እቲ ናይ ወትሩ ሓያል ባህገይ፣ ባህጊ ቀትሪ ካብ ምዃን ሓሊፉ፣ ኣብ ናይ ወትሩ ለይታዊ ሕል መይ ኣብ ምዃን እውን በረኸ። ካብ ባህጊ ናብ ሕልሚ ካብ በረኸ፣ ካብ ሕልሚውን ኣብ ሕዱር ሕማም ከይቅየር ንዝብል ስክፍታይን ሻቅሎተይ ድማ ሰማየ ሰማይ ኣዕረጎ። ክገርመኩምሲ! ካብ ለይትታት ሓንቲ ለይትስ፣ ከም ልዑል ረስኒ ኣህተፍተፈኒ ድኣ! እዋን ድቃስ ስለዝኣኸለ ጥራሕ ዘይኮነስ፣ ካብቲ ዘድክመንን፣ ዘሐልለንን ዘጨንቐንን ናይ ቀትሪ ዕማማተይን መደባተይን ተናጊፈ፣ ኣብታ ተገምሲሰ ሩፍታ ክረክብ ብምብሃግ፣ ኮበርታይ ተጎልቢበ፣ ከምወትሩ ናብ ዓራተይ ተደርበኹ። ካብ ቀዝሒ ኖርወይ ኣብ ውሻጠ ገዛይን ኣብ ውስጠ ውሽጢ ዓራተይን ተጎዝጒዘ ምስ ተዓቖብኩ ድማ፣ ከም ኣብ ሑቕፊ ኣዲኡ ዝማመቖ ሕጻን፣ ቀልጢፉ ከቢድ ድቃስ ወሰደኒ። ኣብ መንጎ በጥ ምባለይን ምድቃሰይን ዝነበረ ግዜ ብካሊኢት ዝቑጸር ኣምበር ደቂቕ እኳ ዝመልእ ኣይነበረን።ካብቲ ኣላሽ ዘብለኒ ናይ ጉልበትን ሓንጎልን ስርሓተይ በታ በጥታ ስለዝተናገፍኩን፣ ኣብቲ ማሙቕዓራት ኣካላተይ ናይ ዕርፍቲ ግዜ ኣስተማቐረ። ዕርፍቲ ሓንጎለይ ግን ኣይከምትጽቢተይን።

ሕልሚ ኣብ ህይወተይ ጋሻ ኣምርኳ ኣንተዘይኮነ፣ ብኡ ንብኡ ምስ ባህገይ ዝተኣሳሰርን ጭንቀት ዝበለሎ ሕልሚ ሓሊመ ክብህርርን ግን ናይ መጀምርያን ሃንደበታውን ነበረ።ነታ ንክርእያ ጥራሕ ዘይኮነስ ንኽውንናውን ኢለ፣ እኩል ምስተረፉ ዝኾነ ዝትመንን ዘይትመንን ዋጋ ዝኸፈልኩላ ኣስመራይ፣ ናይ ሕልሚ ናጽነተይ ተጎናጺፈ፣ ከም ልበይ ድኣ ካብ ጫፍ ናብ ጫፍ ዓንደርኩላ። ኮምብሽታቶ፣ ኣባ ሻውል፣ ጨርሒ፣ ዕዳጋ ሓሙስ፣ ገዛ ከኒሻ፣ እንዳ ማርያም፣ ሓዲሽ ዓዲ፣ ገዛባንዳ ጥልያን፣ ገዛባንዳ ሓበሻ፣ ቀሓውታ፣ ጎዳይፍ፣ ሰምበል፣ ቪላጆ፣ ፎርቶ፣ ኣኽርያ ማይተመናይ ,፣ ኩሉ። እንታይ እሞ ክብለኩም! ተፈራሪቑኒ ሕንቕንቕ በልኩ! ናይ ሓሶት ወረን ቤላበለውን ከይኮነኩም፣ ውቃበ ኣስመራና ተደዊኑ፣ እቲ ቀደም ምስ ግርማኣ እንከላ ለይትውን ከም ቀትሪ ዝነበረ ቀትሪውን ናብ ለይቲ ተቐዪሩ፣ ይዋእኩም እዩ፣ ከላእ ደኣ ትርኣዮ! እቲ ዝርካቡውን ኣብ ሓደ ቦታ ጥራሕ ተግጸንቂቁቑ ረኺበዮ። ኣብኣ፣ ኣብኣ ኣብታ ሓንቲ ሓደና! ትማሊ ናይ ገዛእቲ ሎሚ ናይ መለኽትን በጻሕትን ጎደና! ጎደና

ሓርነት ከኣባ ሰመይዋ! ብጀካ ስልጣን ምልኪ ዝሓዘን ባጠራን ወጅህን ወጻኢ ዝወነነን ወዲባት ምስ መበቆላዊ ወጅሁን ኳ ኢኻ ዘይትረኽበላ። ንሱእንዶ ግዳ ይትረፈና፣ ውቃበ ኣስመራናስ ብዓንተቡኡውን ብርሃጽና ስለዝመጸ፣ ሕጅውን ብጻዕርና ምተመልሰ። ዘጕህየንስ እባ እቲ ጽንቃቕ ኣውን ከየትረፈ በኒኑ ዝጠፍአ ኤርትራዊ መንፈስን ፍሕሽውታን፣ ክቡር ባህልታትን ነበረ። ኣብ ዝረገጽኩዎ ኑቕጣ ጎፍ ዝበለኒ ሰብ ብኣልማማ ገጹ ዝተደወነ፣ መንፈሱ ዝበነን፣ ተስፋ ዝቖረጸ፣ ካብ ክቱር ዕብራን ብቀዛፊ ሕማም ንነዊሕ ግዜ ዝማህመነ ዝመስል ሰውነት ዝመስል ሰውነት (ዝድምሰስ) ዝወነነ ይመስል። ወረ ጸኒሐስ መሸማዕ ስርናይ ካናዳ ዝመስል ከርሸተይ ሒዘ፣ ኣብ ሞንጎቲ ህዝቢቲ ምዛረይሲ እንዳ ኣሰከፈኒ መጸ። ኣብ ጉዕዞ ሕልመይ ግን፣ ሓደ ግዜ ኣብኣ በታ ጎደና ሓርነት ሲቲ ፓርክ ሓሊፈ፣ ናብታ ዘዕርፈላ ዝነበርኩ ሕንጻ ኒያላ ሆተል ገጸይ ኣንዳመረሽኩ፣ ካብ ዳርባ እምኒ ብዘይርሕቅ ርሕቀት፣ ናባይ ገጹ ዝምርሽ፣ ብጀካቲ ዝወደዮ ክዳን፣ ብግዝፊ ሰውነቱ፣ ኣብ ኤርትራ ዝነብር ኣዩ ኢልካ ክትኣምኖ ዘጸግመካ ሰብ ርአኹ።

ነቲ ጋሕታን ኣካይዳኡን ጃምቦ ሰውነቱን ምስተዓዘብኩ ድማ፣ እዝስ ካብዞም ብሃምቡርገር ኣመሪካ ዝተሃንጸ ኤርትራዊ በጽሒ ኢዩ ዝኸውን ኣብ ምባል በጺሐ። ናባይ ኣንዳቀረበ ምምጽኡን፣ ንሱውን ናባይ ኣተኵሩ ምጥማቱን ድማ ነቲ ሃውታቲ ግምተይ ዝያዳ ኣሃውተቶ። ምጥማት ስለዘብዝሓለይ ድማ፣ ጎፍ ኣብዝተበሃሀልናሉ ህሞት፣ ኤርትራዊ ኣመሪካዊ ኣዩ ዝኸውን ብምባል፣ ሃይ ጋይ! (Hi guy!) በልኩዎ። መዛርብትን ብግዝፊ ኣካላት ዝመሳሰለንን ሰብ ረኺበ ኢለ ተሃዊኸ ቀዲመዮ ድኣምበር፣ ንሱውን ደው ከብለኒ ወሲኑ ነይሩ።

ንሰላምታይ ብሰላምታ ክቅበለኒ እንዳተጸበኹዎ፣ ኢዱ ናባይ ሰዲዱ በጥ ኣበላሞ፣ ነቲ ካብ ክቱር ምትካኽ ከንፈር ጻሕሊ ዝመስል ከናፍሩ ከፊቱ፣ ሽጋራ! በለኒ ትሕትናን ላዛን ብዝጎደሎ ኣገባብ። ሰምበድኩ! ኣብ ምሉእ ህይወተይ ምስ ሽጋራ ተላሊየ ኣይፈልጥን። የብለይን ኢለ ረጎጸዮ ከይሓልፍ ኣውን ኣሰከፈኒ። ኣብ ጥቓና ዝኾነ ድኳን ስለዘይነበረ ድማ፣ ናይ ጃኬት ጁባይ ሃሰስ ኢለ፣ ነቲ ብሓንሳብ ተጠቕሊሉ ዝነበረ ገንዘብ ምስቲ ብላዕሊ ዝነበረ 200 ዶላር ኣመሪካ ብሓንሳብ ኣትዒተ ኣውጻኩዎ።

ንዑኡ ዝምጽወት 50 ናቕፋ ሃሰስ እንክብል ድማ ዓቀንን ባጠራን ዝሓዝኩዎ ገንዘብ ኩሉ ልቢ ኣውዲቁ ጠመቶ። ኣብ መወዳእታ፣ ተዓዊተ 50ናቕፋ መሰስ ኣቢለ መጦኹዎ ሞ ሕጅውን ኤርትራዊ ኣመሪካዊ ከይኮነ ኣይተርፍን ካብዝብል ሃውታቲ ግምተይ ከይተናገፍኩ ባይዘወይ ወር አር ዩ ፍሮም ” (By the way where are you from?) ክብል ሕቶ ኣስዓብኩሉ።

ብግቡእ ተረዲኡኒ። ” ካብ ጸጸራት፣ ጽሉል ጽሉል ”፣ ኢሉ መለሰለይ እሞ ንቅድሚት ብግስ በለ።
ጋን ተሰራሕኩ። ብዝኸዶ ከይቀጸለውን ግልጽ ኢሉ ጠመተኒሞ፣ ” ንስኻኸ ወር ኣር ዩ ፍሮም? ” ክብል ሓተተኒ።
ዝሰምበድኩዎ ስንባደ ክነግረኩም ኣይክእልን። ስንባደይ ዊሒጠ፣ ዕውረተይ ተጎልቢበ ለካስ ኣዚ ኩሉ ሰውነት ብሃምቡርገር ኣመሪካ ዝተሃንጸ ዝበልኩዎስ፣ ብመደንዘዚ ኪኒና ጸጸራት ዝበዅሰለ ኣዩ! ትሩፍ ደጊም! ኢለ ምረሻይ ክቕጽል ብግስ በልኩ።

ነባሪ ጸጸራት እየ ኢሉ ዝተላለየኒ ጎበዝ ግን፣ ገዲፉኑ እንዳበልኩ፣ ንናይ ንቅድሚት ስጉምትታቱ ኮሊፉ፣ ናባይ ግልጽ በለሞ፣ ስማዕ ስማዕ በለኒ ድምጹ ዓው ኣቢሉ። ናይ ንቅድሚት ስጉምትታተይ ኣቋሪጸ፣ ናብኡ ግልጽ ብምባል ደው በልኩ።ንሱውን ናባይ ተመልሰ። ብሰሪ ግርህነተይ ኩሉ ገንዘበይ ስለዝረኣዮን፣ ጽሉል ስለዝኾነን ሓደጋ ኮይኑ ከይወርደኒ ብምስጋእ፣ ኣይገበርኩዎን ደኣምበር፣ ሃዲመ ነፍሰይን ገንዘበይን ከድሕን ክፍርጥጥ ተደናዲነ። ተራእየኩምዶ ኣብ ጎደና ሓርነት ብጽሉል ተሃዲነ እግረይ ኣውጽእኒ ክብል !! ካብ ቀዳማይ ህውተታት ዝገደደ ህውተታ።

ንሱ ግን ቅርብ ኢሉ፣ ” ዓርከይ ንስኻኸ ወር ኣር ዩ ፍሮም? ” በለኒ፣ ንትግርኛ እንግሊዘኛ ቃላቱ ሰሓቅ ኣሰኒዩ።
” ካብ ኦስሎ ኖርወይ፣ ትፈልጦ ዲኻ? ” በልኩዎ። ንሱ ግን ” ኣይፈልጦን፣ ክፈልጦውን ዕድል የብለይን። ተጸሊለ እየ። ግን ክነግረካ፣ ምምጻእካ ጽቡቕ፣ ንዓይኳ ናይ ሽጋራ ሂብካኒ፣
ንሃገርካ ነበር ኤርትራ እሞ ከመይ ረኺብካያ፣ በለኒ ክምስ እንዳበለ በቲ ተካኽ ኣፉ።

ጽሉል ተመሲሉ ትሕዝቶ ጁባይ ዝፈለጠ ሕጅውን ብመልሲ ናይዛ ሕቶ ንትሕዝቶ ልበይ ብምፍላጥ ንህይወተይ ኣብ ሓደጋ ከየውርደኒ ብዙሕ ተሰከፍኩ። ዕሽሽ ንኸይብሎውን ከይጥሕረኒ ፈራህኩ። ቀልጢፈ ግን ነታ ዓሻደየ ኣነ ኢትዮዕጵያ ትቅደም ዝብል በለ ኤርትራዊ ጽሉል እትብል ብሂል ዘከርኩ። ናይ ጽሉል ብልሒ ተኸቲለ ድማ ዓሻደየ ኣነ ኣብ ማእከለ ኣስመራ ኮይነ ዓድና ሕማቅ ኣላ ዝብል ብምለት፣ እዋእ ዓድና ድኣ ብጣዕሚ እምበር ጽቡቅ ኣላ፣ ክብል ሓቁ ንውሽጠይ ሓቢአ፣ ዝጥበር መሲሉኒ ንድሕነት ነፍሰይ ክብል ሓሶኹ። ወዩ ጽሉል ተመሲሉ ዝሰርሕ ናይ ህግደፍ ዋህዮ ከይከውን ዝሰጋእኩዎ ጃምቦ፣ ጽሉል ተመሲሉ ዝሰርሕ ዋህዮ ህዝቢ ነይሩ። ንመልሰይ ምስ ሰምዐ፣ እህህህህህህህህህህ! እህህህህህህህህህ! ኣንታ ስምዕዎ ዝብል ዘሎ፣ ነዛ ብዝናብ ሰማያት ዘይኮነስ ብንብዓትን ደምን ደቃ ዝጨቐየት ሃገርሲ ብጣዕሚ ጽቡቅ ኣላ ይብል ኣሎ፣ ክብል ናይ ስምዑለይ ረኣዩለይ ዓው ኢሉ ጨደረ።

መዓልቱ ሰምበት ስለዝነበረ፣ ካብ ክቱር ስምባደ፣ ድምጸይ ኣትሒተ እንታይ ዓይነት ጸላም ሰምበት እያ ወደይ ክብል፣ ሰንበት መዓልትስ ከምዚ ዓይነት ተረኽቦ ብማልት ኣማረርኩ።

ወዮ ጽሉል ሕጅውን ሰሚዑኒ፣ ንዓኻ ሓንቲ ጸላም ሰምበት፣ ህዝቢ ኤርትራ ግን ምስ ህግደፍ ጸሊም መዋዕል የሕልፍ ኣሎ፣ ኣይትርእይን እንዲኻኸ! ሰምበት መዓልቲ ኣብ ሕምብሪቲ ኣስመራ ጎደና ሓርነት ካብዚ ኩሉ ህዝባ ሓደ ኣነ ጽሉልን ሓደ ናይ ኖርወይ ጋሻን ጥራሕ ክንቀሳቀሱ! ክብል ደጊሙ ገሰጸኒ። ኩሉ ኣጊሙኒ ኣብ ቀባሕባሕ ኣቶኹ፣ ተደሃልኩ። ብውሽተይውን ብኻባ ሽጋራ ምስ በለኒ የብለይን ኢለ ጠንጢነዮ ሓሊፈ፣ ኣብ ምባል በጻሕኩ። ንሱ ግን ሕጅውን ሰሓቁ እንዳቀጸለ፣ ነዛ ዘረባኻ ካብ ልብኻ ኣንቂልካያ እንተኾንካ ንስኻ ካባይ ንላዕሊ ጽሉሉ ኢኻ፣ ከም ወዲ ኣፈወርቂ ድማ ተበላጻይን፣ ጨካንንኢኻ፣ እንተደኣ ካብ ዓንቀርካ ኣንቂልካያ እንተኾንካ ግን ናይ ጎረሓት ገበርካ በለኒ።ኣንታ እወ ከምኡ እዩ፣ ኪደለይ ጥራሕ በልኩዎ መንገደይ ክቅጽል እንዳፈተንኩ።

ገጢመኪ ሎኹ ወዲ ኖርወዪኖ፣

ግን ከይወዓልካ ከይሓደርካ ቀልጢፍካ ናብ ኖርወይካ ተመለስ፣ ኣይኮነን ግን ከማይ ተጸሊልካ ኣድራሻኻ ጸጸራት ከይከውን፣ ኣብ ዓዲ መጸለል ኢኻ መጺእካ ዘሎኻ፣ ካብ ኩሉውን ከኣ ናይ ሽጋራ ዝልግሱልናውን ከይንስእን”፣ ኢሉኒ ማእዝኑ ከይሰሓተ ንቅድሚት ክኸይድ ብግስ በለሞ፣ ገለ ዝተረፈ ሓሳብ ስለዝነበሮ እንደገና ንድሕሪት ምልስ ኢሉ፣ ብሓባሪት ጽብዒቱ ናብቲ ገንዘብ ዝሓዘ ጅባይ እንዳ ሓበረ፣ ”ድሓር ኣብዚ ዓዲ ሊዕሊ 3000 ናቅፋ ኮነ ናይ ወጻኢ ባጤራ ኣብ ጁባኻ ምሓዝ ከም ዘይፍቀድ ኣይፈለጥካን ዲኻ፣ እዘን ግሩሽካ ኣሳቢቦም ከይህግርወን .” ኢሉኒ ንቅድሚት ተበቆጸ። እዚ መስተንክር ዝኾነ ካብ ጽሉል ሓንጎል ዝመንጨወ ረዚን መልእኽቲ ሓዘል ምኽሪ ኣዝዩ ስለዘጨነቐኒ፣ ካብ ድቃሰይ ባህሪረ ብቅጽበት ብድድ ስለዝበልኩ፣ እቲ ናይ ሕልሚ ነጻነተይ ኣብኡ ተኾሊፉ ኣብቀዐ።

ነገሩ ኣርሚሙኒውን ኣብቲ ናይ ሕልሚ ነጻነትን ጭንቀትን ዝዓደለኒ ዓራተይ ተገብሲሰ እንከሎኹ፣ ብየማናይ ኢደይ ትእምርተ መስቀል እንዳገበርኩ፣ በስመኣብ ዎወልዲ ዎመንፈስ ቅዱስ በልኩ። እታ ሽዑ ብሪራ ዝጠፍአት ልዋመይ እውን ደሃይ ኣልቦ ተሸሪባ ተሪፋ። ኣይ ካብ ልዋም ኣይ ካብ ውጽኢት ልዋም ዝኾነ ናይ ሕልሚ ናጻነተይ፣ ወረ ኣይ ካብቲ ረዚን ዋጋ ዝኸፈልኩሉ ናይ ወትሩ ባህገይ ለጣ ስለዝተረፍኩ ድማ፣ ዳግማይ ንምጭባጦም ሃሰው ክብል እርከብ ኣሎኹ።

ዶክቶር ሃብተሚካኤል ተኽለብርሃን  “ሕጅስ ኣይበዝሓን ዶ” ብዝብል ኣርእስቲ ንዶክተር ገብረ ምኽሪ ክልግስ  ፈቲኑ እዩ። ዶክተር ገብረ ግን ንሰልፊ ዲሞክራሲ ህዝቢ ኤርትራ ከጸልም ተታሒዝዎ ዘሎ ዕላማ ደው ከብሎ ፍቓደኛ ኣይኮነን። ዘረብኡ ኣብ ክንዲ ዝንኪ መሊሱ በዚሑ፡ እምብዛ ብምብዝሑ ድማ ኣዝዩ ኣሰልቻዊ ኮይኑ ኣሎ። ብብዝሒ ዘረባን ብጸወታ ቃላትን  ክገብሮ ዝደሊ ዘሎ ፍሉጥ እዩ። ንሰልፊ ዲሞክራሲ ህዝቢ ኤርትራ  እንተሰለጠሉ ከፍርሶን ክድምስሶን እንተዘይከኣለ ድማ ዝናኡ ብምብልሻው ከዳኽሞ’ዩ ሕልንኡ። ሓደ ነገር ብዘይጥርጥር ከረጋግጸሉ ዝደሊ ግን ሰልፊ ዲሞክራሲ ህዝቢ ኤርትራ በዚ ዶክተር ገብረ ተበጊስሉ ዘሎ ኣሉታዊ ወስታ ክፈርስን ክድምሰስን ከምዘይኮነ እዩ። ካብዚ ከንቱ ኣሉታዊ ፈተነ ወጺኡ ኣወንታዊ ተራ ክጻወት እናመዓድኩ “ኣይፋልካን ዶክተረ” ብዝብል ኣርእስቲ ገለ መብርህን መአረምታን አቕርብ ኣለኹ።

መንዩ ሰልፊ ዲሞክራሲ ህዝቢ ኤርትራ

እቲ ቀንዲ ንመንነት ሰልፊ ዲሞክራሲ ህዝቢ ኤርትራ ዝገልጽ ትሕዝቶ እንታይ እዩ ኣብ ዝብል ንውሱን ክብጻሕ ዝድለ ዘሎ ዕላማ ብዝንቡዕ መንገዲ ክቐርብ ክትዕዘብ ከለኻ ብሓቂ የሕዝን እዩ። ድሕረ-ባይትኦም ጀብሃን ሻዕብያን ዝኾኑ ኣብ ሰልፊ ዲሞክራሲ ህዝቢ ኤርትራ ምህላዎም ንቓልስና ዝሕግዝ ኣገዳሲ ረቛሒ  እዩ። ይኹንእምበር ካብ ኣገዳሲ ረቛሒ ምዃን ሓሊፉ ንሰልፊ ዲሞክራሲ ዝገልጽ ቀንዲ ትሕዝቶ ገርካ ምቕራቡ ብፍላጥ ንውሱን ዝድለ ዘሎ ዕላማ ንሓቅታት ኣዘምቢዕካ ምቕርብ እዩ።

1- ድሕረባይቶኦም ጀብሃን ሻዕብያን ዝኾኑ ብሓደ ኣብ ሓደ ውድብ ክቃለሱ ሓዲሽ ኣይኮነን። ቅድሚ ናጽነት ሓደ ክፋል ሳግም ኣብ ህዝባዊ ግንባር ተጸንቢሩ’ዩ፡ ዘምህረት፡ ቶቲልን ካልኦትን ኣብ ላዕላዋይ ጽፍሒ ህዝባዊ ግንባር ተቐሚጦም እዮም። ብዛዕባ’ዚ ብዙሕ’ዩ ተደሪፉ ኣገዳሲ ምዕባለ ከኣ’ዩ ነይሩ። ይኹንእምበር እዚ ንመንነት ህዝባዊ ግንባር ዝገልጽ ወይ ዝቕይር ቀንዲ ትሕዝቶ ኣይነበረን።

2- ግንባር ድሕነት ዘቖሙ ድሕረ ባይቶኦም ጀብሃን ሻዕብያን ዝኾኑ እዮም። ካብ ሻዕብያ ኣድሓኖም ዓብደላ ኣደምን ክንጠቅስ ንኽእል፡ ካብ ጀብሃ ድማ ስውእ ኣሕመድ ናስር፡ ስውእ ዶክተር ሃብተ ክንጠቅስ ንኽእል። እዚ ኣገዳሲ ምዕባለ እኳ እንተነበረ ንመንነት ግንባር ድሕነት ዝገልጽ ወሳኒ ረቛሒ ኣይነበረን።

3- ድሕሪ ናጽነት ካብ ከብዲ ህዝባዊ ግንባር ንህዝቢ ኤርትራ መሊኹ ዝረግጽ ሓይሊ ምስ ወጸ ብርግጽ ኩነታት ተቓያይሩ እዩ። እቶም ታሪኻውያን ተቓወምቲ ህዝባዊ ግንባርን እቶም ካብ ውሽጢ ህዝባዊ ግንባር ወጺኦም ንምልኪ እተጻራሩ ኣካላትን ክራኸቡን ብሓደ ክሰርሑን ዕድል ተኸፊቱ እዩ። ነዚ ከም ጸጋ ምርኣይ ከኣ ግቡእ እዩ።

4- ሰልፊ ዲሞክራስን ሰልፊ ህዝብን ክቃራረባ ከለዋ፡ ነቶም ታሪኾም ሻዕብያን ጀብሃን ዝነበሩ ከነስምሮም ብሓደ ከነስርሖም ኣለና ብዝብል ኣይተበገሳን። ነዚ እቲ እዋንን ኩነታትን ባዕሉ ኣምጽእዎ እዩ ነይሩ። ድሮ ኣብ ደምበ ተቓውሞ ቅድሚ ምምስራት ሰልፊ ዲሞክራሲ ህዝቢ ኤርትራ እተፈላለየ ድሕረ ባይታታት ዘለዎም ብሓደ ሓቢሮም ክሰርሑ ሓደ ውድብ ክምስርቱን ተራእዮም እዮም። እዚ እቲ ቀንዲ ትሕዝቶ ዝርርብን ሓድነትን እተን ክልተ ውድባት ማለት ሰልፊ ዲሞክራስን ሰልፊ ህዝብን ኣይነበረን። ብፍላጥ ንእትደልዮ ዕላማ ከገልግል ነዚ ክትደዋውሶ ምፍታን ግን ንታሪኽ ብዝንቡዕ ኣገባብ ምንባቡን ምቕራብን እዩ። ዝርርብን ሓድነትን ሰልፊ ዲሞክራስን ሰልፊ ህዝብን ዕላምኡ ነቶም ተመሳሳሊ ርእይቶ ዘለዎም ኣካላት ኣብ ሓደ ምምጻእ እዩ ነይሩ። ነሱ’ዩ እቲ ዕላማ፡ ንሱ ድማ’ዩ ቀንዲ ትሕዝቶ’ቲ ሓድነት። ሰልፊ ዲሞክራሲ ህዝቢ ኤርትራ ሓድነት ተመሳሳሊ ርእይቶ ዘለዎም ኣካላት እዩ። እቶም ተመሳሳሊ ርእይቶ ዘለዎም ካብ እተፈላለየ ታሪኻዊ ድሕረ ባይታ ምዃኖም ከኣ ተወሳኺ እምበር ቀንድስ ኣይነበረን፡ ኣይኮነን።

5- ሰልፊ ዲሞክራሲ ህዝቢ ኤርትራ እተመስረተ ክህሉን ክቕጽልን ንውሉድ ወለዶ ከም መሳርሒ ዲሞክራስያዊ ፖለቲካዊ ቃልሲ ክመሓላለፍን እዩ። እቶም ኣብ ሰልፊ ዲሞክራሲ ኮይንና ንሕጊ ዲሞክራሲ ብኽብረት ጨቢጥና ንግዝኣተ ሕጊ ኣብ ውሽጢ ሰልፍናን ኣብ ሃገርናን ክረጋገጽ እንቃለስ ዘለና ንጉዳይ ድሕረባይታት፡ ልዕሊ ዝግብኦ ደረጃ ክምጠጥን ቀንዲ መግለጺ ሰልፍና ክኸውን ፍጹም ኣይንድግፍን። ምኽንያቱ ጉዳይ ድሕረባይታት ቀዋሚ ትሕዝቶ ሰልፍና ዘይኮነ ካልኣውን ተቐያያርን ስለ እንቖጽሮ እዩ።

6- ብእምነትና ሰልፊ ዲሞክራሲ ህዝቢ ኤርትራ ብሓዲሽ ወለዶ ብምዕባለ ክትካእ እዩ። እዚ ማለት ድማ ድሕረባይቶኦም ጀብሃን ሻዕብያን ዝኾኑ እናሓለፉ እናተቐየሩ፡ ምስ ሑሉፍ ሓርነታዊ ተሞክሮና ቀጥታዊ ስምዒታዊ ምትእስሳር ዘይብሎም ኣባላት ሓዲሽ ወለዶ እናወረሱ ክኸዱ ምዃኖም ስለ እንኣምን እዩ። ከምዚ ዝመስል ምዕባለ ምምጽኡ  ድማ ንሰልፊ ድሞክራሲ ህዝቢ ኤርትራ ኣብ ትሕዝትኡ ይኹን መንነቱ ፍጹም ክቕይሮ ኣይኮነን። ምኽንያቱ ድሕረ ባይታታት ቀንዲ መግለጺ መንነት ሰልፊ ዲሞክራሲ ህዝቢ ኤርትራ ስለ ዘይኮነ።

7- ሰልፊ ዲሞክራሲ ህዝቢ ኤርትራ ንልዕላውነት ሕግን ንዲሞክራስን ዝቃለስ ሰልፊ እዩ። እዚ ካብ’ቶም  ቀንዲ ዘይቅየሩ ትሕዝትኡን መግለጺ መንነቱን እዩ። ነዚ ትሕዝትኡ እዚ ክቕይር ዝሕልን፡ ንድምጺ ብዙሓት ዝንዕቕ፡ ንብሕጊ እተመርጸ መሪሕነት ዘይምእዘዝን፡ ብዘይጥርጥር ንመንነት ሰልፊ ዲሞክራሲ ክፍሑቕ ዝደሊ ዘሎ ዝምባለ እዩ። ዶክቶር ገብረ መራሕን ቀንዲ ተሓላቕን ክምዚ ዝመስል ዝምባለ ምዃኑ ድማ ብሓቂ’ዩ ዘሕዝነኒ። ኣይፋልካን ዶክተር ብዝብል ኣርእስቲ ክጽሕፍ ዝገደደኒ ውን፡ ዶክተር ንነብሱ ተዳናጊሩ ንኻልኦት ኣብ ምድንጋር ተዋፊሩ ከምዘሎ ይዕዘብ ስለዘለኹ እዩ። ኣባላት ሰልፊ ዲሞክራሲ ህዝቢ ኤርትራ ነዚ ብዶክተር ዝምራሕ ዘሎ ኣጸላሚ ወፈራ ብጽንዓትን ብቆራጽነትን ክምክትዎ ምዃኖም ጥርጥር የብለይን።  ኩሉ ኣጸላሚ ወፈራ ከኣ ነዊሕ ዕድመ የብሉን፡ ኣጸላሚ ወፈራ ዶክተር ውን ከም ኩሎም ኣጸለምቲ ወፈራታት፡ ግዜኡ ሓልዩ ክበንን ክብሪ ክስእንን ምዃኑ ዘጠራጥር ኣይኮነን።

ክቕጽል እዩ።

ንጉዳያት ኮነ ኢልካ ብፍላጥ ብምዝንባዕ ንውልቃዊ ዕላማታትካ ክትግልገለሉ ምፍታን ነውሪ እዩ። ዶክተር ገብረ ንሰልፊ ዲሞክራሲ ህዝቢ ኤርትራ ምጽላም ከም ስርሑ ምስ ተተሓሓዞ፡ንኣድማሳዊ ሕጊ ዲሞክራሲ ዝኾነ፡ ንሕጊ ድምጺ ብዝሓን ዝጻረር ርእይቶ ከቕርብ ብዙሕ ኣይተሰከፈን። ንሕጊ ድምጺ ብዙሓን እናተጻረረ ድማ ኣብ ውሽጢ ሰልፊ ዲሞክራሲ ህዝቢ ኤርትራ ዘሎ ግርጭት “ንግዝኣተ- ሕጊ ዶ ወይስ ንውሳኔ መርሕነት ምምእዛዝ እዩ” ብዝብል ከቕርቦ ፈተነ። ንግዝኣተ ሕጊ ዝምእዘዙ ብሓደ ወገን ንውሳኔ መሪሕነት ዝምእዘዙ ድማ በቲ ካልእ ወገን ከምዘለው ብምግላጽ ኣብ ኣደናጋሪ ስራሕ ተጸሚዱ ይርከብ።

ንግዝኣተ ሕጊ ዶ ንውሳኔ መርሕነት ንማእዘዝ

-      ድምጺ ብዙሓን ክስዕር መሰረታዊ ሕጊ ዲሞክራስን  መሰረታዊ ሕጊ ሰልፊ ዲሞክራሲ ህዝቢ ኤርትራን  እዩ። ነቲ ብድምጺ ብዙሓን እተመርጸ መሪሕነት ምምእዛዝ ከኣ ንድምጺ ብዙሓንን ንሕግን ምምእዛዝ እዩ። ነዚ ብፍላጥ ጓሲኻ ንመርሕነትን ነቲ ንመሪሕነት ዘምጽአ ሕጋውን ዲሞክራስያውን መስርሕን ብበሊሕ ተንኮለኛ ሴፍ ክትቆራርጾ ምፍታን ዘይሓላፍነታውን ኣዕናውን ስራሕ እዩ።

-      ኣብ ሰልፊ ዲሞክራሲ ህዝቢ ኤርትራ መሪሕነት ብብዝሒ ድምጺ ኣብ ጉባኤታት’ዩ ዝምረጽ። እቲ ብማእከላይ ባይቶ ዝፍለጥ መሪሕነት ሰልፍና ኣብ መንጐ ክልተ ጉባኤታት  እቲ ዝለዓለ ኣካል ስልፍና እዩ። ሕግና ንማእከላይ ባይቶ ዘለዓለ ሓጋጊ ኣካል ሰልፊ ምዃኑ እናኣረጋገጸ ነቲ ኣብ ጉባኤ ዝጸደቐ ሕግታት ከብርህን ትርጉም ክህብን ከምዝኽእልን ብንጹር ብዘየዳናግር ቃላት ገሊጽዎ እዩ። ዕድመ ስልጣን ማእከላይ ባይቶ ድማ ውሱን ኣርባዕተ ዓመት እዩ። ፈጻሚት ሽማግለ፡ ኣቦ መንበር ሰልፊ ብብዝሕ ድምጺ ኣብ ስሩዕ ኣኼባ ማእከላይ ባይቶ እዮም ዝምረጹን ሓላፍነት ዝስከሙን። ዕድመ ስልጣኖም ከኣ ሓደ ዓመት’ዩ ድሕሪ ሓደ ዓመት ንኽቕጽሉ ይኹን ክቕየሩ ዝውስን ማእከላይ ባይቶ እዩ። ኩሉ ውሳኔታት ማእከላይ ባይቶ  ብብዝሕ ድምጺ’ዩ ዝውሰን። እዚ ዲሞክራስያዊ መስርሕ ሰልፍና ዘኹርዕን ንውሉድ ወለዶ ክመሓላለፍ ዘለዎ ባህልን  እዩ።

-      ኣብ ሰልፍና ንውሳኔ መሪሕነት ዝጻረር ርእይቶ ክትውንን ክልኩል ኣይኮነን። ንባዕሉ ውሳኔታት ማእከላይ ባይቶ ብብዝሒ ድምጺ’ዩ ዝውሰን ምባልና ውሑዳት ድምጾም ዘይተዓወተ ከምዝህልው ዘመልክት እዩ። ብለበዋን መተሓሳሰብን ስምዒትካ ናብ መሪሕነት ምምሕላፍ ከኣ ብሕጊ ሰልፍና ፍቑድ እዩ። መርሕነት ስልፊ ንዝቐረበሉ ለበዋን መተሓሳሰብን ክቕበሎን ክነጽጐን ይኽእል እዩ።

-      ኣብ ሰልፊ ዲሞክራሲ ህዝቢ ኤርትራ መሪሕነት ሰልፊ ማለት ማእከላይ ባይቶ ጨሪሱ ካብ ሕጊ ሰልፊ ይወጽእ ከምዘሎ ኮይኑ ኣንተተሰሚዕካ ንመርሕነት ሰልፊ ዝብድህ ህጹጽ ጉባኤ ክትጽውዕ ይካኣል እዩ። ብመሰረት ቅዋም ሰልፊ ህጹጽ ጉባኤ ብጠለብ ፍርቂ ካብ ኣባላት ሰልፊ ወይ ከኣ ብሰለስተ ርብዒ ካብ ኣባላት ማእከላይ ባይቶ ክጽዋዕ ይኽእል እዩ። ንህጹጽ ጉብኤ ከጸውዕ ዘኽእል ደገፍ ፍርቂ  ኣባላት ሰልፊ ወይ ውን ደገፍ ሰለስተ ርብዒ ካብ ኣባላት ማእከላይ ባይቶ እንተዘይ ተረኺቡ ግን ንድምጺ ብዙሓን ኣኽቢርካ ብትዕግስቲ ነቲ ስሩዕ እዋን ጉባኤ ምጽባይ’ዩ እቲ ምርጫ። ተጸቢኻ ግዜኡ ምስ ኣኸለ ኣብ ጉባኤ ንዝነበረ መሪሕነት ክትብድህ መተካእታ ኮይንካ ክትቀርብን ይከኣል እዩ። ብጀካ በዚ ኣገባብ እዚ ኣብ ውሽጢ ሰልፍና ንማእከላይ ባይቶ ዝወዳደር ኣካል ምፍጣር ፍቑድ ኣይኮነን።

-      ነዚ መስርሕ’ዚ ገዲፍካ ግን፡ ንሕጊ ሰልፊ ዶ ንውሳኔ መርሕነት ንማእዘዝ ዝብል ዝንቡዕ መጕት እናቐርብካ ካብ ዲሞክራስያዊ ባህልን ሕግን ሰልፊ ዲሞክራሲ ህዝቢ ኤርትራ ወጺእካ ካልእ ኣቋራጭ መንገዲ ሃስውሰው ምባል ንቓልስና ዝጠቅምን ዝሕግዝን ኣይኮነን።

-      ኣባላት ሰልፊ ዲሞክራሲ ህዝቢ ኤርትራ ካብ መሰረታዊ ዕላማናን እመንትናን ዝብገስ ኣብ ሃገርና ሕጊ ክነግስ ኣብ ሰልፍና ውን ብልዑላውነት ሕጊ ክንምእዘዝ’ዩ ድልየትናን ዕግበትናን ። ኩሉ ከምዝፈልጦ ድማ ሎሚ ንሕግና ዝሕሉ ዕግበት ኣባላትና እምበር ጠበናጁ ኣይኮነን። እዚ እነካይዶ ዘለና ቃልሲ ከኣ ነቲ ትማሊ መለኽቲ ኣብ ምፍጣር ምቹእ ባይታ ዝፈጠረ ንድምጺ ብዙሓን ዝንዕቕ ኣብ ዓመጽ ዝምርኮስ ባህሊ ካብ ሱሩ  ቦንቅስካ ድምጺ ብዝሓን ዝዕወተሉ ባይታ ምምችቻእ እዩ። ትማሊ ንድምጺ ብዙሓን እተጻረሩ ኣካላት ብሓይሊ ጠበንጃ ድምጺ ውሑዳት ከዓውቱ ክኢሎም እዮም። እቲ ኣብ ሃገርና ዘሎ መላኺ ስርዓት ከኣ ውጽኢት እዚ ኣሉታዊ ተሞክሮን ባህልን  ሰውራ ኤርትራ እዩ።

-      ሎሚ ኣብ ዘለናዮ ዘመን ንድምጺ ብዛሓት ዝጻረር፡ ንብዙሓት ዘገድደሉ ካልእ መሳርሒ ምስ ሰኣነ፡ ምርጭኡ ካብ’ቲ ብሕጊ ቡዝሓን ዝመሓደር ዲሞክራስያዊ ትካላት ሃዲሙ ንዕግበቱ ዘርዊ ናጻ ትካል ኣብ ምምስራት ክጓየ’ዩ ዝርአ ዘሎ። እቲ ከምዚ ዝመስል ካብ ሕጊ ዲሞክራሲ ዝሃድም ተፈንጫሊ ዝንባለ ከኣ ኣብ ጉዕዞ ቃልስና ዓንቃፊ ተራ ይጻወት እምበር ካልእ ኣድማዒ ኣበርክቶ የብሉን። እቲ ንምፍንጫል ዝጻረር ዝመስል ዶክተር ገብረ ከኣ ንድምጺ ብዙሓን እናተጻረረ መራሕን ኣተባባዕን ምፍንጫል ኮይኑ ክርእዮ ከለኹ ብሓቂ’ዩ ዘሕዝነኒ። ንሕግን ነቲ ብሕጊ ሓላፍነት እተሰከመን መሪሕነት ፈላልዩ ብምቕራብ ንመስርሕ ምፍንጫል ክኹሕሎ እንተፈተነ ከኣ ምፍንጫል ምፍንጭል’ዩ ኩሒልካ ኮሓሒልካ ካልእ ጽቡቕ መልክዕ ከተትሕዞ ኣይከኣልን እዩ።

-      ንስልጣን ማእከላይ ባይቶ ከግድፍ ወይ ክድርት ዝኽእል ጉባኤ ሰልፊ ጥራይ እዩ። ዶክተር ገብረ ግን በቲ ኣዳናጋሪ ቃላቱ ነብሱ ኣብ ቦታ ጉባኤ ኣቐሚጡ ንማእከላይ ባይቶ ስልጣኑ ከግድፍን ንሰልፊ ዲሞክራሲ ህዝቢ ኤርትራ ዝውክል መስመር ኣብ ሰሜን ኣመሪካ ተፈጢሩ ከምዘሎን ክሕብርን ይፍትን ኣሎ። እዚ ከኣ ልሙድ ጠባይ ተፈንጨልቲ እዩ። ካብ ሕጋውን ዲሞክርስያውን መስርሕ ሃዲምካ ንሕና ኢና ሓቀኛታት ወከልቲ ምባል፡ ነቲ ብኸምዚ ዝመስል ኣድካሚ ተሞክሮ ምፍንጫል ዝሓልፈ ህዝብና ሓዲሽ ኣብ ርእሲ ዘይምዃኑ ተወሳኺ ጓሂ እምበር ዘሓጉስ ብስራት ኣይኮነን።

ክቕጽል እዩ

ሰንበት ነሓሰ 20, 2017 ኣሰናዳኢት ሽማግለ ሰልፊ ዲሞክራሲ ህዝቢ ኤርትራ (ሰ.ዲ.ህ.ኤ.) ዞባ ሰሜን ኣመሪካ ሳልሳይ ስሩዕ ኣኼባ ኣካይዳ። ቀንዲ መበገሲ ኣሰናዳኢት ሽማግለ ትካኣዊ ኣሰርርሓ ኣብ ዞባ ምዕቃብ ኮይኑ፣ ንህጹጽ ጉባኤ ዞባ ምድላው ከኣ ቀንዲ ዕማማ እዩ።

ኣሰናዳኢት ሽማግለ ጸብጻብ ካብ ናይ ስርርዕ ሽማለ ተቀቢላ፣ ተመያይጣ ኣጽዲቃ። ናይ ስርርዕ ሽማግለ ንስፊሕ መደባታ ንምትግባር ብጻዕቂ ክትንቀሳቀስ መዲባ ኣላ። ብመሰረት ጸብጻብ ናይ ስርርዕ ሽማግለ፣ ካልኦት ሽማግለታት ስረሐን ጀሚረን ኣለዋ። 

ናይ መሰረት ድሌት ዝዓግቶ ሓይሊ የለን