ሰዲህኤ፡ ሆላንድ ኣብ ልዕሊ ዝለዓለ ፈጻሚ ጉዳይ ኤምባሲ ኤርትራ ኣብ ሆላንድ ንዝወሰደቶ ኣመስጊኑ ካለኦት ንክስዕበኦ ከኣ ተስፋኡ ገሊጹ

Thursday, 18 January 2018 20:36 Written by  ቤት ጽሕፈት ዜና ሰዲህኤ Published in EPDP News Read 1502 times

ሰልፊ ዲሞክራሲ ህዝቢ ኤርትራ (ሰዲህኤ) በቲ መንግስቲ ሆላንድ ብ17 ጥሪ 2018 ኣብ ልዕሊ ኤርትራዊ ኣፈጻሚ ጉዳይ ዝተወስደ ስጉምቲ  ምስጋናኡ ገሊጹ። እቲ ኣፈጻሚ ጉዳይ ኤምባሲ ካብ ሆላንድ ንክስጎግ ዝተወሰኖ ብሰንክቲ ዲፕሎማስያዊ ሕጊ ጥሒሱ ኣብታ ሃገር ካብ ዝነብሩ ኤርትራውያን ናይ ኣታዊኦም 2% ቀረጽ ከኽፍል ዝፈጥሮ ብዝነበረ በደልን ካልእ ዘይሕጋዊ ተግባራትን እዩ።

 

እቲ ብ18 ጥሪ 2018 ናብ ወጻኢ ጉዳይ ሚኒስትሪ ሆላንድ ዝተላእከ መልእኽቲ ሰዲህኤ፡ ናይታ ሃገር ወጻኢ ጉዳይ ሚኒስተር ሃልበ ዚጅስተራ ነቲ ብስም ሰልፍን ኩሎም ተመሳሳሊ ስጉምቲ ዝጽበዩ ኤርትራውያንን ናብ መንግስቲ ሆላንድ ዝተላእከ ሰላምታ ከመሓላልፍሉ ሓቲቱ። ኣተሓሒዙ ድማ ኣብ ልዕሊ ወጻዒ መንግቲ ኤርትራን ኣብ መላእ ዓለም ካብ ኤርትራውያን 2%  ኣገዳዲ ግብሪ የኽፍሉ  ዘለዉ ኣካላቱን ተመሳሳሊ  ስጉምትታት ክውሰድ ዘለዎ ተስፋ ገሊጹ።

 

መልእኽቲ ሰዲህኤ ምስዚ ብምትሕሓዝ፡ በቲ ካብ ነዊሕ ግዜ ትጽቢት ዝተገብረሉ ኣብ ልዕሊቲ ኤርትራዊ ጉዳይ ኣፈጻሚ ኣቶ ተኸስተ ገብረመድህን  ብዝተወስደ ስጉምቲ ብስም እቶም ነዚ ስጉምቲ ክጽበዩ ዝጸንሑ፡ ቅሳነት ከም ዝተሰመዖ ገሊጹ። ብመንጽር እዚ ነቲ ተግባር “ዓብይ ስጉምቲ ንቕድሚት” እዩ ኢሉ፡ ካለኦት ሃገራት ኤውሮጳ ነዚ ስጉምቲ ክም ኣብነት ወሲድን ክስዕበኦ ዘለዎ ትጽቢት ገሊጹ

 

እቲ መልእኽቲ ኣተሓሒዙ ንግስነት ሆላንድ መንግስቲ ኣስመራ ዘይሕጋውን  ካብ ሃገሩ ወጻኢ’ውን ዘይሕጋውነት ከስፋሕፍሕ ዝሰርሕን ምዃኑ ኣዘኻኺሩ። ብመንጽር እዚ ናይ ሆላንድ ፓርላማ፡ ናይ ፍርዲ ኣካላትን ካቢነትን ንግጉይ ኣሰራርሓ ኣካላት መንግስቲ ኤርትራ ንምቁጽጻር ክሰርሕዎ ዝጸንሑ ኣብነታዊ ምዃኑ ኣስፊሩ። ብመንጽር እዚ ኣብ ልዕሊቲ ዓመጸኛ ዝተወስደ ስጉምቲ ዓብይ ስጉምቲ ንቕድሚት እዩ ኢሉ።

Last modified on Thursday, 18 January 2018 20:47