ኣገዳሲ ሓበረታ ንኩሉ ኤርትራዊ ዜጋ።

ናይ ኤርትራ ማሕበር ኣካለ-ጽጉማን ካብ ዝምስረት ኣትሒዙ፡ ኩሉ ግዜ እንዳማዕበለ ይሰጋገር ከምዘሎ ዝስሓት ኣይኰነን። ካብ ሃገር ፈረንሳ ብ2002 ዓ.ም. ጀሚሩ፡ ብሃገር ሱዳንን ጀርመንን ሰጊሩ፡ ብወርሒ ሓምለ 2010 ዓ.ም.ኣብ ሰሜን ኣመሪካ  ሕጋዊ ማሕበር ኣካለ-ጽጉማን ድሮ ተመስሪቱ ይርከብ ኣሎ።

ሕጂ ድማ ኣብ ዝተረፋ ሃገራት ኤውረጳ ንምምስራተን እነሆ መምርሒታት ንሰደልኩም። እዚ መምርሒታት እዚ ከኣ ንኹሎም ኣብቲ ሃገር ዝነብሩ ኤርትራውያን፤

ማለት፤ ጾታኦምን፡ ፖለቲካዊ-መንነቶምን፤ ሃይማነቶምን፡ ዓሌቶምን፤ ብዘየገድስ፤ ዝምልከት ከምዝዀነ ነብርህ። ምኽያቱ ከኣ ዕላማ ማሕበር ኣካለ-ጽጉማን ንኹሉ ኤርትራዊ ዝምልከት ማሕበር ኣብ ርእሲ ምዃኑ፡ ፖለቲካዊ ማሕበር ከኣ ስለዘይኮነ። ንኹሉ ኤርትራዊ ፤ ህሩም ይኹን ዘይህሩም፤ ስንኩል ይኹን ዘይስንኩል ዝምልከት ኣብርእሲ ምዃኑ፡ ብተፈጥሮ ይኹን ብሓደጋ ወይ  ብውግእ ኣካለ-ጸገም ዝወረዶ ኤርትራዊ ዝሕለቕን ዝሕግዝን ዝረድእን ማሕበር ስለ ዝዀነ። ውሽጣዊ ሕግታቱ ምንባብ ከኣ ዝምረጽ ኢዩ።

እዚ ዝስዕብ ሓበሬታታት ከኣ ንኹሎም ኣብዘን ዝስዕባ ሃገራት ኤውሮጳ ዝነብሩ ኤርትራውያን ንሰድድ ኣሎና። ንሳተን ከኣ ንሆላንድ፤ ዓባይ-ብሪጣንያ፤ ሽወደን፤ ነርወይ፤ ደንማርክ፤ ስዊዘርላንድ፤ ዘጠቓለለ  ይዀውን። 2 ደረጃታት ከኣ ኣለወን።

ቀዳማይ/ ኩሎም ኣብዛ ሃገር ዝነብሩን ዝነብራን ፤ እሞ ኣባላት ማሕበር

ኮይኖም ክውደቡ ድልየት ዘለዎም ባእታታት ኤርትራውያን፤ ክምዝገቡ ይግባእ።

ማለት  ምሉእ ኣስማቶምን፤ ኣድራሻኦምን፤ ቁጽሪ ስልክን ኢመይልን ብንጹር

ተመዝጊቡ ብቕልጡፍ ናብ ማእከላይ ምምሕዳር ማሕበር ክሰዱ የድሊ። እዚ ከኣ

ንኹሉ ዋላ ኣባል ማሕበር ኰይኑ ከገልግል ዝጸነሔን ዝጸንሔትን ብሓባር ዝምልከት

ምዃኑ ኢዩ።

እዚ ናይ ምምዝጋብ መድረኽ እዚ ክሳብ መወዳእታ ወርሒ መስከረም ክድምደም

ኣለዎ።

ካልኣይ/ ማእከላይ ምምሕዳር ማሕበር ከኣ ነቲ ዝተመዝገብሉ ቕጥዒ ንዝምልከተን

ሃገራት ትሰድድ።  በዚ መሰረት ከኣ እታ ሃገር፤ ግዜን ቦታን ናይ ጕባኤኣ ትትልምን

ተካይድን፤ ማሕበራ ከኣ ብዕሊ ትምስርትን ማለት ኢዩ። እዚ ከኣ ቅድሚ መወዳእታ

ዓመት ናይ 2010 ክድምደም ኣለዎ።

ኣብዚ ግዜ እዚ ከኣ ኢዩ ምቛም ኣሰናዳዊት ሽማግለን፤  ምጽጻይ ሕገ-ማሕበርን ዝግበር። ስም ማሕበር ከኣ ናይ ኤርትራ ማሕበር ኣካለ-ጽጉማን ክፍሊ ሆላንድ፤ ክፍሊ ዓዲ-እንግሊዝ …ወዘተ ይበሃል ማለት ኢዩ። ብተወሳኺ ከኣ ምስቲ ሕጊ ማሕበርናን ናይቲ ሃገር ሕግታት ዝሰማማዕ ዓንቀጻትን ቃላትን ከምኣድላይነቱ  ይቐርብ።

ምምሕዳር ኣካለ-ጽጉማን ኤርትራ

ርኽክብ ብዝምልከት ከኣ ኣብ ታሕቲ ተመልከት፤