http://ascenteq.com/project/epdp

ቁጽሪ ኤርትራውያን ስደተኛታት ኣብ 2015፡ 400 ሺሕ ስለ ዝበጸሐ ኤርትራ ሓንቲ ካብተን ዝበዘሐ ስደተኛ ዘለወን ቀዳሞት 10 ሃገራት ሓንቲ ኰይና ኣላ። ብዘይካዚ ብዙሓት ካብቶም ኣብዚ ዝሓለፈ 6 ኣዋርሕ ኣብ ባሕሪ ሚዲትራንያን ዝሓቐቑ 2,800 ስደተኛታት ኤርትራውያን ከይኮን ስግኣት ኣሎ።

ኣብ 2015 ናብ ኤውሮጳ ካብ ዝኣተዉ ስደተኛታት ብብዝሖም ኤርትራውያን፡ ደድሕሪ ሱርያውያን፡ ኣፍጋኒታናውያንን ዒራቓውያንን ዝስርዑ ምዃኖም

ትሪቡን ደ ጀነቫ፡ ዝተባህለ ዕለታዊ ጋዜጣ ስዊዘርላንድ ኣብ ናይ 28 ሰነ 2016 ሕታሙ ገሊጹ።

ካብቶም ብደረጃ ዓለም ኣብ 2015 ተመዛቢሎም ዘለዉ 65 ሚልዮን ሰባት፡ ዳርጋ 41 ሚልዮን ኣብ ውሽጢ ሃገራቶም ዝተመዛበሉ እዮም። ልዕሊ 21 ሚልዮን ድማ ካብ ሃገሮም ወጻኢ ተሰዲዶም ዑቕባ ዝሓተቱ እዮም። ኣብተን ዝማዕበላ ሃገራት ብ2015 ዑቕባ ካብ ዝሓተቱ ናይቶም 3.2 ሚልዮን ጉዳይ ጌና መዕረፊ ኣይረኸበን።

ኮሚሽነር ላዕለዋይ ኮሚሽ ጉዳይ ስደተኛታት ሕቡራት መንግስታት፡ ኣቶ ፊሊፖ ግራንዲ ጉዳይ ምምዝባል ኣብ ሃሃገሩ ተዘይተወጊኑ፡ እቲ ጸገም ናብ ኩሉ ክላባዕ ከም ዝኽእል ኣጠንቂቖም። ንሶም ኣብቲ 19 መስከረም 2016 ክካየድ ተመዲቡ ዘሎ ዓለም ለኻዊ ጉባአ ጉዳይ ስደተኛታት፡ ናይቲ ጸገም ርጉጽ ፍታሕ ከርከብ ዘለዎም ተስፋ ገሊጾም።