ሓፋሽ ኣይትገራህ ኣይትገራህ ምዘኖ ንዅሉ

ተመልከቶም ተዓዘቦም  ሓፋሽ፡ ሓፋሽ ዝብሉ

ብኣፍ ስልጣን ናይ ህዝቢ ኢዩ ዝብሉ ብግብሪ ግን ዘይኣምንሉን ዘይሰርሕሉን ሓይልታት ኣብ ታሪኽ ናይ ዓለምና ተራእዮም ኢዮም። ህዝቢ፡ ህዝቢ፡  ስለዝበሉ ጥራሕ፡ ተሓለቕትን ሓለይትን ናይ ህዝቢ ጌርካ ምቕባሎም ቅኑዕ ኣይኰነን። ዓወት ንሓፋሽ ዝብል ጭርሖ እናደጋገመ ንህዝቢ ኣደናጊሩ ኣብ ስልጣን ዝበጽሐ ኢሳያስን ጕጅልኡን፡ ብግብሪ ከኣ ንሓፋሽ ዝጭፍጭፍ  ዘሎ ስርዓት ምዃኑ ከም ህያው ጭቡጥ ኣብነት ክጥቀስ ይከኣል ኢዩ። ኣብ ተቓውሞ ውን ከምኡ ንነብሶም ወከልቲ ናይ ህዝቢ ቆጺሮም፡ ኣብ ክንዲ ህዝቢ ኰይኖም ቅዋም ክሕንጽጹ፡ ፓርላማ ክምስርቱ ዝሓስቡን ዝመጣጠሩን ሓይልታት ከምዘለዉ ናይ ቀረባ ተመኵሮና ዘብርሆ ሓቂ ኢዩ።

ህዝቢ ዋናን ምንጭን ናይ ስልጣን ክኸውን እንተደኣኰይኑ፡ ቅዋሙ ባዕሉ ክሕንጽጽን ከጽድቕን፡ መራሕቱ ክመርጽን ከውርድን፡ ብዛዕባ ኵነታቱ ብናጽነት ክዛረብን ክጽሕፍን ካብ ድኽነት ወይ ቍጠባዊ ባርነት ሓራ ክወጽእን ክኽእል ኣለዎ። እዚ ኵነታት’ዚ ከኣ፡ ኣብ ዲሞክራስያዊ ስርዓት እንተዘይኰይኑ፡ ኣብ ምልካዊ ስርዓት ወይ ቅድሚ ውድቀቱ ክረጋገጽ ኣይክእልን ኢዩ።

ፖለቲካዊ መደብ ዕዮ ሰልፊ ዲሞክራሲ ህዝቢ ኤርትራ (ሰዲህኤ)፡ “ኣብ ሓራን ዲሞክራስያዊት ኤርትራ ዝቐውም መንግስቲ፡ ብምርጫ ህዝቢ ዝውሰን፡ ኣብ ቅድሚ ህዝቢ ተሓታቲ ዝዀነ፡ ኣብዝሓን ሰላማውን ውድድር ሰልፍታት ዘፍቅድ ክኸውን ከምዘለዎ ይኣምን። ከምኡ ውን፡ ልዑላውነት ህዝቢ ዘረጋግጽ ስርዓት ክህነጽን ቀጻልነት ክህልዎን ብህዝቢ እተሓንጸጸን ዝጸደቐን ዲሞክራስያዊ ቅዋምን ኣብ ቅዋም እተመስረተ ዲሞክራስያዊ ትካላትን ክትከልን ክምዕብልን እንከሎ ምዃኑ ይኣምን” ይብል።

“ኣብ ቍጠባዊ መዳይ ከኣ፡ ዕላማ ሰዲህኤ፡ ነቲ ወዲቑ ዘሎ ቍጠባዊ ኵነታት ሃገርና ምሕዋይ፣ ነቲ ዘይተመጣጠነ ናብራ ህዝብና ምምዕርራይ፣ ኣብ ዘተኣማምን ቍጠባዊ ባይታ እተሰረተት ብልጽግቲ ሃገር ንምህናጽ ምቅላስ ኢዩ። ኣብ’ዚ ዕላማ’ዚ ክብጻሕ ዝከኣል፡ ብሓደ ወገን ነቲ ኣብ ድኽነትን ስቓይን ዝርከብ ዝበዝሐ ክፍሊ ሕብረተሰብና፡ ኣፍራዪ ዓቕምታቱ ክብ ኢሉ ተጠቓሚ ጻዕሩን ድኻሙን ዝዀነሉ ኵነታት ምፍጣርን ምጥጣሕን፤ ከምኡ ውን፡ ነቲ ዘይምዕሩይ ኵነታት መነባብሮ ህዝብና ምምዕርራይን፡ ነቶም ህሱያት ወገናት ፍሉይ ትዅረት ዝህብን መደባት ምሕንጻጽን ኢዩ። በቲ ካልእ ወገን ከኣ፡ ቅኑዕ ቍጠባዊ ፖሊሲ ብምኽታልን ንሃገራውያንን ወጻእተኛታትን ኣውፈርቲ ብምትብባዕን፡ ኣብ ዕብየት ቍጠባ ሃገርና ግዲኦም ክጻወቱ ዕድል ምኽፋትን ኢዩ። ምስ’ዚ ተታሓሒዙ’ውን፡ ኣብ ዞናና ይኹን ኣብ ዓለምና ብኣወንታዊ ኣገባብ ከዋስእ ዝኽእል ንግዳዊ ፖሊሲታት ምትላም የድሊ። ነዚ ዕላማታት’ዚ ጋህዲ ንምግባር ውድድርን መሃዝነትን ዘተባብዕ፡ ኣብ ናጻ ዕዳጋ ዝተሰረተ ቍጠባዊ ፖሊሲ ክንክተል ኢና” ይብል።

ህዝቢ ዋናን ምንጭን ስልጣን ክኸውን እንተደኣኰይኑ እምበኣር፡ ናጽነት ናይ ምዝራብ፡ ምጽሓፍን ምውዳብን ዘፍቅድ፤ ሕረስ ሓረስታይ፡ ንገድ ነጋዳይ …. ዝብል ዲሞክራስን ውድድርን ዝሕምረቱ ፖለቲካውን ቍጠባውን ፖሊሲታት ዝኽተል ስርዓት  የድሊ ማለት ኢዩ።

ህዝቢ ኣብ ቃልሲ ብንጡፍ ክሳተፍን ንመሰላቱ ክከላኸልን እንተደኣኰይኑ ግን ክፈልጥ ወይ ክሕበር ኣለዎ። ናጽነት ናይ ምጽሓፍ፡ ምዝራብ፡ ምውዳብን ምምራጽን ….ወዘተ  ኣብ ዘይብሉ ኵነታት፡ ህዝቢ ክፈልጥን ዋናን ምንጭን ናይ ስልጣን ክኸውንን ፈጺሙ ዘይከኣል ኢዩ። ንናጽነት ናይ ፕረስ፡ ምዝራብ ምውዳብ እናኸልከልካ፡ ህዝቢ ኣብ ምዕባለ ሃገሩ ይሳተፍ ኣሎ ምባል ንህዝቢ ካብ ምትላል ሓሊፉ ካልእ ትርጕም ክውሃቦ ኣይክእልን ኢዩ። ዘይተማህረ ሰብ ነየድሕን፡ ዘይተወቕረ መጥሓን ነየጥሕን ከምዝብሃል፡ ዘይተማህረን እኹል ሓበሬታን ዘይብሉ ህዝቢ ስልጡን ሃገርን ሕብረተሰብን ክሃንጽ ኣይክእልን ኢዩ።

ስርዓት ኢሳያስ፡ እታ ዝነበረት እንኮ ዩኒቨርሲቲ ዓጽዩ፡ ኣብ ዝተፈላለዩ  እኹል ናይ ጽዓት (ኤለክትሪክ) ኣገልግሎት ዘይብሎም ከባቢታት ኮለጃት ምኽፋቱ፣ ንሓለዋ ስልጣኑ  ደኣ’ምበር፡ ንህዝቢ ሓልዩ ኣይኰነን። ድንቍርናን ድኽነትን ዝሰፈነሉ ኵነታት፡ ንዕድመ ምልካውያን ስርዓታት ዘናውሕ ምቹእ ባይታ ምዃኑ ኣዐርዩ ስለዝፈልጥ ኢዩ። ምኽንያቱ፡ ዘይተማሀረ ህዝቢ፡ ጠንቂ ናይ ጸገማቱ እቲ ስርዓትን ፖሊሲታቱን ምዃኖም ክርዳእ ኣይክእልን ኢዩ። ዘይተማህረ ህዝቢ ንድኽነቱን ድንቍርናኡን ምስ መርገም ወይ ናቱ ድኽመት ወይ ካልእ ባህርያዊ ምኽንያታት፣ ወይ ድማ፡ ከም’ቲ ፕሮፓጋንዳ ናይ’ቲ ስርዓት ኢሳያስ ምስ ናይ ግዳም ሓይልታት’ዩ  ከዛምዶ’ዩ ዝግደድ።

ሎሚ ግን፡ ህዝቢ ኤርትራ እናነቕሐን እናተረድእን’ዩ ዝመጽእ ዘሎ። ኣብ ወጻኢ ዝነብሩ መንእሰያት ዓው ኢሎም መረርኦም ኣንጻር ዲክታቶርያዊ ስርዓት ከስምዑ ጀሚሮም ኣለዉ።  ብመንእሰያት ዝዳለዉ ሰላማዊ ሰልፍታት ብዓቐን ይኹን ብተሳትፎ እናዛየዱ ይመጹ ኣለዉ። ብዙሓት ሰዓብቲ ናይ ስርዓት ኢሳያስ ዝነበሩ ዜጋታት ውን እምነቶም እናሰሓቡ ክኸዱ ይርኣዩ ኣለዉ። እቲ ስርዓት፡ ካብ ዓለምን ከባቢናን ተነጺሉ፡ ብወተሃደራውን ጸጥታውን ሓለዋ ኢዩ ተተይ ዝብል ዘሎ።

ከም’ቲ ሰራዊት ቱኒዝያን ግብጽን ኣብ ጐድኒ ህዝቦም ደው ኢሎም ንመለኽቲ ስርዓታቶም ኣብ ምውዳቕ ዝተሓባበሩ፡ ሓይልታት ምክልኻል ኤርትራ ውን፡ ኣብ ጐድኒ ህዝቦምን ጸገሙን ደው ክብሉ ትጽቢት ይግበረሎም ምዃኑ ክፈልጡ ይግባእ።

ስልጣን ብወተሃደራዊ ዕልዋታትን ዓመጻዊ ኣገባባትን ምጭባጥ መዋእሉ እናኽተመ ኢዩ ዝመጽእ ዘሎ። ኣብ ሓይሊ ኣጽዋር ዝምርኰስ ኣተሓሳስባ፡ ዘላቒ ሰላም፡ ፍትሕን ዲሞክራስን ከስፍን ከምዘይክእል ተመኵሮ ናይ ዓለምናን ሃገርናን ዘረጋግጾ ዘሎ ሓቂ ኢዩ። ዘለናዮ መዋእል፡ መዋእል ህዝባዊ ናዕብታት ምዃኑ ተገንዚብና ነፍስወከፍ ዜጋ ግቡኡ ክፍጽም ክብገስ ኣለዎ።