትሕዞ ይግበኣና። ካብኡ ሓሊፉ፥ ሰላም፡ ራህዋን ቅሳነትን ዝዓሰላ ሃገር ክትህልወና ብትምኒት ጥራይ ኣይከውንን እዩ። እቲ እንምነዮ ለውጢ  ኣነጺርና ብግሉጽ ክነጒልሖን ብተግባር እውን እነሰንዮን ክኸውን ይግበኦ። ንእንመነዮ ለውጢ ከከም ድሌታትናን ኣተሓሳስባናን ጥራይ ክውሰን ከምዘይክእል ከነስተውዕል ይግበኣና። ምኽንያቱ እቲ  እንምነዮ ለውጢ ንረብሓ መላእ ህዝቢ ዝውክልን ብሓባር ዘንብርን ምዃኑን ዘይምዃኑን ክንመራመረሉ ይግበኣና።

ነዚ ኣንዊሑ ዝጥምት ምርምር’ዚ ንምክያድ፡ ናጻን ቀጻልነት ዘለዎን፡ ዘይዓመጻዊ ኣገባብ ኣተሓሕዛ ጉዳያት ቃልሲ ክኸውን ይግበኦ። ምኽንያቱ ካብ ምልኪ ናብ ዲሞክራሲ ኣብ ዝኸይድ ጉዕዞ ነቲ እንምነዮ ህዱእ መጻኢ ውሕስነት ዝህብ ዲሞክራሲያዊ ምሕደራን፥ ህዝቢ ዝዋንኡ ስልጣንን ክህልወና እንከሎ ስለ ዝኾነ።

ነዚ መስርሕ ዝመልክት ስነፍልጠት ከም ዝሕብሮ፥ ‘’ጭቆና ንምቅዋም ይኹን  ወጻዒ ስርዓት ንምውጋድ ዓመጻዊ ኣገባብ ከም ምርጫ ምውሳድ፥ ቀጻሊ ህድኣት ኣብ ምውሓስ ክህልዎ ዝኽእል ውጽኢት፥ ምስቲ ዘይዓመጻዊ ኣገባብ ክረአ እንከሎ፡  ኣዝዩ ዝተሓተ እዩ።  ዘይዓመጻዊ ኣገባብ ተቓውሞ ግና ኣብ ዲሞክራሲያዊ ውጽኢትን ቀጻሊ ርግኣትን ዝህልዎ ጽልዋ ዝለዓለን ዘተኣማምንን ምዃኑ ብዝተፈላለዩ ተመኩሮታት ዝተረጋገጸ እዩ።’’

ስለዚ ዲሞክራሲ ኣብ ጥጡሕ ባይታ ክስረትን እናማዕበለ ክኸይድን  ኣብ ኣእምሮ ነፍሲ ወከፍ ዜጋ ናጽነት ክትሰፍር ኣለዋ። ምኽንያቱ ንባዕሉ ናጻ ዘይኮነ ንናይ ካልኦት ናጽነት ክኽብርን ብዛዕባ ዝሓሸ መጻኢን ክሓስብን ኣይክእልን እዩ። እዚ ባይታ’ዚ ኣብ ዓመጻዊ ኣተሓሳስባ ዘይኮነስ፡ ኣብ ዘይዓመጻዊ ኣተሓሳስባ ምስ ዝንደቕ እዩ መሰረትን ውሕስነትን ዝተኣማምን ረብሓ ኩሉ ህዝቢ ዘውሕስን ዝኸውን።

ብሓጺሩ እቲ ተቓውሞ ንዘይዓመጻዊ ኣገባብ ከም ምርጫ ክወስዶን ብተግባር ክሰርሓሉን እንከሎ  እዩ ናጽነት ዝዓዝዝን ናብኡ ገጹ ዝወስድ መንገዲ ጥጡሕ ዝኸውንን። እዚ ዘይጐነጻዊ ኣገባብ ውሑስን ዘተኣማምንን ክኸውን ግና ህዝቢ ብንቕሓትን ብውዱብ ኣገባብን ክሳተፎ እንከሎን ዝተጸንዐ መተካእታ ዝቐረበን ክኸውን እንከሎ እዩ። እዚ ምድላው’ዚ ኣብ ዘይተገብረሉ፡ ነቲ ኣገባብ ስለ ዝመረጽካዮ ጥራይ ትዕወት ማለት ኣይኮነን። ኣብዚ ቀረባ ግዜ ብዘይጐነጻዊ ኣገባብ ኣብ ሓጺር ግዜ ብህዝባዊ ናዕቢ ዲክታቶራት ናይ ዘወገዳ ሃገራት ተመኩሮ ዝምህረና እውን እዚ እዩ።

ኣቦናን ሓውናን ኣቶ ኣልኣዛር ቀለተ ዘርኤ

ብዝሓደሮ ሕማም ምኽንያት ብቀዳም ዕለት 16. 04. 2016 ብሰላም ዓሪፉ::

ሓዘን እንገብረሉ ቦታ ኣብ

Pauluskirche Stuttgart-West Bismarckstr. 40,  70197 Stuttgart

ካብ  ዕለት 17.04. 2016 ጀሚሩ ክሳብ  ሓሙስ ዕለት 21.04.2016 ካብ ሰዓት 16³° ክሳብ 21°° ኢዩ

ናብዚ ቦታዚ ንምብጻሕ

 ብ ኩለን S-BAHN ኣብ Schwabstraße ወሪድኩም

ብ U9 ን U2 ኣብ Schwab-Bebelstr Haltestelle ትወርዱ

Schwabstraße ሒዝኩም ን Bismarckplatz  ትኸዱ

ኣውቶቡስ 42 ካብ Bahnhof ab Bismarkplatz Haltestelle ትወርዱ

ናይ ቀብሪ ስነስርዓትን ፍትሓትን

ዝግበረሉ ዕለት ዓርቢ 22.04.2016 ካብ

ሰዓት 11°° ክሳብ 12°°ኣብ Pragfriedhof

Friedhofstraße 44, 70191 Stuttgart

መጉዓዝያ U5 U7 U15 U12 ኣብ Pragfriedhof- ውይውን Milchof-Haltestelle ትወርዱ

ተወሳኺ ናይ ተለፎን ሓበረታ     017672370272

 ስድራ ቤት ቀለተ ኣልኣዛር

ሓልፊ ቤት ጽሕፈት ኣህጉራዊ ዝምድናታትን ምክትል ኣቦ-መንበር ሰልፊ ዲሞክራሲ ህዝቢ ኤርትራን ሓው ወልደየሱስ ዓማር፡ ብ17 ማዝያ 2016 ናይ ኣባላት ሰልፊ ኣኼባ ኣካይዱ። ዕላማ ናይዚ ኣብ ፓልቶክ ንዝያዳ 5 ሰዓታት ዝቐጸለ ኣኼባ፡ ዓመታዊ መደብን ንጥፈታትን ናይቲ ቤት ጽሕፈት ምግላጽ ነይሩ። በዚ መሰረት ሓው ወልደየሱስ ዝርዝር ዓመታዊ መደብ ናይቲ ቤት ጽሕፈት ኣቕሪቡ፡ በቲ መደብ መሰረት ዝተኻየዱ ንጥፈታት ዘርዚሩን ኣባላት ሰልፊ ነቲ መደባት ንምዕዋት ከበርክትዎ ብዛዕባ ዝግበኦም ከኣ ጸዊዑ።

እቲ ሓላፊ ቤት ጽሕፈት ብሓፈሻ ናይ ቤት ጽሕፈቱ ቆላሕታ ኣብ ዲፕሎማሲያዊ መዳይ፡ ብፍላይ ናይ ሰደህኤ ብሓፈሻ ድማ ናይ መላእ ሓይልታት ተቓውሞ ናይ ቀረባን ርሑቕን መደባት ምንጽብራቕ፡ ዝተፈላለዩ ወገናት ነቲ ኣብ ኤርትራን ምእንቲ ደሞክራስን ኩሉ ዓይነት መሰላትን ዝግበር ቃልሲ ክድግፉ ምጽዋዕን ጸረ ህዝቢ ተግባራት ህግደፍ ምቅላዕን ምዃኑ  ሓቢሩ። ዝያዳ ዝርዝር ንምጥቃስ ድማ፡ ራእን ዕላማን ሰዲህኤ፡ ጉዳይ ስደተኛታትን ሳዕቤናቱን፡ ኣብ ልዕሊ ልሉያት መራሕቲ ህግደፍ ዝተነብረ ማዕቀብ፡ ምስታ ጉዳይ ሰብኣዊ መሰል ኤርትራ ትምርምር ዘላ ኮሚሽን ምትሕብባር፡ ካብቶም ዝያዳ ቆላሕታ ዝግበረሎም ዛዕባታት ምዃኖም ሓቢሩ

ንጥፈታት እቲ ቤት ጽሕፈት ክጠቅስ እንከሎ ከኣ፡ ካብ ምቛም ኣካላት እቲ ቤት ጽሕፈት ጀሚሩ፡ ኣብ ምዝርጋሕ እቲ በዚ ቤት ጽሕፈት ብቋንቋ እንግሊዝ ዝዳሎ መጺሐት፡ ብዛዕባ ዝተፈላለዩ ኤርትራዊ ጉዳያት ናብ ዝተፈላለዩ ዝምልከቶም ኣካላት ዝተጻሕፉ መዘክራት፡ ኣብ ዝተፈላለዩ ሃገራት ብዝተፈላለዩ ሓለፍቲ ሰልፊ ዝተኻየዱ ዑደታት፡ ምስ ዝተፈላለዩ ብጉዳይ ኤርትራ ዝግደሱ ሰልፍታትን ማሕበራትን ዝተገብረ ዝምድናታት ብዝምልከት ዝተሰርሑ ስረሓት ከም ኣብነት ዘርዚሩ።

ተሳተፍቲ ብወገኖም ናይ ሕቶን መልስን መድረኽ ምስ ተኸፍተ፡ ንምውህህድ’ዚ ቤት ጽሕፈት ምስ ካልኦት ኣካላት ሰልፊ፡ ኣብዚ መዳይዚ ምስ ሓይልታት ተቓውሞ ሓቢርካ ምስራሕ ብዛዕባ ዝከኣለሉ መንገዲ፡ ህዝባዊ ዲፕሎማሲ ንምፍጣር ዝግበር ጻዕሪ፡ ብሓፈሻ ምስ ኩለን ሃገራት ብፍላይ ድማ ምስ ጐረባብቲ ዘለና ዝምድና፡ ምስ ፍሉይ ተሰማዕነት ዘለዎም ባእታታት ዝምድና ብዛዕባ ምግባር፡ ምስ ዘይኤርትራዊ ወገናት ኣብ እንገብሮ ዝምድናታት እንኽተሎ መምዘኒ፡ ዝብሉ ዝርከቦም ዛዕባታት ኣልዒሎም።

ነዞም ዝተላዕሉ ነጥብታት ብግቡእ ዘብረሀ ሓው ወልደየሱስ፡ ብናይ ክሳብ ሕጂ ተሳትፎ ኣባላት ሰልፊ ሕጉስ ምዃኑ ድሕሪ ምግላጽ፡ ስረሓት ኣህጉራዊ ዝምድና ከምቲ ካልእ መዳያት፡ ነቶም ኣብቲ ቤት ጽሕፈት ዝምደቡ ጥራይ ዝግደፍ ዘይኮነ፡ ነፍሲ ወከፍ ኣባል ሰልፊ ንገዛእ ርእሱ ከም ዲፕሎማት ወሲዱ ክንቀሳቐሰሉ ዝግበኦ ክነሱ፡ ኣብዚ ዝተርፍ ከም ዘሎ ተረዲእና ኣብ መጻኢ ጻዕርና ዝያዳ ከነሕይል ይግበኣና ኢሉ።

ኣኼባ ኣብያተ-ጽሕፈት ሰዲህኤ ምስ ኣባላት ኣካል ዓመታዊ መደብ ኮይኑ ክካየድ ዝጸንሐን ኣብ መጻኢ  ዝቕጽልን እዩ።