http://ascenteq.com/project/epdp

ኣነስ ኩሉ ጊዜ ዝጥርጥሮን ጸጸኒሑ ዝግበርን ዝበሃልን ድማ ነቲ ጥርጠራይ ሓቂ ዘምስሎን የጋጥመኒ። ጥርጠራይ ጌጋ ክኸውን፥ ኣነውን ተጋግየ ነይረ ኢለ ብታሕጓስ ክዛረብ ከብቅዓኒ ትምኒተይ ኢዩ። መንግስቲ ኢሳያስ ኣበይ ገጹ ይመርሓና ከምዘሎ ኣብ ዝሓለፈ እዋን ኣብ ፌስ ቡክ ገሊጸ ነይረ። ኣብ’ዚ ቀረባ እዋን ድማ ነቲ ጥርጠራይ ዝድግፍ ኣስተብሂለ።

ኣብ ከባቢ 2004-5 ኣቢሉ ይመስለኒ፥ ጆን ጋራንግ (ናይ ደቡብ ሱዳን ሓርነታዊ ምንቅስቓስ መራሒ ዝነበረ) ንካርቱም ክበጽሕ መጸ። ኣብቲ እዋን`ቲ: ደቡብ ሱዳን ብፍሉይ ውዕል ምስ ሱዳን ክትቅጽል ዲያ ወይ ክትፍለ ንተኸታተልቲ ኣዝዩ ንጹር ዘይነበረሉ እዋን ኢዩ ነይሩ። ጆን ጋራንግ ናብ ካርቱም ምስ መጸ፤ ኣብ ታሪኽ ናይታ ሃገር ተራእዩ ዘይፈልጥ ብዙሕ ህዝቢ ተቐበሎ። እቲ በዚ ዝተገረመ ጆን ጋራንግ ድማ ዘረባኡ ”እዚ ሪፈረንዱም ኢዩ” ብምባል ከፈተ። እዚ ኣዘራርባዚ ክትርጎም እንከሎ፤ ህዝቢ ሓደ ሃገር ክንከውን ከምዝደለየ ዘመልክ እዩ ማለቱ ከምዝነበረ ኢዩ ዝውሰድ። ድሕሪ`ዚ ዑደት ግን ብዙሕ ከይጸንሐ፤ ምስጢራዊ ኣኸባ ምስ መራሕ ኡጋንዳ ድሕሪ ምክያዱ ሄሊኮፕተሩ ወዲቓ (ወይ ተወቒዓ ክትከውን ትኽእል) ሞተ።

ነዚ ምምጽአይ፤ ዶ/ር ኣብይ ኣሕመድ ኣብ ኣስመራ መጺኡ ናይ ድራር ዕድመ ተገይሩሉን ኣብቲ ኣጋጣሚ ከኣ ተዛሪቡ፤ ናይ ዶ/ር ዘረባ ሎሚ ኣብ ዝኸዶ ከይዱ እንታይ ከም ዝብል ማንም ዝግምቶ ኮይኑ ስለዘሎ ምድጋም ዘድልዮ ኣይኮነን። ዶ/ር ኣብይ ነቲ ኣቀባብላ ኣመልኪቱ ”እዚ ሪፈረንዱም ኢዩ” እንተዝብል ኣይምገረመንን፥ ጋሻ ተዓዳማይ ንሱ ስለዝኾነ፤ ዓዳማይ ከምኡ ክብል ግን ዘይገመቶ ተርእዮ ከምዝኾነ ስለዘመልክት፤ ምስ ኢሳያስ ዝኸይድን ዝሰማማዕን ኣይመስለናን። ግን እስከ ነስተብህል።

እቲ ዘስተብሃልኵዎ ኣብ ዘረባ ኢሳያስ ኢዩ ነይሩ። ከምዚ ድማ በለ፤ ”ሎሚ ኣብዚ ጽርግያ ህዝቢ ዝገበሮ መግለጺ ካልእ ዘረባ ኣየድልዮን ኢዩ፥ ወሰኸውን ኣየድልዮን ኢዩ”። ቅድሚ ምውድኡ፥ ካብቲ ናይ ምግላጽ ኣበሃህላኡ ነቒለ፤ ”እዚ ሪፈረንዱም ኢዩ!” ክብል ተጸብየ ነበርኩ ። ኣይበላን !! ኣብ መልሓሱ ከምዝነበረት ግን ተሰሚዓትኒ (ትደልይኦሞ ይዝንግዓክን እንዲና እንብል) ድሒሩ ድማ፥ ነቲ ናይ ህዝቢ ኣቀባብላ፤ ”…ብፍኑው መገዲ መቆጻጸሪ ዝሰኣነ ናይ ሓቀኛ ስምዒት መግለጺ ተርእዮ….” ክብል ነቲ ዘይፍኑውን ኣብ ትሕቲ ቁጽጽሩ ዝነበረ ህዝብና፤ ነዛ ዕድል እዚኣ ንከካይድ ብምፍቃድ ነቲ ንሱ ዝደልዮ መልእኽቲ ኣመሓላለፈ።

ምስ ጎረባብትና ብሰላምን ምክብባርን ”ፍቕርን” ክንነብር ከም ኩሉ ኣህዛብ ድልየትና ከምዝኾነ ኣብ ቦትኡ እንከሎ፤ እዞም፥ ብፍላይ ኣርብዓታትን ሓምሳታትን ዓመታት ዝተቓለስና (እንኮላይ ኣብ ህዝባዊ ግንባር ዝነበሩ) እሞ ኣብ ምቅዋም እንርከብ፤ ከምኡውን እቶም ድሒሮም ነቲ ስርዓት ዝተረድእዎን፤ ኢሳያስ ዲሞክራስያዊ ስርዓት ተኺሉ ከሳትፈና ኢዩ ዝብል ኣተሓሓሳስባ እንተድኣ ሃልዩና፤ ንሓልም ኣለና ማለት ኢዩ። ነዚ ኩሉ ዝርዝር ገበናት ዘካየደ ሰብ፤ ግደፍዶ ካብ ሰብ: ብድምጺ ሃመማ ዝደሃል ክኸውን ባህርያዊ ኢዩ። ኢሳያስ ስልጣኑን ዕድሜኡን ክናዋሕ እንተኾይኑ፤ ብፍላይ ኣብ ከምዚ ሕጂ ተፈጢሩሉ ዘሎ ኩነታት፤ ንቕድሚት ገጹ ኢዩ ክሃድም፤ ምስኡ ድማ ንመዳምቕቱን ሃገረ ኤርትራን ለኪሙ ኢዩ ክኸይድ። ስለዚ ተቓወምቲ ኢና እንብል ኩላህና፥ ወይ ከምሓዲሽ ካብ ነፍሰፍትወትን ንኡሳን ፍልልያትን ናጻ ብምዃን ነፍስና ሰሪዕና መርሕነትና ነቑም። ነዚ ወይ ካልእ ዝሓሸ ኣማራጺ ረኺብና ተቓውሞና ከነደልድል እንተዘይክኢልና ግን ዘሎና ምርጫ (ፈቲና ጸሊእና) እቶም ኣምሓርኛ ዘይተመሃርና ከሎ ገና ንመሃሮ። ካብዚ ንላዕሊ ዝኸብድ መጠንቀቕታ ክህብ ዓቕሚ የብለይን። ብዘይካ ፖለቲካዊ ውድባት፡ ፋሕ ዝበለ ናይ ሰቪካዊ ማሕበራትን ናይ ውፉያት ውልቀሰባትን ጻዕርታት ክካየድ ከምዝጸንሐ ርኢና ኣለና፥ ሕጂ ዝድለ ዘሎ ናይ ኩሉ ናይ ሓባር ስራሕን ጥርናፈን ኢዩ፤ እታ ዘይተዓደገት ጤል ኣበይ ትተኣሰር ከም ዝበሃል ኮይና ከይትተርፍ።

ቅድሚ 20 ዓመታት ኣብ መንጐ ኤርትራን ኢትዮጵያን ዝተኻየደ ዘይተደላዪ ደማዊ ውግእ፡ “ስለምንታይ ተኻይዱ?” ዝብል ሕቶ ክሳብ ሕጂ ምሉእ ብምሉእ ከይበረሀ ጸኒሑ። ኣብዚ እዋንዚ ግና ብውሕዱ እቲ ቀንዲ ምኽንያት ንጉልባብ ዝቐረበ እምበር ጉዳይ ዶብን መሬትን ከምዘይነበረ ክበርህ ክኢሉ ኣሎ። እዚ ውግ እዚ ኣብ’ዚ ዝቀረባ ግዜ ኣብ ኣፍሪቃ ካብ ዝተኻየዱ ውግኣት እቲ ዝዓበየ ምንባሩ ብዙሓት ናይ ውግእን ሳዕቤናቱን ኣፍልጦ ዘለዎም ኣካላት ኣረጋጊጸምዎ እዮም። ናይ ሓደ ውግእ ግዝፈት ካብ ዝልከዓሉ መምዘንታት ሓደ ናይቲ ዘውርዶ ጉድኣት ዕምቆትን ስፍሓትን እዩ። እዚ ውግእ እዚ ኣዝዩ ከቢድን ኣኽሳርን ምንባሩ ንሕና ኤርትራውያን ኣካሉ ስለ ዝነበርና ምርምር ንጽበየሉ ኣይኮነን።

ብሰንክ’ዚ ብዙሓት ወገናት ተዓዘብቲ “ኣድላይ ዘይነበረ” ዝበልዎ ውግእ፡ እቲ ካልእ ገዲፍካ በቲ እዉጅ ኣገባብ ከም ዝተሓበረ፡ ብወገን ኤርትራ ጥራይ 19 ሺሕ መንእሰያት ተሰዊኦም። ብዙሓት ህጻናት ዘኽቲሞም፡ ኣሸሓት ሰንኪሎም፡ ኣሸሓት ኤርትራውያን ኣብ ውሽጢ ሃገርን ወጻእን ተመዛቢሎም። ማእለያ ዘየብሉ ንብረቶም ባኺኑ፡ ነዚ ደማዊ ውግእ ንምክያድ ኣብ ካልእ ልምዓታዊ ስረሓት ክውዕል ዝግበኦ ዝነበረ ገንዘብን ንብረት በሪሱ፡ ዳርጋ ርብዒ ስፍሓት መሬት ኤርትራ ኣብ ትሕቲ ዘይኤርትራዊ ሓይሊ ወዲቑ ኩሉ ምስኡ ተተሓሒዙ ዝመጽእ ክሳራታት ወሪዱ። ሕጂ’ውን ”ናይዚ ክሳራ’ዚ በሰላ ኣብ መነብባሮ ህዝቢ ኤርትራ ይረአ ኣሎ።

ድሕሪዚ ኩሉ ክሳራን ዘየድሊ ግዜ ምብላዕን ከኣ ጉዳይ ኤርትራን ኢትዮጵያን እነሆ፡ ናብቲ ቅድሚዚ ኩሉ ክሳራ ምውራዱ ክግበር ዝግበኦ ዝነበረ ናይ ምቅርራብ ምዕራፍ ተበጺሑ። መራሒ ህግደፍ “እዚ ንዘይተርፍ ደኣ ስለምንታይ እዚ ኩሉ ናይ ግዜ፡ ህይወትን ንብረት ክሳራ ምውራድ ኣድልዩ?” ዝብል ሕቶ እንተዝቐርቦ ካብ ምጉብዕባዕ ሓሊፉ ዝድህሰስ መልሲ ኣይመነበሮን። እቲ ኣዝዩ ዘገርም ከኣ ነዚ ኩሉ ዝተዘርዘረ ክሳራ ዘንጊዑ ኣብ ኣስመራ ምስ ቀዳማይ ሚኒስተር ኢትዮጵያ ዶ/ር ኣብይ ኣሕመድ ዓሊ ከኽመስምስ እንከሎ፡ ብዘይሕፍረት ኣግሂዱ ኣብዚ ዝሓለፈ ውግእ “ኣይከሰርናን” ኢሉ። እዚ ኣበሃህላ ኣዝዩ ዘስደምም ኮይኑ፡ “ዒራ ዘይስንኻ ሑጻ ቆርጥመሉ” ካብ ምባል ሓሊፍካ ካልእ ዝበሃሎ ኣይኮነን።

ኣቶ ኢሳይያስ “ኣይከሰርናን” ዝበለ፡ ኣብ ቅድሚ እተን ደቀን፡ ኣሕዋተንን ሰብኡተንን ዘውፈያ ናይ ጸጉረን ዘይኮነ ናይ ልበን ድርምም ዘይተፈትሐ ኣደታት፡ ንብረቶም ከንቱ ዝጠፈአ ዜጋታትን ግዜኦም ዝባኸነ መንእስያትን ምዃኑስ እምበርዶ ይርደኦ እዩ። እቲ ኣከስርናን ዝብል ዘሎ እንታይ ምስዚ ኣቐድሙ ዝተጠቕሰ ክሳራ ክወዳደር እንከሎ እንታይ መኽሰብ ዝበሃል ስለ ዘመዝገበ እዩ ”ኣይከሰርናን” ዝበለ። እቲ ምስ ዶ/ር ኣብይን ዝመርሓ ኢትዮጵያ ዝምድና ምፍጣር እንተኾይኑ፡ ዘይንሱ ባዕሉ ዘሪግዎ እምበር፡ ድሕሪ ውድቀት ስርዓት ደርጊ ኣብ ዝነበረ ሸውዓተ ዓመታትስ ዝነበረ ኩነታትዶ ኣይኮነን። ዝነበረ ሰላም ዘሪግካ ደሓር ኮለል ኢልካ ናብቲ ዝነበርካዮ ምምላስከ ምኽሰብን ውሕልነትን ዘብል ድዩ።

እዚ “ኣይከሰርናን” ዝብል ኣበሃህላ ነተን ብመስዋእቲ ደቀን መዓንጠአን ዝሓረረ ኣዴታት ኤርትራ ከምዘይውክል ፍሉጥ እዩ። እንተኾነ ስርዓት ኢሳይያስ ኣብዛ ጉዳይ እዚኣ ጥራይ ዘይኮነ፡ ኣብ ኩሉ ተግባራቱ ንህዝቢ ዝውክል ሓድሽ ኣየምጸአን። ብርገጽ ስዉኣት ዝተሰውእሉ ኣገባብ ቅኑዕ ይኹን ግጉይ ኣይምለሱን እዮም። መስዋእቶም ግና ግቡእ ክብሪ ክወሃቦ ይግባእ’ሞ ኒሳይያስ ከም ልማዱ ዘንጊዕዎም ኢልካዮ ምሕላፍውን ሓደ ጉዳይ እዩ። ናይቶም ኣሸሓት መስዋእቲ ክሳብ ክንድዚ ተናዒቑ ኣብ ውግእ ኤርትራን ኢትዮጵያን “ኣይከሰርናን” ምባል ግና ሸለል ክትብሎ እንተደለኻ ሸለል ዘይበሃል ብደዐ ካብ ምዃኑ ሓሊፉ ካልእ ክኸውን ኣይክእልን እዩ። መራሒ ህግደፍ እንተተበደዐ ንወልድቲ እቶም ሰማእታት ከም ነብሱ ወሲዱ፡ “ኣይከሰርናን” ኢለ ከእምን እየ ኢሉ ምምዳሩ ዘገርም እዩ። ከምዚ ስለ ዝኾነ እዮም ከኣ ነቲ ኣበሃህላ ናይ ስኽራን እንተዘይኮይኑ ናይ ጥዕና ክኸውን ኣይክእልን እዩ ዝብልዎ ዘለዉ።

ከምቲ “ከም ኣሕዋት ተፋቐር፡ ከም ጓና ከኣ ተሓሳሰብ” ዝበሃል፡ ብሓፈሻ ህዝቢ ከተማ ኣስመራ ብፍላይ ከኣ ኣዴታት ኣብ ኣቀባብላ ቀዳማይ ሚኒስተር ኢትዮጵያ ዘርኣይዎ ተሳትፎ ናይ ሰላምን ዓው ኢልካ ምዝራብን ጽምኣቶም ዝምስክር ኮይኑ፡ ነቲ ትርጉም ንዘየብሉን ብውልቃዊ ህልኽ ዝተላዕጠጠን ውግእ ዘካየደ ህግደፍን መራሒኡን ናይ ግድን ክተሓሳሰቦ ኣለዎ። ከምኡ እንተዘይገይሩ ግና እቲ ዝሓለፈ ግጉይ ተመኩሮ ትምህርቲ ስለ ዘይተወስደሉን ንኢሳይያስ ሕራይ ገበርካ ዝብል መልእኽቲ ስለ ዘመሓላልፍን ኣብ ቅድሚ ሰማእታት እውን ዘሕትት እዩ። ኢሳይያስ ካልእ እንተ ተረፈ ናይቶም ሰማእታት መስዋእቲ “ክሳራ እዩ” ምባል ስለምንታይ ከም ዝጸገሞ ዘገርም እዩ። ዘይሩ ዘይሩ ናይዚ ኣበሃህላ ቀንዲ ዕላማ ድሕሪ ከሲርና ምባል ናይቲ ክሳራ ተሓታቲ ምዃን ስለ ዘኸትል ካብዚ ንምህዳብ ጠኒኑ ዝኣተዎ ክሕደት እዩ።

ፈስቲቫል ፍራንክፎርት 2018፡ ኣብ ዞና ቀርኒ ኣፍሪቃ ብሓፈሻ ንህዝቢ ኣብ ምፍላስ ዝጸንሓ ሓይልታት ናይ ዕርቅን ሰላምን ተበግሶታት ክወስዱ፣ ኣብ ጉዳይ ኢትዮ-ኤርትራ ዝጸንሐ ኣይውግእ ኣይሰላም ኲነታት ድማ ብፍላይ ንረብሐ ህዝብን ሃገርን ኤርትራ ዳኣ ይግበሮ እምበር፡ ህጸት ዘሰነዮን ሓድሽን ሞብልናታት ኣብ ዝራኣየሉ ዘሎ እዋን እዩ ካብ ዕለት 03 – 05 ነሓሰ 2018 ክካየድ ኣብ ምድላው ዘሎ። እቲ ጉዕዞ ነቲ ብጸሓይ ባድመ ምሒሉ ዝገዘተን ቅድሚ ዶብ ምሕንጻጽ ዘበት ምዝታይ ዝብል ዝነበረ መድሓኒ ቆርበት ስልጣኑ ገይሩ ክወስዶ ይኽእል ይኸውን፡ ኣብ ህዝብናን ተቓለስቲ ሓይልታቱን ግን፣ ብዙሕ ምጥርጣራት ዘልዕል ብምዃኑ፡ ልኡላውነት ሃገርና ዝዕቅብን፡ መሰላት ህዝብና ዘረጋግጽን መስመር ንምውሓስ ተቓላሳይ ህዝቢ ክድቅሰሉ ዘለዎ ኣይኮነን። ምኽንያቱ ጉጅለ ህግደፍ ዶብ ሃገርናን መሬትናን ዘድፈረን ኣሕሊፉ ዝሃበን ሓደን ንሱን ጥራሕ እዩ።

ስለዚ ተቓወምቲ ፖለቲካዊ ሓይልታት፡ በርጌሳውያን ማሕበራትን ምንቅስቓሳትን፡ ኣገደስቲ ውልቀ-ሰባትን ኮታስ መላእ ናይ ለውጢ ኣካላት፣ ካብዚ ተፈጢሩ ዘሎ ስምዒታዊ ከቢድ ደበና ንደመር፣ ህዝቢ ቅኑዕ መንገዲ ንምትሓዝ፣ ኩሉ ገዲፉ ልዕሊ ዝኮነ ይኹን ግዜ ክብገሰሉን ሓቢሩ ክምክተሉን ዘለዎ ዕድል ሕጂውን ከምልጦ የብሉን።

በዚ መሰረት፡ ኣሰናዳኢት ሽማግለ ፈስቲቫል ፍራንክፎርት 2018፣ ንህልዊ ኵነታት ብዝገጥም ኣገባብን ዕላማን ክስራዕ፡ ተሳተፍቲ ፈስቲቫል ሓሳባቶም ዘዋሃህድሉን ሓባራዊ ናይ ግጥምያ መስርሕ ዝፈጥርሉን መኣዲ ክኸውን ኩሉ ዝካኣላ ጻዕርታት ኣብ ምክያድ ትርከብ ኣላ። ኣብ ከባቢኣ ንዝርከቡ ተወከልቲ ውድባትን ምንቅስቃሳትን ህዝባዊ ምልዕዓላትን ዕድመታታ ዘርጊሓ፡ ዝተዘንግዐ እንተነይሩ እውን ኣስዒባ ብምልኣኽ ኣጠናቒቓ ምህላዋ ተረጋጊጹ ኣሎ።

ብሸነኽ ዕድመኛታት እንተኮነ እውን፡ ኣገዳስነት ናይቲ መድረኽ ተገንዚቦም ብኣግኡ፣ ኣብ ፈስቲቫል ፍራንክፎርት 2018 ክሳተፉ ምዃኖም ዘፍለጡን ዘቕርብዎ መግለጺ ምህላዉን ብጽሑፍ ዝሓበሩ ምህላዎም ኣቦ-መንበር ኣሰናዳኢት ሽማግለ ሓው ተስፋማርያም ሓቢሩ ኣሎ። ሰውራዊ ዲመክራስያዊ ግንባር ኤርትራን፡ ሰልፊ ዲሞክራሲ ኤርትራን፡ ኣወንታዊ መልስታቶም ካብ ዘቐደሙ ውድባት ክኮኑ እንከለዉ፡ ግንባር ሃገራዊ ድሕነት ኤርትራ እውን፡ “ነቲ ዘለና ናይ ቃልሲ ዝምድና ንምዕዛዝ ላዕለዋይ ሉኡኽና ኣብ ፈስቲቫልኩም ክንርከብ ምዃኑ ክንሕብረኩም ደስ ይብለና” ክብሉ ኣወንታዊ መልሲ ኣቅሪቦም ምህላዎም ተሓቢሩ።

ብዘይካዚ ሓድንት  ኤርትርውያን ንፍትሒ፡ ቀንድን ሓያልን መበገሲኦም ኣብ እስራኤ ዘሎ መንእሰይ ኮይኑ፡ ብፍሉጥ ኲነታት ሃገርና ግን መንእሰይ ኤርትራ ዘይተብተኖ ሃገር ኮነ ክፍለ-ዓለም ስለዘየለ፡ ኣባል መሪሕነትን ናይ ወጻኢ ጉዳያት ሓላፍን ምንቅስቃስ መንእሰያት ንፍትሒ ሓው ኣቤል ሃይለ ካብ ኖርወይ፣ ኣነውን ኣብ ፈስቲቫል ፍራንክፎርት ተረኺበ ንመንእሰያትና ዝኸውን መልእኽቲ ኣለኒ ይብል ብምህላዉ፡ ፈስቲቫል 2018 ተወሳኺ ድምቀት ክትረክብ እያ።

እዚ ጥራሕ መኣስ ኮይኑ፡ ንሕና ቀደም ተቓለስቲ ሕጂውን ተቓለስቲ ኣብ ሃገርና ፍትሕን ርትዕን ክሳብ ዝረጋገጽ ድማ ክንቃለስ ስለዝኮና፡ ከም ሃገራውያን፡ ኣባላት ደምበ ተቓውሞ ዝገብርዎ ውራይ፣ ናትና ኢዩ ኢልና ስለእንኣምን፡ ኣብ ፈስቲቫል ፍራንክፎርት 2018 ድማ እጃምና ከነበርክት ድሉዋት ኣለና ካብ ዝበሉ ስነ-ጥበበኛታት ሓው ኢዮብ ሃይለን፡ ኣሕመድ (ሓማዳ) እብራሂምን ካብ ጀርመን፡ ዓሊቶን ተስፋይ ጀንትሊን ሙዚቐኛታትን ድማ ካብ ስዊዘርላንድ ክሳተፉ ምዃኖም ተረጋጊጹ ኣሎ። ልቦና ስነ-ጥበበኛታትና ድማ ኩሉ ተቓላሳይ ክስዕቦን ክብገሰሉን ትስፉዋት ኢና ጥራሕ ዘይኮነስ፡ ኩልና ክንስዕቦ ዘለና ኣወንታዊ ባህሊ ምዃኑ ምግንዛብ ኣገዳሲ እዩ።

ካብዞም ኣርባዕተ ሓደ። ሓው ሓማዳ ኣብራሂም ካብ ዝልለየሉ ስነ-ጥበብ ድማ፡ ወኒ ናይ ቃልሲ ዘበራብር መድረኻዊ ግጥምታቱን ንባቡን ምስ ምቅርራብ መድረኽን ምዃኑ ተሳታፊ ፈስቲቫላት ተጋድሎ ሓርነት ኤርትራ - ሰውርዊ ባይቶ ካብ ዝምስክሮ ሓቕታት ምዃኑ ከይዘከርካ ዝሕለፍ ኣይኮነን።

ንሎሚ ዜና ፈስቲቫል 2018 ኣብዚ ወዲእና ኣለና፡ ዝስዕብ መደባትናን ሓበሬታ ፈስቲቫል ፍራንክፎርት 2018 ድማ ኣብ ዝመጽእ ከነካታትለኩም እያ።

ርክብና ኣብ ፈስቲቫል ፍራንክፎርት 2018 ይኹን።