-
font size
decrease font size
increase font size
ሓይሳም ዎ ሓይሳት ዮም ሓላይ ምን ምድር ትግራዪት እክል ኣስማዓኩም ቱ ። ቀደም ኩሉ ለሰብ ለልትሓለ ምን ቱ ምን እንብል ፣ ሰብ ሸየም ዎ ፋርሶታት ቶም ። ለሔልየት ሄየ ላኣስባብ ለእቡ ሓሉ ብዙሕ ቱ ። ገለ ምኖም እግል መናበረቶም ክምሰል ሽቅል እንደ ዎደዎ ለሓሉ ። ከክምሰል ሓለው ምና ለተሓሎው ሰብ ህያብ ልትሄየቦ ዐለው ፣ በህለት ወኤት ፣ ፍሊት ፣ ጀዲድ ፣ ወዘተ ልትሄየቦ ዓለው። ገለ ገለ ሔልየት ህየ እግል ኖሶም እግል ልትራዩሕ ለሓሉ ዐለው ። ለሰብ ቃድም ፣ መገዲት ወዱ ወእት ስምጡ ልትገሰው ወለእዋን ለሕላይ ለለኣምር እንዶ ራምቃዎ ማ፣እብ ናሱ ሓሌ እሎም ። ዎ ክምሰልሁማ ላሊ እት ክዋና ኣሓሆም ዎ ግርሆም እት ላዐቅቦ እት ለሓሉ ልትመየው ዐለው ።ላሊማ ግናዘት እት ለዐቅቦ ዎ እት ንጻፍ ሓሉ ልትመየው ዐለው ። ወክድ ቁዱም ኣዳም ከትብ ሰበት ኢዐላ ፤ እብ ሕላይ እንደ ወደው ለልኡኽ ላባጽሕዎ ዓለው ። እብ ሰበት ኢሊ ክእና ልብሎ ።
ሕና ሕላይ ቱ መልሀይና ፣ ለሕና ወህት ቱ ንትጋሜ
ሕዱግ እልና ቱ ዲብ ዐድና ፣ መለሀይ ልእሉ ንትፋኔ
ምን ግድዐት ተሌና ፣ ውእት ኣስማጥና እንካሬ
እላ ናይ ዮም ሕላየት ገርማርያም ገብራይ ለልትበሄል መንሳዐይ እት ወክድ ቁዱም እብ ዘመን ራእሲ ኣሉላ እግል ከንተባይ ነጋሲ ወድ ህብተስ ለሓላያ ታ። ቃደም ለሕላዪት ኣሰማዓኩም ላኣስባብ ለእቡ ተሓለት እግል እዳግም እልኩም ።
ራእሲ ኣሉላ እብ ሓጸይ ዮሓንስ ራእሲ እንዶ ትሻያማ እብ 1876 ዲብ ሓማሴን ማፃኣ ። ዎ እግል ኩሉ ለዐዶታት እግል ልገብሮ እግሉ ንዳእ ዋዳ ። ዎ እታ ምዕል ለሃ ነጋሲ ዎ ኣሚር እብ ጋሪት ኖሶም እት ሓማሴን ፀንሓው ። ሓቆ ለንዳእ ሰምዐው ሀየ እግል ራእሲ ገሰው እቱ ዎ ትዋጀሆዎ ። ዎ ሓር ዐድ ዐቅበሎው ዎ እብ ስም ከንተባይ እምነት ክልኤ ወኤት እንዶ ነስኤው ዐቅበሎው እቱ ።ራእሲ ሀየ እግል ክልኢቶም ቀቃሚሾም ሀበዮም ። ህቶም ላታ ዐዶም ክምደነው ኣሚር ለቀሚሹ እግል ተስፈንኬል ወድ ሑሁ ሀበዪ ዎ ነጋሲማ ለናዪ እግል ብእምነት ሑ ኣቡሁ ሀበዩ ። እግልሚ ብእምነት ከንተባይ ዐላ ዎ ተስፋንኬል ውድ ኣፋታይ መሰለስ ለሺመት ዐላት እግሉ ። ራእሲ እግልሚ ቃማይሽ ሀበዮም እሙር ኢኮን ። ከንተባይ ብእምነት እብ ራእሲ ወልደንኬል ወድ ሰሎሞን እንዶ ሻያማ ዐድ ሓክም ዎ ስራዕ ዐላ ።
ክምሰላ እቤሎ ለዘመን ራእሲ ኣሉላ ለሓክም እቱ ለዐላ ቱ ፣ክገድም ምእት ዎ ሕምሳ (150)ሰነት ቓርብ ። እታ ወኪድ ለህይ ሓተ ዶል ከንተባይ ብእምነት ዲብ ቃብር ክንተባይ ሓሰን ናይ ሓባብ ጋይስ እት እንቱ ፣ ነጋሲ ወድ ህብቴስ ዎ ኣሚር ወድ ደሲት ዲብ ራእሲ ኣሉላ ዐድ ተክላይ ፍግረው። ከእግል ራእሲ ኣሉላ ነጋሲ ሽመት ሀበኒ ቤሎ ። ራእሲ ኣሉላ ሄየ ፣ ሰኒ ቤላ ክእግል ነጋሲ ወድ ህብቲስ ክንትብና ሀበዪ ። ብእምነት ወድ ቴድሮስ ሄየ ምን ቃብር ዓድ ከም ዓቅባላ ፣ ሰብ ላዐድ ነጋሲ ወድ ህብቴስ ሽማትካ እግል ልንሳእ ዲብ ራእሲ ፋግራ በሎዎ ። ህቱ ሄየ ኣናማ ዲብ ራእሲ እግልሚ ይእፈግር እንደ ቤላ ህቱማ ብእምነት ዲብ ራእሲ ዐድ ተክላይ ፈግራ ። ራእሲ ኣሉላ እግል ብእምናት ከበተዩ ዲብ ዐድ ተክላይ ዎ ሓተ ሰነት ኤስሮዩ ። ዎ ሓቆ ሓተ ሰነት ባቃል ዎ ቓሪ እንድ ሃባ ፣ እት ዐድካ ክምሰል ገበራይ እንዶ ካእካ ንበር ቤሎ ከሳራሓዪ።
ነጋሲ ወድ ህብቴስ እግል ራእስ ኣሉላ ሚ እንደ ቤሎ ቱ ለሺማት እግል ልንሳእ ቃድራ እሙር ኢኮን ። እግልሚ ከንተባይ ቴድሮስ እብ ናይብ ሓሰን ክም ታኣሳራ ፣ብምእነት ምን ራእሲ ወልደንከኤል ወድ ሰሎምን ክንቱብ ዐላ ፣ ከንተባይ ነጋሲ ቀደም ክንትብና ዎ ሓቆ ክንትብናሁ 6 ወኪድ ለገቢእ ምስል ራእሲ ዲብ ዐድ ተክላይ ሩኩብ ቱ ።
ላጋኣ ምን ገቢእ ከንተባይ ብእምነት ፣ ክምላ ራእሲ ኣሉላ ለቤሎ ኢ ዋዳኒ ።ዲብ ገለብ ሓጋይ እንዶ ሓላፋ ፣ ኣይረዐት ለተለዮ ምን ዐድ ገብሬስ ዎ ምን ዐድ ዐይላይ እንዶ ነስኣ ፣ ዲብ ምድር ዐድ ትማርያም ጋዐዛ ። ደኣም ዲብ ለዐድ ለታርፈት መንሳዕ እግል ዐድ ትማርያም ሓቆ “ እናስ ዐለወኛ ንጉስ ምን ትትከበቶ ኖስኩም ተኣምሮ ‘ ምን ቴሎም ኢትከበተዎ ። ለዶል ብእምነት ምስል ጻሩ ኣውቃጽ እት ለልትበሀል ምድር ቤት- ዐውቀ ዔራ ። ዎ ምን እላ ኣካን ከራዪሁ ምስል ገለ ዳውረት ክል ኣካን እንዶ ገኣት እግል ቤት ኣብርሄ እት ቤልታ እት እንታ ዛምታያ ። ክልኦት እናስ ሓከሮው ዎ ዎሮ ቃትለው ፣ እግላ ኑዋይ ሰሩ ቃተሎዎ ዎ ሰሩ ዘምተዎ ከሰከው ። ቤት ኣብርሄ እንደይ ፈርሄት እግላ ዘምተት እት ስሚጥ ስጋደት ሽግርድባ ማሓዝ ዓንሳባ ዓሮው እባ ፣ ዎ ሕራበት ወደው ዎ ሰልፍ ኣዛዚ ወድ ህብቴስ ሑሁ እግል ከንተባይ ነጋሲ ምና ካራዪ ኦሮት ቃትላ ዎ ሓር እግል ልድገም እት ልብል ለካራዪ እብ ለክፍ እመን ቃትሎዎ ። ሓቆሃ ላካርዪ ብእምነት እባ ላራሰቶ ገሰት ። ከንተባይ ነጋሲ እግል ኣዛዚ ሑሁ እታ ኣካን እግል ልቅቦሮ ምን ሓዞው ከልኤዮም ። ለግናዘት ሑሁ ዳማ እት ልቃጥር እንዶ ናስኣ እት ቤልታ ቃብረዪ ። እሊ በኤስ እት ምግብ ክልኦት ሓው ዐድ ገብሬስ ቱ ለገቢእ ዐላ
ሓቆ እሊ ከንተባይ ነጋሲ ውድ ህብቴስ ፣ ማርባት ሑሁ እግል ላቅሳን ስካብ ኢራክባ። ቁሩብ እንዶ ጸንሓ ዲብ ራእሲ ዓድ ተክላይ ገሳ ። ከእግል ራእሲ ኣሉላ ዓስከር ሃበኒ ቤሎ ፣ ኩሉ ለዝሙት እግልካ ቱ ዎ ኣና ማርባት ሑየ ኣግል ዓቅስን ቱ ቤሎ ። ራእሲ ኣሉላ ሄየ እብ ዝምት ሰበት ነብር ለዐላ ሰኒ ቤሎ ። ዎ ዓስከር ሀበዪ ። ከንተባይ ነጋሲ ዓስከሩ ናስኣ ዎ ኩሉ ለዓዶታ እብ ቀትለት ሑሁ ለሓማዩ ጂን ኣፍጋራ ምኑ ። ብዙሕ ንዋይ ዎ ኣዳም ኣብዳ ልትበሄል ። ለሕላየት ኖሳ ለሳጃዓት ዎ ላ ሓጣራት ናይ ከንተባይ ነጋሲ ተኣሽር እልኩም ።
ገረማርያም ውድ ገብራይ እግል ከንተባይ ነጋሲ ክእና እት ልብል ሓለዪ ፡
ገለ ተኣምሪ ብካዩ ፤ ወለት ሀዋ መምባኪ
ሓምዴሁ ክት ሚ ተኣምሪ ፣ ምን ልትነደቅ ለጎይላኪ
ዐስር ክልኣት ቱ ለኣልባቡ ፤ እት ሰይጣቱ ለላጥዕ
ህቶም ቶም ለእቦም ልትገዐዝ ፣ ከጊጉይ ኢኮን ወናሲ
ለዳራት ከደን ኣብጻሓዩ ፣ ከኢትርካባ እብ ሓዚ
ፈጂር ፈጂር ዐድ ተክላይ ፣ ገበይ ሓሊቡ ታ ለሃዲ
ለደብር ጋድም በልሰዪ ፣ ጣርቃ ዲቡ መናግእ
ለልገት እንዶ ሼሽያ ፣ ካየደዋ ክም ባጽዕ
ዲብ ሚ ቱ እሊ መናሳቅ ፣ ለኣግዋፍ ሳብክ ቱ ወሓጊ
በኪት ፋዳ ዕዳዪ ፣ ሓቆ ሞታ ኣዛዚ
እግል ኣዛን ግሄና ፣ ለእሉ ጣልቅ ነጋሲ
ነሓምዮ ሓደምበስ ፣ ምን ኣቡሁ ኢናስእ
እብ ግሳዩ ልጻገም ፤ ባርጅ ኢኮን ወሓሲ
ሜስ ታ ከብድ ከንቴባይ ፣ ጽረይ ኢኮን ወስልቃ
በሓር ታ ከብድ ከንቴባይ ፣ መሓምሳይ ከኣፎ ቃውሳ
ሸር ላሃባ ልክልኣና ፣ ትልዔ ቤተት ከብድካ
ሓቆ ጻላም ወኣዛዚ ፣ እብ ሚ ትበርድ ነፍስካ
ሓቆ ፈጂር ሽግርድብ ፣ ውሉድ ሚ ቡ ምስልካ
ኣድግ ወከራይ ቱ ጋብኣኩም ፤ ቤት ኣቡካ ወእንታ
ኣምዕል ምስሎም ትትሃጌ ፣ ላሊዲ በና ታ ከብድካ
ጋር ለሞታ ኣለብካ ፣ ለገናይዞታት ላድዳ
ጋር ለገዐዛ ኣላብካ ፣ ለፈጀር ፈጂር ተሓንፍሳ
ጋር ለዝሙት ኣላብካ ፣ ምንማ ለወራር ደግሳ
ቅርቢት እት እንታ ለሬመት ፣ ገያድ ሚ ቡ በልሳ
ጽሪት እንታ ለደዐከት ፣ ጽሙእ እንታ ተሓልፋ
መሰል ለበሀለት ዕምዴናይ ታ ፣ ክብድት ለቀላል ሽፍጋ ።
ላዐቅም ናይ ላ ሔልያይ ዎ ጣዐም ናይላ ሕላየት እግል ተኣምሮ ደፋእ እትብሎ ኣንቡቦ።
ኣሳሱ ምን ኩቱብ ካርል ጉስታቨ ቱ ላትራካባ ቱ ።
ክብሮም ግረነት ።
9/25/2015
