ኣብ ኤርትራን ጅቡትን ወተሃደራዊ ትምህርቲ ክወስዱ ዝምዝገቡ ዝነበሩ የመናውያን ሓደስቲ ተዓለምቲ ብኣጥፊእካ ጥፋእ ዝብል ናይ ኣሸበርቲ ነብሰ-ቅትለታዊ ስጕምቲ ብዝተፈነወሎም መጥቃዕቲ 54 ክመቱ ከለዉ፥ ልዕሊ 60 ድማ ቆሲሎም ክብል ሓደ ስሙ ክጥቀስ ዘይደለየ በዓል ስልጣን የመን ከምዝገለጸ ኢንተርናሽናል ኒው ዮርክ ታይምስ እተባህለ ጋዜጣ ኣብ ናይ ሰሉስ 30 ነሓሰ 2016 ሕታሙ ሓቢሩ። እቶም ተዓለምቲ፡ ኣንጻር’ቲ ኣብ ሰንዓ መንግስቲ መስሪቱ ዘሎ ናይ ሖትይን ሓይሊ ንምውጋእ ኢዮም ዝምዝገቡ ነይሮም።
እቲ ብነታጒ ዝተጻዕነት መኪና ዝተፈጸመ መጥቃዕቲ፡ ብሰኑይ ዕለት 29 ነሓሰ 2016 ኣብ ወደብ ከተማ ዓደን ኢዩ ተኻይዱ። ደዓሽ፡ እቲ ስርሒት ባዕሉ ከምዝፈጸሞ ተኣሚኑ ኣሎ። እቶም ጉድኣት ዝወረዶም ተዓለምቲ ካብ 20 ክሳብ 30 ዝዕድሚኦም መንእሰያት ኢዮም ነይሮም።