ፈስቲቫል/ሰፊሕ በዓል ኤርትራ 2017 ፍራንክፎርት

ብኤርትራዊ ዲሞክራስያዊ ማሕበር ኣብ ጀርመንን ጨናፍር ሰልፊ ዲሞክራሲ ህዝቢ ኤርትራ ኣብ ኤውሮጳን ዝዳሎ ፈስቲቫል/ሰፊሕ በዓል ኤርትራ 2017 ምስንዳኣት ጀሚሩ። ሰፊሕ በዓል ኤርትራ 2017 ኣብ ከተማ ፍራንክፎርት ሃገረ ጀርመን እዩ፡ ኣብ ወርሒ ነሓሰ ካብ ዕለት 04 - 06.2017 ዘሎ ግዜ ንኽካየድ፡ ድሮ ኣሳናዳኢት ሽማገለ በዓል ተመዚዛ ስራሓታ ጀሚራ ዘላ። እዚ ታሪኻዊ ሰፊሕ በዓልዚ፡ ጀርመናውያን ፖለቲከኛታትን መራሕቲ ተቓወምቲ ውድባት ኤርትራን በርጌሳውያን ማሕበራቱን ምስ ተሳታፊ በዓል ዝኾነ ህዝቢ ኣራኺቡ፡ ዓውደ ልዝብን ሕድሕዳዊ ናይ ሓሳባት ምርድዳኣን ምልውዋጥን ዝፈጥር መኣዲ እዩ።

ስለዚ ድማ፡ ኩሎም ኤርትራውያን ፍትሕን ዲሞክራስያዊ ምሕደራን ኣብ ኤርትራ ንምርግጋጽ ዝጽዕቱ ኣካላት ኣብዚ ካብ ዕለት 04 ክሳብ 06 ነሓሰ 2017 ዝውዕል ሰፊሕ በዓል ኤርትራ ንኽሳተፉ ብኽብሪ ንዕድም። ኣሳናዳኢት ሽማግለ ሰፊሕ በዓል ኤርትራ ነዚ ዕድመ'ዚ ከቕርብ እንከሎ፡ ናይ ምድላው ሓላፍነት ከምዝወሰደ የመልክት ምህላዉ እንተዘይኰይኑ፡ ጉዳይ ሃገርን ህዝብን ኤርትራ ንኩልና ውጹዓት ዜጋታት ብፍላይ፡ ንሰላምን ዕብየትን ዝሓልሙን ዝተግሁን መሓዙት ህዝብናን ዝምልከት እምበር፡ ዝኾነ ይኹን ሓለፋታት ስለዘለዎ ኣይኰነን። በዚ ኸኣ፡ ነቲ ጉዳይ ካብ ናተይ ናትካ ወጺና፡ ኣብ ቀንዲ ዕላማ ቃልሲ ህዝቢ ረጊጽና፡ ብዙሕነት ውዳቤታትናን ብዘየገድስ ንሓባራዊ ዓወት ሰፊሕ በዓል ብሓላፍነት ክንብገስ ብኽብሪ ነዘኻኽር።

 መደባት ሰፊሕ በዓል/ፈስቲቫል 2017ን ዝካየደሉ ቦታን ኣብዝስዕብ ክሕበር እዩ።

ብሓባር ንቃለስ፣ ምልኪ ክድምሰስ!!!

ኣሳናዳኢት ሽማገለ ፈስቲቫል ፍራክፎርት 2017

               12.02.2017

ተጋዳላይ ዓብዱ ዑመር፡ ብዝነበሮ ሕዱር ሕማም ንነዊሕ እዋን ክሳቐ ድሕሪ ምጽናሕ፡ ብሰንበት ዕለት 12 ለካቲት 2017 ኣብ ከተማ ሙንስተር (ጀርመን) ተሰዊኡ። ሰልፊ ዲሞክራሲ ህዝቢ ኤርትራ፡ ንስውእ ዓብዱ ዑመር መንግስተ-ሰማይ፡ ንስድራቤቱን ኵሎም መቃልስቱን ድማ፡ እግዚኣብሄር ጽንዓቱ ይሃቦም፡ ጠሉን ራሕሱን ድማ የውርደሎም እናበለ ናይ ሓዘኖም ተኻፋሊ ምዃኑ ይገልጽ።

ስውእ ተጋዳላይ ዓብዱ ዑመር ብ1975 ዓ.ም ኢዩ ናብ ተሓኤ ተሰሊፉ። ድሕሪ ተሓኤ ናብ መሬት ሱዳን ምእታዋ ድማ ኣባል ተሓኤ ሰውራዊ ባይቶ ኰይኑ ተቓሊሱ። ተጋዳላይ ዓብዱ ኣቦ ሰለስተ ቆልዑ ኢዩ።

መንግስተኣብ ኣስመሮም

ኣቦ መንበር ሰዲህኤ

ኣብቲ ናብ ምኒስትሪ ወጻኢ ጉዳይ ጀርመንን  ማሕበራዊ ደሞክራሲያዊ ሰልፍን ዝለኣኾ ናይ ምሕዝነት መልእኽቲ፡ ሰልፊ ዲሞክራሲ ህዝቢ ኤርትራ፡ ንምክትል ቻንስለርን ናይ ወጻኢ ጉዳይ ሚኒስተርነት ሓላፍነት ሒዞም ዘለዉ ዚግማር ገብሪልን ንኣቶ ማርቲን ሽሉዝ ናይ ቅድም ፕረሲደንት ፓርላማ ሕብረት ኤውሮጳን ኣብ ናይ 2017 ናይ ቻንስለር ምርጫ  ሕጹይ ማደሰ ኮይኖም ቀሪቦም ንዘለዉን ኣብ ዝለኣኾ መልእኽቲ  ልባዊ ዓወት ተመንዩ።

ሰዲህኤ ኣብዚ ብ10 ለካቲት 2017 ዝሰደዶ መልእኽቲ ናብቶም ሓድሽ ጀርመናዊ ሚኒስተር ወጻኢ ጉዳይ፡ ብኣኦም ኣቢሉ ድማ ናብ ፈደራላዊ መንግስቲ ጀርመን፣ ንጉዳይ ኤርትራ ግቡእ ኣቓልቦ ክገብርሉን ኣብ ኤርትራ ዘሎ ኣሻቓሊ ፖለቲካውን ሰብኣውን ጸገማት ክፍታሕ ክሕግዙ ምሕጽንታኡ ኣቕሪቡ።

ምስዚ ኣተሓሒዙ ሰልፊ ዲሞክራሲ ህዝቢ ኤርትራ፡ ነቲ ኣጋጣሚ ተጠቒሙ፡ ንኣቶሽሉዝ ሰናይ ትምኒቱ ጠቒሱ ብዙሓት ኤርትራ ዝመበቆሎም ጀርመናውያን መሓዙት ማሰደ  ከምቲ ልሙድ  ምስ ኣቶሽሉዝ  ክስለፉ ዘለዎ ተስፋ ገሊጹ።

ከምኡ እውን እቲ መዘክር ክልቲኦም ኣቶዚግማ ገብሪኤልን ክቡር ማርቲን ሽሉዝን ነቶም ኣቐዲሞም ናብ  ወጻኢ ጉዳይ ሚኒስትሪን ማእከላይ ቤት ጽሕፈት ማሰደ ዝተለእኩ ብዙሓት መዘክራት ከቕልብሎምን ኣብቶም ጉዳያት  ንለውጢ ይቃለሱ ንዘለዉ ኤርትራውያን ደሞክራሳውያን ሓይልታት ዘሕይሉ ስጉምታት ክወስዱን ኣዘኻኺሩ።  

ኣቶ ወልደየሱስ ዓማር ሓላፊ ቤት ጽሕፈት ናይ ወጻኢ ዝምድናታት ሰልፊ ዲሞክራሲ ህዝቢ ኤርትራ (ሰዲህኤ) ብኣቋጻራ በርሊን ካብ 11 ናብ 12 ለካቲት 2017 ኣብ ዘውግሕ ለይቲ ኣብ መስመር ሕድሪ ጀጋኑና ንልዕሊ 4 ሰዓታት ዝቐጸለ መግለጺ ኣቕሪቡ። ኣብዚ ርክብ ዘቕረቦ መጽናዕታዊ ጽሑፍ “ ግጉይ ኣጀማምራ ድሕሪ ነጻ ኤርትራ ናይ 1991፡ ንዘለናዮ ሃለዋት ከመይ ይጸልዎ"፡ ኣብ ትሕቲ ዝብል ኣርእስቲ’ዩ ነይሩ።

ኣቶ ወልደየሱስ ኣብቲ ዘቕረቦ መጽናዕቲ እቲ ኣብ 1991 ንሓይሊ መግዛእቲ ኣወጊዱ ስልጣን ዝጨበጠ ውድብ ህዝባዊ ግንባር ሓርነት ኤርትራ፡ ሓላፍነት ወሲዱን ኣርሒቑ ጠሚቱን ንኹሉ ኣብ ቃልሲ ምእንቲ ናጽነት ኤርትራ ግደን ህዝባዊ ጽልዋን ዝነበሮ ወገናት ዘሳትፍ መድረኽ ዘይምፍጣሩ ናይዚ ዘለናዮ ሃለዋት ጠንቂ ምዃኑ ብኣብነታት ኣሰንዩ ገሊጹ። ንሱ ኣተሓሒዙ እቲ ግንባር ድሕሪ ናጻነት ዝተኸተሎ ግጉይ ኣገባብ ሽዑ ዝጀመረ ዘይኮነ ቅድም እውን ዝነበረን ምእንቲ መስርሕ ናጽነት ከይዕንቀፍ ሸለል ኢልካ ክሕለፍ ዝጸንሐን ምዃኑ ኣብሪሁ።

ኣብቲ ብምዕራፋት ከፋፊሉ ዘቕረቦ መጽናዕታዊ ጽሑፍ፡ እቶ ወልደየሱስ ኤርትራውያን ተቓለስቲ ኣብ ክልቲኡ ውድባት ታሪኽ ዘይዝንገዖ ሓርበኝነት ከም ዝፈጸሙ  ጠቒሱ፡ ዓውት እንዳቐረበ ኣብ ዝመጸሉ ብዝዕባ ድሕሪ ናጽነት ክሕሰበሉ ይግባእ ከም ዝነበረ፡ ናይ ወጻኢ ተዓዘብቲ ከይተረፉ የጠንቅቕዩ ከም ዝነበሩ ሓቢሩ። ኣብ ዝሓለፈ ቃልስና ኣብ ውልቀሰብ ጥራይ ምእማን ሓደ ካብቲ ጸገማት ምንባሩን ሕጂ’ውን ጌና ኣብ ዲያስፖራ ይንጸባረቕ ከም ዘሎ’ውን ኣግሂዱ። ንናይ ሓደ ውድብ ዓቕሚ ብወተሃደራዊ መዳይ ጥራይ ምርኣዩ “ኣበይ ዝነበሩ እዮም” ኢልካ ምንእኣስን እውን ኣሉታዊ ምንባሩን ምዃኑን ኣስፊሩ። እዚ ሎሚ ኣብ ኤርትራ ዘሎ ኩነታት ከይመጽእ፡ ከም ሕብረት ኣፍሪቃን ሕቡራት ሃገራት ዝኣመሰሉ ዓበይቲ ትካላት ዘይምሕጋዞም’ውን ኣይሓበአን።

ብዙሓት ግዱሳት ኤርትራውያን ኣብ ውሽጥን ወጻእን ካብ 1991 ጀሚሮም ብዝተፈላለዩ ኣገባባትን መድረኻትን ናብቲ ኢሳያስ ዝመርሒ ሓይሊ ዓገብ ከም ዝበሉን ንሱ ግና ካብቲ ናይ “ውድባት ሓሸውየ” ዝብል ዘይሓላፍነታዊ መርገጹ ከምዘይተመልሰ ብምጥቃስ፡ ሰውራዊ ባይቶን ካልኦት ውድባትን ዝወሰድዎ ሓላፍነታዊ ስጉምትታት ዘርዚሩ። ዕላማ ናይቲ መጽናዕቲ ካብ ዝሓለፈ ክንመሃርን ድሕሪ ውድቀት ስርዓት ህግደፍ እውን ንከይድገምን ምዃኑ ዝገለጸ ነባር ተቓላሳይ ኣቶ ወልደየሱስ ካብቲ ቀንዲ ኣርእቲ ወጻኢ ንሰዲህኤ ኣብ ዝምልከት ይቐርቡ ንዝነብሩ ሕቶታት እውን መሊሱ።

ኣብ መወዳእታ እዚ ክሳብ 400 ዝኮና ኮምፒተራት ተሰሊፍሉ ዝነበረ፡ ናይ ሕቶን መልስን መድረኽ ተኸፊቱ ኣቶ ወልደየሱስ ግቡእ መልሲ ሂቢ እቲ ርክብ ክድምደም እንከሎ፡ ብዙሓት ተሳተፍቲ ኣብ ዝሃብዎ ርኢቶ፡ እቲ መግለጺ ንጹር እቲ ናይ ሕቶታት መልሲ ድማ ብሩህ ምንባሩ ብምሕባር ከምዚ ዓይነት ናይ ግሉጽነት ርክብ ብፍላይ እቲ መንእሰይ ወለዶ ክመሃረሉ ከም ዝኽእል ምስ ሰናይ ምስጋና ኣንጸባሪቖም።