ፍትሒ ዘማእከሎ ቅዋም ሃገር

2015-05-20 11:22:34 Written by  ነጸረ ተ/መድህን (ለንደን) May 2015 Published in ጽሑፋት ትግርኛ Read 1968 times

ጽሩይ ማይ ፈልፊሉ፡ ክዛሪ

ዕምቆተመሰረተ-ሓሳብ፡ ቀያያሪ

ሕድሪ ስዉኣት፡ ንወለዶታት ተሰጋጋሪ።

                  ባሕሪ ልቡ፡ ንኹሉ ዘዕቁር

                  ብደሙን ህይወቱን፡ ሽግራት ዝጸዉር

                  ንራኢ ዓመጽቲ፡ ካብ ሱሮም ዝብንቁር።

ንዑቕዉጹዕ፣ ብዱል . . . መስተብሃሊ

ልዙብ፣ ጸዋር፣ ትዕግስተኛ . . . ኣዋህላሊ

ንሓባርና፣ ንኹልና፣ ንሃገርና . . . ዘይፈላሊ

                  ዝተወሃሃደ ቅልጽም፡ ናይዉጹዕ

                  ብጽፉፍ ዉዳቤ፡ መሰልቱ ከዋዓዉዕ

                  ነግ ፈረግ ዘይብሉ፡ ንግህሰቱ ዝብርቁቕ።

ኣብክሊፍትሒምትእኽኻብና ሰሚሩ

ነቓዓት ለዃዂቱ፡ ቀላጽሙ ኣትሪሩ

ብዙሕነት ይዓምብብ፡ ሃገራዉነቱ ኣመስኪሩ።

                  ከላእ መላእ ነበር፡ ይጸራረግ ኩሉ

                  መስፍነ ዝምድናዊ ፖለቲኮ፡ ንባዕሉ

                  ንመስርሕ ኣይዓንቅፍ፡ ይኣኽለና በሉ።

ጽናዕ ኣጆኻ/ኺ፡ ምስ ኩነት ተፈታተን

ንሱናብራ፡ ተገንዘቦዓቐን

ሓድሽ ህይወት፡ ተመጣጠር ንሓበን።

                  ዕርፍ ‘ሞ ንበል ንህዳእ፡ እንታይ ‘ዩ ዝሓይሽ

                     ልቦና ይተሓወሶ፡ ኣጻጺና ንመርሽ

                     ምምሕዳራዊ ትካል፡ ንማንም ዘየጋይሽ።

መንግስትን ህዝብን፡ ገደብ ዝህልዎም

ንምንቅስቃሳቶም ኩሉ፡ ብዉሕልና ዝኣልዮም

ልዑል ቅዋም ሃገር፡ ብተሳትፎ ህዝቢ ዝእመም።

                     ዑቕባ ምትእምማና፡ ቅዋም ርእሲ ኹሉ

                     ተር ከም ዓተር፡ ጽልግልግ ዘይብሉ

                     ዋሕስ ስጥመት ሃገር፡ ፍትሒ ዝማእከሉ።

ሻራ ዘይብሉ ብይናት፡ ንኹሉ ኣባዲ

መሰረት ቅሳነተ-ሰላም፡ ናይ ፍትሒ ዕርዲ

ዉፉይ ተሳትፎ ሃገራዉያን፡ ኣብ ሓደ መኣዲ።

                     ኣእምሮና ይሕሰብ፡ ይመርምር ኩነትና

                     ኣብ ጸቢብ ዉልቀ-ርእይቶ፡ ኣይነተኩር ኣጆና

                     ናይ ሓባር ስምምዕ፡ መዛዘሚ ጉዕዞና።

ጽልእታት ይወገን፡ ነበረ ‘ያ ነበረ

ካብ ዕለት ናብ ዕለት፡ ሃለዋትና መረረ

ወለዶታት እና ጠፍኤ፡ ኣዝዩ ዝኸበረ።

                     ምትህልላኽ ሃልኪ‘ዩ፡ ፋይዳ ኣልቦ

                     ዓመታት ተኾማሚሩ፡ ብዘይ ኣቓልቦ

                     ሃገርና ነቐድም፡ ጉዳይና ነቕርቦ።

ስርዓት ስባ‘ሎና፡ ንጥፍኣት ዘንቀደ

ተንኮላት ዝፍሕስ፡ ኣእላፋት ዝቐርደደ

መምለሲ ዘይብሉ፡ ኣብ ህጉም ዘኹደደ።

                     መተካእታ ሕሰም፡ ሕሰም እንተኾይኑ

                    ኣላሽ ኢልካ/ኪ፡ ደኒንካ/ኪ ኣማስያኡ ትዓኑ

                     ጥፍኣት ሃገርካ፡ እነሆ ተኻዊኑ።

 

ክብርን ዝኽርን ንምእንቲ ፍትሕን ሰላምን ሃገርና ዝወደቑ/ቓ !!!

Last modified on Wednesday, 20 May 2015 13:30